বস্তু-বাহানিৰ বাঢ়ি যোৱা দাম কেনেকৈ সন্মুখীন হʼম

ভাবি-চিন্তি খৰচ কৰক

যেতিয়া বস্তু-বাহানিৰ দাম বাঢ়ে, তেতিয়া আমি চিন্তিত হওঁ আৰু বুজি নাপাওঁ যে কি কৰিম। কিন্তু তেতিয়াও আপুনি কিছুমান পদক্ষেপ লৈ নিজৰ পৰিস্থিতি ভাল কৰিব পাৰে।

এইদৰে কৰাটো কিয় প্ৰয়োজন

যদি আপুনি ভাবি-চিন্তি খৰচ নকৰে, তেনেহʼলে আপোনাৰ টকা-পইচাৰ সমস্যা বাঢ়ি যাব পাৰে। লগতে আপুনি বেছিকৈ চিন্তিত হʼব পাৰে। আপোনাৰ ওচৰত কম টকা-পইচা থাকিলেও এয়া ভালদৰে ব্যৱহাৰ কৰিবলৈ আপুনি বহুত কিছু কৰিব পাৰে।

আপুনি এয়া কেনেকৈ কৰিব পাৰে

আঁঠুৱা চাই ঠেং মেলা। আপোনাৰ যিমান উপাৰ্জন আছে, সেই অনুসৰি যদি আপুনি টকা খৰচ কৰে, তেনেহʼলে আপোনাৰ চিন্তা কম হʼব। আপোনাৰ হাতত কিছু টকা বাচিব, যি আগলৈ প্ৰয়োজনৰ সময়ত আপুনি খৰচ কৰিব পাৰে।

আপুনি যিমান উপাৰ্জন কৰে, সেই অনুসৰি চিন্তা কৰক যে আপুনি কিমান টকা কʼত খৰচ কৰিব। এয়া নিশ্চিত কৰক যে সঁচাকৈ প্ৰয়োজন হোৱা বস্তুবোৰতে আপুনি খৰচ কৰিব। যেতিয়া বস্তু-বাহানিৰ দাম কম-বেছি হয় বা আপোনাৰ উপাৰ্জনত কিবা সাল-সলনি হয়, তেনেহʼলে খৰচ পাতিটো সাল-সলনি কৰক। যদি আপুনি বিবাহিত, তেনেহʼলে কোনো এটা নিৰ্ণয় লোৱাৰ আগতে নিজৰ সংগীৰ লগত কথা পাতক।

এইদৰে কৰি চাওক: ধাৰত বা EMI-ত (ই এম আই) বস্তু-বাহানি কিনাৰ পৰিৱৰ্তে, সেই সময়তে নগদ পইচা দি কিনক। কিছুমান লোকে এইদৰে কৰাৰ বাবে নিজৰ উপাৰ্জন অনুসৰি খৰচ কৰিব পাৰিছে। আনকি বেছিকৈ খৰচ কৰাৰ পৰা আঁতৰি থাকিব পাৰিছে। ইয়াৰ উপৰিও মাজে সময়ে নিজৰ বেংক ষ্টেটমেণ্ট চাওক। আপোনাৰ ওচৰত কিমান টকা আছে, সেয়া জানিলে আপুনি কিমান খৰচ কৰিব পাৰে সেয়া জানিব পাৰিব। খৰচ কম কৰাটো কঠিন হʼব পাৰে, কিন্তু ভাল পৰিকল্পনা কৰিলে আপুনি এইদৰে কৰিব পাৰিব আৰু টকা-পইচাৰ প্ৰতি আপোনাৰ চিন্তাও কম হʼব।

খৰচ কম কৰাটো আপোনাক হয়তো কঠিন লাগিব পাৰে। কিন্তু আপুনি যদি ভাবি-চিন্তি খৰচ কৰে আৰু ভালদৰে হিচাপ ৰাখে, তেনেহʼলে আপুনি বহুত সহায় লাভ কৰিব। এইদৰে টকা-পইচাকলৈ আপুনি বেছি চিন্তিত নহʼব।

‘খৰচ পাতিৰ হিচাপ কৰক।’—লূক ১৪:২৮.

