¡Ayüwün mu küdawaiñ taiñ püramyeafiel ta Jewba!

1, 2. 1) Elifas ka Bildad, ¿chem feypingu Chaw Ngünechen mu? 2) Welu, ¿chem feypi Jewba?

FÜTRA kuyfi mu, küla wentru nütramkamefingün ta Job, kiñe küme wentru poyekefilu ta Chaw Dios. Kiñe tüfa Elifas pingefuy, ka ramtufi ta Job: “Kiñe wentru, ¿kellupeafi may ta Chaw Ngünechen? Kiñe che kim ngüneduamlu, ¿kümelkayafi kay? Tati kom pepiluwün nielu, ¿duamtukepey tami nor chengen? Tami nor miyawken mu, ¿chem llowkey ta kidu?” (Job 22:1-3). ‘Femlay tati’, rakiduamkefuy Elifas. Kangelu wentru Bildad pingekefulu, feypi Chaw Ngünechen nor trokikelafi iney no rume. Biblia feypi: “Feymu, kiñe wentru lakelu, ¿chumngechi nor chengeafuy Chaw Ngünechen ñi adkiñ mu? Kam kiñe che domo mew choyüngelu, ¿chumngechi kulpafengelayafuy?” (Job 25:4).

² Elifas ka Bildad küpa rakiduamelfingu ta Job tüfa: ‘Yafüluwülmi rume tami poyeafiel ta Chaw Ngünechen, kidu falintukelafi tüfa’. Ka feypingu Jewba doy falintukefi kiñe tonton kam piru ta iñchiñ mu (Job 4:19; 25:6). ¿Tañi ñom piwkengen mu feypingu tüfa? (Job 22:29). Rüfngey Jewba ñi rume afmatufalngen ka taiñ angkapuwnon kidu mew. Kiñe fütra wingkul ñi wechun mew müleliyiñ, ka nagkintuliyiñ, fey ngüneduamafuiñ taiñ falin-ngenon. Welu, Chaw Ngünechen ngüneduamle tunte yafüluwkeiñ ñi poyeafiel ka küdawülafiel, ¿falintupeay tüfa? Femay tati. Jewba feypifi ta Elifas, Bildad ka ti kangelu wentru Sofar pingelu ñi koylatumeken engün, ka feypi ñi ayüwületew ta Job ka ‘iñche tañi poyekeetew’ pifi (Job 42:7, 8). Feymu kulpafengelu rume, tuteafuiñ ta Jewba.

¿CHEM ELUAFUIÑ TA JEWBA?

3. Eliu, ¿chem feypi Jewba mu? Ka, ¿chem küpa feypi?

³ Kiñe weche wentru Eliu pingelu, allkütuy tüfachi küla wentru ñi nütramkafiel ta Job. Fey aflu ñi nütram engün, Eliu ramtufi ta Job: “Nor chengefulmi, ¿chem eluafuymi [ta Jewba]; ka kidu chem llowafuy eymi mu?” (Job 35:7). Eliu, ¿küpa feypi Jewba ñi falintukenofiel taiñ yafüluwken ñi poyeafiel? Femlay. Jewba chaftudungulafi ta Eliu, tüfachi wentru ka dungu küpa feypi. Jewba duamnielay chem no rume, feymu duamtulay taiñ poyefiel ñi küme feleal, elulayafuiñ chem no rume ñi doy newen nieal kam doy ülmen-ngeal. Chem adümuwün rume taiñ nieel, Chaw Dios mu küpay, ka kidu ngüneduamkey taiñ femken feychi adümuwün mu.

4. Taiñ kutranpiwkeyecheken mu, ¿chem rakiduamkey Jewba?

⁴ Nor piwke mu fürenefiliyiñ kakelu che piwkeyekefilu ta Jewba, fey Kidu rakiduamay ‘iñche ta füreneenew’. Proverbios 19:17 feypi: “Tati fürenekefilu pu ñom che arelelkefi ta Jewba, ka Kidu kulliñmayaeyew tañi femken”. Jewba ngüneduamkey taiñ femkefiel kakelu che kutranpiwkeyechen mu. Fey, tati Dewmalu itrokom ti müleyelu taiñ defeetew trokiwkey. Ka kulliñmayaeiñmu fillke kümelkan mu. Chaw Dios tañi Fotüm kimeltuy tüfa (papeltunge Luka 14:13, 14).

5. ¿Chem ramtun inaduamaiñ?

