Yatxatañ munirinakax kunsa jisktʼasipxi
Diosax wali munasirïchi ukaxa, ¿kunatsa jan walinakxa jichhakam jan tukjkpacha?
CHIQANSA Jehová Diosax tʼaqhisiñanaksa jan walinaksa janiw tukjkiti, ukatxa waljanirakiw jan walinak lurapxaraki. Chʼaxwanaka utjayasinxa jan juchani wawanakaruw jiwthapiyapxi, ukat uraqsa qʼal tukjapxaraki, ukatwa machʼanakas utjaraki. Maysa tuqitsti, walja jaqinakaw cigarrompi pulmón qʼañuchasisax cáncer usu apantasipxi, ukat chachatsa warmitsa qʼañu luräwinakan sarnaqasaw jan wali usunak aptasipxi, ukat alcohol wal umasasti cirrosis sat usumpiw usuntapxi. Jïsa, yaqha jan walinakat parlaskaksnawa. Ukampis jaqinakax janiw uka jan wali luräwinakat jarkʼatäñ munapkiti, jan ukasti jan walinak lurasin llakinakar puripkixa, uka llakinakan chhaqtañapakwa munapxi. Kunjamtï yatktanxa, jan walinakan uñjasisakiw akham jisktʼasipxi: “Kunatsa ukax nayar paspachïtu” sasa, ukat Diosaruw juch jaqupxi. Kunjamtï Proverbios 19:3 jiskʼa tʼaqax siskixa, “Jaqix jan amuytʼasirïtap laykuxa suma sarnaqañapxa chhaqhayiwa, ukatsti jaqix Tatiturukiw juchañchi”. Ukat Diosax uka jan wali luräwinakat jarkʼaspa ukhaxa, janiw kusisit jakasiñas munkiti sasaw parlapxarakispa.
Maysa tuqit amuytʼarakiñäni, Supayaw Jehová Diosat kʼarinak parlatayna, ukatxa janiw khiti jaqis yantʼatax Diosar taqi chuyma luqtkaniti sasaw sarakitayna, ukhamasti uka kʼarinak qhanstayañatakiw Diosax jan walinakxa janïr tukjkiti (Job 1:6-12; 2:1-10, NM). Uka amtaniw Diosax Supayarus janïr tukjkarakiti (Éxodo 9:16). Ukatwa Supayax jichhakamas jaqinakarux jan walinak luraskaki, Dios contra saytʼapxañapataki (Apocalipsis 12:12). Ukampis chiqpach cristianonakax Diosat jan jithiqtasaw sum sarnaqapxi, kunjamtï Job tatas, jan ukax Jesusas sarnaqapkäna ukhama (Job 27:5; 31:6; Mateo 4:1-11; 1 Pedro 1:6, 7).
Paraisoptat aka Uraqinwa wiñay jakasiñäni sapxiwa, ukax wali sumawa, ukampis ¿chiqäpachati?
Jïsa, chiqäskapuniwa, ukampis jaqinakax sinti jan walinakar yatinuqtatätanwa, walja maranakaw ukham sarnaqtanxa, ukatwa payachasiñjamäspa. Amtañäni, Jehová Diosax mä amtaniw aka Uraqxa luräna, ukat phuqantapxam sasaw nayrïr chacha warmir sarakïna, jupanakaw aski wawanakapampix aka Uraqirux phuqantapxañapäna, animalanaksa jan ukax quqanaksa sum uñjapxañapäna, ukhamata wali suma uraqin jakasiñataki, mä arunxa, janiw uraq tukjapxañapäkänti (jukʼamp amuytʼañatakix 12 ukat 17 jananak uñxattʼäta). Ukhamasti aka Uraqix mä suma paraisor tukuyatäniwa, janiw uka tuqit payachasiñamäkiti. Ukat aka jan wali urunakax tukusxani ukhaxa, wali suma jakasiñaw utjxani.
Bibliat sawkasirinakarus jan ukax jaqin amuyupakiw ukat ciencia tuqitsa janiw chiqäkiti sirinakaruxa, ¿kunjamsa qhanañchiristxa?
Kuna yatichäwsa janiw jan amuytʼasakix katuqasiñasäkiti. “Iyawsañaxa [istʼatas] laykuw utji” sasaw Bibliax qhanañchi. Mä arunxa, Diosan Arupat sum yatiqasaw yatiñkankañ jikxattanxa, ukhamatwa iyawsäwix jukʼampi jilxatti (Romanos 10:17; Hebreos 11:1).