নিজৰ চাকৰি সুৰক্ষিত কৰি ৰাখক। ইয়াৰ বাবে আপুনি কিছুমান পদক্ষেপ লʼব পাৰে। যেনে: সময়মতে কাম আৰম্ভ কৰক, কামৰ প্ৰতি সঠিক দৃষ্টিভংগী ৰাখক, কঠোৰ পৰিশ্ৰম কৰক, আনক আগবাঢ়ি সহায় কৰক, সকলোৰে সন্মান কৰক, কামৰ ঠাইৰ নিয়ম মানি চলক আৰু নিজৰ দক্ষতা বঢ়াবলৈ চেষ্টা কৰক।

টকা-পইচা বৰ্বাদ নকৰিব। নিজকে সোধক, ‘মই মোৰ টকা-পইচা প্ৰায়ে অদৰকাৰী বস্তুবোৰত বা বেয়া অভ্যাসবোৰত খৰচ কৰোঁ নে?’ বহুতো লোকে নিজৰ টকা-পইচা ড্ৰাগ্চ লʼবলৈ, জুৱা খেলিবলৈ, চিগাৰেট বা বেছিকৈ মদ খাবলৈ খৰচ কৰে। এই বেয়া অভ্যাসবোৰৰ বাবে তেওঁলোকৰ স্বাস্থ্য বেয়া হয়, লগতে নিজৰ চাকৰি হেৰুৱাই।

“যি মানুহে প্ৰজ্ঞা লাভ কৰে তেওঁ সুখী হয়, . . . ৰূপৰ পৰিৱৰ্তে পোৱা লাভতকৈ প্ৰজ্ঞাৰ পৰা পাৱা লাভ উত্তম।”—হিতোপদেশ ৩:১৩, ১৪, IRV.

প্ৰয়োজনৰ সময়ৰ বাবে কিছু টকা সাঁচি ৰাখক। যদি সম্ভৱ হয়, তেনেহʼলে কিছু টকা সাঁচি ৰাখক যাতে হঠাতে যদি কিবা খৰচ ওলাই বা সমস্যা হয়, তেনেহʼলে এই টকা আপুনি ব্যৱহাৰ কৰিব পাৰে। যেনে, আপোনাৰ বা আপোনাৰ পৰিয়ালৰ কোনো সদস্যৰ বেমাৰ হʼব পাৰে, আপুনি নিজৰ চাকৰি হেৰুৱাব পাৰে বা আন কিবা ডাঙৰ সমস্যা হʼব পাৰে। সেইবাবে আপুনি যদি কিছু টকা সাঁচি থৈছে, তেনেহʼলে আপুনি চিন্তিত নহʼব।

“বিপদ হঠাতে মানুহৰ ওপৰলৈ আহে আৰু তেওঁক ফান্দত পেলায়।”—উপদেশক ৯:১২, IRV.

টকা-পইচা সাঁচি থোৱাৰ কিছু উপায়

বাহিৰতকৈ বেছি ঘৰত বনোৱা খানা খাওক।

প্ৰায়ে বাহিৰৰ খানা খালে বা বাহিৰৰ খানা কিনিলে বেছি টকা খৰচ হয়। এয়া সঁচা যে ঘৰত খানা বনালে বহুত সময় লাগে আৰু পৰিশ্ৰম কৰিবলগীয়া হয়। কিন্তু এইদৰে কৰিলে আপুনি নিজৰ টকা-পইচা বচাব পাৰিব আৰু খানাও পুষ্টিকৰ হʼব।

বুদ্ধিমতাৰে খৰচ কৰক।

যি মন যায়, সেয়াই কিনি নলʼব। ইয়াৰ পৰিৱৰ্তে এটা লিষ্ট বনাওক আৰু লিষ্টত থকা বস্তুহে কিনক।
সম্ভৱ হʼলে কিছুমান বস্তু বেছি পৰিমানে কিনক। বেছিকৈ লʼলে সস্তা হয়। কিন্তু মনত ৰাখিব যদি এইবোৰ খোৱা বস্তু হয়, তেনেহʼলে এয়া ৰাখিবলৈ আপোনাৰ ওচৰত এনে ঠাই হোৱা উচিত, যʼত এইবোৰ বেয়া নহয়। নহʼলে আপোনাৰ টকা বৰ্বাদ হʼব।
এনে ব্ৰেণ্ডৰ বস্তুবোৰ কিনক, যি সস্তা আৰু তাৰ কোৱালিটিও ভাল।
অনলাইনৰ পৰা বস্তু-বাহানি কিনি চাওক। কেতিয়াবা কেতিয়াবা অনলাইনত ভাল দামত পাই। প্ৰায়ে দেখিবলৈ পোৱা গৈছে যে যেতিয়া আমি দোকান বা মলত যাওঁ, তেতিয়া যি দেখো সেয়া কিনি লওঁ। কিন্তু অনলাইনত বস্তু কিনিলে, এইদৰে কৰাৰ পৰা বাচি থাকিব পাৰোঁ। কিয়নো আমি সহজে বস্তুবোৰৰ দাম চাব পাৰোঁ আৰু মুঠতে কিমান খৰচ হʼব, সেয়াও চাব পাৰোঁ।
যʼত ভাল অফাৰ, ডিচকাউণ্ট বা চেল লগা আছে, তাৰ পৰা কিনক। যদি কুপন আছে, তেনেহʼলে ব্যৱহাৰ কৰক। কোনো এটা বস্তু কিনাৰ আগতে বেলেগ বেলেগ ঠাইৰ পৰা বা তাৰ বেলেগ বেলেগ ব্ৰেণ্ডৰ দামৰ লগত তুলনা কৰক। যিকোনো বস্তু কিনাৰ আগতে চিন্তা কৰক যে সেয়া মেৰামতি কৰিবলৈ আৰু ব্যৱহাৰ কৰিবলৈ কিমান বিদ্যুৎ বা ইন্ধনৰ খৰচ হʼব।

