10 YATICHÄWI

¿Kawkïrisa cheqa yupaychäwejj uk kunjamsa yatsna?

1. ¿Mä sapa cheqa religionakit utjpacha?

Jesusaw yatichaski — “Amuyasipjjam khitinakatejj: ‘Diosatwa parlta’ sasa kʼarisisa sarnaqapki ukanakatjja.” (MATEO 7:15)

Jesusajj mä yupaychäwitakwa arkirinakapar parläna, uka sapakiw cheqa yupaychäwejja. Ukajj wiñay jakañ apir mä thakhir uñtatawa ukat jukʼanikiw uka thakhi jikjjatapjje sasaw säna (Mateo 7:14). Cheqa yatichäwinakarjama, mä arunjja, Bibliarjam yupaychapki ukanakarukiw Diosajj katoqe. Khitinakatï ukarjam yupaychapki ukanakajja, ‘mä sapa iyawsawin’ mayakïpjjewa. Juan 4:23, 24; 14:6, ukat Efesios 4:4, 5 liytʼäta.

¿Taqpach religionas Diosatakejj walikïpachati? sat video uñtasma.

2. ¿Kamsänsa Jesusajj kʼari cristianonakatjja?

Mä tatakuraw iglesiapan yatichaski. Ukat juparakiw guerrar sarapkani uka soldadonakar bendiciski. — “Diosarojj uñtʼapjjtwa sapjjewa. Ukatsti luräwinakapampejj janiw ukham uñachtʼayapkiti.” (TITO 1:16)

Kʼari yatichirinakaw cheqa cristianonakan yatichäwinakap mayjtʼayapjjäni sasaw Jesusajj säna. Uka kʼari yatichirinakajj cristianöpjjtwa sapjjewa. Ukat cheqa yatichäwinïpjjtwa sapkchisa, kʼarinakwa jaqenakar yatichapjje. Ukampis kawkïrisa cheqa yupaychäwejj uk yatsnawa, ¿kunjämatsa? Ukankirinakajja, luratanakapampiw cheqa cristianöpjjatap uñachtʼayapjje. Mateo 7:13-23 liytʼäta.

3. ¿Khitinakäpjjesa cheqa yupaychirinakajja?

Phesqa toqet uk uñjañäni:

Bibliarojj Diosan Aruparjamaw respetapjje. Cheqa yupaychirinakajja, jaqen yatichäwinakapampi apayasiñat sipansa, Biblian yatichäwinakaparjam sarnaqañatakiw wal chʼamachasipjje (Mateo 15:7-9). Ukat kuntï yatichapki ukwa lurapjjaraki. Juan 17:17 ukat 2 Timoteo 3:16, 17 liytʼäta.
Diosan, Jehová sutip jachʼañchapjje. Jesusajj Diosan sutip jaqenakar yatiyasaw uka suti jachʼañchäna. Taqeniruw Jehová Diosat parläna ukat “sutimajj jachʼañchatäpan”, jan ukajj qollanaptayatäpan sasaw oracionan mayisiñ yaticharakïna (Mateo 6:9). Jumajj utjaskta uka cheqanjja, ¿khitinakas Diosan sutip yatiyapjje? Romanos 10:13, 14 liytʼäta.
Diosan Reinopat yatiyapjje. Jehová Diosajj Reinopat suma yatiyäwinak yatiyañapatakiw Jesusar aka Oraqer khithanïna. Uka Reinokiw jaqenakar yanaptʼaspa. Jesusajj jiwañapkamaw uka Reinot yatiyäna (Lucas 4:43; 8:1; 23:42, 43). Ukat arkirinakajaw uka Reinot yatiyapjjarakini sarakïnwa. Ukhamajj maynitï Diosan Reinopat jumamp parlir jutani ukhajja, ¿kawknïr religionataw sasmasa? Mateo 24:14 liytʼäta.
Janiw akapachankirïpkiti. Jesusan arkirinakapajj janiw akapachankir politicanakarusa, ni jaqen chʼajjwäwinakaparus mitisipkiti (Juan 17:16; 18:36). Ukat janirakiw kuna jan walinaktï aka ñanqhapachan lurapki ukanaksa lurapkiti. Santiago 4:4 liytʼäta.
Munasirïpjjatapajj qhana amuykañawa. Kuna markatäskpansa, Diosan Arupaw cheqa cristianonakar taqe jaqenakar respetañ yatichawayi. Ukampis niya taqe kʼari religionanakaw guerranakan wal yanaptʼawayapjje, cheqa yupaychäwinkirinakajja janiw uk lurapkiti (Miqueas 4:1-3). Antisansa, jan kun mayisakiw jaqe masipar yanaptʼañatak tiempo apstʼasipjje ukat qollqempis yanaptʼapjjaraki. Juan 13:34, 35 ukat 1 Juan 4:20 liytʼäta.

4. ¿Kawkïrisa cheqa yupaychäwejj uk kunjamatsa yatisma?

¿Khitinakas Diosan sutip jachʼañchapjje ukat Bibliarjam yatichapjje? ¿Khitinakakis Diosan Reinopakiw jaqenakar yanaptʼani sasin yatiyapjje? Ukat ¿khitinakas maynit maynikam cheqpachapun munasipjje ukat guerranakarus jan mitisipki? ¿Jumajj kamsasmasa? 1 Juan 3:10-12 liytʼäta.

Jukʼamp yatjjatañatakejja, ¿Kunsa Bibliax chiqpachapuni yatichi?, sat libron 15 jaljap uñjjattʼäta.