1 TIMOTEO
TIMOTEOR NAYRÏR QELLQAT CARTA

1 Naya Pablojja suytʼañ churkistu uka Cristo Jesusana ukhamarak jiwasar Salviri Diosan arsutaparjamaw Cristo Jesusan apostolopätjja.+ 2 Nayasti juma Timoteoruw*+ qellqansma. Jumajj Diosar confiyatamatjja* cheqpach wawajäkasmas+ ukhamätawa:

Dios Awkina ukhamarak Cristo Jesús Tatitusan jachʼa munasiñapasa, wali khuyapayasiñapasa, sumankañapasa jumampïpan.

3 Naya Pablojj Macedoniar niya sarañampïskayäta ukhajja, Éfeso markan quedasiñamatakiw nayajj chʼamañchtʼayäsma, ukhamarakiw jichhajj yaqhepanakar ewjjtʼañamatak chʼamañchtʼansma, ukhamat jupanakajj kʼari yatichäwinak jan yatichapjjañapataki, 4 falso cuentonakarusa+ nayra awkinakan sutinakap yatjjatañarus jan yäqapjjañapataki. Ukanakajj janiw kunatakis walïkiti,+ janirakiw Diosatsa jutkiti ni Diosar confiyañatakis* yanapkiti, antisakiw jaqenakarojj kunatï jan cheqäki ukanak parlayi. 5 Cheqansa nayajj aka ewjjtʼanak churta, ukhamat jiwasajj qʼoma chuymampi suma concienciampi munasiñasataki,+ Diosar confiyasa*+ jan kʼari chuymanïsa munasiñasataki. 6 Taqe ukanakat saranukupjjatap laykuw yaqhepanakajj loqher uñtat parlapjje.+ 7 Jupanakajj leyit yatichirïñ+ wal munapjje, ukampis kunanaktï parlapki, wal arjjatapkaraki ukanakjja janiw amuyapkiti.

8 Jiwasajj yattanwa, maynejj Ley cheqapar apnaqki ukhajja, Leyejj wali sumawa. 9 Leyejj janiw cheqapar sarnaqer jaqenakatak uskutäkiti, jan ukasti ley pʼakintirinakataki,+ kutkatasirinakataki, jan wal sarnaqerinakataki, juchararanakataki, mayninakar jaytjir jaqenakataki,* kunatï santöki uk qʼañuchirinakataki, awkipar jiwayirinakataki, taykapar jiwayirinakataki, jaqe jiwayirinakataki, 10 qʼañu jucha* luririnakataki, chachapura ikintasirinakataki, secuestradoranakataki, kʼarisiri jaqenakataki, juramento pʼakintirinakataki,* kunanakatï cheqa* yatichäwinak conträki ukanak luririnakatakiwa.+ 11 Uka suma yatichäwinakajj kusisiri Diosan kʼajkir suma yatiyäwinakapatwa juti, nayajj uka suma yatiyäwinak yatiyañataki uttʼayatätwa.+

12 Cristo Jesús Tatitusarojj wal nayajj yuspärta, jupaw nayarojj chʼam churitu, juparakiw suma phoqer jaqerjam uñjasajj jupar serviñatak uttʼayitu.+ 13 Nayrajj Dios contra jan wal parliri, markapar jan waltʼayañatak arknaqeri, jan respetasiri ukhamäyätwa.+ Ukampis jan yatisaw ukanak lurayäta, Diosar jan confiyataj* layku, ukhampachas Cristojj nayat wal khuyaptʼayasitu. 14 Cheqansa Tatitusajj wal nayat khuyapayasitu, jupar confiyañajatakis* ukhamarakiw wal yanaptʼitu, Cristo Jesusan arkiripätaj laykurakiw wali munasiñamp uñjitu. 15 Aka arunakajj cheqawa, taqe chuyma creykañarakiwa: Cristo Jesusajj jucharar jaqenakar salvañatakiw aka mundor jutäna.+ Taqe uka jucharar jaqenakatjja, nayaw jukʼamp juchararätjja.+ 16 Ukhamäkchisa jupajj khuyapayasiñampiw nayar uñjitu, ukhamat Cristo Jesusan pacienciapajj naya wali jucharar jaqen qhan amuyasiñapataki. Jupaw nayar mä ejemplot uskusitu, khitinakatejj wiñay jakañ katoqañatak jupar confiyapkani* ukanakajj nayat yateqasipjjañapataki.+

