SOFONÍAS
1 Aka arunakajja Sofonías* chachajj Jehová Diosat katoqkäna uka arunakawa, Sofonías chachajja Cusí chachan wawapänwa, Cusí chachasti Guedalías chachan wawapänwa, Guedalías chachasti Amarías chachan wawapänwa, Amarías chachasti Ezequías chachan wawaparakïnwa. Amón+ chachan Josías+ yoqapajj Judá marka reyit apnaqaskäna ukhaw Sofonías chachajj aka arunak katoqäna:
2 Jehová Diosajj akham siwa: “Taqe kunanakatï aka oraqen utjki ukanakjja qʼalpun tukjäjja”+ sasa.
3 Jehová Diosajj akham saskakiwa: “Jaqenakarusa animalanakarusa qʼalpun tukjäjja.
Jamachʼinakarusa chawllanakarusa qʼalpun tukjäjja,+
taqe kunanakatejj jan wali thakir apki ukanakjja* jan wali jaqenakamp chikaw chhaqtayäjja,+
jaqenakarojj aka oraqet chhaqtayäwa.
4 Judá marka contraw nayajj amparaj aytäjja,
Jerusalenan jakir taqe jaqenak contraw amparaj aytäjja,
khitinakatï Baal diosar adoririnakat* jiltʼapki ukanakarojja taqpachwa aka lugarat chhaqtayäjja,+
yaqha markankir diosanakan sacerdotenakapan sutinakapjja falso sacerdotenakamp chikaw chhaqtayäjja,+
5 khitinakatï terrazanakana* alajjpachankir ejercitonak nayraqatan altʼasipki,+
khitinakatï Jehová Dios nayraqatan altʼasipki, jupat jan jitheqtañatak mä juramento lurapki,+
ukampis Malcam sat diosat jan jitheqtañatak mä juramento lurapkaraki ukanakarojja chhaqtayäwa.+
6 Khitinakatï Jehová Diosar arkañat jitheqtapki,+
khitinakatï Jehová Diosar jan thaqapki, janirak jupar jisktʼasipki ukanakarojj chhaqtayäwa”.+
7 Taqe Kunjjar Munañani Jehová Dios Tatitu nayraqatanjja amukïpjjam, kuna laykutejj Jehová Diosan urupajj jakʼankiwa.+
Jehová Diosajj mä sacrificio wakichtʼi, invitadonakaparojj qʼomacharakiwa.
8 “Naya Jehová Diosajja, sacrificio lurañ urujanjja principenakaru,
reyin yoqanakaparu,+ taqe khitinakatï extranjeronakjam isisipki ukanakaruw cuenta mayëjja.
9 Uka urunjja taqe khitinakatï plataformar* makatapkani ukanakarusa,
patronapan utap nuwasiñanakampi engañompi phoqantapki ukanakarusa nayajj cuenta mayëjja.
10 Jehová Diosajj akham siwa: uka urunjja,
Chawlla Punku sat lugarat maynin arnaqasitapaw istʼasini,+
markankir Segundo Barrio sat lugaratjja maynin jachatapaw istʼasini,+
jiskʼa qollunakatjja wali jachʼat suyniriw istʼasirakini.
11 Mactés* sat lugaran jakir jaqenaka, jachapjjam,
kuna laykutejj taqe negociantenakajj* tukjatäpjjewa,*
taqe khitinakatï qollqe metal pesapki ukanakajja tukjatäpjjewa.
12 Uka tiemponjja, lamparanakampiw Jerusalén markarojj wali amuyumpi inspeccionäjja,
khitinakatï jakañ vidapampejj wali kusisitäpki ukanakarusa,*
‘Jehová Diosajj janiw kunatï walïki uksa kunatï jan walïki uksa lurkaniti’+ sasin chuymanakapan sapkaraki ukanakarusa nayajj cuenta mayëjja.
