Diosan iyawsata yupaychäwi

1. ¿Diosarux munañaparjam yupaychañänixa kunsa katuqañäni?

JEHOVÁ DIOSAX wal munasistu. Ukatwa, sum jakasiñasatakixa yanapañ munistu. Munañaparjam yupaychañänixa, wali kusisitaw sarnaqasiñäni ukat jan waltʼäwinakarusa atipañäniwa. Ukhamarusa bendicionanakwa katuqañäni, ukat yanaptʼarakistaniwa (Isaías 48:17). Ukampisa, patak patak yupaychäwinakawa jan ukax religionanakaw utji. Diosat kunatï chiqäki ukwa yatichapxta sasaw taqinis sapxi, ukampisa, khitis Diosaxa ukat kunsa Diosax jiwasanakaru mayistu uka tuqinakatxa may maywa parlapxi.

2. ¿Kunjamsa Jehová Diosar yupaychañaxa ukxa kunjamatsa jumax yatisma, ukat kunampisa uk amuytʼsna?

² ¿Kunjamas Jehová Diosar yupaychañäpacha uk kunjamatsa yatisma? Uk yatxatañatakix janiw wakiskiti taqi yupaychäwinakaru yatichäwinakap uñaqir sarañaxa. Jan ukasti, kuntï chiqa yupaychäwit Bibliax chiqpachapuni yatichki ukwa yatiqañama. Sañäni: kunjamtï yatktaxa, falso qullqxa taqi markanwa apnaqapxi. Ukat falso qullqinakat chiqa qullqinak apstʼarapit sapxiristamxa, ¿kunjamatsa apsusma? ¿Falso qullqi sum uñtʼañamat wakisispa? ¿Janit chiqa qullqi sum uñtʼañamax wakiskaspa? Chiqa qullqtï sum uñtʼätaxa janiw chʼamäkaniti falso qullqinakat ajllsuñaxa. Ukhamarakiwa, kunapachatï chiqa yupaychäwi sum uñtʼxtan ukhaxa janiw chʼamäkiti kʼari yupaychäwinakaru uñtʼañaxa.

3. Jesusan aruparjamaxa, ¿Diosan iyawsatäñatakix kun lurañasasa?

³ Kunjamtï Jehová Diosax munki ukham yupaychañasawa. Taqi yupaychäwinakaruw Diosax iyawspacha sasaw yaqhipanakax sapxi, ukampisa janiw Bibliax ukham yatichkiti. Janiw cristianüxtwa sañakïkarakisa, Jesusax akham sänwa: “Janiw khitinakatix: ‘Tatay, Tatay siskitus ukanakax taqini alaxpach markarux [apnaqäwirux, NM] mantkaniti, jan ukasti khitinakatix Awkixan munañapa lurki ukanakakiw mantani” sasa. Ukhamasti, kuntï Diosax maykistu ukanak yatiqañäni ukat ukarjam sarnaqañäni ukhakiwa Diosax iyawsistani. Diosan munañap jan lurañ munirinakaruxa, Jesusax “jan wali luririnaka” sasaw säna (Mateo 7:21-23). Kʼari yupaychäwinakaxa falso qullqimp sasiwa, uñxatatax suma qullqjamäspawa, ukampisa jan kunataki inamayawa. Ukatxa jan waltʼañanakaruwa puriyistaspa.

4. ¿Jesusax pä thakit parlasinxa kamsañs munpachäna, ukat kunarus uka pä thakixa irpistaspa?

⁴ Jehová Diosax taqiniruw wiñay jakañxa churañ muni. Ukat Kusipachan wiñay jakañatakix munañaparjam yupaychañasawa, munañaparjam sarnaqañasarakiwa. Ukampisa waljaniw ukham jan sarnaqañ munapkiti, ukatwa Jesusaxa akham säna: “Kʼullkʼu punku tuqi mantapxam. Chhaqhañaru irpiri thakisti anchowa, punkupasti wali anchorakiwa; waljanirakiwa uka tuqi mantasipki. Jakañaru irpiri thakisti wali kʼullkʼuwa, punkupas uka kikpa kʼullkʼurakiwa, jukʼanikirakiw ukarux mantapxi” sasa (Mateo 7:13, 14). Ukhamaxa, chiqa yupaychäwix jakañaru irpiriwa, ukat kʼari yupaychäwisti jiwañar irpiriwa. Ukampisa, Jehová Diosax janiw khitin jiwañapsa munkiti, ukatwa taqi jaqinakaru jupxat yatiyaski (2 Pedro 3:9). Chiqasa, kunjamtï Diosar yupaychasktan ukaxa, wiñay jakañaru jan ukax jiwañaruw irpistaspa.

