এজনী ছোৱালীয়ে বাইবেল অধ্যয়ন ভালদৰে কৰিবলৈ সময়ৰেখা, jw.org অধ্যয়ন বাইবেল, এখন মানচিত্ৰ আৰু হাতেৰে অঁকা এখন ছবি ব্যৱহাৰ কৰিছে

যুৱক-যুৱতীসকলে সোধে

বাইবেলে মোক কেনেকৈ সহায় কৰিব পাৰে?—ভাগ ২: বাইবেল পঢ়া আনন্দপূৰ্ণ কৰি তোলক

বিল নামৰ এজন ডেকাই কয়, “যদি আপুনি সঠিকভাৱে বাইবেল নপঢ়ে, তেনেহʼলে আপোনাক পঢ়িবলৈ আমনি লাগিব পাৰে।”

আপুনি বাইবেল পঢ়া কেনেকৈ আনন্দপূৰ্ণ কৰি তুলিব পাৰে, তাৰ ৰহস্য আপুনি জানিব বিচাৰেনে? এই লেখে আপোনাক সহায় কৰিব।

পদবোৰ জীৱন্ত কৰি তোলক
অনুসন্ধান কৰক
আপোনাৰ সমনীয়াই কি কয়?

পদবোৰ জীৱন্ত কৰি তোলক

আপুনি পঢ়া বিষয়বোৰ মনোযোগ দিয়ক। এইদৰে কৰিবলৈ তলত দিয়া পৰামৰ্শবোৰ ব্যৱহাৰ কৰিব পাৰে:

১. বাইবেলত উল্লেখ থকা কোনো ঘটনা বাছনি কৰক। আপুনি শুভবাৰ্তা কিতাপৰ কোনো ঘটনা বা কিছুমান পদ বাছনি কৰিব পাৰে অথবা jw.org ৱেবছাইটৰপৰা কোনো নাটকৰ আকাৰত বাইবেল পঢ়া বাছনি কৰিব পাৰে।
২. সেই ঘটনাটো পঢ়ক। আপুনি অকলে বা নিজৰ বন্ধুৰ লগত অথবা পৰিয়ালৰ লোকসকলৰ লগত একেলগে পঢ়িব পাৰে। আপোনালোকৰ মাজৰ এজনে ঘটনাটো পঢ়িব পাৰে আৰু আন লোকসকলে বাইবেলত উল্লেখ থকা বেলেগ বেলেগ চৰিত্ৰৰ লোকসকলে কোৱা কথাবোৰ পঢ়িব পাৰে।
৩. নিম্নলিখিত কোনো এটা পৰামৰ্শ বা কেইবাটাও পৰামৰ্শ ব্যৱহাৰ কৰি চাওক:
- ঘটনাটোৰ ছবি আঁকক বা ষ্টʼৰি বৰ্ড বনাওক অথবা কেইবাটাও সাধাৰণ ছবি আঁকক আৰু ঘটনাটো যি ক্ৰমত ঘটিছিল, সেই ক্ৰমত ছবিবোৰ ৰাখক। প্ৰত্যেকখন ছবিৰ তলত লিখক যে সেই ছবিখনত কি দেখুৱা হৈছে।
- আপুনি বিশ্বাসী ব্যক্তিৰ বিষয়ে পঢ়াৰ সময়ত তেওঁৰ কি কি ভাল গুণ আছিল আৰু কি কি ভাল কাম কৰিলে, তাৰ বিষয়ে লিখি ৰাখক। লগতে তেওঁ কি কি আশীৰ্বাদ লাভ কৰিলে, সেয়াও লিখি ৰাখক।
- সেই ঘটনাটো বাতৰি আকাৰত লিখক আৰু বেলেগ বেলেগ দৃষ্টিভংগীৰে তথ্য আগবঢ়াবলৈ চেষ্টা কৰক। কল্পনা কৰক, যদি আপুনি সেইসময়ৰ মুখ্য চৰিত্ৰ আৰু সাক্ষীসকলৰ “সাক্ষাৎ” লোৱা হʼলে তেওঁলোকে কি উত্তৰ দিলেহেঁতেন। তেওঁলোকে দিয়া উত্তৰবোৰ লিখি লওক।
- যদি ঘটনাটোত কোনোবাই ভুল নিৰ্ণয় লৈছিল, তেনেহʼলে চিন্তা কৰক যে তেওঁ যদি ভাল নিৰ্ণয় লোৱা হʼলে কি হʼলহেঁতেন। উদাহৰণস্বৰূপে, পিতৰে যীচুক চিনি নাপাওঁ বুলি কৈছিল। (মাৰ্ক ১৪:৬৬-৭২) চিন্তা কৰক যে পিতৰে সেই পৰিস্থিতিত কেনেকৈ ভুল নিৰ্ণয় লোৱাৰপৰা আঁতৰি থাকিব পাৰিলেহেঁতেন?
- যদি আপুনি বাইবেল পঢ়া আনন্দপূৰ্ণ কৰি তুলিব বিচাৰে, তেনেহʼলে বাইবেলৰ কোনো ঘটনাৰ ওপৰত এখন নাটক লিখক। এই ঘটনাৰপৰা লাভ কৰা শিক্ষাবোৰ আপুনি নাটকত জড়িত কৰক।—ৰোমীয়া ১৫:৪.
  
