Jeremías
35 Josiasan yoqapäkäna Judá markan reyipäkarakïna uka Jehoiaquim+ reyin urunakapanjja, Jehová Diosajj akham sasaw Jeremiasar säna: 2 “Recabitanakan+ familiapan ukar saram, jupanakamp parlasajja, Jehová Diosan utapankki uka comedoranakat* mayaruw jupanakar irpäta, ukatsti jupanakarojj vino churäta” sasa.
3 Ukatwa nayajj Habazinías chachan allchhipäki Jeremías chachan yoqapäkaraki uka Jaazanías chachampiru, jilanakapampiru, taqpach yoqanakapampiru, recabitanakan taqpach familianakapampirojj 4 Jehová Diosan utapar irpayäta. Jupanakarojj Hanán chachan yoqanakapan comedoraparuw irpayäta, ukajj principenakan comedorap ladonkänwa, principenakan comedorapajj porterökäna uka Salum chachan Maaseya sat yoqapan comedorap patjjankänwa. Hanán chachajj cheqpach Diosar serviripäkäna uka Igdalías chachan yoqapänwa. 5 Ukatsti nayajj recabitanakan familiapankir chachanak nayraqataruw vinon phoqtʼat vasonakampi copanakampi uchayäta, jupanakarojj akham sarakiyätwa: “Vino umtʼasipjjam” sasa.
6 Ukampis jupanakajj akham sapjjänwa: “Janiw nanakajj vino umtʼapkäti, Recab chachan Jehonadab*+ sat yoqapäkäna uka nayra awkijajj akham sapjjetänwa: ‘Janipuniw vino umtʼapjjätati, ni jumanakasa ni wawanakamasa. 7 Janirak utanaks lurasipjjamti, ni jathanaks phawapjjamti, ni uvasanaks ayrusipjjamti,* ni uvas yapunakanïpjjamsa. Antisas carpanakanpun jakapjjam, ukhamat extranjerot jakapkta uka oraqen walja tiempo jakapjjañamataki’ sasa. 8 Ukhamasti nanakajj Jehonadab chachan yoqapäkäna uka Recab sat nayra awkijan arunakapsa taqe kunanaktï mayipkitäna ukanaks istʼasipkaktwa, ukatwa nanakasa, esposanakajasa, yoqanakajasa, phuchanakajasa janipun vino umtʼapkti. 9 Janirakiw ukan jakañatakejj utanaks lurasipkti, janiw uvas yapunakanïpktsa, janirakiw oraqenakasa, ni jathanakasa utjapkituti. 10 Nanakajj carpanakanwa jakasipkakta, taqe kunanaktï Jehonadab* sat nayra awkijajj mayipkitäna ukanak phoqasipkaktwa. 11 Ukampis kunapachatï Babilonia markan Nabucodonosor* sat reyipajj aka oraqe contra makatanïna ukhajja,+ nanakajj akham sapjjtwa: ‘Sarañäni, caldeonakampin sirionakampin ejercitonakapat escapjjañatakejj Jerusalén markar sarjjañäni’ sasa. Jichhasti Jerusalén markanwa jakasipkarakta” sasa.
12 Ukatsti Jehová Diosajj akham sasaw Jeremiasar parläna: 13 “Naya Israelan Diosapäkta uka ejercitonakan Jehová Diosapajj akham sistwa: ‘Jumajj Judá markankir jaqenakarus Jerusalén markan jakirinakarus akham sanim: “¿Janit nayajj arunakajar istʼapjjañamatakejj kutin kutin mayipksma?”,+ sistwa naya Jehová Diosajja. 14 “Recab chachan Jehonadab sat yoqapasti, jupat jutirinakarojj jan vino umapjjañapatakiw mayïna, jupanakasti jichhürkamaw jan vino umasajj jupan arunakapar istʼapjje, ukhamatwa nayra awkiparojj istʼapjjaraki.+ Ukampis nayajj kutin kutinis parlapksmajja,* jumanakajj janiw nayar istʼapkistati.+ 15 Nayar serviri taqe profetanakajarojj kutin kutiniw khitanipjjsma,*+ jumanakar akham sapjjañapataki: ‘¡Mirä amp suma, jumanakat sapa maynejj jan wali thakip apanukjjpan,+ kunatï walïki ukarak lurpan! Jan yaqha diosanakar arkasajj servipjjamti. Ukhamatwa jumanakampiru nayra awkinakamampir churapksma uka oraqen jakasipkakïta’+ sasa. Ukampis jumanakajj janiw istʼapkistati, ni amuyumpis istʼapkistati. 16 Recab chachan Jehonadab sat yoqapat jutirinakajj kuntï nayra awkipajj jupanakar maykäna uk phoqapjjewa,+ ukampis aka markajj janiw nayar istʼkituti” sasa’”.
17 “Ukhamasti naya Israelan Diosapäkta, ejercitonakan Diosapäkarakta uka Jehová Diosajj akham sistwa: ‘Kuntï Judá markjjarusa Jerusalén markan taqe jakirinakjjarus apaniñ arskayäta taqe uka jan waltʼäwinakwa apanëjja.+ Nayasti jupanakarojj parlayätwa, ukampis jupanakajj janiw istʼapkitänti, jupanakarojj jawsaskakiyätwa, ukampis jupanakajj janiw jaysasipkänti’+ sasa”.
18 Ukatsti Jeremiasajj akham sasaw recabitanakan utapankirinakar säna: “Israelan Diosapäki uka ejercitonakan Jehová Diosapajj akham siwa: ‘Jumanakajj Jehonadab sat nayra awkiman mayitaparojj istʼapjjtawa, taqe kunanaktï mayipktam ukanaks phoqasipktawa, kunjamtï sapktam ukarjampuniw lurasipkaraktajja, 19 ukatwa naya Israelan Diosapäkta uka ejercitonakan Jehová Diosapajj akham sista: “Recab chachan Jehonadab* sat yoqapat jutirinakat naya nayraqatan serviñatakejj utjapuniniwa” sasa’”.