¿Khitinakäpxisa?
SUM Jehová Diosan Qhanañchirinakapax uñtʼayasiñ munapxi. Inas jupanakat maynix utam jakʼankirïchi, irnaqir masimächi, jan ukax kunjamatsa jupanakampix jikisiraksta. Ukat qhanaw thakinakansa qillqatanakampix yatiyasipki. Ukatxa, inas uta punkum liqtʼanïpan jupanakampix parltʼaraksta.
Chiqpachansa, Jehová Diosan Qhanañchirinakapax sum jakasiñamwa munapxi. Jumampis sum apasiñ munapxaraki. Ukatxa kunsa yatichapxi, kunjam uttʼayatäpxisa, ukat jaqinakatsa jan ukax aka urunakatsa kamsapxisa uk yatiñam munapxaraki. Ukatakiw aka qillqatxa wakiyanipxi.
Jehová Diosan Qhanañchirinakapax jumjamaw jan waltʼäwinakansa llakinakansa usuntañanakansa qullqit pistʼañanakansa uñjasipxaraki. Janiw jan pantjasirïpkiti, janirakiw Diosjam chiqapäpkisa. Ukampis sapürutjamaw yatiqapxi, ukat Bibliat taqi chuyma yatxattʼasaxa sum jakañatakiw chʼamachasipxi. Ukatxa Diosan munañap lurañatakiw jakäwip Diosar katuyasipxi, ukat ukarjam sarnaqañatakiw chʼamachasipxaraki. Kun lurañatakis Diosan Arupampi ukat qullan ajayumpiw yanaptʼayasipxi.
Iyawsäwinakapax janiw jaqinakan amtat yupaychäwinakarjamäkiti jan ukasti kunjamtï Bibliax yatichki ukarjamaw iyawsapxi, ukaw jupanakatakix jukʼampi askixa. Kunjamtï Apóstol Pablox arskäna ukhamwa amuyapxaraki, jupasti akham sänwa: “Diosax taqi kunsa chiqaparjamaw luraraki, jaqinakax kʼarisisipkpansa” sasa (Romanos 3:4).a Taqi kunanakatï Bibliat yatichaski ukanakxa wali sum amuytʼapxi, Berea markankirinakjamaw lurapxi, apóstol Pablox jupanakat akham siwa: “Jupanakasti taqi chuymaw Pablompir Silasampirux ischʼukipxäna, sapürurakiw Qillqatanaksa yatxatapxäna uka arunakax chiqapunïpachati janicha” sasa (Hechos 17:11). Ukatwa Jehová Diosan Qhanañchirinakapax taqi yatichäwinakapxa Bibliarjamati janicha sasin sum amuytʼapxi, jupanakan yatichatäskpas janisa, taqi yatichäwinakaw yantʼasiñapa sasaw sapxi, jumas ukham amuytʼarakisma ukwa munapxi.
Ukhamasti Bibliax Diosan Arupawa sasaw Jehová Diosan Qhanañchirinakapax sapxi. Biblian 66 libronaka jikxataski ukanakaxa Diosan qullan ajayupamp amuytʼayatawa ukat chiqpach sarnaqäwinakaw ukan qillqataraki sasaw sapxi. Ukat Jehová Diosan Qhanañchirinakapax Antiguo Tesatamentorux Hebreo Arut Qullan Qillqatanaka sapxiwa ukat Machaq Testamentorusti Griego Arut Qullan Qillqatanaka sapxarakiwa. Griego Arut Qillqatanakarus Hebreo Arut Qillqatanakarus chiqaw sasaw atinisipxi, ukat kunjam qillqatäkitï ukaruw atinisipxi, yaqhip chiqanakaxa uñachtʼäwinakampi qillqatarakiwa, ukhamäki ukhaxa, ukarjamaw amuyasxañapa sasaw yatichapxaraki. Ukatxa walja profecía arunakaw phuqasiwayi, yaqhipasti jichhaw phuqasiski ukat jutir urunakansa phuqasiskakiniwa sasaw sapxaraki.
¿KUNATSA DIOSAN SUTIP APAPXI?
Diosan amtäwinakapata Apnaqäwipata ukat taripäwinakapatwa qhanañchapxi, ukatwa Jehová Diosan Qhanañchirinakapa satäpxi. Jichhax uka sutit amuytʼañäni, Dios, Tatitu ukat Taqikun luriri siski uka arunakax rey, general, apnaqiri sisksnas ukham sutiñchanakakiwa, mä marka apnaqirisa “pʼiqtʼiri, munañani” ukham sutimpis uñtʼatarakiwa. “Jehová” sutisti taqi chʼamani, alaxpacha akapacha luririn sutipawa. Traducción del Nuevo de las Santas Escrituras sat Biblianxa Salmo 83:18 qillqatanxa akham siwa: “Jaqinakan yatipxañapataki, jumax Jehová sutinïtama, juma sapakiw uraqpachan taqi munañanïtaxa” sasa.
