NAHÚM
1 Aka arunakajja Nínive marka contra arsut arunakawa.+ Aka librojja Elcós markankir Nahúm* chachajj Diosat katoqkäna uka visionatwa parli.
2 Jehová Diosajj jupa saparuki adorasispa* uk mayir Diosawa,+ enemigonakapat vengasir Diosarakiwa,
Jehová Diosajj vengasiriwa, colerasirirakiwa.+
Jehová Diosajj jupa contra saytʼasirinakatjja vengasiriwa,
enemigonakapatakis coleratakïskiwa.
3 Jehová Diosajj paciencianiwa,*+ wali chʼamanirakiwa,+
ukampis khitinakatï juchanïpki ukanakarojja kunjamatsa Jehová Diosajj castigakipuniniwa.+
Jupan thakipajja tukjir thaya taypinkiwa,
qenayanakajja kayunakapan laqʼa polvonakarakiwa.+
4 Jupajj lamar qotarojj toqenoqewa,+ wañtʼayarakiwa.
Taqpach jawiranakjja wañtʼayarakiwa,+
Basán toqenkiri ukhamarak Carmelo qollunak toqenkir chʼojjña alinakas wañsjjapjjewa,+
Líbano qollunak toqenkir panqaranakas wañsjjapjjarakiwa.
5 Jupa kawsajja qollunakajj khatatipjjewa,
jiskʼa qollunakas chhaqtjjapjjewa.+
Jupa nayraqatanjja oraqejj khatatiniwa,
aka oraqesa taqe khitinakatï ukan jakapki ukanakasa khatatipjjaniwa.+
6 Jupajj wal coleraski ukhajja, ¿khitirak saytʼatäspasti?+
Jupajj wal coleraski ukhajja, ¿khitirak jakaskakispasti?+
Jupan colerasitapajj ninjamaw aqani,
jupa kawsajja qarqanakas* qʼala tʼunjatäpjjaniwa.
7 Jehová Diosajj suma Diosawa,+ jan waltʼäwi tiemponjja jupajj imantasiñatak mä lugarjamawa.+
Khitinakatï imantasiñatak jupar thaqapki ukanakatjja janiw armaskiti.*+
8 Diosajj jachʼa inundacionampiw Nínive markarojj qʼal chhaqtayani,
jupan enemigonakaparojja chʼamakaw arknaqarakini.
9 ¿Kuna jan walinaksa jumanakajj Jehová Dios contrajj amtapjjäta?
Jupasti jumanakarojj qʼal chhaqtayapjjätamjja.
Mayampi tʼaqesiñ apayaniñapajj janiw wakisjjaniti.+
10 Kuna laykutejj jupanakajj kʼanantat chʼapinakar uñtasitäpjjewa,
cervezampi* machantasir jaqenakjamäpjjarakiwa,
ukampis jupanakajj pajar uñtat nakhantayatäpjjaniwa.
11 Khititï Jehová Dios contra jan walinak lurañ amtki ukajja jumatwa* mistuni,
jan kunatak serviri ewjjtʼanak churirejj jumatwa mistuni.
12 Jehová Diosajj akham siwa:
“Jupanakajj chʼamanïpjjchisa waljanïpjjchisa
tʼunjatäpjjaniwa, chhaqtjjapjjarakiniwa.*
Nayasti jumarojj* tʼaqesiysmawa, ukampis janiw mayampis tʼaqesiyjjämati.
13 Jichhasti jumanakjjankki uka yukjja nayajj pʼakjäwa,+
cadenanakamsa payaruw tʼaqjäjja.
14 Jehová Diosajj akham sasaw Asiria markat mä mandato arsüna:
‘Sutimajj janiw wiñayatakïkaniti.
Diosanakaman templopankki uka idolonaksa metalat lurat idolonaksa nayajj tʼunjäwa,
jan kunatak servirïtam laykojja, mä sepulturwa jumatakejj luräjja’ sasa.
15 Khititï suma yatiyäwinak apanki, sumankañat yatiykaraki ukajj
qollunak patjjnamaw jutaski.+
Judá marka, fiestanakam amtam,+ promesanakamsa phoqarakim,
kuna laykutejj khititï jan kunatak servirïki ukajja janiw mayampis juma taypnamajj paskaniti.
Jupajj qʼala tukjataw uñjasini”.
2 Nínive marka, khititï jaqenakar aywitatayki ukaw juma contrajj makatasinki.+
Murallanak jarkʼaqapjjam.
Thaksa vigilapjjarakim.
Wakichtʼasipjjam, guerratak chʼam katjjatapjjarakim.
2 Kuna laykutejj Jehová Diosaw Jacoburojj jachʼañchäwi kuttʼayjjani,
Israelan jachʼañchäwipsa kuttʼayjjarakiniwa,
kuna laykutejj enemigow jupanakan oraqep tukji,+
uvas alinakapan ramanakapsa qʼal tukjaraki.