  কল্পনা কৰক, বাইবেলত লিখা ঘটনাবোৰ যেন আপোনাৰ সন্মুখতে হৈছে!

অনুসন্ধান কৰক

যদি আপুনি কোনো এটা ঘটনাৰ প্ৰত্যেকটো কথা ধ্যান দি পঢ়ে, তেনেহʼলে আপুনি এনে ৰত্ন বিচাৰি পাব, যি আপুনি আগতে কেতিয়াও বিচাৰি পোৱা নাছিল। কেতিয়াবা কেতিয়াবা এটা শব্দতেই বহুতো কথা সোমাই থাকে।

উদাহৰণস্বৰূপে, মথি ২৮:৭ পদৰ লগত মাৰ্ক ১৬:৭ পদটো তুলনা কৰক।

মাৰ্কে লিখিছিল যে অতি সোনকালে যীচুৱে নিজৰ শিষ্যসকলক “আৰু পিতৰক” দেখা দিব। তেওঁ পিতৰৰ বিষয়ে বেলেগকৈ কিয় উল্লেখ কৰিছিল?
ইংগিত: মাৰ্কে এই ঘটনা নিজ চকুৰে দেখা নাছিল। হয়তো এই কথাষাৰ পিতৰে তেওঁক কৈছিল।
গুপ্ত ৰত্ন: যীচুৱে পিতৰক পুনৰ লগ কৰিব বিচাৰিছিল বুলি জানি তেওঁ কিয় উৎসাহ লাভ কৰিছিল? (মাৰ্ক ১৪:৬৬-৭২) যীচু পিতৰৰ প্ৰকৃত বন্ধু হয় বুলি কেনেকৈ দেখুৱালে? আপুনি যীচুৰ দৰে কেনেকৈ আনৰ প্ৰকৃত বন্ধু হʼব পাৰে?

কল্পনা কৰক যে পদবোৰত উল্লেখ থকা ঘটনাবোৰ আপোনাৰ সন্মুখতে ঘটি আছে আৰু ঘটনাটোৰ সৰু-সুৰা বিষয়বোৰ ধ্যান দিয়ক। এইদৰে কৰিলে আপোনাক বাইবেল পঢ়িবলৈ ভাল লাগিব।

আপোনাৰ সমনীয়াই কি কয়?

“কেতিয়াবা কেতিয়াবা কোনো এটা অধ্যায় পঢ়াৰ সময়ত অধ্যায়টো ভালদৰে বুজি নোপোৱালৈকে মই তাৰ সৰু-সুৰা বিষয়বোৰত গভীৰভাৱে ধ্যান দিওঁ। এইদৰে কৰি মই এনে শিক্ষা লাভ কৰোঁ, যি আগতে পোৱা নাছিলোঁ। যেতিয়া মই কোনো নতুন কথা শিকোঁ, তেতিয়া মোক বহুত ভাল লাগে।”—বাণী।

“যেতিয়া মই ৰূথ নামৰ কিতাপখন অধ্যয়ন কৰিছিলোঁ, তেতিয়া ৱাচটাৱাৰ লাইব্ৰেৰীত মই অনুসন্ধান কৰিছিলোঁ। মই এই কিতাপখন ভালদৰে বুজিব বিচাৰিছিলোঁ। আপোনালোকেও এই লাইব্ৰেৰী ব্যৱহাৰ কৰিব পাৰে। ইয়াত অনুসন্ধান কৰি মই জানিব পাৰিলোঁ যে বাইবেল পঢ়া কিমান আনন্দপূৰ্ণ হয়।”—তীমথি।

“একগোট হৈ বাইবেল পঢ়িবলৈ বহুত ভাল লাগে। কোনো এজন ব্যক্তিয়ে এজন চৰিত্ৰৰ কথাবোৰ এইদৰে পঢ়িব পাৰে, যেন তেওঁ স্ক্ৰিপ্ট পঢ়ি আছে। মোক jw.org ৱেবছাইটৰ নাটকৰ আকাৰত বাইবেল পঢ়া বহুত ভাল লাগে। সেইবোৰ শুনিলে এনে লাগে যেন বাইবেলত লিখা ঘটনাবোৰ মোৰ সন্মুখতে ঘটি আছে আছে।”—ইজাবেল।