নতুন ফোন বা টেবলেট কিনাৰ আগতে ভালদৰে চিন্তা কৰক।

ফোন বা আন বস্তুবোৰ বনোৱা কোম্পানীয়ে নিজৰ লাভৰ বাবে নতুন নতুন মডেল উলিয়াই থাকে। সেইবাবে কিবা কিনাৰ আগতে নিজকে সোধক, ‘এতিয়াই নতুন মডেল কিনাৰ প্ৰয়োজন আছে নে পুৰণি মডেল কিনিলেও হʼব? যদি সলনি কৰিবলগীয়া আছে, তেনেহʼলে একেবাৰে নতুন মডেল লোৱাৰ প্ৰয়োজন আছে নে?

বেয়া হʼলে পেলাই নিদিব, তাৰ মেৰামতি কৰক।

ঘৰৰ বস্তু ভালদৰে ৰাখক যাতে সেয়া বহু সময়লৈকে ব্যৱহাৰ কৰিব পাৰি। কিন্তু সেইবোৰ যদি বেয়া হৈ যায় আৰু মেৰামতি কৰিবলৈ বেছি খৰচ নহয়, তেনেহʼলে সেয়া মেৰামতি কৰক আৰু যদি কিবা বস্তু সলনি কৰিবলৈ থাকে, তেনেহʼলে চেকেণ্ড হেণ্ড কিনাৰ বিষয়েও চিন্তা কৰিব পাৰে।

ফল-মূল আৰু শাক-পাচলি ৰোৱক।

আপুনি ঘৰতে ফল-মূল আৰু শাক-পাচলি ৰুব পাৰে নে? এইদৰে কৰিলে আপোনাৰ খৰচ কিছুপৰিমানে কম হʼব, ইয়াৰ উপৰিও আপুনি আনকো ফল-মূল আৰু শাক-পাচলি দিব পাৰে বা ইয়াৰ সলনি আন কিবা লʼব পাৰে। অথবা এয়া বিক্ৰিও কৰিব পাৰে।

‘পৰিশ্ৰমী লোকৰ যোজনা সফল হয়।’—হিতোপদেশ ২১:৫.

“দৈনন্দিন বস্তুবোৰ কিনাৰ সময়তো আমি তাৰ দাম চাওঁ। লগতে এই কথাৰ প্ৰতিও ধ্যান দিওঁ যে আমি নিজৰ ক্ৰেডিট কাৰ্ড বেছিকৈ ব্যৱহাৰ নকৰোঁ।”—মাইল্ছ, ইংলেণ্ড।

“প্ৰতিবাৰে খোৱা-বোৱা বস্তু কিনাৰ আগতে গোটেই পৰিয়ালে মিলি এটা তালিকা বনাওঁ যে আমাক কি কি বস্তুৰ প্ৰয়োজন আছে।”—জেৰেমী, আমেৰিকা।

“কিবা কিনাৰ আগতে আমি বাৰে বাৰে ধ্যান দিওঁ যে সেই বস্তুটো কিনাৰ আমাৰ সামৰ্থ আছে নে নাই। ইয়াৰ উপৰিও প্ৰয়োজনৰ সময়ৰ বাবে আমি কিছু টকা সাঁচি থওঁ।”—য়ায়েল, ইজৰাইল।

“আমি নিজৰ লʼৰা-ছোৱালীক শিকাইছোঁ যে যেতিয়া কোনো বস্তু বেয়া হৈ যায় বা ভাঙি যায়, তেতিয়া নতুন কিনাৰ পৰিৱৰ্তে সেয়া কেনেকৈ মেৰামতি কৰিব পাৰি। সেয়া গাড়ী হওক বা ঘৰৰ কোনো বস্তুৱে হওক। আমি প্ৰায়ে নতুন মডেল নিকিবলৈ চেষ্টা কৰোঁ।”—জেফ্ৰী, আমেৰিকা।

“মই নিজে শাক-পাচলি লগাওঁ আৰু কুকুৰাও পোহো। এইদৰে কৰাত মোৰ খৰচ কম হৈছে। ইয়াৰ উপৰিও মই আনকো শাক-পাচলি দিব পাৰিছোঁ।”—হনʼ, ম্যানমাৰ।

এজন ব্যক্তিয়ে নিজৰ বাৰীৰ পৰা বেলেগ বেলেগ শাক-পাচলি চিঙি আছে।