Nayrïr kurmi

NOEX familiapampi arkat mistusaxa, ¿kuns nayraqat luräna uk yattati? Diosaruw mä ofrenda luqtäna. Aka aynachan uk luraski. Noé tatax Diosaru yuspärañatakiw uywanak luqtaski, kunattix Diosaw familiapar qhispiyäna.

¿Uka waxtʼax Diosar kusisiypachänti? Jïsa, kusisiyänwa. Ukatwa Noeruxa akham satayna, janipuniw mayampsa ukham jall purintayxäti sasa.

Uraqix wañsxänwa, Noempi familiapampixa arkat mistxasaxa wasitatwa aka uraqin jakasiñ qalltxapxäna. Diosax jupanakar bendicïnwa ukat akham sänwa: ‘Jichhax walja wawanakanïpxañamawa. Aka Uraqiru phuqantañkamaw mirantapxäta’ sasa.

Ukampisa, Uma Juiciot parlir istʼasaxa jaqinakax axsarapxasapänwa, wasitampiw ukham purintaspa sasa. Ukat Diosax janipuniw Uma Juicio mayampis apanxäti siskäna, uk jan armasipxañapatakixa Diosax mä señal churäna. ¿Kunänas ukaxa uk yattati? Mä kurmïnwa.

Jallu pasatat Intixa qhantʼanxi ukhaw alaxpachan kurmix uñsti. Walja suma coloranakaniwa. ¿Jumax uñjirïtati? ¿Aka patxankir kurm uñjtati?

Diosax akham sänwa: ‘Janipuniw umampix jaqinakarus animalanakarus jiwarayxäti. Qinay taypiruw kurmij uchasktxa. Kunapachatï kurmix uñstani ukhaxa, nayax uk uñjasax aka arsutajatwa amtasïxa’ sasa.

Ukhamasti, kunapachatï mä kurmi uñjkäta ukhaxa, ¿kuns amtäta? Jïsa, janiw umampi akapach chhaqtayxäti sas Diosax siskäna uka arunakwa amtañamaxa.