MALAQUÍAS

1 Akasti Diosan arsut arunakawa.

Jehová Diosajja Malaquías* profeta taypejj aka arunakwa Israel markarojj säna:

2 “Nayajj munasiñwa uñachtʼayapjjsma”+ siw Jehová Diosajja.

Ukampis jumanakajj akham sapjjtawa: “¿Kunjamarak munasiñ uñachtʼayapjjestasti?” sasa.

Jehová Diosajj akham siwa: “¿Janit Esaú chachajj Jacobun jilapäkänjja?+ Nayajj Jacoburojj munasiyätwa, 3 ukampis Esaurojj uñisiyätwa.+ Jupan qollunakapjja chʼusa jaytanukut+ qollunakaruw nayajj tukuyayäta, herenciapsa wasarankir chacal sat animalanakatakiw jaytayäta”+ sasa.

4 “Edom markajj akham siwa: ‘Nanakajj qʼala tukjatäpjjtwa, ukampis nanakajj kuttʼanipjjäwa, wasitampiw laqayanak saytʼayapjjäjja’ sasa. Ejercitonakan Jehová Diosapajj akham siwa: ‘Jupanakajj saytʼayapjjaniwa, ukampis nayajj allthapïwa, jaqenakas akham sasaw uka lugararojj sapjjani: “Jan walinak luririnakan oraqepa, Jehová Diosan wiñayatak juchañchat marka”+ sasa. 5 Jumanakajj pachpa nayranakamampiw uk uñjapjjäta, akham sapjjarakïtawa: “Jehová Diosajj Israel markpachan jachʼañchatäpan” sasa’”.

6 “Nayaw ejercitonakan Jehová Diosapätjja, nayan sutij jiskʼachir sacerdotenakarojj+ akham sistwa: ‘Mä wawajja awkiparojj respetiwa,+ servirejja patronaparojj respetarakiwa. Nayatejj jumanakan awkimästjja,+ ¿kunatsa jumanakajj nayar jan respetapkista?+ Nayatejj jumanakan patronamästjja, ¿kunatsa jumanakajj nayar jan ajjsarapkista?’* sasa.

”‘Ukampis jumanakajj akham sapjjtawa: “¿Kunjamarak nanakajj sutim jiskʼachapjjtsti?” sasa’.

7 ”‘Altarajan qʼañuchat manqʼañanak* loqtasaw sutij jiskʼachapjjtajja’.

”‘Jumanakajj akham sapjjtawa: “¿Kunjamarak nanakajj jumar qʼañuchapjjsmasti?” sasa’.

”‘Akham sasaw qʼañuchapjjestajja: “Jehová Diosan mesapar+ respetañajj janiw wakiskiti” sasa. 8 Kunapachatï jumanakajj mä juykhu animal sacrificiotak apanipkta ukhajja, “akajj janiw kuna jan walïkisa” sasaw sapjjtajja. Kunapachatï mä cojo animala jan ukajj mä usut animal apanipkta ukhajja, “akajj janiw kuna jan walïkisa”+ sasaw sapjjtajja’”.

Ejercitonakan Jehová Diosapajj akham siwa: “Mirä amp suma, ukanak gobernadoramar churam, ¿jupajj jumamp kusisitäniti? ¿Kusisitat katoqätamjja?” sasa.

9 “Jichhajj mirä amp suma, Diosar ruwtʼasipjjam, jiwasar sum uñjañapatak mayipjjam. Jumanakatejj uka kasta ofrendanak loqtapjjäta ukhajja, ¿jumanakat maynirus kusisitat katoqapjjätamjja?” siw ejercitonakan Jehová Diosapajja.

10 “¿Khitis jumanakat punkunak gratisak jistʼantaspa?+ Janiw jumanakajj altarajan ninapsa gratisak naktayapkasmati.+ Janiw nayajj jumanakampejj kusisitäkti, apanipkta uka sacrificionakat janiw ni mayas kusisiykituti”+ siw ejercitonakan Jehová Diosapajja.

