পাঠ ৪৮

ভাবি-চিন্তি বন্ধু বাছনি কৰক

ছপা সংস্কৰণ

যি ব্যক্তিয়ে আমাৰ সুখত সুখী হয়, দুখত দুখী হয় আৰু ভাল-বেয়া দুয়োটা পৰিস্থিতিত আমাৰ লগত থাকে, সেই ব্যক্তিজনেই আমাৰ প্ৰকৃত বন্ধু। কিন্তু বাইবেলে আমাক সতৰ্ক কৰিছে যে সকলোৱে আমাৰ ভাল বন্ধু হʼব নোৱাৰে। তেনেহʼলে আমি ভাল বন্ধু কেনেকৈ বাছনি কৰিব পাৰোঁ? আহক, কিছুমান প্ৰশ্নৰ ওপৰত ধ্যান দিওঁ।

১. আপোনাৰ বন্ধুৱে আপোনাৰ ওপৰত কি প্ৰভাৱ পেলাব পাৰে?

আমাৰ বন্ধুৱে আমাৰ ওপৰত ভাল আৰু বেয়া দুয়োটাই প্ৰভাৱ পেলাব পাৰে। কিয়নো আমি যিসকলৰ লগত বন্ধুত্ব কৰোঁ, আমি তেওঁলোকৰ দৰেই হʼব বিচাৰোঁ। এয়া চʼচিয়েল মিডিয়া বা অনলাইনত কৰা বন্ধুৰ ক্ষেত্ৰতো এইদৰেই হয়। বাইবেলত এইদৰে লিখা আছে, “তুমি জ্ঞানীবিলাকৰ লগত আলাপ কৰা, তাতে তুমি জ্ঞানী হবা; কিন্তু অজ্ঞানবোৰৰ (অৰ্থাৎ যিহোৱাক প্ৰেম নকৰা) লগৰীয়াই ক্লেশ পাব।” (হিতোপদেশ ১৩:২০) যদি আপোনাৰ বন্ধুৱে যিহোৱাক প্ৰেম কৰে আৰু তেওঁৰ উপাসনা কৰে, তেনেহʼলে তেওঁ আপোনাক যিহোৱাৰ কাষ চাপিবলৈ আৰু ভাল নিৰ্ণয় লʼবলৈ সহায় কৰিব। কিন্তু যিহোৱাক প্ৰেম নকৰা লোকসকলৰ লগত যদি আপুনি সংগতি কৰে, তেনেহʼলে আপুনি যিহোৱাৰপৰা আঁতৰি যাব পাৰে। সেইবাবে, বাইবেলে আমাক উৎসাহিত কৰিছে যে আমি ভাবি-চিন্তি বন্ধু বাছনি কৰা উচিত। যেতিয়া আমাৰ বন্ধুৱে যিহোৱাক প্ৰেম কৰে, তেতিয়া তেওঁৰ আৰু আমাৰো লাভ হয়। কিয়নো আমি ‘পৰস্পৰে প্ৰবোধ দি থাকোঁ, আৰু ইজনে সিজনক ধৰ্ম্মত বৃদ্ধি কৰোঁ।’—১ থিচলনীকীয়া ৫:১১.

২. আমি কেনে লোকসকলৰ লগত বন্ধুত্ব কৰিলে যিহোৱা আনন্দিত হʼব?

যিহোৱাই সকলোৰে লগত বন্ধুত্ব নকৰে। তেওঁ কেৱল “সৰলবিলাকৰ লগত্‌হে” বন্ধুত্ব কৰে। (হিতোপদেশ ৩:৩২) যদি আমি যিহোৱাক প্ৰেম নকৰা লোকসকলৰ লগত বন্ধুত্ব কৰোঁ, তেনেহʼলে যিহোৱাক কেনেকুৱা লাগিব? তেওঁক নিশ্চয় বহুত দুখ লাগিব। (যাকোব ৪:৪ পঢ়ক।) কিন্তু যদি আমি বেয়া সংগতিৰপৰা আঁতৰি থাকোঁ আৰু তেওঁক প্ৰেম কৰা লোকসকলৰ লগত বন্ধুত্ব কৰোঁ, তেনেহʼলে যিহোৱা আনন্দিত হʼব আৰু আমাক তেওঁৰ বন্ধু বুলি ভাবিব।—গীতমালা ১৫:১-৪.