3 Guerran nuwasiri wali chʼamani jaqenakapan escudonakapajj wila coloramp tiñitawa,
soldadonakapajj llijkir wila colorat isthapitäpjjewa.
Jupajj guerratak wakichtʼaski uka urunjja,
carronakapan hierropajj ninjamaw kʼajapjje.
Soldadonakajj enebro maderat lurat lanzanakwa uksar aksar khiwnaqapjje.
4 Guerran nuwasiñatak carronakajja loqher uñtasitaw callenakan tʼijnaqapjje.
Plazanakanjja alayaru, aynacharu ukhamaw tʼijnaqapjje.
Uka carronakajj nakhaskir antorchanakar uñtasitaw kʼajtapjje, lliju llijunakjamaw llijtapjjaraki.
5 Jupajj* oficialanakaparuw tantachthapini.
Nayrar sartkasaw jupanakajj lanktʼasipjjani.
Jupanakajj Nínive markan murallap toqeruw tʼijtjjapjjani,
murallanakwa reforzapjjarakini.
6 Jawiranakan punkunakapajj jistʼartapjjaniwa,
palaciojj tʼunjatäniwa.*
7 Akaw amtasiwayi: aka markajj jiskʼachat mä reinar uñtasitawa,
jupajj apataw uñjasi, esclavanakapas jachapjjewa,
chuymanak leqʼesisajj palomanakjamaw jupanakajj jachapjje.
8 Qalltatpachajja Nínive+ markajj walja umani estanquer uñtasitänwa,
ukampis jichhajja jaqenakajj escapapjjewa.
Yaqhepanakajj akham sasaw arnaqasipjje: “¡Ukjar saytʼapjjam! ¡Ukjar saytʼapjjam!” sasa.
Ukampis janiw khitis kuttʼankiti.+
9 ¡Qollqe saqueysupjjam! ¡Qori saqueysupjjam!
Kunanaktï jupanakajj imkatapki ukanakajj jan tukuskiriwa.
Uka imkatatanakajja, wali valorani kunayman yänakampi* phoqantatarakiwa.
10 ¡Markajj chʼusakiwa, qʼala apanukutawa, tukjatarakiwa!+
Jaqenakan chuymapajj walpun ajjsarapjje, qonqorinakapajj janiw suma thurtʼasirjamäpkiti, caderanakapas khatatiwa,
taqe jaqenakan ajanunakapas wali llakitäpjjewa.
11 ¿Kawkinkarak leonanakan utjäwipasti?+ Uka utjäwipanwa waynpach leonanakajj manqʼapjje,
uka utjäwipatwa leonajj qallunakapampi mistuni,
janiw khitis jupanakar sustjkiti.
12 Leonajj walja animalanakwa qallunakapatakejj katüna,
qachu leonanakapatakiw uywanakjja jiwayarakïna.
Utjäwinakapjja katut animalanakampiw phoqtʼayäna,
jiwat animalanakat jiltʼkäna ukanakampiw utjäwinakap phoqtʼayarakïna.
13 Ejercitonakan Jehová Diosapajj akham siwa: “Nayajj juma conträtwa.+
Guerran nuwasiñatak carronakamjja nakhantayäwa,+
waynpach leonanakamas espadampi jiwayatäpjjaniwa.
Janiw mayampis oraqer saqueysjjätati,
yatiyir jaqenakaman arunakapas janiw jukʼampejj istʼasjjaniti”+ sasa.
3 ¡Ay kunakïkani, wila wartir markatjja!
Uka markajj engañonakampi lunthatasiñanakampi qʼala phoqantatawa.
¡Jupajj janipuniw jan saqueysusajj quedaskaspati!
2 Chicoten suynatapaw istʼasi, ruedanakan suynatapaw istʼasiraki,
tʼijuskir caballonakaw uñjasi, thoqtas thoqtas sarir carronakaw uñjasiraki.
3 Caballjjat sarir jaqenakampi, llijkir espadanakampi, kʼajkir lanzanakampi,
walja jiwatanakampi, montón montón jiwat cuerponakampi...,
jan jaktʼkañ jiwat cuerponakampiw uñjasi.
Jaqenakajj jiwat cuerponakampiw lanktʼasipjje.
4 Ukajja prostituta warmin walja prostitución jucha luratanakapatwa pasi,
jupajj suma uñnaqtʼani, wali munkaña, layqasiñanakan jilïripa ukhamawa,
jupajj prostitución jucha lurasaw markanakarojj engañji, familianakarusti layqasiñanakampiw engañjaraki.
5 Ejercitonakan Jehová Diosapajj akham siwa: “Nayajj juma* conträtwa.+
Nayajj faldamwa aparäma,
ukhamat markanakajj qʼalalätam uñjapjjañapataki,
ukhamarak reinonakajj* jiskʼachat uñjasitam uñjapjjañapataki.
6 Nayajj basurampiw jumar willtʼäma,
taqe jaqenakampiw jiskʼachayäma,
taqe jaqenakampiw uñchʼukiyarakïma.+
7 Khititï jumar uñjkätam ukajja, jumat escapaniwa,+ akham sarakiniwa:
‘¡Nínive markajj tukjatawa!