17 Ukhamajj jan tukusiri+ wiñay Reyejja,+ wiñayans wiñayapataki honra katoqpan, jachʼañchatarakïpan, jupajj jan uñjkañawa,+ jupa sapakiw Diosajja.+ Amén.

18 Timoteo nayan wawaja, jumjjat yatiyaskäna uka profecía arunakarjamaw nayajj akanak ewjjtʼsma, ukhamat uka profecía arunak laykojj mä soldador uñtat suma nuwasïwin nuwasiskakiñamataki.+ 19 Ukham lurkasajja, Diosar confiyaskakim,* suma conciencianïñatakis chʼamachasiskakim.+ Yaqhepanakajj concienciapar jan yäqapjjatap laykojja, kunjamtï mä barcojj umar chhaqarantkejja, ukhamarakiw Diosar confiyañan* aynachtʼapjje. 20 Himeneompi+ Alejandrompejj ukham jaqenakäpjjewa, ukatwa nayajj jupanakar Supayan* amparapar katuyta,+ ukhamatwa nayajj jupanakar cheqañchta, Diosar jan jiskʼachapjjañapataki.

2 Nayraqatajj taqeniruw nayajj chʼamañchtʼapjjsma, Diosar ruwtʼasipjjañamataki, oración lurapjjañamataki, mayninakatakis mayipjjañamataki, yuspärapjjañamataki. Taqe ukanakjja lurapjjañamawa, taqe kasta jaqenakataki, 2 reyinakataki, taqe jachʼa cargoninakataki,*+ ukhamat jiwasajj sumaki, Dios chuyma, taqe kunsa sum phoqasa jakañasataki.+ 3 Taqe ukanakajj jiwasar Salviri Dios nayraqatanjja wali sumawa, kusiskañarakiwa,+ 4 Diosajj taqe kasta jaqenakan salvasipjjañapa+ ukhamarak kunatejj cheqäki uk sum uñtʼapjjañapwa muni. 5 Kuna laykutejj mä Diosakiw utji,+ Diosampi jaqenakampi+ pactor mantapjjañapatakis mä yanapirikiw* utji,+ jïsa, mä jaqekiw utji, jupajj Cristo Jesusawa.+ 6 Jupaw jakäwip churäna, ukhamatwa ukhat ukha churasajj taqe* jaqenakaru juchat kutsuyäna.*+ Jaqenakasti tiempoparuw uka toqet yatiyapjjani. 7 Ukanak yatiyañatakiw+ Diosajj mä yatiyirjama, mä apostoljam nayar uttʼayitu,+ yaqha markanakan yatichiripjama,+ ukhamat Diosar confiyañjjata,* kunatï cheqäki ukanakjjata yatichañataki. Nayajj cheq parlaskta, janiw kʼariskti.

8 Chachanakajj taqe cheqansa oración lurasipkakiñapwa nayajj munta, Diosat jan jitheqtasin amparanak loqtasa,+ jan colerasa,+ jan chʼajjwasa.+ 9 Warminakajj ukhamarakiw sum isthaptʼasis kʼachachtʼasipjjañapa, altʼat chuymampi,* wali amuyumpi.* Janiw ñikʼutanakapjja kunayman kʼanatanakampi* kʼachachasipjjañapäkiti, janirakiw qorimpisa, ni perlanakampisa, ni jila alani isinakampis kʼachachasipjjañapäkiti,+ 10 jan ukasti Dios chuyma warminakjamaw+ suma luräwinakampi kʼachachasipjjañapa.