⁵ Fütra kuyfi mu, Jewba mangelfi ti pelon wentru Isaia ñi dungual Kidu mu ka ñi femal sakin küdaw (Isaías 6:8-10). Isaia ayüwün mu llowi ti küdaw, fey feypi: “¡Tüfa mu mülen! ¡Werküen llemay!”. Ka femngechi Jewba eluñmaeiñmew taiñ kelluafiel, fey ñi femürpual tañi ayükeel. Fentren che poyekefilu ta Jewba inayentukefingün ta Isaia. Eluwkeyngün ñi llowal fillke küdaw ñi poyeafiel ta Jewba chew rume, küdawngechi dungu mu rupale rume. Welu rakiduamafuiñ chi: ‘Falintuken Jewba ñi elukeetew tañi küdawülafiel ayüwün mu, welu ¿rüf falin-ngey ñi femken iñche? Kellunofuli rume, Jewba ¿femürpunoafulu am tañi küdaw?’. Tüfachi chillkatun mu inaduamaiñ tüfa, feymu ngüneduamaiñ ñi rupan Debora ka Barak, epu che poyekefilu ta Jewba kuyfi mu.

JEWBA ÑI KELLUN MU LLÜKALAYNGÜN

6. ¿Chumngelu rakiduamafuiñ Jabin tañi pu weychafe ñi wewfemafiel pu israelche?

⁶ Barak weychafengefuy Israel mu ka Debora pelon domongefuy. Kiñe fütra longko Kanan mu, Jabin pingelu, awükakefuy pu israelche 20 tripantu mew. Jabin tañi pu weychafe rume kewatuchefengefuyngün ka awükachekefuyngün, feymu pu israelche küpa elkünulayngün chew tañi ellkawküleken engün. Jabin tañi pu weychafe niefuyngün 900 weychan kareta nielu rosewe reke tañi rueda mu, welu pu israelche nielafuyngün weychawe rume kam takun ñi ingkañpewal (Jueces 4:1-3, 13; 5:6-8).

7, 8. 1) Jewba, ¿chem wüne feypifi ta Barak ñi femal? 2) Pu israelche, ¿chumngechi wewfingün Jabin ñi pu weychafe? (Inaduamnge ti adentun pagina 27 mu.)

⁷ Pu israelche trürümngelu Jabin ñi pu weychafe mu, fey newen-ngenolu ka wewfalngelu trokingeyngün. Welu Debora nütramkalelfi ta Barak Jewba ñi feypiel: “Amunge ka trekange Tabor wingkul mew ka yefinge 10.000 wentru Neftali ka Sabulon mu küpalu. Eymi mew küpalelaeyu ta Sisara, tati longkolelu Jabin ñi pu weychafe mew, ka küpalelaeyu tañi weychan kareta ka tañi pu weychafe, Cison wütrunko mu, ka wülkünulelaeyu tami kuwü mew” (Jueces 4:4-7).

⁸ ‘Küpape pu küpa weychalu’ feypingelu, fey 10.000 wentru trawüyngün Tabor wingkul mu. Fey Barak ka tañi pu weychafe chaftumeyngün tañi pu kayñe, Taanac mu. Biblia feypi: “Fewla Debora feypifi ta Barak: ‘Witrange, tüfa am tati antü Jewba ñi wülkünual tami kuwü mew ta Sisara. ¿Wüne amulenolu am ta Jewba eymi mu?’ Fey Barak nagi Tabor wingkul mu ka 10.000 wentru inaeyew. Fey Barak tañi fütra kuchillu ñi adkiñ mu Jewba welulkafi ta Sisara, kom tañi weychan kareta ka kom tañi pu weychafe. Fey Sisara nagi tañi weychan kareta mu ka namuntu lefmawi. Haroset de las naciones pingechi waria mu puwi Barak ñi inantukufiel pu weychan kareta ka pu weychafe. Fey Sisara kom tañi pu weychafe langümngeyngün fütra kuchillu mu, kiñe no rume montulay” (Jueces 4:14-16). Jewba, ¿chumngechi kellufi pu israelche? Eli kiñe fütra mawün, fey chew ñi weychalen engün, fotrakünuy. Tüfa kellufi pu israelche, fey Barak 24 kilometro mu inantukufi Sisara tañi pu weychafe. Ti rüpü mew, Sisara tañi weychan kareta pünalewey fotra mew. Feymu Sisara lefkülen puwi Zaananim mu, ka ellkawi kiñe domo ñi tolto ruka mew, Jael pingelu. Sisara müna ürkülefuy, feymu fütra umawkoni. Fey petu umawtulu, Jael fütra piwkekünuwi, fey langümeyew (Jueces 4:17-21). ¡Jewba elufi pu israelche ñi wewafiel tañi pu kayñe!