Jehová sutixa Hebreo Arut Qullan Qillqatanakanxa niya paqallq waranqa kutiw uñsti (ukat yaqhip Biblianakansti Yavé sasaw uchapxaraki).b Yaqhip Biblianakansti janiw Jehová sutxa uchapkiti jan ukasti “Dios” jan ukax “Tatitu” sasakiw uchxapxi. Ukampisa waljpach Biblianakanwa Jehová jan ukax Yavé sutxa uchapxaraki. Traducción del Nuevo Mundo sat Biblianxa Isaías 42:8 qillqatax akham siwa: “Nayätwa Jehová Diosaxa, ukaw sutijaxa” sasa.
Isaías 43 jaljan qillqatäki ukhamarjamawa, Jehová Diosan Qhanañchirinakapa satäpxi. Uka jaljansti taqi markanakas mä taripäwin uñjasipkaspa ukham parli, ukat taqi diosanakaruw jawsthapisi, jupanakar arxatir qhanañchirinak irpanipxañapataki, jan ukax Jehová Diosan qhanañchirinakapax kunjamsa arsupxi uk istʼapxañapataki, ukat kawkïris chiqaxa uk yatipxañapataki. Ukatwa Jehová Diosax Qhanañchirinakapatxa akham saraki: “Jumanakäpxtaw nayan qhanañchirinakaxaxa, nayan ajllit sirvirinakaxa, nayaw jumanakar ajllipxsma nayar uñtʼapxañamataki, alkatapxañamatakiraki, ukhamat amuyapxañamataki khitïktix nayax uka. Nayat nayrax janiw khiti Diosas utjkänti, ukat qhiparus janipuniw utjkaniti. Naya sapakïtwa [Jehová Diosaxa, NM], nayat yaqhasti janiw qhispiykaspati” sasa (Isaías 43:10, 11).
Janïr Jesusax aka Uraqir jutkäna ukhatpachwa Jehová Diosan Qhanañchirinakapax utjänxa. Hebreos 11 jaljanxa iyawsäwin walja jaqinakatwa parlasi, ukat akham siwa: “Ukhamaraki jiwasanakaxa, ukhataqi qhanañchirinakana muyuntatäsaxa, kunatix jarkʼxäskistu uka taqi jathi ukhamaraki uka jan apaqtir jucha apanukusaxa, pacienciampiy parlapxañäni kunatix waktʼkistu uka jalañxa” sasa (Hebreos 12:1, MT). Poncio Pilaton jisktʼataxa Jesusax akham sänwa: “Nayax ukatakiw nasta, ukatakirakiw akapacharux jutta, chiqata qhanañchañataki” sasa. Ukatwa Qillqatanakanxa Jesusat akham sixa: “Khititix chiqapäki, ukhamarak kunsa chiqapapuni arski ukaxa” sasa (Juan 18:37; Apocalipsis 3:14, MT). Jesusax arkirinakaparux akham sänwa: “Qullan ajayuw jumanakxar jutani, ukatxa chʼam katuqapxäta. Jumanakasti nayat qhanañchapxitäta Jerusalén markana, Judeana, Samariana, taqi aka uraqpachana” sasa (Hechos 1:8).
Jichhürunakkamaxa Jehová Diosan Qhanañchirinakapax paqallq millón jiläpxiwa, ukat pä patak kimsa tunka suxtani jachʼa markanakankapxiwa, Diosan Apnaqäwipax Jesusan amparapankiw sasaw taqinir qhanañchasipki, ukatwa Jehová Diosan Qhanañchirinakapa sat suti apañax jupanakatak wali askixa.
[Qhanañchäwinaka]
a Jiskʼa tʼaqakanaxa Qullan Arunaka, 1992, Bibliat apstʼatawa, jan ukhamäkanixa qhanañchasiniwa. Kawkhantï MT qillqanakampi qhanañchaskixa Machaka Testamento Bibliat apstʼatawa, ukat kawkhantï NM qillqanakampi qhanañchaskixa Traducción del Nuevo Mundo de las Santas Escrituras (con referencias) español aruta apstʼatarakiwa.
b Qullan Arunaka sat aymar Biblianxa akham sasaw glosario siski ukanxa Diosan sutipat qhanañchi: “[Aka] Biblianxa qillqatarakiwa Diosarux Tatitu satäkaspas ukhama. Hebreo jaqinakax ‘Adonay’ sasaw sapxarakïna, Diosan sutipxa jan aliqaki aytasiñ munapxatapata, jupanakasti Diosan sutipxa walwa respetapxarakïna. Ukatwa Adonay sasaki sapxänxa. Uka aruxa jichhürux Tatitu sañwa munaspaxa, Yavé sasaw Diosarux sapxarakïna, ukampisa uka sutix wali qullanäkaspasa ukhamat uñtʼatarakïnwa. Ukatwa Tatitu sasaki sapxänxa” sasa.
[4 janan qhanañchäwipa]
Diosan munañap phuqañatakiw jakäwipxa Jupar katuyasipxi
[4 janan qhanañchäwipa]
Bibliax Diosan Arupaw sapxiwa
[5 janan qhanañchäwipa]
Mä taripäwin qhanstayatäkaspas ukhamwa sutipax qhansti
[5 janan qhanañchäwipa]
Jehová Diosan Qhanañchirinakapaxa pä patak kimsa tunka suxtani markanakanwa utji ukat paqallq millón jiläpxiwa
[3 janan fotopa]
Sum jakasiñamwa munapxi
[4 janan fotopa]
Nayra hebreo qillqatanxa akhamaw Diosan sutipaxa