11 Mä warmejj amukiw* yateqañapa, taqe chuymaw sujetasiñaparaki.*+ 12 Warmejj janiw yatichañapäkiti, janirakiw warmejj chachar apnaqañapäkiti, jan ukasti jupajj amukïñapawa.*+ 13 Kuna laykutejj Diosajj Adanaruw nayraqat luräna, ukjjaruw Evar lurarakïna.+ 14 Ukhamarus janiw Adanajj engañjatäkänti, jan ukasti warmiw qʼala engañjatänjja,+ ukhamatwa jupajj juchar purtʼasïna. 15 Warmitakejja wawanïñajj walïspawa, ukaw juparojj jan walinakar jan purtʼasiñapatakejj jarkʼaqani.+ Jupatejj* Diosar confiyasa,* munasisa, Dios nayraqatansa santa warmit uñjata, wali amuyumpi* sarnaqaskakinejja,+ jupajj jarkʼaqatäniwa.

3 Aka arunakajj wali confiykañawa: maynitejj ancianot*+ serviñatak wal chʼamachasiskchejja, mä suma luräwi katoqañwa jupajj muni. 2 Ukhamasti ancianojj sum sarnaqañapawa, ukhamat jupatjja jan khitis jan wal parlañapataki, mä sapa warminikïñapawa, janiw kunansa jiljañapäkiti, wali amuyumpiw* kuns lurañapa,+ taqe kunsa suma lurirïñapawa,* katoqtʼasirïñapawa,*+ yatichañatakis wakichatäñapawa,+ 3 janiw machirïñapäkiti,+ janiw nuwasirïñapäkisa,* jan ukasti amuytʼirïñapawa,+ janiw chʼajjwirïñapäkiti,+ janirakiw qollqe chuymäñapäkisa.+ 4 Familiaparus sum pʼeqtʼañapawa,* wawanakapas istʼasiri suma sarnaqeri ukhamäpjjañapawa.+ 5 (Maynitejj familiapar jan sum pʼeqtʼañ* yatkchejja, ¿kunjamaraki Diosan congregacionaparojj pʼeqtʼaspasti?). 6 Janiw machaq creyentëñapäkiti,+ ukhamat jan jachʼa jachʼa tukuñapataki, janirak kunjamtï Diablojj juchañchatäki ukham juchañchatäñapataki. 7 Khitinakatejj jan congregacionankapki uka jaqenakas jupjjat sum parlapjjañapawa,+ ukhamat jiskʼachat* jan uñjasiñapataki, Diablon trampaparus jan jaltʼañapataki.

8 Siervo ministerialanakajj* responsable jaqëpjjañapawa, janiw may may parlirïpjjañapäkiti,* janiw vinjja jiljas umirïpjjañapäkiti, janiw qollqe chuymäpjjañapäkiti, janirakiw kunatï jupanakatak walïki ukak thaqerïpjjañapäkiti.+ 9 Diosan imantat amtapatsa, mä arunjja Diosar confiyañatsa* janiw jitheqtapjjañapäkiti, qʼoma conciencianïpjjañapawa.+

10 Ukhamarus jupanakajj luräwinakampi phoqapjjaspati janicha ukaw nayraqat yantʼasiñapa, jupanakatejj jan khitinsa juchañchkaya sarnaqapjjchejja,+ siervo ministerialanakjamajj* servipjjaspawa.

11 Warminakajj responsable warminakäpjjañaparakiwa, janiw kʼarintirïpjjañapäkiti,+ janirakiw kunansa jiljapjjañapäkiti, taqe kunansa suma phoqerïpjjañapawa.+

12 Siervo ministerialanakajj* mä sapa warminikïpjjañapawa, wawanakaparusa familianakaparusa sum pʼeqtʼapjjañapawa. 13 Kawkïr chachanakatejj sum servisipki ukanakajja, taqeninsa suma uñjatäpjjewa, Cristo Jesusar confiyapjjatapsa* jan ajjsartʼasaw qhan parlapjjaraki.

