Prólogo

Munat liytʼiri:

“Jutam, nayar arkita” (Marcos 10:21). Ukham sasajj sapa mayniruw Jesusajj arkiripäñatak invittʼistu. ¿Jumajj arkiripäñ ajlljjtati? Uk lurjjsta ukhajj walja bendicionanakwa katoqäta. ¿Kunatsa ukham sistanjja?

Jehová Diosajja, juchampit jiwañampit jiwasar kutsuyañatakiw Yoqapar khitaniwayi (Juan 3:16). Jesusajj jiwas laykus jiwawaykchejja, kunjamsa sarnaqañasa ukwa yatichawayistu. Jupajj kunayman jan walinakanwa uñjasïna, ukampis janipuniw Diosat jitheqtkänti, Awkipar kusisiyañwa munarakïna. Ukatjja Awkipjamäñasatakiw yatichawayistu. Jupajj sarnaqatapampisa, luratapampisa, parlatapampis Jehová Diosajj kunjamasa, kunas voluntadapajja ukwa sumpach uñachtʼayawayi (Juan 14:9).

Bibliajja Jesusaw “mä ejemplo churapjjtamjja” sasaw qhanañchi, ukhamat “wali amuyumpi kayup arka[ñasataki]” (1 Pedro 2:21). Ukhamajj Diosar jakʼachasiñatakisa, jan kuna llakin sarnaqañatakisa, jutïrin wiñay jakʼañ katoqañatakis Jesusan kayupwa wali amuyump arkañasa.

Jesusan kayup arkañatakejja, kunjamsa jupajj aka oraqen sarnaqäna ukwa sum yatjjatañasa, ukatakejj Bibliaw yanaptʼistaspa. Ukhamasti, kunanaktï arskäna lurkarakïna ukanakat wal lupʼipjjañäni, kunjamsa jupat yateqasitas uñachtʼaysna uks amuytʼapjjarakiñäni. Ukhamatwa kunjamsa jupar arksna uk sumpach amuyañäni.

Aka librojj Jehová Diosampiru Jesusampir jukʼamp munasiñatakiw jumar yanaptʼätam, Jesusan taktʼatanakap sum arkañatakis yanaptʼarakïtamwa. Ukhamatwa jichhasa ukat wiñayan wiñayapatakis Jehová Diosar kusisiyäta.