¿Uma Juicion khitinakas Diosar istʼapjjäna?

Noé chachan tiempopanjja, jaqenakajj sinti jan walinakwa lurapjjerïna (Génesis 6:5).

Adanampi Evampejj wawanakanëjjapjjänwa, ukhamajj oraqen walja jaqenakaw utj-jjäna. Ukat yaqhep angelanakajj Supayar uñtasitaw Jehová Dios contra saytʼasipjjäna.

Uka angelanakajj oraqer saraqanisaw jaqer tukupjjäna, ukhamat warminakamp casarasiñataki. Jupanakan wawanakapajj yaqha jaqenakat sipans wali chʼamanipjjänwa ajjsarkañapjjarakïnwa.

Oraqejj jan wali jaqenakamp phoqantatäjjänwa. Uka toqet Bibliajj akham siwa: “Oraqenjja jaqenakan jan wali luratanakapajj waljapunïnwa” sasa. Jaqenakajj kunatï jan walïki ukpun lurañ munapjjäna.

Noé chachajj Diosaruw istʼäna ukat mä arca lurarakïna (Génesis 6:13, 14, 18, 19, 22).

Noé chachajj wali suma jaqënwa. Ukat jan wali jaqenakarojj Uma Juiciompiw tukjä sasaw Jehová Diosajj jupar säna.

Mä jachʼa arca luram sasaw Diosajj Noé chachar säna. Uka arcaruw jupasa familiapasa kunayman kasta animalanakas mantapjjañapäna.

Noé chachajj Uma Juiciot jaqenakar yatiyarakïnwa, ukampis jaqenakajj janiw istʼañ munapkänti. Yaqhepasti jupat larusipjjänwa yaqhepasti wal colerasipjjarakïna.

Noé chachajj arca lurañ tukuyjjasajja, animalanak arcaruw anantjjäna.