13 Yatichäwi
Kunjamsa chiqa yupaychäwi jikxatasma
¿Taqi yupaychäwinakaruti Diosax iyawspacha jan ukax mayarukicha? (1)
¿Kunatsa cristianüpxtwa siri walja yupaychäwinakax utji? (2)
¿Kunjamatsa chiqa cristianonakar uñtʼasma? (3-7)
1. Jesusaxa mä chiqa cristiano tamakwa uttʼayatayna. Ukhamasti, jichhürunakanxa Jehová Diosar yupaychiri mä sapa tamakiw utjañapa (Juan 4:23, 24; Efesios 4:4, 5). Mä qhawqhanikiwa wiñay jakañaru irpir kʼullkʼu thakin sarnaqapxi siw Bibliaxa (Mateo 7:13, 14).
2. Apostolanakan jiwatapatxa jukʼat jukʼatwa cristiano tama taypinxa kʼari yatichäwinakampi jan wali luräwinakampix uñstani sataynaw Bibliaxa. Criston arkirinakaparu jupanak tuqir apaqir jaqinakaw utjani sarakitaynawa (Mateo 7:15, 21-23; Hechos 20:29, 30). Ukatwa cristianüpxtwa siri kunaymani yupaychäwinakax utjixa. ¿Kunjamatsa chiqa cristianonakar uñtʼsna?
3. Chiqa cristianonakax chiqpachapuniw jupanakkama munasipxi, uka tuqitwa jupanakar uñtʼsnaxa (Juan 13:34, 35). Janiwa yaqha kast jaqinakat jila jil tukupkaspati, ukham yatichatäpxiwa. Janirakiw yaqha markankiri jaqinakaru uñisipxam satäpkisa (Hechos 10:34, 35). Ukatwa janipuni chʼaxwañanakaru mitisipkiti. Chiqa cristianonakaxa jilat kullakanakjamawa sarnaqasipxi (1 Juan 4:20, 21).
4. Chiqa cristianonakaxa Bibliar wal respetapxi, uka tuqitwa jupanakaru uñtʼaraksnaxa. Bibliaxa Diosan Arupaw sapxiwa, ukat yatichäwinakaparuxa chiqaw sapxiwa (Juan 17:17; 2 Timoteo 3:16, 17). Diosan Arupawa jupanakatakix wali wakiskirixa jaqinakan amtanakapat sarnaqäwinakapat sipansa (Mateo 15:1-3, 7-9). Sapürusa Diosan Aruparjama sarnaqañatakiwa chʼamachasipxi. Ukhamaxa kuntï jaqinakaru yatichapki ukarjamaw sarnaqapxi (Tito 1:15, 16).
5. Chiqa yupaychirinakaxa Diosan sutip jachʼañchapxañaparakiwa (Mateo 6:9). Jesusaxa Diosan Jehová sutipwa yatiyäna, chiqa cristianonakaxa ukham lurapxañaparakiwa (Juan 17:6, 26; Romanos 10:13, 14). ¿Khitinakasa Diosan sutip markaman yatiyapxixa?
6. Chiqa cristianonakax Diosan Apnaqäwipat yatiyapxañapawa. Jesusax ukham luräna. Diosan Apnaqäwipatpunwa parläna (Lucas 8:1). Ukatxa, uka pachpa yatiyäwi taqi chiqan yatiyapxäta sasaw arkirinakaparux satayna (Mateo 24:14; 28:19, 20). Diosan Apnaqäwipakiwa suma jakasiñxa aka Uraqiru apanini sapxiwa chiqa cristianonakaxa (Salmo 146:3-5).
7. Jesusan arkirinakapaxa janiw aka ñanqha pachankirïpkiti (Juan 17:16). Janiwa politicaru mitisipkiti, janirakiw kunapachatï markachirinakax saytʼasipki ukhax mitisipkiti. Aka ñanqha pachax jan wali amuyunakampi jan wali lurañanakampi jan wali sarnaqäwinakampi phuqantatawa, uka jan walinakatxa jithiqtapxiwa (Santiago 1:27; 4:4). ¿Markaman ukham yupaychäwix utjiti?
[26, 27 jananakan fotonakapa]
Chiqa cristianonakaxa jupanakkamax wal munasipxi, Bibliaruxa respetapxiwa ukatxa Diosan Apnaqäwipat yatiyapxaraki