Isaías
36 Ezequías reyejj 14 maranakaw apnaqaskäna, ukhaw Asiria+ markan Senaquerib sat reyipajj Judá oraqen jachʼa perqanakamp muyuntat markanakap contra makatäna, ukatsti katuntarakïnwa.+ 2 Ukatjja Asiria markan reyipajj rabsaqué*+ chacharuw khitäna, wali jachʼa ejercitompiw Lakís+ markat Jerusalén markar Ezequías reyin ukar khitäna. Jupanakajj patjja toqenkir uma estanquen canalap jakʼaruw puripjjäna,+ ukajj isi tʼajjsurin oraqepar sarki uka thakinkiwa.+ 3 Ukatjja Hilquías chachan yoqapäkäna utat* encargatäkarakïna uka Eliaquim+ chachampi, reyin Sebná+ secretariopampi, Asaf chachan yoqapäkäna uka Joá sat registriri chachampiw jupan ukar mistunipjjäna.
4 Rabsaqué chachasti jupanakarojj akham sänwa: “Mirä amp suma, Ezequías reyirojj akham sapjjam: ‘Asiria markan jachʼa reyipajj akham siwa: “¿Kunarus jumajj wal confiyasta?+ 5 ‘Guerran nuwasiñatakejj yatiñanïtwa, chʼamanirakïtwa’ sasaw jumajj sistajja, ukampis uka arunakajj inamayakiwa. ¿Khitirus jumajj confiyasta, ukhamat naya contra saytʼasiñataki?+ 6 Jumajj mä pʼakit soqos lawar uñtasitäki uka Egipto markaruw confiyastajja, mä jaqetejj uka soqosar thujrtʼasispa, uka soqosajj pʼakisirakispa ukhajja, amparapatwa jununtasispa maysat mayswa passuyasirakispa. Egipto markan faraón reyipajja, taqe khitinakatï jupar confiyapki ukanakatakejj uka soqosar uñtasitawa.+ 7 Jumanakajj ‘Jehová Diosajaruw nanakajj confiyapjjta’ sasaw sapjjestajja, ukampis ¿janit Ezequías reyejj Diosan alto cheqankir sagrado lugaranakapsa altaranakapsa chhaqtaykänjja?+ ¿Janit Ezequías reyejj Judá markampiru Jerusalén markampirojj ‘aka altar nayraqatanwa altʼasipjjañama’ sasin siskänjja?”+ sasa’. 8 Mirä amp suma, jichhajj Asiriankir+ reyijampejj mä apuesta luram: nayajj 2.000 caballonakwa churäma, jumasti caballot sarir chachanakwa uka caballonakatak jikjjatañamaraki. 9 Egipto markan carronakaparu ukhamarak caballot sarir chachanakapar confiyasajj ¿kunjamarak jumajj reyijar serviri gobernadoranakapat sinti jiskʼäki ukar atipjasmasti? 10 ¿Janit Jehová Diosan autorizatajj aka markar tʼunjañatak makatanktjja? Jehová Dios pachpaw nayar akham situ: ‘Uka marka contra makatam, qʼal tʼunjanirakim’ sasa”.
11 Uk istʼasasti Eliaquim chachasa, Sebná+ chachasa, Joá chachas akham sasaw rabsaqué+ chacharojj sapjjäna: “Mirä amp suma, nanak servirinakamarojj arameo* arut+ parlapjjeta, nanakajj uka aru yatisipktwa, jan muralla patjjankasipki uka jaqenakan istʼkatajj judionakan arupat parlapjjestati”+ sasa. 12 Ukampis rabsaqué chachajj akham sänwa: “Janiw reyijajj reyimampiru jumanakampiru yatiyañatakik khitankituti. Aka yatiyäwejj murall patjjankasipki uka chachanakampitakiwa. Jumanakasa jupanakasa pachpa jamanakam manqʼasipjjäta, pachpa chhojjom umasipjjarakïta” sasa.
13 Ukatjja rabsaqué chachajj saytʼasïnwa, akham sasaw judionakan arupat+ wali jachʼat artʼarakïna: “¡Asiria markan jachʼa reyipan arunakap istʼapjjam!+ 14 Reyejj akham siwa: ‘Jan Ezequiasampejj engañjayasipjjamti, jupajj janiw salvapkiristamti.+ 15 Ezequiasajj akham siwa: “Jehová Diosaw cheqpachans salvistani, janiw aka markajj Asiria markan reyipan amparapar katuyatäkaniti” sasa. Jan jumanakajj Ezequiasar istʼasajj Jehová Diosar confiyapjjamti.+ 16 Jan Ezequiasarojj istʼapjjamti, Asiria markan reyipajj akham siwa: “Nayampejj sumar mantjjañäni, rendisjjapjjarakim, ukhamatwa jumanakajj pachpa uvas yapunakamata, higos qoqanakamata* manqʼasipjjäta, pachpa estanquenakamatwa uma umapjjarakïta, 17 kunapachatï nayajj jumanakan ukar jutkä, oraqenakamar uñtasit oraqer apapkarakïma ukhakama.+ Uka oraqejj trigo, cebada, uvasa achuyir oraqewa, ukhamat uka achunakamp tʼantʼsa vinsa lurapjjañamataki. 18 Jan jumanakajj Ezequiasamp engañjayasipjjamti, jupajj ‘Jehová Diosaw salvistani’ sasaw engañjasipktamjja. ¿Yaqha markanakan diosanakapat kawkïr diosaraki markaparojj Asiria reyin amparapat salvisti?+ 19 ¿Kawkinkis Hamat, Arpad markanakan diosanakapajja?+ ¿Kawkinkis Sefarvaim markan diosanakapajja?+ ¿Uka diosanakajj nayan amparajat Samaria markar salvapjjeti?+ 20 ¿Uka markanakan taqpach diosanakapat kawkïr diosarak markaparojj nayan amparajat salvisti, ukhamat Jehová Diosajj Jerusalén markarojj amparajat salvañapatakisti?”+ sasa’”.
21 Ukampis jupanakajj amukiw ischʼukipjjäna, janirakiw juparojj kamsapkänsa, reyin akham satap layku: “Janiw juparojj kuns sapjjañamäkiti”+ sasa. 22 Ukatjja Hilquías chachan yoqapäkäna utat* encargatäkarakïna uka Eliaquim chachasa, reyin Sebná+ sat secretariopasa, Asaf chachan yoqapäkäna uka Joá sat registriri chachasa, isinakap chʼiyanoqasisaw Ezequías reyin ukar puripjjäna, ukatsti kuntï rabsaqué chachajj siskäna ukanakwa yatiyapjjarakïna.