KIÑEKE KÜPA ELUWLAYNGÜN

9. Jueces 5:20, 21, ¿ka chem kimeltueiñmew?

⁹ Papeltufiliyiñ Jueces kapitulo kechu, doy adümafiyiñ taiñ inaduampeel. Jueces 5:20, 21 feypi: “Wenu mapu mew pu wangülen weychayngün; chew ñi miyawken engün wenu mapu mew weychafingün ta Sisara. Ti Cison wütrunko apümkafi engün”. Feymu, ¿feypiafuiñ kümeke püllü ñi kellufiel pu israelche kam ñi nagpan üykülechi kura wenu mu? Biblia ta feypilay. Welu rakiduamafuiñ Jewba ñi fente küme mawünelfiel ñi montulal tañi pu che, femngechi pu 900 weychan kareta ñi küme nengümnoal. Jueces 4:14, 15 mu küla rupa püramyengey ta Jewba ñi elufiel pu israelche tañi wewal. Kiñe weychafe no rume Israel mew feypilayafuy ‘iñche ñi duam mu wewiyiñ’.

10, 11. ¿Chem am ta Meroz? ¿Chumngelu malisiangey?

¹⁰ Dew wewlu engün, Debora ka Barak ülkantufingu ta Jewba, fey ngüneduamfalngey kiñe dungu ñi feypiel. Ülkantuyngu: “Jewba ñi küme püllü feypi: ‘Malisiafimün ta Meroz. May, malisiafimün pu che mülelu fey mu, küpanolu am engün [...] ñi kelluafiel ta Jewba ka tañi pu newen-ngechi che’” (Jueces 5:23).

¹¹ ¿Chem am ta Meroz? Küme kimlaiñ. Tañi malisiangen mu kom apümkangey. Tüfa kiñe waria ngepelafuy, ka tañi pu che eluwlayngün chi ñi kelluafiel ta Barak ti weychan mu. Pu 10.000 wentru eluwlu ñi weychayal fülkülepelafuyngün Meroz mu, feymu pu che feychi waria mu kimpelayngün ñi duamfalngen wentru ñi weychameal. Kam Sisara lefmawpelay Meroz mu. Fey pu che Meroz mu, pepi nüfingün peno ta Sisara, welu femlayngün. Rakiduamnge tüfa: pu che adkintumekeyngün tüfachi fütra weychafe ñi lefmawkiyawün tañi waria mu, kelluafuyngün ñi femürpual Jewba ñi ayükeel, welu chumlayngün rume. Kellufule engün, Jewba kümelkayafeyew. Pu che mülelu Meroz mu, trürlayngün Jael mew, kidu am llükakelafuy (Jueces 5:24-27).

12. ¿Chem dungu mu trürlay tati pu che ñi feypiel Jueces 5:9, 10? ¿Chem müley taiñ femal iñchiñ?

¹² Jueces 5:9, 10 mu, Debora ka Barak sakifingu pu longko weychafe Israel mu eluwkülelu ñi weychayal ayüwün mu. Welu feypingu pu küpa weychanolu, ñi miyawken kolü furiku mew, ñi anülen falinkechi alfombra mew, ka ñi trekayawken rüpü mew. ¿Chem pengeli tüfa? Feychi pu che rume tutengelu trokiwingün ñi weychayal ka yemekefuyngün ülmen mongen. Feymu tüfa engün trürlayngün pu 10.000 wentru eluwlu ñi weychayal Barak engu kura wingkul mu, Tabor pingelu, ka Cison mu, chew fotrakolekefuy. Feymu pu küpa küdawnolu, feypingeyngün ‘ngüneduamfimün’, femngechi ñi rakiduamal kom tati dungu mew ñi llownofiel engün eluwnolu am ñi küdawülafiel ta Jewba. Famülke mu, iñchiñ ka müley ñi ngüneduamal tunte taiñ eluwkülen ñi küdawülafiel ta Jewba.

13. Ruben, Dan ka Aser ñi pu che, ¿chem dungu mu trürlay ñi rakiduamken Zabulon ka Neftali ñi pu che?

¹³ Pu 10.000 wentru pepi ngüneduamfingün Jewba ñi afmatufal femken tañi pengelal ñi rüf Ngünechen-ngen. Pepi nütramkalelfingün kakelu che Jewba ñi nor femken (Jueces 5:11). Welu Ruben, Dan ka Aser ñi pu che doy falintufingün tañi pu kulliñ, pu farku, ka kakelu falinke fillem ñi nieel, welu newe falintulafingün ñi küdawülkefiel ta Jewba (Jueces 5:15-17). Welu kom tati pu trokiñche femngechi femlayngün. Latripafule rume, pu che Zabulon ka Neftali mu kellufingün ta Debora ka Barak (Jueces 5:18). Kümeke dungu kimürpuafuiñ ñi rakiduamken tüfachi pu che mu.

¡PÜRAMYEFIMÜN TA JEWBA!

14. ¿Chumngechi pengelkeiñ taiñ kelluntukukefiel Jewba ñi ngünenieel?