¿KAWKÏRISA CHIQA YUPAYCHÄWIXA UK KUNJAMATSA YATSNA?

5. ¿Kunjamatsa uñtʼsna chiqa yupaychirinakaruxa?

⁵ ¿Kunjamaraki ‘jakañaru irpiri thaksti’ jikxatsna? Chiqa yupaychäwinkirinak uñtʼañax janiw chʼamäkaniti, sarnaqäwinakapatwa uñtʼapxäta sataynaw Jesusaxa. “Jumanakax luräwinakap tuqiw uñtʼapxasma”, kunattix “taqi suma quqaxa suma achunakwa achu” sasaw satayna (Mateo 7:16, 17). Mä arunxa, chiqa yupaychäwinkirinakax yatichäwinakapansa luräwinakapansa qhanawa. Juchanïpxchisa pantjasirïpxchisa, tamjamax Diosan munañapa lurañatakiw chʼamachasipxi. Sum uñtʼañatakix suxta tuqit yatxatañäni.

6, 7. ¿Diosan yupaychirinakapax kamsapxisa Bibliatxa, ukat kunjamsa Jesusax uka tuqit mä uñachtʼäwi jaytawayistu?

⁶ Diosan yupaychirinakapaxa Bibliampipuniw yatichapxi. Diosan Arupax akham siwa: “Taqi Qillqatasti Diosan amuytʼayatawa, askirakiw yatichañataki, chiqachañataki, ukhamarak qʼuma jakañan sarnaqañ yatichañatakisa, ukhamat Diosankirinakax wali yatiñanïpxañapataki, taqi casta suma luräwinakatak suma wakichatäpxañapataki” sasa (2 Timoteo 3:16, 17). Ukat apóstol Pablox akham sasaw jilat kullakanakaparux qillqarakitayna: “Kunapachatix jumanakax Diosan Arunakap istʼapxta nanakax qhanañchapkayäsma ukkhaxa, jumanakax janiw jaqinakan arunakapjamti katuqapkäyätaxa, jan ukasti Diosan arunakapjamwa katuqapxta. Chiqpachansa Diosan arunakapawa” (1 Tesalonicenses 2:13). Ukhamasti, chiqa yupaychäwinkirinakan yatichäwinakapasa luräwinakapasa janiwa jaqinakan yatichäwinakapata jan ukax jaqinakan sarnaqäwinakapata apsutäkiti. Jan ukasti, Diosan amuytʼayata Arunakapata apstʼatawa.

⁷ Jesucristox Diosan Arupatpunwa yatichäna, ukhamatwa yatiqasiñasataki mä uñachtʼäwi jaytawayistu. Alaxpachankir Awkiparu mayiskäna ukhaxa akham sänwa: “Arunakamasti chiqawa” sasa (Juan 17:17). Jesusax Diosan Aruparux iyawsänwa, Bibliatpunwa yatichänxa. “Qillqatawa” sapunirïnwa, ukatxa Diosan Arupatpunwa arstʼirïna (Mateo 4:4, 7, 10). Ukhamarakiwa, jichhürunakan Diosan yupaychirinakapax janiw amuyunakapaki yatichapkiti. Jan ukasti, Bibliax Diosan Arupaw sapxiwa, ukampiwa yatichapxaraki.

8. ¿Chiqa yupaychäwinkirinakaxa kunsa lurapxi?

⁸ Chiqa yupaychäwinkirinakax Jehová Diosarukiw yupaychapxi ukat Sutipwa yatiyapxaraki. “[Jehová] Tatitu Diosamarukiw yupaychäta, jupa saparukirakiw servïta”, ukham sasaw Jesusax yatichäna (Mateo 4:10). Ukhamasti, Jehová Diosan yupaychirinakapaxa Juparukipuniwa yupaychapxi, janipuniwa yaqharuxa yupaychapkiti. Kunjam Diosasa uka tuqit yatiyasawa ukat sutipat yatiyasarakiwa yupaycharaktanxa. Salmo 83:18, Traducción del Nuevo Mundo sat Biblianxa siwa: “Jaqinakan yatipxañapataki, jumaxa Jehová sutinïtama, juma sapakiw uraqpachxaru taqi Munañanïtaxa” sasa. Diosan yupaychirinakapaxa Jesusat yatiqasisaw jaqinakaru Diosat yatichapxaraki. Jesusaxa akham sasawa Awkipar mayisïna: ‘Sutimxa uñtʼaytwa akapachata churkista uka jaqinakaruxa’ sasa (Juan 17:6, MT). Jichhürunakanxa, Diosan chiqpach yupaychirinakapaxa ukhamarakiwa jaqi masinakaparu kunjam Diosäkitix uk yatiyasipki, ukat Diosan sutipsa, amtanakapsa yatiyasipkarakiwa.

