Kunjamsa chiqa yupaychäwi jikxatsna

Diosan munasitapäñatakixa, Diosana iyawsata yupaychäwinkañasawa. Jesusax sänwa: “Chiqpach yupaychirinakax”, “chiqa” kankañampiw Diosaruxa yupaychapxani sasa (Juan 4:23, 24). Diosaru chiqampi yupaychañatakixa, mä thakikiw utji (Efesios 4:4-6). Chiqa yupaychäwixa mä arunxa chiqa religionaxa wiñay jakañar apiriwa, ukat kʼari yupaychäwixa jiwañar apirirakiwa (Mateo 7:13, 14).

Kawkïris chiqa yupaychäwixa ukxa yupaychirinakan sarnaqäwinakapa uñjasaw yatsna. Chiqpach yupaychirinakapaxa Jehová Diosjama suma jaqïpxañaparakiwa. Kunjamtï mä suma jawas alixa suma jawasanak achuqkixa, uka kikpakirakiwa chiqa yupaychäwixa suma achunakjama jaqinakaru tukuyi (Mateo 7:15-20).

Jehová Diosan munasitanakapaxa Bibliaruxa respetapxapuniwa. Yatipxiwa Bibliax Diosan apayanitätapa. Ukatpï, sum jakasiñatakisa, jan waltʼäwinakaru atipjañatakisa ukat Diosar jukʼampi uñtʼañatakisa Bibliampipuniw yanaptʼayasipxi (2 Timoteo 3:16). Ukatxa, kuntix yatichapki ukhamarjam sarnaqañwa munapxi.

Jehová Diosan munasitanakapaxa jupanakkamaw munasisipxi. Jesusax Diosat yatichasawa ukat usutanakaru qullasarakiwa jaqinakaru munasiñapxa uñachtʼayäna. Chiqa yupaychäwinkirinakaxa yaqhanakarusa munasipxarakiwa. Jesusjamawa, janiw pisinkirinakarusa yaqha kasta jaqinakarusa jiskʼachapkiti. Jesusax sänwa, maynit maynikama munasirinakaxa, nayan arkirinakajjama taqinin uñtʼatäpxaniwa (Juan 13:35).

Diosan munasitanakapaxa Jupan Jehová sutipwa jachʼañchapxi. Maynitï sutis jan arsuñ munkaspa ukhaxa, ¿munasit masisäskakispati? Janiwa. Munat masinïsaxa sutipxa arsupuntanwa, ukat yaqhanakarusa sumpun jupat parltanxa. Ukhamarakiwa, Diosan munasitapäñ munirinakaxa Sutipatpuni aytasipxañapa ukat yaqha jaqinakarusa yatiyapxañaparakiwa. Jehová Diosax ukham lurañaswa muni (Mateo 6:9; Romanos 10:13, 14).

Jesusjamawa, Diosan munasitanakapaxa Diosan Reinopat jaqinakaru yatichapxi. Diosan Reinopax alaxpachankir apnaqäwiwa, ukaw aka Uraq kusipachaptayani. Diosan munasitanakapaxa Diosan Reinopatwa suma yatiyäwinaka yaqha jaqinakaru yatiyapxi (Mateo 24:14).

Jehová Diosan Qhanañchirinakapaxa, Diosan munasitapäñwa munapxi. Bibliarux respetapxiwa ukat jupanakkamasa munasisipxarakiwa. Diosan sutipxa aytasipxapuniwa, waqaychapxarakiwa ukat Diosan Reinopatxa yaqha jaqinakaruw yatiyapxaraki. Jichhürunakanxa Jehová Diosan Qhanañchirinakapawa chiqa yupaychirinakaxa.