গভীৰভাৱে ধ্যান কৰক

আমি কিয় ভাবি-চিন্তি বন্ধু বাছনি কৰা উচিত? যিহোৱাৰ লগত ভাল সম্পৰ্ক গঢ়ি তুলিবলৈ সহায় কৰা বন্ধু আমি কেনেকৈ বিচাৰি পাম? আহক এই বিষয়ে আলোচনা কৰোঁ।

৩. বেয়া সংগতিৰপৰা আঁতৰি থাকক

যিসকল লোকে যিহোৱাক প্ৰেম নকৰে আৰু তেওঁৰ মানদণ্ডৰ অনুসৰি জীৱন-যাপন নকৰে, তেওঁলোকৰ লগত সংগতি কৰাই হৈছে বেয়া সংগতি। ভিডিঅʼখন চাওক, তাৰ পাছত নিম্নলিখিত প্ৰশ্নৰ ওপৰত আলোচনা কৰক:

ভিডিঅʼ: কুসংগ ত্যাগ কৰিবলৈ শিকক (৬:১৭)

আমি অজানিতে কেনেকৈ বেয়া সংগতিৰ প্ৰভাৱত পৰিব পাৰোঁ?

প্ৰথম কৰিন্থীয়া ১৫:৩৩ পঢ়ক, তাৰ পাছত নিম্নলিখিত প্ৰশ্নবোৰ আলোচনা কৰক:

আমি কেনে লোকসকলৰ লগত সংগতি কৰিব নালাগে আৰু কিয়?

গীতমালা ১১৯:৬৩ পঢ়ক, তাৰ পাছত নিম্নলিখিত প্ৰশ্নৰ ওপৰত আলোচনা কৰক:

আপুনি কেনে লোকসকলৰ লগত বন্ধুত্ব কৰিব বিচাৰে?

এটা পাত্ৰত আপেল ৰখা হৈছে। ইয়াৰ এটা আপেল বেয়া হৈছে আৰু তাত মাখি পৰিছে। সেই আপেলৰ বাবে বাকী আপেলখিনিও বেয়া হʼবলৈ ধৰিছে। — যিদৰে এটা পচি যোৱা আপেলে গোটেই আপেলখিনি বেয়া কৰিব পাৰে। ঠিক সেইদৰে, এজন বেয়া বন্ধুৱে আপোনাৰ ওপৰত কি প্ৰভাৱ পেলাব পাৰে?

৪. আপুনি বিভিন্ন বয়স আৰু পৃষ্ঠভূমিৰ লোকসকলৰ লগত বন্ধুত্ব কৰিব পাৰে

বাইবেলত দায়ূদ আৰু যোনাথন নামৰ দুজন ইস্ৰায়েলী ব্যক্তিৰ বিষয়ে উল্লেখ আছে। তেওঁলোক একে বয়সৰ নাছিল আৰু বেলেগ বেলেগ পৃষ্ঠভূমিৰপৰা আহিছিল, তথাপি তেওঁলোকৰ মাজত ঘনিষ্ঠ বন্ধুত্ব আছিল। তেওঁলোকে এজনে-আনজনৰ বাবে জীৱন দিবলৈও সাজু আছিল। ১ চমূৱেল ১৮:১ পঢ়ক, তাৰ পাছত নিম্নলিখিত প্ৰশ্নবোৰ আলোচনা কৰক:

কেৱল একে বয়স আৰু পৃষ্ঠভূমিৰ দুজন ব্যক্তিৰ মাজতহে বন্ধুত্ব গঢ়ি উঠে বুলি আপুনি ভাবেনে? আপুনি এইদৰে কিয় ভাবে?

ৰোমীয়া ১:১১, ১২ পঢ়ক, তাৰ পাছত নিম্নলিখিত প্ৰশ্নৰ ওপৰত আলোচনা কৰক:

যিহোৱাক প্ৰেম কৰা দুজন বন্ধুৱে এজনে-আনজনক কেনেকৈ উৎসাহিত কৰিব পাৰে?

এজন ভায়ে কেনেকৈ এজন ভাল বন্ধু বিচাৰি পালে? তেওঁ ভবাই নাছিল যে সেই ব্যক্তিজন তেওঁৰ ভাল বন্ধু হʼব পাৰিব। ভিডিঅʼখন চাওক, তাৰ পাছত নিম্নলিখিত প্ৰশ্নবোৰ আলোচনা কৰক:

ভিডিঅʼ: অচিনাকী ঠাইত বন্ধু বিচৰা (৫:০৬)

অখিলে স্কুলত কাৰ লগত বন্ধুত্ব কৰিছে, তাৰ বিষয়ে তেওঁৰ মা-দেউতাই কিয় চিন্তা কৰিছিল?
আৰম্ভণিতে তেওঁলোকৰ লগত বন্ধুত্ব কৰিবলৈ অখিলক কিয় ভাল লাগিছিল?
অখিলে অকলশৰীয়া অনুভৱ কেনেকৈ দূৰ কৰিব পাৰিলে?