Bibliax qillqaskän uka urunakanxa kunanakas utjäna, ukanakwa uraq allisin jikxatapxi, ukanakarakiw Bibliar yanaptʼi, mä arunxa, ukanakaw chiqapätapxa uñachtʼayi. Ciencia tuqitxa chiqpunwa Bibliax parlaraki. Amuytʼañäni, jaqinakax janïra ciencia tuqit sum yatxattʼapkäna ukhaw aka Uraqin muruqʼütapsa, jan kunxaru warktʼatätapsa Bibliax qhanañchxäna. Ukat Uraqis kunjam luratasa, kuna jamachʼinakas wali jayar sarapxi, taqi ukanakwa sum qhanañchxäna (Isaías 40:22, NM; Génesis 1 jalja; Job 26:7; Jeremías 8:7).
Maysa tuqitxa, Biblian qillqat walja profecianakaw phuqasiraki, ukaw Diosan Arupätapxa uñachtʼayarakistu. Daniel profetan arunakapat amuytʼañäni, chʼamani jachʼa markanakax kunjamas uñstapxani ukat kunjamarakis tukusipxani uka tuqitwa qillqatayna. Ukatxa Mesiasan jutañapatsa jiwañapatsa qillqarakitaynawa, ukanakax phuqasiskapuniwa (Daniel, 2 ukat 8 jalja; 9:24-27). Ukat jichhürunakanxa walja profecianakaw phuqasiskaraki, ukanakaw ‘qhipa urunakankatas’ uñachtʼayarakistu (2 Timoteo 3:1-5; Mateo 24 jalja). Ukhamaw Biblian qillqat profecianakax phuqasi, jaqin arunakapax janiw ukham phuqaskaspati (Isaías 41:23). Uka tuqinakat jukʼampi yatxattʼañatakixa ¿Kunsa Bibliax chiqpachapuni yatichi?, ukat ¿Existe un creador que se interese por nosotros?, siski uka libronaka uñxattʼäta, Jehová Diosan Qhanañchirinakapan luratawa.
Biblia tuqit jisktʼataxa, ¿kamachiristsa?
Bibliat yatxatasin sum amuytʼañamawa, ukatxa Diosaruw qullan ajayup mayisiñamaraki (Proverbios 15:28; Lucas 11:9-13). Diosan Arupax akham siwa: “Jumanakat maynitix jan yatiñ kankañapax utjkchi ukapachax, Diosat maypan, Diosasti juparux churaniwa. Jupasti jilarkirwa churi, khitirus jan kuns sasaw churaraki” sasa (Santiago 1:5). Ukat Bibliat apstʼat qillqatanak uñxattʼañaw wakisiraki. Ukatxa maynin yanaptʼataw jukʼamp sum yatxataraksna, kunjamatix mä etiopex Felipempi yanaptʼayaskänxa ukhama (Hechos 8:26-35). Ukat khitinakatix Bibliat yatiqañ munapki ukanakaruxa, jan qullq mayisakiw Jehová Diosan Qhanañchirinakapax yatichasipki. Jumatï ukham yatiqañ munätaxa, kunapachas jupanakar jakʼachtʼasiskakismawa.
¿Kunatsa waljanix Jehová Diosan Qhanañchirinakapar uñisipxpacha ukat jan jupanakampi yatichayasimti sapxpachïtu?
Jesusax Diosan arunakapwa yatiyäna, ukatwa jupar uñisipxäna, ukatxa arkirinakajax ukham uñisitäpxarakiniwa sasaw jupax säna. Mä kutixa, Jesusan yatichäwip istʼasaw jaqinakax wal muspharapxäna, ukampis uñisirinakapax akham sasaw uka jaqinakar sapxäna: “¿Jumanakamppachat sallqjayasipxta? Jilïrinakatsa, ukhamarak fariseonakatsa ¿khitis juparux iyawsi?” sasa (Juan 7:46-48; 15:20). Yaqhipax janiw Jehová Diosan Qhanañchirinakapar sum uñtʼapkiti, ukatwa jupanakampi Bibliat jan yatiqayañ munapkiristamti, jan ukax uñisiñatwa jarkʼasipxaspa. Ukampis jumax yatiqaskañamakiwa, Bibliat yatichapxiristamti janicha ukxa, juma pachpaw amuyasxañama (Mateo 7:17-20).
