Chau Jehová feipicünui ñi ayüfalngetual ti mapu

1. Isaías, ¿chem feipicünufi pu Israel che?

ISAÍAS, Chau Ngünechen ñi huerquen, feipi Jehová manelfalngei. Ti palabra “manelfalngelu” hebreo quehun mu rulpadungungeafui “amén” (Is. 65:16, nota). Ti palabra amén ca feipingeafui “felepe mai” cam “femtripape”. Quiñeque rupa, tripai Biblia mu ti palabra “amén”, fei ñi pengelal ñi rüfngen chem ñi feipin ca ñi femquen Jesús ca Chau Jehová. Feimu Isaías ñi feipifiel pu Israel che pengeli chem ñi feipicünuel Chau Jehová manelfali. Feimu femtripamequei com tañi feipin.

2. 1) ¿Chumngelu maneluhuafuiñ Chau Dios ñi feipicünuel mu? 2) ¿Chem ramtun ngüneduamaiñ?

² ¿Ca femngechi maneluhuafuiñ mai chem ñi femal Chau Jehová cüpalechi antü mu? Rupalu 800 tripantu Isaías ñi huirintucuel, ti apostol Pablo feipi: “Chau Ngünechen coilatuquelai”, femngechi pengeli ñi femtripayal Chau Ngünechen ñi feipin (Heb. 6:18). Quiñe pengelün dungu: quiñe huitrunco hulquelai cotrü co, re cüme co hulquei, ca femngechi Chau Jehová coilatuquelai, rüf dunguquei müten. Feimu com piuque mu maneluhuafuiñ Jehová tañi feipin ca tañi feipiel cüpalechi antü mu. Tüfachi troquiñ mu, ngüneduamaiñ tüfachi ramtun: ¿Chau Dios chem feipicünueiñmu ñi femal cüpalechi antü mu? ¿Chumngechi pengelquei ñi rüf femtripayal tañi feipicünuel?

CHAU JEHOVÁ, ¿CHEM FEIPICÜNUEIÑMU?

3. 1) Pu poyequefilu ta Chau Jehová, ¿chem maneluhun falintuquefiyiñ? (Apocalipsis 21:3, 4). 2) ¿Chem piquei ta che allcülu tüfachi maneluhun?

³ Com pu poyequefilu ta Chau Jehová rume falintuquefiyiñ Biblia ñi feipin (papeltunge Apocalipsis 21:3, 4). Chau Jehová feipicünui: “Ngehuelayai lan, afai ta hueñancün, ngüman ca cutrantun”. Amuldungulu iñchiñ, papeltulelquefiyiñ pu che ñi chumletual tañi mongen hue mapu mu. ¿Chem piquei ta che allcülu tüfachi maneluhun? “Müna cümefui, huelu ¿rüfngei chi am?” piqueingün.

4. 1) ¿Chem quimniefui Chau Jehová? 2) Jehová feipicünui ñi femal, huelu ¿ca chem chumi?

⁴ Chau Jehová ñi pin mu, ti apostol Juan huirintucui chem ñi rupayal ayüfal mapu mu. Chau Jehová quimniefui ñi amuldungulelngeal ta che tüfachi dungu. Jehová ca quimniefui fentren pu che nehue maneluulayai quisu ñi feipicünuel mu (Is. 42:9; 60:2; 2 Cor. 4:3, 4). ¿Chumngechi quelluafuiñ pu che ñi rüf femtripayal ñi feipin Apocalipsis 21:3, 4? ¿Chumngechi doi maneluhuafuiñ Jehová mu ca tañi feipicünuel? Chau Jehová elueiñmu tüfachi cümeque dungu taiñ yafüluucüleal ca pengeleiñmu chumngelu mülei taiñ maneluhual tañi feipicünun mu. Peafiyiñ tüfa.

CHAU JEHOVÁ FEIPI ÑI FEMTRIPAYAL TAÑI FEIPICÜNUEL

5. ¿Chumngelu maneluuqueiñ ñi ayüfalngetual ti mapu ca cheu peafuiñ?

⁵ Ñi feipin Apocalipsis pengeli Chau Jehová ñi rüf femtripayal tañi feipin ti ayüfal mapu mu. Tüfa mu, feipi: “Tati anülelu ülmen huancu mu feipi: ‘Huecünumequetufiñ com dungu’. Ca feipi: ‘Tüfachi dungun manelfali ca rüfngei, feimu huirintucufinge’. Ca feipieneu: ‘¡Deu femtripai tati! Iñche tati Alfa ca tati Omega, tati ellaca mu mülelu ca ti af mu mülelu’” (Apoc. 21:5, 6a).

