Jeremías

37 Ukatjja Josías chachan Sedequías+ yoqapaw Jehoiaquim chachan Conías*+ sat yoqap lantejj reyit apnaqjjäna, juparojj Babilonia markan Nabucodonosor* reyipaw Judá oraqen reyit uttʼayäna.+ 2 Ukampis jupasa, servirinakapasa, oraqenkir jaqenakasa, kuntï Jehová Diosajj Jeremías profeta taypi parlkäna uka arunak janiw istʼapkänti.

3 Sedequías reyejj Selemías chachan Jehucal+ yoqapampiru Maaseya sacerdoten Sofonías+ yoqapampiruw Jeremías profetan ukar khitäna, akham sapjjañapataki: “Mirä amp suma, Jehová Diosasaruy jiwasatakejj oración luram” sasa. 4 Jeremiasajj janïraw carcelan llawintatäkänti, ukatwa jupajj marka taypin libre sarnaqaskäna.+ 5 Uka tiemponsti caldeonakajj Jerusalén marka muyuntasipkäna, ukampis faraonan ejercitopajj Egiptot mistunipjjatap yatipjjäna ukhajja,+ jupanakajj Jerusalén marka contra saytʼañat sarjjapjjänwa.+ 6 Ukatsti Jehová Diosajj akham sasaw Jeremías profetar säna: 7 “Israelan naya Jehová Diosapajj akham sistwa: ‘Nayar jisktʼañatak khitanipktam uka Judá markan reyiparojj akham sapjjañamawa: “Jumanakar yanaptʼañataki jutaski uka faraonan ejercitopajj Egipto markaparuw kuttʼjjani.+ 8 Caldeonakajj kuttʼanipjjaniwa, aka marka contraw nuwasipjjani, katuntasajj ninampiw phichantapjjarakini”+ sasa. 9 Naya Jehová Diosajj akham sistwa: “‘Caldeonakajj jiwasan ukat sarjjapjjapuniniwa’ sasajj jan jumanak pachpajj engañjasipjjamti. Jupanakajj janiw sarjjapkaniti. 10 Jumanak contra nuwasipki uka ejercitorojj taqpachanirus tukjapkchismajja, usuchjat chachanakakis jupanakat jiltʼapkchispajja, jupanakajj carpanakapat sartasaw aka markar ninamp phichantapjjaspa”+ sasa’”.

11 Kunapachatï caldeonakan ejercitopajj faraonan ejercitop kawsajj Jerusalén contra saytʼañat sarjjapjjäna ukhajja,+ 12 Jeremiasajj Jerusalenat mistusaw Benjamín oraqer sarjjäna,+ ukhamat marka masinakap taypin kunatï jupar waktʼkäna uk katoqañataki. 13 Ukampis Jeremiasajj Benjaminan Punkupar purïna ukhajja, Hananías chachan allchhipäkäna, Selemías chachan yoqapäkäna, guardianakat encargatäkarakïna uka Iriya sat chachajj Jeremías profetar katuntasaw akham säna: “¡Jumajj caldeonakan ukaruw escapasktajja!” sasa. 14 Jeremiasajj akham sarakïnwa: “¡Janiw ukhamäkiti! ¡Janiw nayajj caldeonakan ukar escapkti!” sasa. Ukampis Iriya chachajj janiw jupar istʼkänti. Jeremiasar preso katuntasajj principenakan ukaruw apäna. 15 Principenakajj walpun Jeremiasatak colerasipjjäna,+ jupar nuwjasajj carcelaruw llawintapjjarakïna,+ Jehonatán sat secretarion utaparu, uka utajj carcelar tukuyatänwa. 16 Jeremiasarojj calabozoruw* uchapjjäna, walja urunakaw ukankarakïna.

17 Ukatsti Sedequías reyejj Jeremiasaruw irptayanïna, utapanwa* juparojj jamasat jisktʼäna.+ Juparojj akham sasaw jisktʼäna: “¿Janit jumajj Jehová Diosan kuna arunakaps katoqkta?” sasa. Jeremiasajj sarakïnwa: “¡Katoqtwa!” sasa, ukatsti akham sarakïnwa: “¡Jumajj Babilonia markan reyipan amparapar katuyatäyätawa!”+ sasa.

18 Jeremiasajj akham sasaw Sedequías reyir sarakïna: “Nayaru carcelar llawintapjjañamatakejj ¿kuna juchsa nayajj juma contrasa, servirinakam contrasa, aka marka contras lurtjja? 19 ‘Babilonia markan reyipajj janiw jumanak contrasa ni aka oraq contras jutkaniti’ sasin profecía arunak sapkayätam uka profetanakamajj ¿kawkinkapjjes jichhajja?+ 20 Jachʼa rey, mirä amp suma, jichhajj istʼita. Kuntï nayajj ruwtʼaskäma ukarojj iyaw sakitaya. Janikiy Jehonatán sat secretarion utaparojj kuttʼayistati,+ jan ukajj ukanwa jiwäjja”+ sasa. 21 Ukatwa Sedequías reyejj Jeremiasar Guardianakan Patiopar+ uchasajj vigilapjjañapatak mayïna. Ukatsti sapürurakiw juparojj tʼantʼa luririnakan callepat mä moroqʼo tʼantʼa churapjjäna,+ tʼantʼajj markan tukusjjän ukapachkama.+ Jeremiasasti Guardianakan Patiopankaskakïnwa.