¿Jehová Diosan Qhanañchirinakapax kunatsa yaqha yupaychäwinïpki ukanakarus Diosan arunakapat yatiyir sarapxi?
Jesusat yatiqasisaw ukham yatiyir sarapxi. Uka urunakanxa Diosan Arupat saranukusaw judionakax Diosar yupaychapxäna, ukampis Jesusax jupanakarus yatiyaskakïnwa, janiw yaqhachkänti (Mateo 15:1-9). Chiqansa, taqi chiqanwa jaqinakax kuna yupachäwirus sarapxapuni, yaqhipax cristianüpxtwa sapxiwa, yaqhipasti yaqha kasta yupaychäwinakaruw sarapxaraki. Ukampis ak amuyañasawa, taqiniw kunjamtï Diosan Arupax yatichki ukham chuymasan yatiqañasa. Ukatwa Jehová Diosan Qhanañchirinakapax jaqi masipar munasiñatxa Diosan arunakapat yatiyir sarapxi.
¿Jupanakakis Diosar sum yupaychapkaspa ukhamti Jehová Diosan Qhanañchirinakapax amuyasipxi?
Chiqansa, janiw khitis mä yupaychäwirux ukhamaki sarañasäkiti, chuymasan chiqaw sistan ukhakiw mä yupaychäwir sarañasa, ukat payachasis sarañax janiw wakiskiti. Diosan Arupax akham sasaw cristianonakar qhanañchi: “Taqi kun yantʼapxam, ukatsti kunatix askïki ukana katxarupxam” sasa (1 Tesalonicenses 5:21). Ukhamasti, kuntï maynix iyawski ukaxa Bibliankañapawa. Amtañäni, mä sapa chiqa yupaychäwikiw utji. Uka tuqitxa Efesios 4:5 qillqatax akham siwa: “Mä sapa Tatitukiw utji, mä sapa iyawsaña, mä bautismokiraki” sasa. Ukampis jichhürunakanxa, walja thakiw utji, ukat taqi uka thakinakaw qhispiñar apistani sasaw jaqinakax sañ yatipxi, ukampis Jesusatakix uka amuyunakax janiw walïkänti. Ukatwa akham säna: “Jakañaru irpiri thakisti wali kʼullkʼuwa, punkupas uka kikpa kʼullkʼurakiwa, jukʼanikirakiw ukarux mantapxi” sasa. Uka thaksa jikxatapkaspa ukhamwa Jehová Diosan Qhanañchirinakapax amuyapxi, jan ukhamäkaspaxa yaqha yupaychäwi thaqapxaspa (Mateo 7:14).
¿Jupanakakis qhispiñäpkaspa ukhamti Jehová Diosan Qhanañchirinakapax amuyapxi?
Janiw jupanakax ukham amuyapkiti. Amtañäni, waljaniw jichhakamax Jehová Diosan jan Qhanañchiripäkasin jiwarawayapxi, ukampis jupanakax jaktanipxaniwa ukat mayampiw aka Uraqin jakasxapxani. Maysa tuqitxa, janïra ‘wali tʼaqhisiñ’ urükipanwa waljanix Diosan chiqa yatichäwinakap tuqit saytʼasisin ukarjam sum sarnaqapxarakispa, ukhamata qhispiñataki. Ukat janiw jaqi masimar uñchʼukïtati sasaw Jesusax säna. Chiqansa, jiwasax janiw yaqhan chuymap yatksnati, Diosakiw uk sum yati. Jupax wali sumwa sapa maynir uñtʼistu, ukat khuyapayasiñampiw uñjarakistu, ukhamasti jaqi masir uñchʼukiskañax janiw wakiskiti, Jesusakiw Diosan uttʼayatjamax uk luraspa (Mateo 7:1-5; 24:21; 25:31).
¿Jehová Diosan Qhanañchirinakapan tantachäwinakapar saririnakax kuna amtampis qullqi tuqit yanaptʼapxaspa?