¹⁴ Famülke mu, weychakelaiñ taiñ kelluntukuafiel Jewba ñi ngünenieel. Welu may pengelaiñ ñi kelluntukufiel amuldunguliyiñ ayüwün mu ka llükakenon mew. Taiñ antü mew, doy duamfalngey che eluwkülelu ñi küdawülafiel ta Jewba. Feymu rume fentren peñi ka lamngen ayüwün mu eluwkeyngün ñi küdawülafiel ta Jewba fillke küdaw mu. Kiñeke wünelekeyngün amuldungun mu, küdawkeyngün Fetel mu kam dewmakeyngün Trawünwe Ruka. Kafey wechekeche ka füchakeche küdawkeyngün taiñ fütrake trawün mu. Kiñeke longkolelu koneltuyngün ti Trokiñ wentru ñi kellual pu kutrankülelu pital mu ka adkünukefingün fütrake trawün. Maneluwkeiñ Jewba mew ñi falintukefiel taiñ eluwkülen ñi küdawülafiel chem dungu mu rume ñi duamniengeel, kidu ngoymalayay taiñ femün (Ebrew 6:10).

15. ¿Chem ramtun kelluaeiñmu ñi kimal tunte taiñ eluwkülen ñi poyeafiel ta Jewba?

¹⁵ Kom müley taiñ ramtuwal: “¿Eluwken kakelu che müten ñi femal kom ti küdaw? ¿Chem doy falintukefiñ? ¿Nieal itrofillem, kam küdawülafiel ta Jewba? ¿Inayentuñmakefiñ ñi mupiltun ka llükakenon ta Barak, Debora, Jael ka pu 10.000 wentru? Kidu engün reke, ¿wülken chem ñi nieel tañi poyeafiel ta Jewba? ¿Rakiduamkülen ñi wiñamtuwal tañi doy nieal plata kam ñi doy küme feleal? Femngechi femli, ¿chumngechi tüfa kümelkayafi kam wedalkayafi tañi pu che ka tati trawünche? ¿Ngillatukefiñ ta Jewba tüfachi dungu mew?”.

16. Jewba duamnielay chem no rume, welu ¿chem eluafuiñ iñchiñ?

¹⁶ Taiñ Wenu Chaw sakikeeiñmew, feymu eluñmaeiñmu taiñ kelluntukuafiel tañi ngünenieel. Adan Eva engu ñi antü mu ka fantepu mew, Weküfü ayükey taiñ kiñewal kidu mew ñi kayñetuafiel ta Jewba. Welu kelluntukufiliyiñ Jewba ñi ngünenieel, fey pengelafiyiñ ta Weküfü taiñ kiñewkülenon kidu mew. Iñchiñ mupiltukefiyiñ ka nor piwkeyekefiyiñ ta Jewba, feymu ayüwün mu eluwkeiñ taiñ küdawülafiel, femngechi ayüwülkefiyiñ (Proverbios 23:15, 16). Kelluntukufiliyiñ ta Chaw Ngünechen ka nor piwke mu inaniefiliyiñ ñi feypin, fey Jewba wiñoldungulelafuy ta Weküfü ñi dalluntukun (Proverbios 27:11). Inaniefiliyiñ kom taiñ feypietew Jewba, fey kiñe falin yewün reke eluafiyiñ, femngechi ayüwülafiyiñ.

17. Jueces 5:31, ¿chem kimeltueiñmew ñi rupayal küpalechi antü mu?

¹⁷ Pichiñma mu, kom pu che Mapu mew doyümafi ñi ngünenieaetew Chaw Ngünechen müten. ¡Rume duamnieiñ ñi puwal feychi antü! Rakiduamkeiñ Debora ka Barak reke, kidu ülkantuyngu: “Lape kom tami pu kayñe, awem Jewba, welu tami pu piwkeyeetew felepe ti antü reke püralu ñi afmatufalngen mu” (Jueces 5:31). Tüfa rupayay Chaw Jewba apümkafile Weküfü ñi ngünenieel. Konle ta Armagedon, Jewba duamtulayay ñi kelluaetew pu che tañi apümkayafiel ñi pu kayñe. Doy may, re adkintuaiñ müten chumngechi taiñ montulaetew Jewba (2 Crónicas 20:17). Welu petu puwnole feychi antü, famülke mu kelluntukuafuiñ Jewba ñi ngünenieel ayüwün mu ka llükakenon mew.

18. Eluwülmi tami küdawülafiel ta Jewba, ¿chem chumayngün kakelu che?

¹⁸ Debora ka Barak we ülkantulu dew ñi wewün pu israelche, püramyelafingu ta kiñe che, welu may püramyefingu ta Jewba. Ülkantuyngu: “Pu che ayüwün mu eluwingün, feymu ¡püramyefimün ta Jewba!” (Jueces 5:1, 2). Ka femngechi, iñchiñ eluwliyiñ ñi küdawülafiel ta Jewba chem dungu mu rume ñi duamniengeel, kakelu che ‘¡püramyeafingün ta Jewba!’.