14 Nayajj jumar wal uñjañ munsma, ukampis kapasakiw jan jankʼak jutkiristti, ukatwa akanak qellqansma, 15 ukhamat kunjamsa Diosan utapan sarnaqañama uk yatiñamataki,+ uka utajj jakkir Diosan congregacionapawa, ukarakiw kunatï cheqäki ukan columnapasa katjjäsiripasa. 16 Cheqansa kunatï Dios chuymäñjjat imantatäki ukajj wali jachʼawa: ‘Jesusajj mä jaqeruw tuküna,+ espiritur tukusajj cheqapar sarnaqerit uñjatänwa,+ angelanakaruw uñstarakïna,+ yaqha markanak taypinsa jupatjja yatiyasirakïnwa,+ aka mundonkir jaqenakas juparojj creyipjjänwa,+ alajjpachansa jachʼañchasaw katoqapjjarakïna’.

4 Diosan amuytʼayat arunakapanjja wali qhanaw parlaski:* jutir urunakanjja yaqhepanakajj kawkïr yatichäwinakarutï creyktan ukat saranukupjjaniwa,* demonionakan kʼari arunakapampiru+ yatichäwinakapampir istʼasaw saranukupjjani, 2 kʼari chuymani* jaqenakan kʼari arunakaparuw istʼapjjarakini.+ Uka kʼari chuyman jaqenakan conciencianakapajj qʼala tunuratawa, parintat hierromp naksutäkaspas ukhama. 3 Uka jaqenakajj casarasiñsa+ yaqhep manqʼanak manqʼañsa jarkʼapjjewa,+ ukampis uka manqʼanakajj Diosan luratawa,+ ukhamat Diosar confiyirinakasa*+ kunatï cheqäki uk sum uñtʼirinakasa yuspäras manqʼapjjañapataki. 4 Diosan taqe luratanakapajj wali suma lurtʼatawa,+ uka manqʼanakatejj yuspärtʼasis katoqatächejja, janiw ukanakat kunas rechazatäñapäkiti,+ 5 ukanakajj Diosan arunakapampi oracionampi qʼomachatawa.

6 Jilatanakar aka arunakampi ewjjtʼasajja, Cristo Jesusan suma serviripäjjätawa, Diosar confiyañatak* yanapkistu uka arunakampisa, jan jaytas arkkta uka suma yatichäwinakampisa suma yatichatäjjätawa.+ 7 Ukhamajj Diosar jiskʼachir falso cuentonak jan istʼamti,+ ukanakajj awichanakan cuentonakapjamawa. Maysa toqetjja, Dios chuymäñatak wal chʼamachasim. 8 Ejercicio lurañajj mä jukʼatakikiw yanaptʼistu, ukampis Dios chuymäñajj taqe kunanwa yanaptʼistu, ukhamatwa maynejj jichhasa jutïrinsa bendicionanak katoqani.+ 9 Uka arunakajj wali confiykañawa, taqe chuyma creykañarakiwa. 10 Ukanak laykuw jiwasajj wal trabajisktanjja, wal chʼamachasiskaraktanjja.+ Jiwasajj jakkiri Diosaruw suytʼasktanjja, jupaw kunayman jaqenakan+ Salviripajja,+ jukʼampis jupar taqe chuyma servirinakapan Salviripawa.

11 Aka ewjjanak churaskakim, yatichaskakim. 12 Jan khitis jumarojj waynäskatam laykojja jiskʼachpanti. Antisas parlatamasa, sarnaqatamasa, munasiñamasa, Diosar confiyatamasa,* qʼoma sarnaqatamasa,* Diosar taqe chuyma servirinakatakejj yateqaskañäpan. 13 Nayan puriniñajkamajja, mayninak nayraqatan liytʼañatakisa,+ ewjjtʼañatakisa,* yatichañatakisa chʼamachasiskakim. 14 Kuntï Diosajj jumar churktam ukjja jan apanukumti, uksti ancianonakajj* amparamp loqjjatapktam ukhaw profecía arunakarjam katoqtajja.+ 15 Ukanakat lupʼiskakim,* taqe chuyma ukanak lurarakim, ukhamat taqenis nayrar sartatam qhan uñjapjjañapataki. 16 Kunjamsa sarnaqaskta, kunjamsa yatichaskta ukanakatjja amuytʼasipunim.+ Ukanak phoqañatakejj chʼamachasiskakim, ukhamatwa juma pachpas salvasïta, khitinakatï jumar istʼapktam ukanakas salvasipjjarakiniwa.+