13 Wali valorani utjirinakapajja saqueysutäniwa, utanakapas qʼala tukjatäniwa.+
Jupanakajj utanakwa utachasipjjani, ukampis janiw ukan jakapkaniti,
uvasanakwa yapuchasipjjani, ukampis janiw vinopjja umapkaniti.+
14 ¡Jehová Diosan jachʼa urupajj jakʼankiwa!+
¡Jakʼankiwa, ratukiw jakʼachasisinki!+
Jehová Diosan urupajja, wali ajjsarkañäniwa.*+
Uka urunjja guerrar sarir jaqenakas wararipjjaniwa.+
15 Uka urojja colerasiñ urüniwa,+
uka urojja tʼaqesiña, llakisiña urüniwa,+
uka urojja jan waltʼayatäña, tukjatäña urüniwa,
uka urojja chʼamak urüniwa,+
uka urojja wali chʼamaka, chʼiyar qenayanakani urüniwa,+
16 uka urojja putut tuktʼaña, guerratak arnaqasiñ urüniwa,+
jachʼa perqanakamp muyuntat markanak contra ukhamarak esquinankir jachʼa torrenak contra putut tuktʼaña ukat guerratak arnaqasiñ urüniwa.+
17 Nayasti jaqenakarojj llakisiyäwa,
jupanakajj juykhunakjamaw sarnaqapjjani,+
kuna laykutejj Jehová Dios contraw jupanakajj juchachasipjje.+
18 Jehová Diosan colerasiñ urupanjja, janiw jupanakarojj ni qollqepasa ni qoripas salvkaniti.+
Diosan colerasiñapajj ninar uñtasitawa, oraqpachwa nakhantarakini,+
uka urojja wali ajjsarkañ urüniwa, kuna laykutejj oraqen jakir taqe jaqenakaruw Diosajj jiwarayani”.+
2 Leyejj janïr phoqaskipana,
thayamp apata pajar uñtata urojj janïr paskipana,
Jehová Diosan wali colerasiñapajj janïr jumanakjjar jutkipana,+
Jehová Diosan wali colerasiñ urupajj janïr jumanakjjar jutkipana,
3 oraqenkir llampʼu chuyman jaqenaka,* taqe jumanakajj Jehová Diosar thaqapjjam,+
khitinakatejj cheqap leyinakap phoqapkta ukanakajj Diosar thaqapjjam.
Kunatï cheqapäki uk thaqapjjam, llampʼu chuymanïñ* thaqapjjam.
Jehová Diosan wali colerasiñ urupanjja inas jarkʼaqatäpjjchisma.*+
4 Gaza markajj apanukut markäniwa,
Asquelón markajj qʼala tukjatäniwa.+
5 “¡Ay kunakïkani, lamar qota jakʼan jakir jaqenakatjja! ¡Ay kunakïkani, keretita jaqenakan markapatjja!+
Jehová Diosan arunakapajj jumanak contrawa.
Canaán oraqe, filisteonakan oraqepa, jumarojj qʼal nayajj tukjäma,
ukhamat jan khiti jaqes juman ukan utj-jjañapataki.
6 Lamar qota jakʼanakajja, pastoni oraqenakaruw tukjjani,
ukanjja uywa awatirinakatakejj phujunakaw utjani, ovejanakatakejj qala uyunakaw utjarakini.
7 Uka oraqenakajja Judá markat jiltʼir jaqenakatakïniwa.+
Ukanwa jupanakajj manqʼasipjjani.
Arum toqerojja Asquelón markankir utanakanwa iktʼasipjjani.
Kuna laykutejj Jehová Diosapaw jupanakarojj uñjani,
preso apat uñjasipki ukanakarus kuttʼayanjjarakiniwa”.+
8 “Moab+ markan burlasitanakapjja nayajj istʼtwa, ammonitanakan+ jiskʼachatanakapsa istʼaraktwa.
Jupanakajj markajatwa burlasipjje, jachʼa jachʼa tukusaw oraqenakap aparañatak amenazapjjaraki.+
9 Ejercitonakan Jehová Diosapajja, mä arunjja Israelan Diosapajj akham siwa: kunjamtï nayajj cheqpachapun jakkir Diosäktjja,
Moab markajj Sodoma markjam tukuyatäniwa,+
Ammón markajj Gomorra+ markjam tukuyatäniwa,
itapallumpi phoqantat mä lugararu, jayuni mä lugararu, wiñayatak tukjata mä oraqeruw tukjjani.+
Markajat jiltʼirinakaw jupanakar saqueysupjjani,
markajat jiltʼirinakaw oraqep aparapjjani.
10 Jachʼa jachʼa tukupjjatapatjja ukwa katoqapjjani,+
kuna laykutejj ejercitonakan Jehová Diosapan markapatwa jupanakajj burlasipjjäna, jiskʼachapjjarakïnwa.
11 Jehová Diosajj jupanakatak ajjsarkañäniwa,
oraqenkir taqe diosanakaruw chhaqtayani,
markanakankir taqe islanakaw nayraqatapar altʼasipjjani,*+
sapa mayniw pachpa lugarapatpach altʼasini.
12 Etiopía markankir jaqenaka, jumanakajj espadajampi jiwayataw uñjasipjjarakïta.+
13 Jupajj* alay toqeruw* amparap aytani, Asiria markaruw tʼunjarakini.
Nínive markaruw tʼunjani,+ wasarar uñtat qʼala wañsutwa jaytarakini.
