Israel markan apnaqirix utjkäna ukata Babiloniar apatapkäna ukhakama

Israel markan nayrïr apnaqiripaxa Saúl tatänwa. Ukampis Jehová Diosax apnaqirïñatxa apaqxänwa, ukat Davitaruw ajllïna Saúl lanti apnaqirïñapataki. Davitan sarnaqäwinakapatwa yatxatañäni. Waynitükasinwa, Goliat sat jachʼa jaqimpi nuwasïna. Uka qhipatxa uñisir Saulatakiw imantasïna. Ukatxa suma uñnaqtʼan Abigailaw jan wali lurañat jarkʼtʼäna.

Ukatxa Davitan Salomón yuqapatwa yatiqarakiñäni, jupaw Davit lanti Israel apnaqxarakïna. Israel markar nayrïr kimsa apnaqirinakaxa sapaqatax 40 marakamaw apnaqapxäna. Salomonan jiwatapatxa Israel markax pä apnaqäwir jaljtayatänwa, mayax alay tuqinwa apnaqäna, maynisti aynach tuqinwa apnaqarakïna.

10 tribunakaxa alay tuqinxa 257 maraw apnaqatäpxäna, ukatxa asirionakaw tukjxarakïna. Uka maratxa 133 maranakaw saraqxäna ukhaw pä tribur apnaqäwixa tukjatäxarakïna. Ukapachaw israelitanakax Babiloniar apatäxapxänxa. Ukhamasti PUSI Jaljäwinxa 510 maranakatwa parlasi, ukäñkamasti wali muspharkañanakaw utjäna uk uñjañäni.