Jeremías
14 Jehová Diosajj akham sasaw Jeremiasarojj sequianakat parläna:+
2 Judá markajj llakisitaw uñjasi,+ punkunakapas chhaqtjjarakiwa.
Wali llakitaw oraqen jaqosisipki,
Jerusalenan jachʼat wararitapajj alajjpachanakkamaw puri.
3 Patronanakajj servirinakaparuw* um thaqanipjjañapatak khitapjje.
Jupanakajj uma estanquenakar* sarasajja, janirakiw kuna umsa katupkiti.
Chʼusa wakullanakampikiw kuttʼanjjapjje.
Phenqʼachata chuymas pʼakintata ukhamäpjjewa,
pʼeqenakapsa imtʼasipjjarakiwa.
4 Oraqen kʼakʼanoqtatätap laykusa
oraqer jallojj jan purjjatap laykusa,+
yapuchirinakajj janiw kuns lurtʼasirjamäpkiti, pʼeqenakapsa imtʼasipjjarakiwa.
5 Camponkir venado* animalas jichhak nasit qalluparojj apanukjjarakiwa,
chʼojjña alinakan jan utj-jjatap layku.
6 Salvaje asnonakajj jiskʼa qollunakan saytʼatäpjjewa,
chacal sat animalanakar uñtasitaw samaqepjjaraki.
Pastonakan jan utjatap laykojja, nayranakapas chʼamaktʼjjarakiwa.+
7 Pachpa pantjasitanakajaw juchanïpjjataj uñachtʼayi,
Jehová Dios Tata, sutim laykuy yanaptʼapjjeta.+
Walja kutipuniw jumar apanukupjjsma,+
juma contraw nanakajj juch lurapjjta.
8 Israelan suytʼäwipa, llakisiñ tiemponakan Salviripa,+
¿kunatsa jumajj aka markan mä extranjero jaqjamäta,
aruman iktʼañatakik quedasiri viajero jaqjamäta?
9 ¿Kunatsa jumajj mä muspariri chachar uñtasitäta?
¿Kunatsa jumajj wali chʼamani chachar uñtasitajj markamar jan salvkta?
10 Jehová Diosajj aka markat akham siwa: “Jupanakarojj mä cheqat yaqha cheqar sarañajj wal gusti,+ janiw kayunakap jarktʼapkiti.+ Ukatwa naya Jehová Diosajj jupanakamp jan kusisitäkti.+ Jichhaw nayajj pantjasitanakap amtasëjja, juchanakapatsti cuenta mayirakëjja”+ sasa.
11 Ukatsti Jehová Diosajj akham sasaw sitäna: “Jan jumajj aka markan sumar sarañapatak oración luramti.+ 12 Kunapachatï ayunapki ukhajja, janiw nayajj ruwtʼasitanakap istʼkti,+ enterpach nakhantayat ofrendanak loqtatapasa grano ofrenda loqtatapasa janiw nayarojj kusisiykituti.+ Jupanakarojj espadampi, manqʼat pistʼañampi ukhamarak usumpiw* qʼal tukjäjja”+ sasa.
13 Ukatwa nayajj akham sista: “¡Ay, Taqe Kunjjar Munañani Jehová Dios Tata! Profetanakajj akham sasaw jupanakar sasipki: ‘Jumanakajj janiw kuna espadsa uñjapkätati, janirakiw jumanakjjarojj manqʼat pistʼañas jutkaniti, antisas Diosaw jumanakarojj cheqpach sumankañ aka lugaran churapjjätam’+ sasa”.
14 Ukatjja Jehová Diosajj akham sasaw nayar sitäna: “Profetanakajj kʼari profecianakwa nayan sutij-jjarojj arsusipki.+ Janiw nayajj jupanakar khitankti, janirakiw jupanakarojj kuns ordenkti ni kunsa siskarakti.+ Jupanakajj kʼari visionanakampi, jan kunatak servir adivinacionampi, chuymanakapan utjki uka kʼarinakampi profecía arunakjam jumanakar parlapjjtamjja.+ 15 Ukhamasti janis nayajj jupanakar khitankstjja, naya Jehová Diosan sutij-jjaru profecianak parlir profetanakarojj akham sistwa, khitinakatejj janiw espadas ni manqʼat pistʼañas aka oraqen utjkaniti sapki uka profetanakaru: ‘Espadampi manqʼat pistʼañampiw uka profetanakajj tukusipjjani.+ 16 Profecianakap istʼir jaqenakajja, Jerusalén markan callenakapanwa manqʼatjama ukhamarak espada kawsa jaqortapjjani. Janiw khitis jupanakar imtʼkaniti,+ ni warminakaparusa, ni yoqanakaparusa, ni phuchanakaparusa, kuna laykutejj nayaw jupanakar waktʼki uka jan waltʼäwi jupanakjjar apanëjja’.+
17 ”Jupanakarojj aka arunak parlam:
‘Nayranakajajj arumay uruy jacha mayakïpan, jan saytʼas jachasipkakpan,+
kuna laykutejj markajan virgen phuchapajj qʼala nuwjatawa, tukjatarakiwa,+
heridapajj sinti jan walipuniwa.
18 Kunapachatï marka anqäjjar mistta ukhajja,
¡espadampi jiwarayatanakaruw uñjta!+
Kunapachatï markar mantta ukhajja,
¡manqʼat pistʼañajj apanki uka usunak uñjarakta!+
Profetasa sacerdotesa jupanakan jan uñtʼat oraqer sarasaw muyupjje’+ sasa”.
19 ¿Judá markarojj qʼalpunti apanukta? ¿Sionarojj walti uñista?+
¿Kunatsa jumajj nanakar nuwantapjjesta? Jichhajj janiw nanakajj qollañjamäpkti.+
Nanakajj sumankañ suyasipkayäta, ukampis janiw kuna sumas jutkiti.
Qollatäñ tiempo suyasipkayäta, ¡ukampis wali ajjsarañaw utji!+
20 Jehová Dios Tata, kuna jan walinaktï nanakajj lurapjjta uk yatisipjjtwa,
nayra awkinakajan pantjasitanakapsa ukhamaraki,
kuna laykutejj juma contraw juch lurapjjta.+
21 Sutim laykojj jan nanakar apanukupjjestati,+
janirak kʼajkir tronomar jiskʼachamti.
nanakamp lurkta uka pacto jan armasimti, janirak uka pacto pʼakintamti.+
22 ¿Markanakankir jan kunatak servir idolonakat maynikis jallu puriyaspati?
Jan ukajj ¿alajjpachanakakich jallu wal purintayaspa?
Nanakan Jehová Diosaja, juma sapakiw uk lurasmajja.+
Nanakajj jumaruw suytʼasipksma,
taqe ukanak jumak luratam layku.