6. Ñi feipin Apocalipsis 21:5, 6, ¿chumngelu yafültucuqueiñmu taiñ maneluhual Chau Dios ñi feipicünuel?

⁶ Tüfachi dungu, ¿chumngelu yafültucuqueiñmu taiñ maneluhual Chau Dios ñi feipicünuel? Tüfachi versiculo mu, Chau Jehová firmacünui reque quiñe huirintucun, femngechi ñi quimfalcünual ñi huechunentual tañi feipicünuel cüpalechi antü mu.b Apocalipsis 21:3, 4 pengeli chem maneluhun huli Chau Dios. Huelu versiculo 5 ca 6, Chau Jehová firmacünui reque, femngechi pengeli tañi rüf femtripayal tañi feipicünuel. Fei peafiyiñ chumngelu ñi manelfalngen ñi feipicünuel ta Jehová.

7. ¿Inei am dungumequei Apocalipsis 21:5? Ca, ¿chumngelu rume falin-ngei?

⁷ Chau Dios feipicünulu tañi chumal, hune feipi: “Tati anülelu ülmen huancu mu feipi” (Apoc. 21:5a). Apocalipsis lifru mu, Chau Jehová cüla rupa dungui afmatun dungu mu, tüfa ta quiñe. ¿Inei feipicünui tüfachi dungu? ¿Quiñe cüme püllü? ¿Jesús pemai? Femlai, ¡Chau Jehová llemai! Jehová am coilatuquenolu, feimu feipiafuiñ tañi huechutripayal tañi feipicünuel (Tito 1:2). Quimfali llemai, ñi feipin Apocalipsis 21:5, 6 müna manelfali.

“HUECÜNU­MEQUETUFIÑ COM DUNGU”

8. ¿Chem feipi Jehová ñi pengelal tañi rüf femtripayal ñi feipicünuel? (Isaías 46:10).

⁸ Fei hula, Chau Jehová feipi: “Huecünumequetufiñ com dungu” (Apoc. 21:5). Rüfcünu llemai, Chau Jehová nütramcai chumngechi feleai ta dungu cüpalechi antü mu. Huelu fente ñi rüfngen tüfachi dungu, Chau Dios feipicai reque ñi deu femtripan (papeltunge Isaías 46:10).

9. 1) Chau Jehová feipilu: “Huecünumequetufiñ com dungu”, ¿chem epu dungu chumai? 2) ¿Chem chumngeai “ti cuifi huenu ca ti cuifi mapu”?

⁹ Ngüneduamaiñ ñi feipin Apocalipsis 21:5. Tüfa mu, Chau Jehová feipi: “Huecünumequetufiñ com dungu”. ¿Chem cüpa feipi? Tüfachi capitulo Biblia mu, pengeli epu dungu ñi femal Chau Jehová. Hune, Jehová apümcayafi Huecüfü ñi ngünenieel. Epu, cüme elcünutuai com dungu mapu mu. Apocalipsis 21:1 feipi: “Ti cuifi huenu ca ti cuifi mapu ñamturquei”. “Ti cuifi huenu” adentulei com pu gobierno ñi adnieteu tati Huecüfü ca tati huesaque püllü (Mat. 4:8, 9; 1 Juan 5:19). Ca ti “mapu” adentulei tati pu che, chumngechi feipilei tati Biblia (Gén. 11:1; Sal. 96:1). Feimu “ti cuifi mapu” adentulei tati pu huesaque che. Chau Jehová cüme elcünuafi ti huenu ca ti mapu. Huelu feica müten no, liftuafi ca huecünutuafi. Feimu “ti cuifi huenu” ca “ti cuifi mapu” huelucünungetuai, fei mületuai “hue huenu” ca “hue mapu”. Feimu llemai, ti “hue huenu” feita Chau Dios ñi ngünenietual mapu. Ca ti “hue mapu” feita re nor che ñi mületual mapu meu.

10. ¿Chem huecünutuai Chau Jehová?

¹⁰ ¿Ca chem femai Chau Jehová ‘ñi huecünutuafiel com dungu’? (Apoc. 21:5). Chau Jehová cüme elcünutuai ti mapu ca quelluafi pu che ñi culpafengehuenoal. Chumngechi feipi Isaías, com ti mapu ayüfalngetuai Edén reque. Cafei Chau Jehová huecünutuaiñmeu, fei cutranhuelayaiñ ca cülfüncületuaiñ. Tremotuai pu cüntro, pu trauma ca pu pilu, cafei huiñomongetuaingün pu la (Is. 25:8; 35:1-7).

