Isaías
34 Markanaka, istʼañatak jakʼachasinipjjam,
markanaka, wali atencionamp istʼapjjam.
Oraqesa taqe kunatï oraqer phoqantki ukanakasa istʼapjjpan,
oraqpachasa taqe kunanakatï ukan utjki ukanakas istʼapjjpan.
2 Kuna laykutejj Jehová Diosajj taqe markanakatak coleratawa,+
markanakan taqe ejercitonakapatakis wali coleratawa.+
Diosaw jupanakarojj tukjani,
juparakiw jupanakarojj jiwarayani.+
3 Jiwayatanakajj anqar jaqtatäpjjaniwa,
jiwat cuerponakapajj thujsapjjaniwa,+
qollunakas wilanakapampi phoqtʼatäpjjaniwa.+
4 Alajjpachanakankir taqe ejercitonakajj ñusantjjapjjaniwa,
alajjpachanakajj mä rollor uñtat rollthapitäpjjarakiniwa.
Taqpach ejercitopajj wañsjjaniwa,
kunjamtï uvas alin wañsut laphipajj jalaqtki ukhama,
kunjamtï mä higos qoqan* wañsut higopajj jalaqtki ukhama.
5 “Alajjpachanakanjja nayan espadajajj wila mayakïniwa.+
Uka espadampiw Edom markarojj castigäjja,+
nayajj tukjatäñapatak apjjaruykta uka markaruw castigäjja.
6 Jehová Diosajj mä espadaniwa, uka espadajj wilararäniwa.
Uka espadajj likʼiraräniwa,+
corderonakana cabranakana wilapamp jawsutäniwa,
ovejanakan riñonanakapan likʼipampi jawsutarakïniwa.
Kuna laykutejj Bozrá markanjja Jehová Diosajj mä sacrificio wakichtʼi,
Edom oraqenjja nayajj walja wila wartayäjja.+
7 Salvaje toronakajja ukanakamp chikaw aynach toqer jutapjjani,
torillonakajj wali chʼamani toronakampiw aynach toqer jutapjjani.
Oraqepajj qʼala wilararäniwa,
laqʼapasti likʼi mayakirakïniwa”.
8 Jehová Diosajja enemigonakapat vengasiñatakejj mä uru ajllisi,+
castigañatakejj mä mara jupajj ajllisi, ukhamat Sionar arjjatañataki.+
9 Jawiranakapajj* alquitranar tukuyatäniwa,
laqʼapasti azufrer tukuyatäniwa,
oraqepas aqkir alquitranar tukuyatäniwa.
10 Janiw urusa ni arumasa jiwarkaniti,
jewqʼepajj wiñayatakiw jewqʼeskakini.
Qhawqha tiempos paskchinejja, uka oraqejj qʼala tukjatäskakiniwa.
Wiñayans wiñayapatakejj janipuniw khitis uka oraqnamajj paskaniti.+
11 Pelícano jamachʼisa puercoespín sat animalasa uka oraqwa katuntasipjjani,
jachʼa jiñchunakan jukunakasa cuervo jamachʼinakasa uka oraqenwa jakapjjarakini.
Diosajja midtʼañatak pitampi ukhamarak mä plomadampiw* aka oraqer midtʼani,
kuna laykutejj oraqejj jan kunatak servir chʼusa oraqer tukuñapwa jupajj amti.
12 Importante jaqenakapatjja janiw khitirus reyit uttʼayapkaniti,
taqpach principenakapas qʼala tukjatäpjjaniwa.
13 Jachʼa torrenakapanjja chʼapinakaw jilani,
imantasiñ lugaranakapansa itapallunakampi chʼapirar alinakampiw jilarakini.
Uka oraqejja chacal sat animalanakan pʼiyaparuw tukjjani,+
avestruz sat animalanakan utjäwiparuw tukjjarakini.
14 Wasarankir animalanakajja awullir animalanakampiw juntachasipjjani,
salvaje cabrajja* mayni salvaje cabranakaruw jawsarakini.
Jïsa, arum sarnaqer jamachʼejj* uka oraqenwa jakasini, mä samartʼañ lugarwa uka oraqen jikjjatani.
15 Uka oraqenwa asirojj* tapachasini, ukaruw kʼawnacharakini,
asir qallunakap ansusasti sum uñjarakini.
Jïsa, uka oraqenwa milano sat jamachʼinakajj parej parej juntachasipjjarakini.
16 Jehová Diosan libropan thaqtapjjam, jachʼat liytʼapjjarakim:
jupanakatjja janiw maynis faltkaniti,
jupanakatjja janiw maynis jan parejanïkaniti,
kuna laykutejj Jehová Diosan lakapaw mä orden churi,
jupan espiritupaw jupanakar tantachthapiraki.
17 Jupaw jupanakatakejj suertenak willti,
jupanakar waktʼi uka lugarjja pachpa amparapaw midtʼaraki.
Uka oraqjja wiñayatakiw jupanakajj katusipjjani,
qhawqha tiempos paskchinejja, jupanakajj ukan jakasipkakiniwa.