5 Mä jilïr jaqerojj jan jiskʼachir arunakamp parlamti,+ antisas awkimarjam munasiñampi ewjjtʼam, waynanakarojja jilanakamarjam ewjjtʼarakim, 2 jilïr warminakarojj taykamarjam munasiñamp ewjjtʼam, tawaqonakarojj kullakanakamarjam ewjjtʼarakim, qʼoma chuymampi.

3 Jan khiti yanapirinïpki* uka viuda warminakarojj sum uñjam.*+ 4 Ukampis mä viuda warmitejj wawanakanïchi jan ukajj allchhinakanïchi ukhajja, jupanakaw nayraqatajj familiapar sum uñjasajj Dios chuymäpjjatap uñachtʼayapjjañapa.+ Jupanakarakiw awkiparusa, taykaparusa, achachilaparusa, awichaparusa kunatejj wakiski ukanak churapjjañapa,+ ukasti Diosarojj wal kusisiyi.+ 5 Mä viuda warmitejj jan khiti yanapirinïchi wali pobrerakïchi ukhajja, Diosaruw wal confiyasi,+ uruy arumaw Diosar oración luri, wal ruwtʼasiraki.+ 6 Ukampis mä viuda warmitejj jañchin munañaparjam sarnaqchejja, jakaskchisa jupajj jiwatawa. 7 Ukhamajj aka ewjjanak jupanakar churaskakim, ukhamat sum sarnaqapjjatapatjja jan khitis jupanakat jan wal parlañapataki. 8 Maynitejj jupankirinakat jan llakiskchi,* jukʼampis familiapat jan llakiskchejja, kuna yatichäwinakarutï jiwasajj creyktan ukjja apanukjjewa, Diosar jan confiyiri* jaqet sipansa jukʼampëjjarakiwa.+

9 Mä viuda warmejj listaru qellqatäñapatakejja, 60 jila maranïñapawa, jiwir chachapar jan engañjirïñapawa,* 10 suma luräwinak luririt uñtʼatäñapawa,+ mä arunjja wawanakapar suma uywiri,+ katoqtʼasiri,*+ santo jilatanakan kayunakap jareqeri,+ tʼaqesirinakar yanapiri,+ suma luräwinak taqe chuyma luriri ukhamäñapawa.

11 Ukampis tawaqo viudanakarojj jan listar qellqamti. Cristor serviñat sipansa chacha munañampi apayasipki ukhajja, jupanakajj casarasiñwa munapjje. 12 Arsutanakap jan phoqapjjatap laykojja, juchañchataw uñjasipjjani. 13 Jupanakajj utat ut muyusajj jayraw yatintapjje, janiw jayräñak yatintapkiti, jan ukasti arunakwa apnaqapjje, yaqhanakan luräwinakaparuw mitisipjje,+ kuntï jan parlapjjañapäki ukanakwa parlapjje. 14 Ukatwa nayajj tawaqo viudanakan casarasipjjañapa,+ wawanakanïpjjañapa,+ utapsa sum uñjapjjañap muntjja, ukhamat khitinakatejj jiwas conträpki ukanakajj jan jiwasar kʼumipjjañapataki. 15 Yaqhep viudanakajj niyaw cheqa thakit saranukusajj Supayar* arkasipki. 16 Mä creyente warmin familiapantejj viuda warminakajj utjchejja, congregacionar llakimpi jan apjjatañatakejj jupaw uka viuda warminakarojj yanaptʼañapa, ukhamatwa congregacionajj jan khiti yanapirinïpki* uka viudanakar yanaptʼani.+