11 “Inti jalsut inti jalantkamajja nayan sutijajj markanak taypin jachʼäniwa.+ Taqe lugaranakanwa sacrificionakajj jewqʼeyasini, nayan sutijatakiw ofrendanak apanipjjani, ukanakajja qʼoma regalonakäniwa. Kuna laykutejj nayan sutijajj markanak taypinjja jachʼäniwa”+ siw ejercitonakan Jehová Diosapajja.

12 “Ukampis jumanakajj ‘Jehová Diosan mesapajj qʼañuchatawa, mesa pantjjankir ofrendanakasa manqʼañanakasa janiw kuna valoranïkisa’+ sasaw nayan sutij qʼañuchapjjtajja.*+ 13 Jumanakajja ‘ukampejj qaritäjjapjjtwa’ sasaw sapjjtajja. Taqe kunsa jiskʼachasaw uñchʼukipjjtajja” siw ejercitonakan Jehová Diosapajja. “Jumanakajj lunthatsut animalanaka, cojo animalanaka, usut animalanakwa apanipjjtajja. Jïsa, ¡ukanakwa regalot apanipjjtajja! ¿Uka ofrendanak jumanakat katoqañajäspati?”+ siw Jehová Diosajja.

14 “Engañjir mä jaqetï uywanakap taypin mä kʼumar orqo animalanïchi, ukampis mä promesa lurarakchi, Jehová Diosarojj jan kʼumaräki uka animal loqtarakchi ukhajja, uka jaqejj maldisitäpan. Kuna laykutejj nayajj jachʼa Reyïtwa,+ markanak taypinjja sutijajj ajjsarkaña respetkaña sutiwa”+ siw ejercitonakan Jehová Diosapajja.

2 “Sacerdotenaka, jichhajj mä mandamiento jumanakar churapjjsma.+ 2 Jumanakatï jan istʼañ munapkäta, janirak sutijarus taqe chuyma jachʼañchapkäta ukhajja, nayajj maldisipjjämawa,+ bendicionanakamsa maldicionanakaruw tukuyäjja.+ Jïsa, niyakejjay jumanakajj taqe chuyma jan istʼapkstajja, bendicionanakjja maldicionanakaruw tukuyta” siw ejercitonakan Jehová Diosapajja.

3 “Luratanakam kawsajja, jumanakajj satapkta uka jathjja qʼal tukjäjja.+ Ajanunakamarus wanumpiw willkatapjjäma, fiestanakaman sacrificapkta uka uywanakan wanupampiw willkatapjjäma, wanu montonar liwtatäpjjarakïtawa.* 4 Ukhamatwa jumanakajj ak yatipjjäta: nayaw aka mandamientjja jumanakar churapjjsma, ukhamat Leví tribumpi pacto luratajajj utjaskakiñapataki”+ siw ejercitonakan Jehová Diosapajja.

5 “Nayajj jupamp lurkayäta uka pactojja, jakañataki sumankañatak pactönwa, ukanakjja nayar ajjsarañapatakiw* churayäta. Jupajj ajjsaritänwa, jïsa, sutijarojj wali respetompiw uñjäna. 6 Jupasti kunatï cheqäki ukwa yatichäna,+ janipuniw kunatï jan walïki ukjja parlkänti. Jupasti sumwa nayampejj apasïna, naya nayraqatansa cheqaparuw sarnaqäna,+ walja jaqenakaruw jan wali thakit kuttʼayanirakïna. 7 Kuna laykutejj mä sacerdoten lakapajja Diosar uñtʼañ toqetwa jaqenakarojj yatichañapa. Jaqenakasti sacerdoteruw leyit* jisktʼasipjjañapa,+ kuna laykutejj sacerdotew ejercitonakan Jehová Diosapan yatiyiripajja.