9, 10. ¿Kunjamatsa chiqa cristianonakax munasiñ uñachtʼayasipxi?

⁹ Diosan yupaychirinakapaxa chiqpachapuniw munasipxi, janiw uñisisipkiti. Jesusax akham sänwa: “Jumanakatix maynit maynikama munasipxätaxa, taqiniw amuyapxani nayan discipulonakaxäpxatama” sasa (Juan 13:35). Nayrïri cristianonakaxa ukhamwa munasipxäna. Diosan yupaychirinakapan munasiñapaxa, yaqha kasta jaqinakarusa, yaqha markankïrinakarusa mayarukiw tukuyi mä familiäkaspasa ukhama (Colosenses 3:14). Kʼari yupaychäwinkirinakaxa janiw jupanakkamax ukham munasipkiti. Yaqha kastätapata jan ukax yaqha markankirïtapatxa jupanakkamaxa jiwayasipxakiwa, munasipxaspaxa janiw jiwayasipkaspati. Chiqa cristianonakax janipuniw kunampisa jilat kullakanakaparu jiwayapkiti, janirakiwa yaqhanakarus jiwayapkaspati. Bibliax akham sasaw yatichi: “Ukhamatwa yatisi khitinakas Diosan wawanakapaxa, khitinakarakis Supayan wawanakapäkarakis ukaxa. Kawkïritix jan aski lurkixa, ukhamarak jan jilaparus munaski ukaxa, janiw Diosankkiti [...]; ‘munasipxam maynit maynikamaʼ. Janiw Cainjamañasäkiti, jupax Supayankirïnwa ukatwa jila[ta]paru jiwayi” sasa (1 Juan 3:10-12; 4:20, 21).

¹⁰ Ukhamawa, chiqa munasisaxa janiw khitisa jaqi masiparu jiwaykaspati, ukampisa janiw ukakïkiti. Chiqa cristianonakaxa tiempsa chʼamsa jan ukax yänakapsa apstʼasipxiwa maynit maynikama yanaptʼasiñataki ukhamaraki chuymachtʼasiñatakisa (Hebreos 10:24, 25). Jan waltʼañanakansa taqi chuymawa yanaptʼasipxi ukat janiw mayninakat kuns apaqapkarakispati. Ukhamasti, Biblianxa ‘taqiniruw aski luraña’ siski uka iwxarusa istʼapxarakiwa (Gálatas 6:10).

11. Diosaw Jesucristompi qhispiyistu, ¿kunatsa ukar iyawsañaxa?

¹¹ Diosaw jaqinakaru Jesucristompi qhispiyi ukaruw chiqa cristianonakaxa iyawsapxi. Bibliax akham sasaw yatichi: “Janiw yaqha khitinsa qhispiyasiñax utjkiti. Janirakiw akapachanxa yaqha sutix Diosan churata utjkiti, jaqinakan qhispiyasipxañapatakixa” sasa (Hechos 4:12). Kunjamtï 5 jaljan yatiqktanxa, Jesusawa istʼasir jaqinakar qhispiyañatakixa jakañapa luqtasïna (Mateo 20:28). Ukatsti, aka Uraqiru apnaqaniñapatakiwa Jehová Diosaxa alaxpacha Apnaqäwipana Apnaqirit Jesusarux uttʼayi. Ukhamasti, Jesusan yatichäwinakapar istʼañaswa Diosax muni. Ukhamatakwa wiñayas jaksnaxa. Ukatwa Bibliax akham sixa: “Khititix Yuqar iyawski ukaxa wiñay jakañaniwa, ukampis khititix jan Yuqaru iyawski ukaxa janiw wiñay jakañanïkaniti” sasa (Juan 3:36).

12. ¿Jan akapachankïriñax kamsañs muni?

