Nayrapachat yatiqasipxañäni

Jehová Diosax janiw ñanqha jaqinakampix Kusipachxa tukjaykaniti. Kusipachanxa munasitanakapakiw jakasipxani. ¿Kamachasinis ñanqha jaqinakaruxa? Uk yatiñatakixa, Noé chachan sarnaqäwipa uñjañäni. Noex nayrapachaw jakatayna. Suma jaqïnwa, taqi chʼuymaw Jehová Diosan munañaparjam sarnaqäna. Yaqha jaqinakasti jan waliw sarnaqapxäna. Ukatwa Jehová Diosaxa Noerux säna, mä jachʼa jallu apayanï taqi ñanqha jaqinakaru tukjañataki. Ukatxa sarakitaynawa, mä arka luram uka Uma Juiciona jumampi familiamampi jan jiwapxañamataki (Génesis 6:9-18).

Noex familiapampiwa uka arkxa luratayna. Noex Uma Juiciow jutani sasaw jaqinakaru yatiyäna, ukampisa janiw khitis istʼkänti. Jan wali sarnaqasipkakïnwa. Kunapachatix Noé chachax arka tukuyxäna ukhaxa, animalanakwa uka arkarux anantatayna, ukxaruxa Noé chachax familiapamp chikawa uka arkarux mantapxarakitayna. Ukatsti, Jehová Diosax thayampi jallumpi walpun purintayäna. Pusitunka uruy arumaw jallux purintatayna Uraqi chhaqtayañkama (Génesis 7:7-12).

Ñanqha jaqinakax jiwarapxataynawa, ukampisa Noé chachax familiapampiw qhispipxatayna. Uma Juicionxa Jehová Diosawa jupanakarux sum uñjäna ukatxa jan ñanqhan suma qʼuma Uraqiruw uchatayna (Génesis 7:22, 23). Wasitatwa Jehová Diosax jan chiqa lurañ munirinakaruxa tukjani, siw Bibliaxa. Suma jaqinakax janiw tukjatäpkaniti. Kusipachaptayata Uraqinxa wiñay wiñayatakiw jakasipxani (2 Pedro 2:5, 6, 9).

Jan wali lurir jaqinakax jichhürunakanxa añchapuniwa. Akapachaxa jan waltʼäwinakampi phuqhantatawa. Jehová Diosax walja kutiw Qhanañchirinakaparux jaqinakaru yatiyañataki khitaski, ukampisa Jehová Diosan arunakapxa walja jaqinakawa jan istʼañ munapkiti.Ñanqha sarnaqäwinakapxa janiw jaytañ munapkiti, janirakiw Diosampix kunatix walïki ukat kunatix jan walïki uk sayasiñxa munapkarakiti. ¿Uka jaqinakax kunarus purtʼasipxani? ¿Kunapachkamasa ukhamasipkakini? Yaqhipanakax ukhamasipkakiniwa. Ñanqha jaqinakaxa jan mayampitakiw tukjatäpxani, uka uruxa jakʼankxiwa (Salmo 92:7).

Uraqixa janiw tʼunjatäkaniti; kusipachaptayatäniwa. Khitinakatix Diosan munasitanakapäni ukanakax Kusipachaptayata Uraqinwa wiñayataki jakasipxani (Salmo 37:29).