8 ”Ukampis jumanak pachpaw thakit saranukupjjtajja. Jumanak kawsaw waljanejj ley pʼakintapjje.*+ Nayajj levitanakampi lurkayäta uka pactwa jumanakajj pʼakintapjjtajja”+ siw ejercitonakan Jehová Diosapajja. 9 “Ukatwa taqpach marka nayraqatan jiskʼachayapjjäma, humilljayapjjarakïma, kuna laykutejj jumanakajj janiw thakinakaj arkapkayätati, juzgapjjayäta ukhas janiw cheqapar uñjapkayätati”.+

10 “¿Janit taqenis mä sapa awkinïktanjja?+ ¿Janit taqenis mä sapa Diosan luratäktanjja? Ukhamajj ¿kunatarak jiwaskamajj traicionastansti,+ nayra awkinakasan pactop jiskʼachasasti? 11 Judá markajj engañonakwa luri. Israel markansa Jerusalén markansa kunatï ajjtaskañäki ukwa lurapjje. Kuna laykutejj Judá markajja kunatï santöki ukar* munasir Jehová Diosan sutipwa jiskʼachi,+ jupajj yaqha markankir diosar adorir* warmimpiw casarasi.+ 12 Jehová Diosajja khitinakatï uk lurapki ukanakarojj Jacobun carpanakapat qʼalwa chhaqtayani, khitïskpansa* chhaqtayaniwa, ejercitonakan Jehová Diosaparojj mä ofrendsa churkchinejja chhaqtayaniwa”.+

13 “Jumanakajj yaqhwa lurapjjaraktajja, ukham lurapjjatamatjja Jehová Diosan altarapajj jachanakampi, warariñanakampi, llakisiñanakampi phoqtʼatawa, ukatwa jupajj ofrendanakamarojj jan sum uñj-jjeti, janirakiw kunanaktï churapkta ukarus sum uñj-jjeti.+ 14 Akham sapjjaraktawa: ‘¿Kunata?’ sasa. Kuna laykutejj waynäkasin casaraskta uka esposamar engañjatamatjja Jehová Dios pachpaw testigojja. Pacto taypi mayachatäkta uka esposamaruw engañjtajja, jupajj juman compañeramäkchisa engañjtawa.+ 15 Ukampis jumanak taypit yaqhepanakajja janiw chuymanakapan ukham lurañ amtapkänti. Jupanakajja wawanakapajj Diosan markapankirïpjjaspa ukwa munapjjäna. Jupanakajja Diosan espiritupamp irpataw taqe kuns lurapjje. Jichhasti jumanakajj kunjam chuymanïpjjtasa uka toqet wal amuyasipjjam. Waynäkasin casaraskta uka esposamarojj jan engañjamti. 16 Kuna laykutejj divorciasiñarojj nayajj uñistwa”+ siw Israelan Jehová Diosapajja. “Nuwasir jaqerojja uñistwa” siw ejercitonakan Jehová Diosapajja. “Jumanakajj kunjam chuymanïpjjtasa uk wal amuyasipjjam, jan engañjirïpjjamti.+

17 ”Arunakamampejja Jehová Diosarojj qariyjjapjjtawa.+ Ukampis jumanakajj akham sapjjtawa: ‘¿Kunjamarak qariyapjjtsti?’ sasa. Jumanakajj akham sasaw qariyapjjtajja: ‘Taqe khitinakatï jan wal lurapki ukanakajja Jehová Dios nayraqatan suma jaqet uñjatäpjjewa, jupasti jupanakampejj kusisitarakiwa’+ sasa. Jan ukajj akham sasaw qariyapjjaraktajja: ‘¿Kawkinkarak cheqapar uñjir Diosasti?’ sasa”.

3 “Nayajj yatiyirijaruw khitanëjja, jupaw naya nayraqatan thaki wakichani.*+ Jumanakajj thaqapkta uka cheqpach Tatitojj akatjamatwa templopar jutani.+ Jumanakajj wali kusisit suyapkta uka pacton yatiyiripajj jutaniwa. Jupajj cheqpachapuniw jutani” siw ejercitonakan Jehová Diosapajja.

