Uma Juiciot Egiptot mistupxañapkama

Uma Juiciotxa kimsaqallqunikiw qhispipxäna, ukat tiempompix waranq waranqa jaqinakaw utjxarakïna. Uma Juiciotxa 352 maraw pasxäna, ukhaw Abrahamax utjäna. Ukat Diosax Abrahamar siskän uka arsüwipxa kunjamsa phuqatayna Isaac wawar churasax uka tuqitwa yatiqarakiñäni. Ukatxa, Isaacan pä wawapatxa, Jacob sata wawaparuw Diosax ajllïna.

Jacob tatax jachʼa familianïnwa, 12 yuqani ukat phuchanakani ukhamänwa. Ukat yuqanakapatxa tunkanisti, José sat sullkaparuw uñisipxäna, ukat tʼaqhisiñapatakiw aljapxäna, Egipt markar apatänwa. Walja maratsti Joseyax Egipton jilïr apnaqirit uttʼayatäxänwa. Kunapachatï machʼa maranakax qalltxäna ukhaxa, Joseyax jilanakaparuw yantʼäna, jan sinttʼasirïsipkakpachati jan ukax suma jaqinakäxapxpachacha uka yatiñataki. Uka qhipatxa Jacobun taqpach familiapaw Egiptor jakasir sarxapxäna, jupanakax israelitanaka satapxarakïnwa. Abrahamax utjkäna uka marat israelitanakax Egiptor mantapkäna uka marakamax 290 maranakaw pasäna.

Ukat 215 maraw Egipton israelitanakax jakapxäna. Joseyan jiwatapatxa, irnaqirinakjam tʼaqhisiyatäxapxarakïnwa. Ukatxa Moisesaw utjxarakïna, ukat Moisesampiw Diosax israelitanakar Egiptot irpsuyanxäna. PAYA Jaljäwinxa 857 maranakatwa parlasi.