17 Sum pʼeqtʼasipki uka ancianonakajj*+ wali respetomp uñjatäpjjañapawa,+ jukʼampis kawkïrinakatejj parlañansa yatichañansa wal chʼamachasisipki ukanakaw wali respetomp uñjatäpjjañapa.+ 18 Qellqatajj akham siwa: “Mä torotejj trigo takiskchejja, janiw ñukuntayañamäkiti”*+ sasa, ukatsti sarakiwa: “Mä trabajirin pago katoqañapajj wakisiwa”+ sasa. 19 Maynitejj mä anciano* contra mä kuns parlani ukhajja, jan istʼamti, paya jan ukajj kimsa testigonak utjani ukhakiw istʼäta.+ 20 Khitinakatejj juchan sarnaqasipki+ ukanakarojj taqenin nayraqatapan cheqañcham,+ ukhamat mayninakajj juch lurañ ajjsarapjjañapataki. 21 Nayajja aka arunak phoqañamatakiw Dios nayraqatansa, Cristo Jesús nayraqatansa, ajllit angelanak nayraqatansa ewjjtʼansma: janïr kuna amtar purkasajj taqe kunwa sum yatjjatañama, janirakiw khitirus arjjatañamäkiti ni yaqhachañamäkisa.+

22 Janipun maynirojj amparamp ratuki loqjjatamti,*+ janiraki mayninakan juchanakapsa imtʼamti, jan ukasti qʼomapun jakasim.

23 Sapa kuti usuntatamatsa purak usunïtamatsa jan um umjjamti,* jan ukasti mä jukʼa vino umtʼam.

24 Yaqhep jaqenakan juchanakapajj taqenin uñjkañawa, ukhamatwa jankʼaki juzgat uñjasipjje. Yaqhep jaqenakan juchanakapasti qhepatakwa yatisiraki.+ 25 Uka kikparakiw suma luräwinakajj taqenin uñjkañajja,+ ukampis jan uñjkañ suma luräwinakajj janiw imantatapunïkaspati.+

6 Khitinakatejj esclavonakäpki ukanakajja patronanakaparojj wali respetomp uñjasipkakpan,+ ukhamat Diosan sutipatsa yatichäwinakapatsa janipun khitis jan walinak parlañapataki.+ 2 Khitinakatejj creyente patronanakanïpki ukanakajja, jan patronanakaparojj jiskʼachapjjpanti, jupanakajj jilatanakapäpjjewa. Antisas taqe chuyma servipjjpan, servirinakapat beneficio katoqapki uka patronanakajja, creyentenakäpjjewa, munat jilatanakapäpjjarakiwa.

Kuntï nayajj sisksma ukarjam yatichaskakim ukhamarak ewjjtʼaskakim. 3 Maynitejj yaqha yatichäwi yatichaskchi, janiraki Jesucristo Tatitusat jutki uka cheqa* yatichäwimpisa,+ ni Dios chuyma sarnaqañ yatichkistu uka yatichäwimpis acuerdökchejja,+ 4 jupajj jachʼa jachʼaw tukuski, janirakiw kuns amuykiti.+ Jupajj arunakatakwa chʼajjwañsa jiskhisiñsa wal muni.+ Ukanak kawsaw envidiasiñasa, chʼajjwañasa, kʼarintasiñasa, mayninakat payachasiñasa utji. 5 Ukanak kawsarakiw kuna jiskʼanakat jan waltʼayasiñanakas utji. Kawkïr jaqenakatï jan wali amuyunïpki,+ kunatï cheqäki ukanaksa jan amuyapkaraki ukanakaw uka jan waltʼayasiñanak utjayapjje. Jupanakajj Dios chuymäsas kuns jikjjatapkaspa ukhamwa amuyapjje.+ 6 Maynitejj Dios chuymächi, kunatï jupan utjki ukampejj kusisitakïchi ukhajja, cheqpachansa walja gananciaw jupatak utji.+ 7 Jiwasajj janiw kunsa aka mundor apanktanti, janirakiw kunsa apkañäniti.+ 8 Jiwasantejj manqʼasa* isisa* utjaskchistojja, ukanakampejj kusisitakïskañäniwa.+

