Yatichañatak yanaptʼanaka
Oraqpachanjja Jehová Diosan Testigonakaparojj Bibliat yatichirinakatwa uñtʼasi.
BIBLIAT yateqañajj Jehová Diosan Testigonakapatakejj wali importantewa, ukatwa yaqha toqenakat yateqañajj janis Testigonakatak wakiskaspa ukham yaqhepanakajj amuyapjjaspa. Ukampis janiw ukhamäkiti. Yatichirejj yaqhanakar yatichañatakejj nayraqat sum yateqañapawa, wakichtʼatäñaparakiwa. Jehová Diosan Testigonakapajj yateqañ utanakar sarapkchisa, walja maranakaw Diosan markapan escuelanakajj utjki ukanakamp yanaptʼayasipjje. Kunatï uka escuelanakan yatichaski ukanakajja, amuyunsa, qʼom sarnaqañansa ukat Diosar serviñans wal yanaptʼawayi. Yaqhanakarus yanaptʼarakiwa.
Jehová Diosan Testigonakapajj walja markanakanwa liyiñ qellqañ jan yatipki, jan ukajj jukʼak yatipki uka jaqenakar jikjjatapjje. Ukatwa jupanakar liyiñ qellqañ yatichapjje.
Nigeriankirinakajj waranq waranqanakaw ukham yatichäwinak uttʼayasitapat liyiñ qellqañ yateqawayapjje. Nigeria markan mä encuestajj apaskäna ukarjamajja, Jehová Diosan Testigonakapat niya taqeniw liyiñ qellqañ yatipjjäna, ukampis uka markankir jan Testigonakajja, janiw ni chikatanis liyiñ qellqañ yatipkänti. México markan Testigonakajj 1946 marat aksaruw liyiñ qellqañ yatichasipki. Mä marajja, 6.500 jila jaqenakaruw liyiñ qellqañ yatichapjjäna. Cheqas 100.000 jila jaqenakaruw yatichasiwayi. Tiempompejja, Bolivia, Camerún, Zambia ukat yaqha markanakanwa liyiñ qellqañajj yatichasiraki. Jehová Diosan Testigonakapajj Liyiña qellqaña yateqañataki sat folleto 7 millón jilwa 100 jila arunakan lurawayapjje.
Yatichañ toqet walja markanakan utjki uka autoridadanakajja, Testigonakajj liyiñ qellqañ yatichapki ukarojj wali wakiskiritwa uñjapjje. México markankir yateqañ utanak uñjir mä autoridadajj akham sasaw qellqäna: “Ukham yatichapjjatamat wal yuspärapjjsma, ukhamarakiw gobiernos liyiñ qellqañ jan yatipki ukanakar yatichapjjatamat wal yuspärapjjtam [...;] ukham yatichasajj nayrar sarantasipkakim” sasa.
Jukʼamp capacitación
Reunionar sarapki ukanakajj sum liytʼañataki ukat arstʼañatakiw capacitación katoqapjje
Jehová Diosan Testigonakapatakejj Bibliat yatichañajj wali importantewa, ukatwa yaqhanakar Bibliat jukʼamp sum yatichtʼañatakejj wal chʼamachasipjje. Ukatakejj oraqpachan 119.000 jila congregacionanakanwa sum liytʼañataki ukat arstʼañatak capacitacionajj apasi. Liyiñ yateqjjapjje uka wawanakas uka capacitación katoqapjjarakispawa. Ukajj vidapansa, escuelans yanaptʼarakiwa. Testigonakan wawanakapajj wali sum arstʼañ yatipjje sasaw walja profesoranakajj sapjje.
Congregacionanakanjja, taqenin liytʼapjjañapatakiw chʼamañchasi, ukat familianakarus utanakapan mä bibliotecanïpjjañapatakiw chʼamañchasiraki
Maysa toqetjja, Jehová Diosan Testigonakaparojj taqe Salonanakapan mä bibliotecanïñatakiw chʼamañchtʼasi, ukan Bibliat apstʼat qellqatanaka, libronaka ukat diccionarionakampiw utjañapa. Uka bibliotecajj reunionanakar jutapki ukanakan liytʼapjjañapatakiwa. Congregacionanakanjja, taqenin liytʼapjjañapatakiw chʼamañchasi, ukat familianakarus utanakapan mä bibliotecanïpjjañapatakiw chʼamañchasiraki. Ukanjja Bibliat apstʼat kunayman libronakaw utjañapa, ukhamatwa wawanakarus jilïrinakarus yanaptʼani.
Yaqha capacitación
Jehová Diosan Testigonakapajj misioneronakataki, congregacionankir jilat kullakanakataki, congregacionan responsabilidadanïpki taqe jupanakatakiw escuelanak wakichapjjaraki. Ukanakajja, Testigonakajj yateqañar wali valoranit uñjapjjatapwa uñachtʼayi.