2 “Ukampis jupajj jutkani uka urojj ¿khitis aguantani? Jupajj uñstankani ukhajj ¿khitis saytʼatäskakini? Jupajj metal qʼomachir jaqen ninapjamäniwa, isi tʼajjsurinakan lejiapjamäniwa.*+ 3 Jupajja qollqe metal refiniri, qʼomachiri jaqjamaw qontʼasini,+ Leví chachan wawanakaparuw qʼomachani. Jupanakarojj qorirjama qollqerjamaw refinani,* jupanakasti Jehová Diosatakejj cheqap chuymampi mä ofrenda loqtir jaqenakäpjjaniwa. 4 Judá markampina Jerusalén markampin ofrendapajj cheqpachapuniw Jehová Diosarojj kusisiyani, nayra urunakanjama, nayra maranakanjamwa kusisiyani.+

5 ”Nayajj jumanakar juzgañatakiw jutäjja, layqanakarusa,+ adulterio jucha luririnakarusa, falso juramentonak luririnakarusa,+ sueldot trabajiri jaqenakaru,+ viudanakaru, jan awkin wajcha wawanakar*+ engañjirinakarusa, extranjero jaqer jan yanaptʼañ munirinakarus+ jankʼakiw juzgäjja. Uka jaqenakajj janiw nayar ajjsarapkituti” siw ejercitonakan Jehová Diosapajja.

6 “Nayaw Jehová Diosätjja, janiw nayajj cambyir Diosäkti.*+ Jumanakajj Jacobun wawanakapäpjjtawa, ukatwa jan tukjatäpktati. 7 Nayra awkinakaman urunakapatpachwa jumanakajj mandamientonakajat saranukupjjtajja, janirakiw phoqapktati.+ Nayan ukar kuttʼanipjjam, nayasti jumanakan ukaruw kuttʼanëjja”+ siw ejercitonakan Jehová Diosapajja.

Ukampis jumanakajj akham sapjjtawa: “¿Kunjamarak nanakajj juman ukar kuttʼanipjjästi?” sasa.

8 “¿Mä jaqejj Diosar lunthataspati? Jumanakajj nayarojj lunthatasipkistawa”.

Ukampis jumanakajj akham sapjjtawa: “¿Kunjamarak nanakajj jumar lunthatapjjsmasti?” sasa.

“Jumanakajj diezmonaka, contribucionanak jan apanisaw lunthatapjjestajja. 9 Cheqansa jumanakajj maldisitäpjjtawa,* kuna laykutejj lunthatasipkistawa. Jïsa, taqe markpachaw ukham luraski. 10 Phoqatpach diezmo templor* apanipjjam,+ ukhamat utajan manqʼañanakajj utjañapataki.+ Mirä amp suma, aka toqet nayar yantʼapjjeta: nayasti alajjpachanakan punkunakapwa jumanakatak jistʼaräjja,+ bendicionanakwa jumanakjjarojj warjjatanëjja, jan kunas jumanakar faltañapkama”+ siw ejercitonakan Jehová Diosapajja.

11 “Nayasti jumanak laykuw tʼiju tʼijunakar* toqenoqäjja, ukanakajj janiw oraqenakaman achunakap tukjapkaniti, janirakiw camponakamankir uvas yapunakamajj jan achuni quedaskaniti”+ siw ejercitonakan Jehová Diosapajja.

12 “Taqe markanakaw jumanakarojj kusisit jaqenaka sapjjätamjja,+ kuna laykutejj jumanakan oraqemajj kusiskañ oraqeruw tukuni” siw ejercitonakan Jehová Diosapajja.

13 “Naya contra parlapkta uka arunakajj jan walipuniwa” siw Jehová Diosajja.