Tamar qullqimpi yanaptʼañ tuqitxa akham sasaw apóstol Pablox säna: “Sapa mayniw, kunjämtï chuymapanxa amtki ukhamarjam churañapa; janiw pä chuyma churañapäkiti, janirakiw maynin jariyatakis churañapäkarakiti, Diosasti kusisit chuymampi chuririruw munaraki” sasa (2 Corintios 9:7). Jehová Diosan Qhanañchirinakapax tantachäwinakansa, jachʼa tantachäwinakansa janiw khitirus qullq mayipkiti. Ukampis qullqimpi yanaptʼañ munirinakatakix cajanakaw utji. Ukhamasti janiw khitin ichunttʼatapas ni qhawqha churatapas yatiskiti. Yaqhipax walja iranttʼapxi, yaqhipasti jukʼampikiw yanaptʼapxaraki; ukat yaqhipax janirakiw iranttʼapkiti. Ukampis janiw walja qullqi churañapunix askïkiti, kunjamtï Jesusax siskänxa, kuna amtampis churirjamäsax maynix churi ukaw jukʼamp askixa. Ukhamwa Jesusax Jerusalén markankir templon churaskirinakat amuytʼayäna (Lucas 21:1-4).
Jehová Diosan Qhanañchiripäxirista ukhaxa, ¿jupanakamp chika yatiyirit sarañajäspa?
Diosan Apnaqäwipaw aka Uraqi paraisoptayxani siski uka yatichäwi maynix istʼki, ukat chuymapar purtʼi ukhaxa janiw ukhamaki qhiparkiti, jan ukasti wal uka suma yatiyäwxa yaqhanakar yatiyañ muni. Jumax ukhamaw jikxatasirakisma (Hechos 5:41, 42).
Chiqansa, kunaymanitwa maynix cristianüxatap uñachtʼayaspa, ukampis Diosan arunakapat yatiyir sarki ukhaw Jesusan arkiripäxatapxa sum uñachtʼayi. Jesusax ‘chiqapawa, ukat kunsa chiqaparupuniw arsu’ sasaw Bibliax qhanañchi. Aka Uraqinkkasaxa “Diosan reinopaw jakʼankxi” sasaw yatiyäna. Ukat ukham lurapxäta sasaw arkirinakapar jaytawayäna (Apocalipsis 3:14; Mateo 4:17; 10:7). Ukat akham sarakïnwa: “Taqi akapachankir jaqinakar yatiyir sarapxam [...]. Yatichapxarakim”, ukat “Diosan reinopat aka suma yatiyäwisti aka uraqpachanwa yatiyatäni, ukhamat taqi markanakan yatipxañapataki” sasa (Mateo 24:14; 28:19, 20).
Maynix kunaymanitwa Diosan Apnaqäwipat yatiyaspa. Inas munat masinakampis jan ukax yaqhanakampis parltʼañ munchispa. Ukat yaqhipax cartanaka qillqasinwa yaqhanakar apayapxaraki, ukat telefonot jawsasin yatiyirinakas utjarakiwa. Ukampis yaqhipax libronak jan ukax revistanakwa yatxatañ munir masinakaparux apayapxaraki. Ukampis janiw mä qhawqhaniruki yatiyañ munapkiti ukatwa Jehová Diosan Qhanañchirinakapax utat uta sarapxi.
Biblianxa taqiniruw akham saraki: “Qullan Ajayumpi Corderon esposapampisti siwa: ‘jutam’. Istʼirïki ukasti sarakpan ‘Jutam’ sasa. Khititix umat pharjayaski, ukat um munaraki ukax jutpan, jakañ umat inak umtʼarakpan” sasa (Apocalipsis 22:17). Ukampisa, janiw khitis paraíso tuqitsa jan ukax ukan utjkani uka bendicionanakatxa pä chuyma yatiyir sarañapäkiti, jan ukasti taqi chuymaw sarañapa.
Chiqpachansa, jumax jukʼampwa Jehová Diosan Qhanañchirinakapatsa yatichäwinakapatsa yatiñ munpachätaxa. Inas kuna tuqitsa payachassta jan ukax mayjsa amuysta, uka tuqinakatwa parltʼañ munpachätaxa. Nanakax ukhamarakiw jumarux ukham sum qhanañchtʼañ munapxsma, ukampis janiw aka qillqatarukix mantkaspati, ukhamasti inas utam jakʼankïr Jehová Diosan Qhanañchirinakapan Tantachasiñ Utapan jupanakampi parltʼchisma, jan ukax utamar jutapkani ukhasa jupanakampix parltʼarakchisma. Maysa tuqitxa, markamankir sucursalaparuw mä carta tuqi jisktʼasirakisma, aka manqhanwa kawkirus apayasma ukax uñsti.