‘TÜFACHI DUNGUN MANELFALI CA RÜFNGEI ¡DEU FEMTRIPAI TATI!’

11. Chau Jehová, ¿chem huercüfi ta Juan ñi femal ca chumngelu?

¹¹ Chau Jehová feipicünui tañi chumal. Huelu ¿ca chem feipi? Chau Jehová feipifi ta Juan: “Tüfachi dungun manelfali ca rüfngei, feimu huirintucufinge” (Apoc. 21:5). Chau Dios feipi ñi huirintucungeal tañi chumal, huelu ca feipi chumngelu tañi femal, feipi: “Tüfachi dungun manelfali ca rüfngei”. Chau Jehová tañi feipicünuel manelfali llemai. Juan ñi huirintucufiel tüfachi dungu, feimu quimnieiñ ñi cüme feletual ta mapu ca taiñ llohual cümeque dungu. ¡Rume mañumcüleiñ!

12. ¿Chumngelu Chau Jehová feipi “¡Deu femtripai tati!”?

¹² ¿Ca chem feipi Chau Jehová? “¡Deu femtripai tati!” pi (Apoc. 21:6). ¿Chumngelu feipi ñi deu femtripan tañi feipicünuel? Femngechi feipilu, pengeli chem no rume catrütulayafeyu ñi huechutripayal tañi feipicünuel. Chau Jehová ca dungu feipiqueiñmu, femngechi pengeli ñi rüf femtripayal tañi feipicünuel. ¿Chem dungu? Peaiñ.

“IÑCHE TATI ALFA CA TATI OMEGA”

13. ¿Chumngelu Chau Jehová feipi “Iñche tati Alfa ca tati Omega”?

¹³ Chumngechi ngüneduampeiñ, Chau Jehová cüla rupa dungui ñi afmatufalchi dungu tañi peel ta Juan (Apoc. 1:8; 21:5, 6; 22:13). Feichi cüla rupa mu, Chau Jehová feipi: “Iñche tati Alfa ca tati Omega”. Alfa fei tati hunen letra pu Grecia che ñi abecedario mu, omega tati inangechi letra. ¿Chumngelu Jehová feipi: “Iñche tati Alfa ca tati Omega”? Eluule ñi femal quiñe dungu huechunenturpuquefi.

14. 1) ¿Chumül Jehová feipi “Alfa” ca chumül feipiai “Omega”? 2) Génesis 2:1-3, ¿chem dungu pengeli?

¹⁴ Chau Jehová deumafilu müten Adán ca Eva, feipicünui ñi chumleal pu che ca tati mapu. Biblia feipi: “Chau Dios cümelcafi ca feipifi: ‘Nieaimün yall, fentren-ngeaimün, apolfimün ti mapu ca ngünenieafimün’” (Gén. 1:28). Feita mu Chau Jehová feipi reque “Alfa”, fei feipicünui tañi chumal. Huelu ¿chumül tripayafui? Adán Eva engu ñi pu yall apolfile ti mapu ca quelluntucufile ñi ayüfalngeal ti mapu. Femtripale tüfa, fei hula Chau Jehová feipiai reque “Omega”. Cafei fentecünulu deumafiel ti huenu, ti mapu ca com ñi mülen, Chau Jehová femi quiñe dungu pengelquelu ñi rüf femtripayal tañi ayüqueel. Tüfachi dungu mülei Génesis 2:1-3 (papeltunge). Jehová feipi feiti regle antü ñi püntücünungeal. ¿Chem feipi tüfa? Pengeli ñi rüf femtripayal Chau Jehová tañi ayüqueel mapu mu ca tati pu che mu. Com femtripayai afle ti regle antü mu.

15. Huecüfü, ¿raquiduampefui mai ñi catrütufiel Chau Dios ñi ayüqueel?

¹⁵ Adán ca Eva caiñetufilu ta Chau Dios, culpaingu ca rulpalelfingu tañi pu yall ti culpan ca ti lan dungu (Rom. 5:12). Chau Jehová ayüniefui ñi apolal ti mapu re nor che culpaquenolu. Feimu ñi femün Adán engu Eva, ¿catrütungepei mai Chau Dios ñi ayünieel? Femtripalayai Jehová ñi feipicünuel ¿pipelai ta Huecüfü? Fei, ¿chumafui Chau Dios? ¿Langümafui Adán ca Eva, fei ñi deumayal quiñe hue curehuen ñi femürpual tañi ayüqueel mapu mu? Chau Jehová femfule tüfa, Huecüfü feipiafui ñi coilatufengen. ¿Chemu? Génesis 1:28, Chau Jehová feipifi Adán ca Eva ca tañi pu yall ñi apolal ta mapu.