Ukampis jumanakajj akham sapjjtawa: “¿Kunapacharak nanakajj juma contra parlasipjjtsti?”+ sasa.

14 “Jumanakajj akham sapjjtawa: ‘Diosar serviñajj inamayakiwa.+ ¿Luräwinakasampi jupatak phoqasajj kunrak jikjjattansti? ¿Ejercitonakan Jehová Diosapan nayraqatan llakit sarnaqasas kunrak jikjjattansti? 15 Jichhasti jachʼa jachʼa tukurinakarojj kusisit jaqenakarjamaw uñjtanjja. Ukhamarus jan walinak lurir jaqenakatakejja taqe kunas sumaw mistu.+ Jupanakajj Diosarojj yantʼapjjewa, ukham lurapjjatapatjja janiw kuna jan walinsa uñjasipkiti’ sasa”.

16 Uka tiemponjja khitinakatï Jehová Diosar ajjsarapkäna ukanakajj jupanakkamaw parlapjjäna, sapa mayniw compañeropamp parläna, Jehová Diosasti jupanakarojj istʼaskänwa, kuntï sapkäna ukjja wali atencionampiw istʼaskäna. Jupa nayraqatansti mä librow qellqantasïna,+ ukhamat Jehová Diosar ajjsaririnakaru, sutipat lupʼirinakar* amtañataki.+

17 Ejercitonakan Jehová Diosapajj akham siwa: “Kuna uruntï jupanakarojj munat markajar tukuykä+ ukhajja, jupanakajj nayan markajäpjjaniwa.+ Nayasti jupanakat sinttʼasïwa, kunjamtï mä jaqejj jupar servir wawapat sinttʼaski ukhama.+ 18 Jumanakajj mayampiw ak uñjapjjäta: cheqapar sarnaqer jaqempi jan wali jaqempejj janiw igualäpkiti,+ Diosar servir jaqempi Diosar jan servir jaqempejj janiw igualäpkiti” sasa.

4 Ejercitonakan Jehová Diosapajj akham siwa: “Mä hornor uñtat wali juntʼu uruw jutaski,+ uka urunjja jachʼa jachʼa tukuri taqe jaqenakasa jan walinak lurir jaqenakasa waña pajar uñtatäpjjaniwa. Niya jutañampïski uka urojja, cheqpachapuniw jupanakarojj qʼal tukjani, janiw ni mä saphisa ni mä ramas jaytatäkaniti. 2 Ukampis justicia utjayir intejja jumanakjjaruw qhantʼani, khitinakatï sutijar respetapkta* ukanakjjaruw qhantʼani, uka intin qhanapasti qollapjjarakïtamwa. Jumanakasti likʼintayat torillonakjamaw thoqnaqapjjäta” sasa.

3 Ejercitonakan Jehová Diosapajj akham siwa: “Jumanakajj jan wali jaqenakarojj takichasipjjätawa, kunapachatï nayajj luräwijampi phoqkä uka urojja, jupanakajj kayu plantanakamankir laqʼa polvor uñtasitäpjjaniwa.

4 ”Moisés servirijan Leyip amtapjjam, mandamientonaksa kunanaktï nayajj Juezjam amtkta ukanaksa Horeb qollunwa nayajj churayäta, ukhamat Israel markpachajj uk phoqañapataki.+

5 ”Jehová Diosan jachʼa ukhamarak musparkañ urupajj janïr jutkipanjja,+ Elías profetaruw+ nayajj jumanakan ukar khitanëjja. 6 Jupajja awkinakan chuymapjja wawanakan chuymaparuw tukuyani,+ wawanakan chuymapjja awkinakan chuymaparuw tukuyarakini, ukhamat nayajj jan jutañajataki, janirak oraq qʼal tukjasin jan waltʼayañajataki” sasa.

(Hebreo-Arameo Arunakat Qellqatanakajj akjaruw tukuyi, akat uksarojja Griego Arut Qellqatanakaw qallti).