9 Ukampis khitinakatejj qamirïñ amtapki ukanakajja, kunayman yantʼanakaru, trampanakaru,+ jan kunatak servir munañanakaru, jan waltʼayir munañanakampiruw jalantapjje, ukaw jupanakarojj jan waltʼañarusa jiwañarus puriyi.+ 10 Qollqe sinti munañajj taqe jan waltʼäwinakan saphipawa. Qollqe sinti munañampi apayasipjjatap laykojja, yaqhepanakajj Diosar confiyañatwa* saranukupjje, kunayman llakinakampiw apjjatasipjjaraki.*+

11 Diosan serviripjamajja, jumajj taqe ukanakat jitheqtam.* Antisas cheqapar sarnaqañataki, Dios chuymäñataki, Diosar confiyañataki,* munasir jaqëñataki, aguantañataki, llampʼu chuymanïñataki* chʼamachasim.+ 12 Kuna yatichäwinaktï creyktan ukanak laykojja, suma nuwasïwin nuwasiskakim. Wiñay jakañatsa jumajj wal katjjarusim, uka jakäwi katoqañamatakiw Diosajj jawstamjja, uka jakäwitwa walja testigonak nayraqatansa sum qhanañcharaktajja.

13 Taqe kun jakayiri Dios nayraqatana ukhamarak Poncio Pilator+ jan ajjsartʼas parlkäna uka Cristo Jesús nayraqatanwa nayajj ewjjtʼansma, 14 ukhamat jumajj mandamientonakjja qʼoma chuymampi phoqañamataki, sum sarnaqatamatsa jan khitis jan wal parlañapataki, Jesucristo Tatitusan+ uñstaniñapkama. 15 Kusisiri wali chʼamani Tatitojj tiempoparuw uñachtʼayasini. Jupaw reyinakjam apnaqapki ukanakan Reyipajja, juparakiw taqe mayni gobiernonakan munañaninakjam apnaqapki ukanakan Tatitupasa.+ 16 Jupa sapakiw jan jiwirïkiti,+ jan jakʼachaskay qhananwa jakaraki,+ juparojj janiw khiti jaqes uñjkiti, ni uñjkarakispasa.+ Jupajj jachʼañchatäpan, chʼamapas wiñayatakïpan. Amén.

17 Akapachan* qamirïpki ukanakarojj akham ewjjtʼam:* jan jachʼa jachʼa tukupjjpanti,* tukusir qollqer confiyañat+ sipansa Diosar confiyapjjpan, jupaw taqe kunatï kusisiykistu ukanak walj churistu.+ 18 Jupanakar ewjjtʼarakim, kunatï walïki ukanak lurapjjañapataki, suma luräwinakan qamirïpjjañapataki, wajjtʼasirïpjjañapataki, utjirinakap compartiñatakis listokïpjjañapataki.+ 19 Ukhamtï lurapjjanejja, kunanakatï wali valoranïki ukanaksa imasipkaspa ukhamäniwa, mä arunjja jutïrin suma saytʼatäpjjaniwa,+ ukhamatwa jupanakajj cheqpach jakañat katjjarusipjjani.+

20 Timoteo, kuntï Diosajj jumar confiyktam uk jan apanukumti.+ Diosar jiskʼachir inamay arunaksa wali yatiñan tukuri jaqenakan amuyunakapsa jan istʼamti, jupanakan yatiñanakapajj+ kunatï cheqäki uka contrawa. 21 Uka yatiñat jachʼañchasisaw yaqhepanakajj cheqa yatichäwinakat saranukupjje.

Diosan wali khuyapayasiñapajj jumanakampïpan.