16. Huecüfü, ¿chumngelu raquiduamfui chi ñi dalluntucuafiel ta Chau Jehová?

¹⁶ Huecüfü ca raquiduamquefui chi Jehová eluafi yall ta Adán ca Eva, huelu feitachi yall culpafengelleai mai. Rumel culpafengeaingün piafui chi (Ecl. 7:20; Rom. 3:23). Rupafule tüfa, Huecüfü dalluntucuafui ta Jehová ñi femtripanon tañi ayünieel. Ti mapu apolngelayafui culpaquenochi che mu piafui ta Huecüfü.

17. 1) Caiñetulu Huecüfü ca Adán engu Eva, ¿chem femi Jehová? 2) ¿Chem rupayai afle huaranca tripantu? (Ca inaduamnge ti adentun).

¹⁷ Adán engu Eva ca ti Huecüfü caiñetufilu rume ta Jehová, fei Jehová eluhui ñi huechunentual ñi ayüqueel (Sal. 92:5). Chau Jehová elufilu Adán ca Eva ñi nieal yall, pengeli ñi coilatufengenon. Rumel femtripaquei ñi feipin. Chau Jehová feipile ñi femal quiñe dungu, chem no rume catrütulafeyu. ¿Chem femi? Eli quiñe cüpanche ñi montulafiel pu cümeque che Adán ca Eva tuulu, femngechi amulei ñi femtripamequen ñi ayünieel (Gén. 3:15; 22:18). Feiti cüpanche hulafui tañi mongen com pu che ñi duam mu. Huecüfü turpu raquiduamquelafui tüfa. ¿Chumngelu? Chau Jehová femngechi montulfilu pu che, pengeli tañi fütra piuqueyechen (Mat. 20:28; Juan 3:16). Huecüfü ta piuqueyechequelai, re quisutu duamuuquei müten. Fei, ¿chem dungu rupayai Chau Dios adniefilu ñi montulngeal ta che? Afle huaranca tripantu, ayüfalngeai ti mapu. Üyeu müleaingün re cümeque che culpaquenolu, Adán engu Eva mu tuulu. Fei tañi ayüniefel Chau Jehová ellaca mu. Fei hula, Chau Jehová com huechunentuai ñi feipicünuel, fei feipiai “Omega”.

¿CHUMNGECHI DOI MANELUHUAFUIÑ ÑI AYÜFALNGETUAL TA MAPU?

18. ¿Chem cüla dungu pengeli Chau Dios? (Inaduamnge ti huichulechi dungu “Cüla dungu pengelquelu Chau Dios ñi femtripayal tañi ayüqueel”).

¹⁸ Tüfachi troquiñ mu, ngüneduampeiñ quiñeque dungu pengelquelu ñi ayüfalngetual ta mapu. Chau Dios huechurpuai tañi feipicünuel. Fei, ¿chem feipiafuiñ caquelu che? Hune, Chau Jehová feipicünui tañi chumal. Apocalipsis feipi: “Tati anülelu ülmen huancu mu feipi: ‘Huecünumequetufiñ com dungu’”. Chau Dios niei quimün, pepiluhun ca ayüniei femürpual tañi feipicünuel. Epu, Chau Dios quimniei ñi femtripayal tañi feipicünuel, feimu deu huechurpui pi. Fei ca feipi: ‘Tüfachi dungun manelfali ca rüfngei. ¡Deu femtripai tati!’. Cüla, Chau Jehová eluule ñi femal quiñe dungu, huechunenturpuquefi. Feimu feipi: “Iñche tati Alfa ca tati Omega”. Femngechi Chau Jehová pengelai Huecüfü ñi coilatufengen ca pepi catrütulafi Chau Jehová ñi ayüqueel.

19. Pu che feyentunole ñi ayüfalngetual mapu, ¿chumafuimi?

¹⁹ Loncontucuaimi, amuldungun mu nütramcalmi Chau Jehová tañi feipin, doi maneluhuaimi ñi femtripayal Chau Dios tañi feipicünuel. Feimu quimelelafuimi ta che ñi feipin Apocalipsis 21:4. Huelu ti che feipile: “Tüfa müna cümefui, huelu ¿rüfngei chi am?”, eimi ¿chumafuimi? Papeltulelfinge ca quimelelfinge ti versiculo 5 ca 6. Pengelelafimi tati che chumngechi Chau Jehová pengeli ñi rüf femtripayal tañi ayünieel. Acordanienge, Jehová quisu feipicünui tüfa, fei femtripayai (Is. 65:16).