¹² Diosan chiqa yupaychirinakapax janiw akapachankirïpkiti. Kunapachatï Jesusax Pilato sat apnaqiri nayraqatan taripatäkän ukhawa akham säna: “Nayan reinoxax janiw akapachankkiti” sasa (Juan 18:36). Chiqa cristianonakax kawki markansa jakasipkpan Diosan Apnaqäwiparupuniw istʼapxi. Ukatwa, chʼaxwäwinakarusa politicanakarusa janipun mitisipkiti. Ukampisa, yaqhanakatï politicaru mantañ munapxchi, marka apnaqirïñsa amtapxchi jan ukax marka irpiri chhijllir sarañ munapxchi ukhaxa, janirakiw ukanakarusa mitisipkiti. Diosan chiqa yupaychirinakapax janis politicaru mitisipkchixa, markan kamachinakaparuxa istʼapxiwa. ¿Kunatsa? Kunattix Diosan Arupaxa cristianonakarux akham siwa: “Autoridadanakarux jaysapxañama[wa]” sasa (Romanos 13:1). Ukampisa, kunapachatï marka apnaqirinakax Diosan kamachinakap contra lurañaru waytʼki ukhaxa, chiqa yupaychirinakaxa apostolanakat yatiqasisaw sarnaqapxi, uka apostolonakaxa akham sapxänwa: ‘Diosar nayraqat istʼapxañasaw wakisi, jaqinakar sipansa’ sasa (Hechos 5:29; Marcos 12:17).

13. ¿Kamsapxisa Diosan Apnaqäwipatxa Jesusan chiqa arkirinakapaxa, ukat kunsa lurapxi?

¹³ Jesusan chiqa arkirinakapaxa Diosan Apnaqäwipakiwa jaqinakataki mä suytʼäwixa sasaw yatiyapxi. Jesusax akham sänwa: “Diosan reinopat aka suma yatiyäwisti aka uraqpachanwa yatiyatäni, ukhamat taqi markanakan yatipxañapataki, ukatsti akapachan tukusiñapaw jutani” sasa (Mateo 24:14). Jesucriston chiqa arkirinakapaxa janiw akapach apnaqirinakaru atinisiñ yatichapkiti. Jan ukasti, Diosan Apnaqäwipakipuniw jan waltʼañanakxa askichani sasaw yatiyapxi (Salmo 146:3). Ukat Diosar jakʼachasipkäta ukhaxa uka suma apnaqäwix jutpan sasaw mayisipxäta sataynawa Jesusaxa, akham arunakampi: “Apnaqäwimax jutpan. Munañamax luraspan, alaxpachansa ukhamaraki aka Uraqinsa” sasa (Mateo 6:10, NM). Uka Apnaqäwitxa Diosan Arupaxa akham siwa: “Jupaw taqi yaqha reinonakarux tukjani, wiñayan wiñayapaw uka reinox utjarakini” sasa (Daniel 2:44).

14. Amuyatamatxa, ¿kawkïris chiqa yupaychäwixa?

¹⁴ Ukanak yatisax akham sas jisktʼasiñamawa: “¿Kawkïri yupaychäwisa jan ukax kuna religionasa Bibliatpun yatichapxixa, ukat Diosan Jehová sutipsa yatiyapxixa? ¿Khitinakas cristianonakjama chiqapuni munasipxixa, Jesucristorus iyawsapxixa, ukat jan akapachankirïpkixa? ¿Kawkïri yupaychäwisa Diosan Apnaqäwipakiwa jaqinakataki mä suytʼäwix sas yatichapxi? Taqi yupaychäwinakatxa, ¿kawkïr yupaychäwikisa taqi ukanak phuqhixa?”. Jehová Diosan Qhanañchirinakapawa taqi ukanak phuqasipki (Isaías 43:10-12).

¿KUNSA JUMAX LURÄTA?

15. Jupan utjatap yatiñat sipansa, ¿kunsa Diosax mayistu?

¹⁵ Diosar kusisiyañatakix janiw juparux aliqaki iyawsañasäkiti. Saxranakas Diosan utjatapa iyawsäpxarakiwa siw Bibliaxa (Santiago 2:19). Ukatxa janiw Diosan munañapxa lurapkiti, janirakiw Diosampi iyawsatäpkisa. Diosan chuymaparu purtʼañatakixa janiwa jupan utjatapaki yatiñasäkiti, jan ukasti munañap lurañasawa. Ukatxa, kʼari yupaychäwitsti mistxañasawa, chiqa yupaychäwir makatxañataki.

16. ¿Kun lurañasasa jan kʼari yupaychäwinkañasatakixa?

