¿Awk taykanakajj kuna responsabilidadanïpjjesa?

ESTADOS UNIDOS markankir Instituto Nacional de Salud Mental ukajja, kawkïr awk taykanakatï wawanakapar sum uywapkatayna ukanakaruw mä encuesta luräna. Jupanakan wawanakapajj 21 maranëjjasajj “wali trabajtʼiri, mayninakampis suma jaqet uñtʼata ukhamäpjjänwa”. Uka awk taykanakarojj akhamwa jisktʼasïna: ‘Experiencianakamarjamajja, yaqha awk taykanakarojj ¿kamsasas ewjjtʼapjjasma?’ sasa. Jupanakajj akham sapjjänwa: ‘Wawanakamar wal munasipjjam’, ‘munasiñamp cheqañchapjjam’, ‘jupanakampïñatak tiemp apstʼasipjjam’, ‘kunatï walïki jan walïkaraki uk amuyapjjañapatak yatichapjjam’, ‘familian respetasiñ yatichapjjam’, ‘atencionamp istʼapjjam’, ‘jupanakar ewjjsuñat sipans sum amuytʼayapjjam’, ‘kuntï lurirjamäpki ukak mayipjjam’ sasa.

Ukampis suma wakichtʼat wayn tawaqöpjjañapatakejj janiw awk taykan yanaptʼapakejj munaskiti, jan ukasti profesoran yatichäwinakapajj wali wakiskirirakiwa. Yateqerinakar ewjjtʼiri mä experienciani jaqejj akham sänwa: “Escuelan yatichaski ukajj awk taykanakar yanaptʼañatakiwa, ukhamat wawanakapajj jilsusin responsabilidadanakap sum phoqerïpjjañapataki, amuytʼasirïpjjañapataki, kusisit jakasipjjañapataki, jañchi toqens kʼumaräpjjañapataki” sasa.

Awk taykanakasa yatichirinakas mä amtanikïpjjewa: wayn tawaqonakar sum yatichañwa munapjje, ukhamat suma amuytʼasir jaqëpjjañapataki, kusisit jakasipjjañapataki ukat jakaskani uka cheqans suma jaqet uñtʼatäpjjañapataki.

Profesoranakar yanaptʼapjjañapawa

Awk taykanakatï profesoranakar jan yanaptʼapkanejja, wawanakar yatichañajj jupanakatak chʼamäniwa. Yaqhep awk taykanakarojj wawanakapan yateqapjjañapajj janiw importkiti. Yaqhepanakasti yatichirit sipans jukʼamp suma yatichirïpkaspas ukhamaw tukupjje. Uka toqet Francia markankïr mä periodicojj akham siwa: “Janis profesoranakak yatichapjjañapäkaspa ukhamwa yaqhep awk taykanakajj amuyapjje. Yaqhepasti wawanakapan sum yateqapjjañap toqet sint llakisipjjaraki, ukatwa yateqañatak libronak wal uñakipapjje, profesoranakajj janis sum yatichapkaspa ukham amuyasajj jupanakat jan wal parlapjje, ukat wawanakapajj jan wali notanak apsusipjje ukhas wal colerapjjaraki” sasa. Ukhamïpanjja, janis yatichañatak wakichtʼatäpkaspa ukhamwa profesoranakajj amuyasipjjaspa.

Awk taykanakajj wawanakapat llakisis profesoranakar yanaptʼapjje ukhajja, wawanakajj sum yateqapjje sasaw Jehová Diosan Testigonakapajj sapjje. Ukham purapat yanaptʼasiñajj wali importantewa, kuna laykutejj profesoranakatakejj wawanakar yatichañajj sapürutjamaw wali chʼamäjje sasaw sapjjaraki.

Escuelan jan waltʼäwinaka

Jichhürunakanjja, jaqenakajj kunjamäpkitejj ukaw escuelanakan uñjasiraki, jan waltʼäwinakajj urut urutjamaw jiljjattaski. The New York Times sat periodicojj Estados Unidos markankir mä escuelat akham sänwa: “Yateqerinakajj yateqkasas ikj-jjapjjakiwa, jupanakkamasa pintsut pasillonakan amenazjasipjjewa, suma yateqerinakarojj jiskʼachapjjewa. [...] Niya taqe yateqerinakaw jan walinakan uñjasipjje. Sañäni, yaqhepajj jichhak nasit wawanakar uñjapjjañapawa, yaqhep wawanakan awk taykanakapajj carcelankapjjewa, yaqhepasti pandillanakat escapapjjañapawa. Sapa patakat niya pä tunkaniw escuelanakar sapür jan sarapkiti” sasa.

Walja markanakanjja, escuelanakan jan waltʼäwinakajj jukʼampiw jiljjattaski. Yateqerinakajja, nayrajj awisakiw nuwasipjjerïna, jichhajj sapa kutiw pistolampi jan ukajj cuchillonakamp nuwasipjje. Usuchjasiñ armanak jan kunakiw apnaqapjje, ukat jiskʼatpachaw nuwasiñanakar yatintasipki.

Cheqas janiw taqe markanakan ukham jan walinakajj utjkapuniti. Ukampis oraqpachanwa profesoranakajj jan waltʼäwin uñjasipjje, sapa seman mistki uka Le Point sat qellqatajj uka toqet akham siwa: “Profesoranakarojj janiw respetjjapjjeti, janirakiw autoridadanëjjapjjeti” sasa.

Profesoranakar jan respetañajj taqe wawanakaruw jan waltʼayaspa. Ukatwa Jehová Diosan Testigonakapajj escuelan autoridadanïpki ukanakar istʼapjjañapataki respetapjjañapatak yatichapjje, escuelan janiw uka toqet sum yatichjjapjjeti.