¿Khitirak uka markat sinttʼasinisti?’ sasa.
¿Kawkinarak jumar mä chuymachtʼir jikjjatästi?
8 ¿Nilo canalanak jakʼan qontʼasirïkäna uka No-Amón*+ markat sipansa jumajj jukʼamp jilanktati?+
Umanakaw juparojj muyuntäna,
lamar qotaw jupan wali valorani utjiripänjja, lamar qotarakiw jupan murallapänjja.
9 Etiopía markasa Egipto markasa jupan jan tukuskir chʼamapänwa.
Put+ sat markasa Libia markankir jaqenakasa jupan yanapirinakapäpjjänwa.+
10 Ukampis No-Amón markajj yaqha markar apataw uñjasirakïna,
preso apataw uñjasïna.+
Wawanakapajj callenakan taqe esquinanakapan jiwayatäpjjänwa.
Uka markan wali respetat chachanakapar esclavot apasjjañatakejja, suertenakwa willtapjjarakïna,
wali importante taqe jaqenakapajj cadenanakampi ñachʼantatäpjjarakïnwa.*
11 Jumajj machantasirakïtawa,+
imantasirakïtawa.
Enemigonakamat escapañatakejja mä imantasiñwa thaqarakïta.
12 Jachʼa perqanakamp muyuntat taqe markanakamajja, higos qoqanakar* uñtasitawa, poqorat nayrïr achunakani higos qoqanakar uñtasitawa,
higos qoqanakatï thaljatäspa ukhajja, achunakapajj higosanak manqʼer jaqenakan lakanakaparuw jalaqtaspa.
13 Juma taypinjja trop tropa soldadonakamajj warminakjamäpjjewa.
Markaman punkunakapajja enemigonakamatakejj qʼala jistʼaratäniwa.
Ninaw punkunakaman trancanakap qʼal nakhantarakini.
14 ¡Enemigonakamamp muyuntat uñjaskäta uka tiempotakejj um imasim!+
Jachʼa perqanakam reforzarakim.
Ñeqʼer mantam, ñeqʼe takirakim,
ukatjja moldempejj ladrillonak lurarakim.
15 Ukhamäkchinisa ninaw qʼal nakhantätam.
Espadaw jiwayätam.+
Kunjamtï langostanakajj* chʼojjña alinak qʼal manqʼantapkejja, ukhamwa ukanakajj manqʼantapjjätam.+
¡Langostanakjam jumajj waljaptam!
¡Jïsa, langostanakjam waljaptam!
16 Comerciantenakamarojj waljaptaytawa, jupanakajj alajjpachanakankir warawaranakat sipansa jukʼamp waljäpjjewa.
Langostajj nayra jañchipat mistuwayasajj jaltawayjjewa.
17 Guardianakamajj langostanakjamäpjjewa,
oficialanakamajj walja langostanakjamäpjjewa.
Mä thaya urunjja qala uyunakanwa uka langostanakajj jarkʼaqasipjje,
ukampis intejj qhantʼanjje ukhajja, jaltawayasaw sarjjapjje,
kawkjarus sarapjje uk janiw khitis yatkiti.
18 Asiria markan reyipa, awatirinakamajj ikimpiw atipayasipjje,
oficialanakamajj utjäwinakapanwa quedasipjje.
Markamajj qollunakan aywitatatawa,
janiw khitis jupanakarojj tantachthapkiti.+
19 Jan waltʼäwimatakejj janiw chuymachtʼäwejj utjkiti.
Heridamajj janiw qollanïkiti.
Taqe khitinakatï jumat istʼapkani ukanakajja tʼajjllirapjjaniwa,+
juman sapa kuti jan wali luratanakamat ¿khitis jan tʼaqeskänjja?”.+
Uka sutejja, “chuymachtʼiri” sañ muni.
Jan ukajja, “yupaychasispa”.
Jan ukajja, “janiw jankʼak colerasirïkiti”.
Variante: “jaqhenakas”.
Jan ukajja, “ukanakarojja jarkʼaqewa”. Hebreo arunjja, “ukanakarojj uñtʼiwa”.
Jan ukajja, “trigot lurat cervezampi”.
“Jumatwa” sasinjja, Nínive markatwa parlaski.
Ukajja, “jupajj chika taypnamaw pasani” sasaw jaqokipasirakispa.
“Jumarojj” sasinjja, Judá oraqetwa parlaski.
“Jupajj” sasinjja, inas Asiria markan reyipat parlaskchi.
Jan ukajja, “allitattaniwa”.
Jan ukajja, “cosasanakampi”.
“Juma” sasinjja, Nínive markatwa parlaski.
Jan ukajja, “gobiernonakajj”.
Ukajja, Tebas markatwa parlaski.
Variante: “chʼoqantatäpjjarakïnwa”.
Jan ukajja, “arbolanakar”.
“Langosta” siski uk glosarion liytʼäta.