14 Uka taypinwa uywanakajj jiptʼasipjjani, kunayman salvaje animalanakaw jiptʼasipjjarakini.
Pelícano jamachʼisa puercoespín sat animalasa tinkurat columnanakap taypinwa arumajj ikipjjani.
Jamachʼinakan cantatapaw* ventanat istʼasini.
Umbralanakajj qʼala tʼunjatäniwa.
Cedrot lurat tablonanakapas qʼala uñstaratäniwa.
15 Akaw jachʼa jachʼa tukuri jupa pachpar confiyasis qontʼasir markajja,
chuymapanjja akham sarakïnwa: ‘Naya sapakïtwa, janiw khitis nayjamajj utjkiti’ sasa.
¡Jichhajj jupar uñjirinakajja wal musparapjjani,
salvaje animalanakan samartʼañ lugaraparuw tukjjarakini!
Taqe khitinakatejj uka marka jakʼa pasapkani ukanakajja khuychʼukipjjaniwa, moqochtʼasipjjarakiniwa”.+
3 ¡Ay kunakïkani, kutkatasiri, qʼañuchata, tʼaqesiyir markatjja!+
2 Uka markajj janiw istʼasiñ munkänti,+ janirakiw kuna cheqañchawsa katoqaskänti.+
Janiw Jehová Diosarojj confiykänti,+ janirakiw Diosaparus jakʼachaskänti.+
3 Uka marka taypinjja principenakapajj jachʼat wararir leonanakjamäpjjewa.+
Juezanakapajja arumanak katuri lobo* sat animalanakjamäpjjewa,
qhepärmanthi tʼuruñatakejja jupanakajj janiw ni mä chʼaksa jaytapkiti.
4 Profetanakapajj jan respetasiri jaqenakäpjjewa, traicioneronakäpjjarakiwa.+
5 Uka marka taypinjja Jehová Diosajj cheqapar uñjir Diosawa,+ jupajj janiw kuna jan walsa lurkiti.
Kunanaktï jupajj Juezjam amtki ukanakjja sapa alwaw yatiyi,+
kunjamtï intejj sapa alwa mistunki ukhama.
Ukampis jan cheqapar sarnaqer jaqejja, janiw phenqʼaskiti.+
6 “Markanakwa nayajj tʼunjayäta, esquinanakapankir torrenakapajja qʼala tʼunjatänwa.
Jan khitins pasañapatakejj callenakapwa nayajj tʼunjayäta.
Markanakapajj laqayar tukuyatäpjjänwa, jan jaqeni jaytatarakïnwa.+
7 Jupan utjäwipajj jan tukjatäñapatakejja,+
nayajj akham sayätwa: ‘Cheqpachapuniw jumajj nayar ajjsaritäta, cheqañchatajj katoqasirakïtawa’+ sasa.
Kuna laykutejj uka markarojj nayajj taqe ukanakat cuenta mayiñajawa.*
Ukampis jupanakajj jan walinak lurañjja jukʼampiw munasipkakïna.+
8 Jehová Diosajj akham siwa: ‘Saqueysuñatak* sartaskä uka urkamajja,
pacienciampi suytʼapjjeta,+
kuna laykutejj akwa nayajj Juezjamajj amtawayta: markanakar tantachthapiña ukhamarak reinonakar* tantachthapiña,
ukhamat colerasitaj jupanakar uñachtʼayañajataki, wal colerasitaj uñachtʼayañajataki.+
Colerasitajajj ninar uñtasitawa, oraqpachwa nakhantarakini.+
9 Markanakan arupjja mä qʼoma aruruw cambiäjja,
ukhamat taqe jupanakajj Jehová Diosan sutipat artʼasipjjañapataki,
10 Etiopía markankir jawiranak toqetpachwa nayatakejj mä regalo apanirapipjjetani,
khitinakatï ruwtʼasipkitu, mä arunjja aywitatat markajaw nayatakejj mä regalo apanini.+
11 Uka urunjja, taqe kunanaktï jumajj naya contra saytʼasiñatakejj lurkayäta ukanakatjja,+
janiw phenqʼachat uñjaskätati,
kuna laykutejj khitinakatï jachʼa jachʼa tukusin jachʼañchasipki ukanakarojja juma taypit chhaqtayäwa,
sagrado qollujanjja jumajj janiw mayampis jachʼa jachʼa tukjjätati.+
12 Humilde chuymani, altʼat chuymani* markaruw juma taypin jiltʼayäjja,+
jupanakaw Jehová Diosan sutipar imantasipjjani.