¹⁶ Apóstol Pabloxa janiw kʼari yupaychäwirux sarañati sänwa. Akham qillqäna: “Ukatwa [Jehová] Tatitux sarakixa: ‘Mistunxapxam jupanak taypita, jupanakat jithiqtapxarakim. Qʼañu lurañanaksti jan lurapxamti, nayasti jumanakarux katuqxapxämawaʼ” sasa (2 Corintios 6:17; Isaías 52:11). Ukhamaxa, kunanakatï kʼari yupaychäwiru apkistaspa ukanakxa qʼalwa chiqa cristianonakaxa apanukxapxi.

17, 18. ¿Kunas “Jachʼa Babiloniaxa”, kunatsa jankʼak ‘mistxañasaʼ?

¹⁷ Taqi kʼari yupaychäwinakaxa ‘Jachʼa Babiloniankiripxiwa’ siw Bibliaxa (Apocalipsis 17:5).a Uka sutix Babilonia sata nayra markatwa amtayistu, Uma Juicio qhipatxa uka markanwa kʼari yupaychäwixa qalltäna. Kʼari yupaychäwin yatichäwinakapasa luräwinakapasa nayraw uka markan uñstäna. Babiloniankirinakaxa, kimsa diosat mayar tukuyasawa yupaychapxiritayna mä diosakïkaspas ukhama, ukat jichhürunakanxa kʼari yupaychäwinakan wali uñtʼat yatichäwipaxa ukarakiwa, Trinidad satäkis ukwa yatichapxaraki. Ukampis Bibliax qhan yatichi, mä sapa Jehová Diosakiw utji ukat Jesucristox Yuqapaw siwa (Juan 17:3). Babiloniankirinakaxa, jaqix almaniw ukat uka almax jakaskakiw kunapachatï maynix jiwxi ukhaxa ukat infiernon tʼaqhisipxi sasaw sapxiritayna. Jichhürunakanxa, jila part yupaychäwinakaw ukham yatichapxi jan jiwir almanïksnasa jan ukax jan jiwir ajayunïksnasa ukat infiernonsa wal tʼaqhiskaspa ukhama.

¹⁸ Ukhamaxa, nayra Babilonian kʼari yatichäwinakapawa uraqpachan yatichasi. Ukhamasti, Jachʼa Babiloniaxa Jehová Diosar kutkatasiri taqi kʼari yupaychäwinakawa, uraqpach apnaqiri kʼari yupaychäwi sas uñtʼatarakiwa. Ukatxa, uka Babiloniaxa mä akatjamat chhaqtayatäniw siw Diosaxa (Apocalipsis 18:8). ¿Amuytati kunatsa Jachʼa Babiloniat qʼal mistxañax wali wakisirixa? Jehová Diosaxa tiempo utjkipana jankʼaki ‘mistxañamwa’ muni (Apocalipsis 18:4).

19. ¿Jehová Diosar yupaychasax kuns katuqäta?

¹⁹ Uka kʼari yupaychäwita mistxañ amtatamatxa inas yaqhipanakax jumat jithiqtxapxchini. Ukampisa, markapamp chika Jehová Diosaru yupaychätaxa, jumat jithiqtirinakat sipansa, walja jaqinakaw jumaru jakʼachasipxätamxa. Jesusan nayrïr arkirinakapjamarakiwa walja jilat kullakanakanïxäta, Jesusan arkirinakapaxa taqi kunwa jaytjapxatayna. Chiqasa, Uraqpachan mä jachʼa familianïxätawa, ukaxa millón millón chiqa cristianonakawa, ukatxa chiqa munasiñampiwa uñjapxätamxa. “Ukampis khä pachanxa wiñay jakañ katuqara[kïta]” (Marcos 10:28-30). Ukhamarusa, Bibliat yatiqatamatwa inas jumat jithiqtapxchini, ukampisa tiempompixa kuntï Bibliax yatichki ukxa yatiqapxaspawa, ukat Jehová Diosan yupaychirinakapäpxarakispawa.

20. ¿Kuna suytʼäwis chiqa yupaychäwinkirinakatakix utji?

²⁰ Diosax niyaw aka ñanqhapacharux tukjani, uka lantxa Apnaqäwipampi apnaqat mä suma jutïrpachwa apanini siw Bibliaxa (2 Pedro 3:9, 13). ¡Ukax kunja sumakïkani! Ukanxa mä sapa chiqa yupaychäwikiw utjxani. ¿Janiti jichhatpacha Diosan chiqa yupaychirinakapampi tantachasiñamäkaspa?