13 Khitinakatï Israel markat jiltʼapkani ukanakajja,+ janiw kunatï jan cheqapäki uk lurapkaniti,+
janiw kʼarinaksa parlapkaniti, janirakiw lakanakapampejj jaqenakar engañjapkaniti.
Jupanakajj manqʼasipjjaniwa, iktʼasipjjarakiniwa, janiw kunas jupanakarojj ajjsaraykaniti”.+
14 ¡Sionan phuchapa, kusisiñat arnaqasim!
¡Israel marka, Diosar jachʼañcham!+
¡Jerusalenan phuchapa, kusisim, taqe chuyma kusisirakim!+
15 Tʼaqesiykayätam uka castigjja Jehová Diosajj jumat apaqjjewa.+
Enemigomarojj jayaruw khitanukjje.+
Israelan Reyipaw jumampïski, mä arunjja Jehová Diosaw jumampïski.+
Janiw mayampis jan waltʼäwit ajjsarjjätati.+
16 Uka urunjja Jerusalenajj aka arunakwa istʼani:
“Sion, jan ajjsaramti.+
Jan desanimasimti.
17 Jehová Diosamaw jumampïski.+
Jupajj wali chʼamaniwa, jupaw jumarojj salvätam.
Jumat kusisiniwa, wal kʼuchisirakini.+
Jumar munasitap laykojja jupajj amukïniwa.*
Jumat kusisiniwa, kusisiñatwa arnaqasirakini.
18 Fiestanakamar jan sarapjjatapat llakitäpki ukanakaruw nayajj tantachthapëjja,+
jupanakajj preso katuntatäpkäna ukhajja, jaqenakajj jupanakatwa burlasipjjäna.+
19 Uka tiemponjja, jumar tʼaqesiyapktam ukanak contraw nayajj saytʼasëjja,+
cojnaqerinakaruw nayajj salväjja,+
aywitatätapki ukanakaruw tantachthapirakëjja.+
Kawkjanakantï jupanakar phenqʼachapkäna taqe uka lugaranakanjja,
jupanakarojj jachʼañchayäwa, wali uñtʼatäpjjañapatakiw yanaptʼarakëjja.
20 Uka tiemponjja jumanakarojj kuttʼayanipjjämawa,
uka tiemponjja jumanakarojj tantachthapipjjämawa.
Kunapachatï nayajj preso apatanakamarojj juman uñjkat kuttʼayankä ukhajja,
oraqenkir taqe markanakan wali uñtʼatäñamataki ukhamarak jachʼañchatäñamatakiw+ yanaptʼäma” siw Jehová Diosajja.+
Uka sutejja, “Jehová Diosaw imanti (wali valoranit uñji)” sañ muni.
Amuyatajja, kunanakatï idolanakar adorañatakejj (yupaychañatakejj) luraski, kuna cosasanakatï apnaqaskaraki ukanakatwa parlaski.
Jan ukajja, “yupaychirinakat”.
Jan ukajja, “uta patjjanakana”.
Jan ukajja, “umbralar”. Ukajja, inas reyin tronopan plataformapat parlaskchi.
Amuyatajja, Mactés lugarajj Jerusalenankir mä lugaränwa, Chawlla Punku jakʼankarakïnwa.
Jan ukajja, “comerciantenakajj”.
Hebreo arunjja, “amuktʼayatäpjjewa”.
Jan ukajja, “khitinakatï wakullanakankir vinon qoñchupjam jan onjjtapki ukanakarusa”.
Jan ukajja, “tukjäwin suynatapajj wali ajjsarkañäniwa”.
Jan ukajja, “jañchinakapas”.
Jan ukajja, “humilde chuyman jaqenaka”. “Llampʼu chuymanïña” siski uk glosarion liytʼäta.
Jan ukajja, “humilde chuymanïñ”.
Jan ukajja, “imantatäpjjchisma”.
Hebreo arunjja, “jikʼinukutäniwa”.
Jan ukajja, “adorapjjani (yupaychapjjani)”.
“Jupajj” sasinjja, Diosatwa parlaski.
Jan ukajja, “norte toqeruw”.
Ukajja, inas “thayan suynatapata jan ukajj salvaje animalan wararitapat” parlaskchi.
Uka animalajj qamaqer jan ukajj zorror uñtatawa, qamaqet sipansa jachʼarakiwa.
Jan ukajja, “castigañajawa”.
Ukajja, “Testigot” sasaw jaqokipasirakispa.
Jan ukajja, “gobiernonakar”.
Jan ukajja, “mayachtʼat adorapjjañapataki (yupaychapjjañapataki)”.
Jan ukajja, “modestia.
Jan ukajja, “sumakiw jikjjatasini; chuymas chuymäniwa”.