Qalltañataki

1, 2. Biblian parlki uka chacha warminakarojja, ¿kunjamsa tamanak tumptʼir mä jilatajj uñjäna, ukat kunatsa jupanakaru amigonakasarjam uñjañajj wali askïspa?

TAMANAK tumptʼirin arstʼäwip istʼasajja, mä kullakajj akham sänwa: “Bibliajj parlki uka chacha warminakat parlkasajja, uka jilatajj wali munat amigonakapäkaspas ukhamwa jupanakat parli” sasa. Jïsa, uka chuymankipstat jilatajj walja maranakaw Bibliat yatjjatawayäna ukat yaqhanakarus yaticharakïna, ukhamajj Bibliajj parlki uka chacha warminakajj jupatakejj wali uñtʼatäpjjänwa, wali munat amigonakapäkaspas ukhama.

² Biblian parlki uka chacha warminakarojj ¿janit suma amigonakasarjam uñjañ munksna? ¿Ukhamti jumajj jupanakar uñjarakta? ¡Jupanakamp parltʼasiñajj wali askipunïspawa! Diosar taqe chuym serviri Noé, Abraham ukat Elías chachanakaru, jan ukajj Rut ukat Ester warminakar uñtʼañajj wali askïspawa. ¡Wal yanaptʼapjjestaspa! Suma ewjjtʼanaka ukat chʼamañchtʼir arunakwa sapjjestaspa (Proverbios 13:20 liytʼasiñapawa).

3. 1) Biblian parlki uka chacha warminakajja, ¿kunjamsa wal yanaptʼapjjestaspa? 2) ¿Kuna jisktʼanaksa qhanañchaskañäni?

³ Aski jaqenakajj jaktanipjjani ukhaw uka iyawsäwini chacha warminakamp wali sum parltʼasiñäni (Hech. 24:15). Ukampis jichhürunakanjja yanaptʼapjjarakistaspawa, ¿kunjamatsa? Apóstol Pablojj akham sänwa: “Yateqasipjjam khitinakatejj iyawsäw toqe, jan qarjasisa taqe kunatejj Diosajj: ‘Churämaw’ siski uka herencia katoqapki ukanakata” sasa (Heb. 6:12). Ukampis janïr sarnaqäwinakapat yatjjatkasajja, Pablon arunakapat kunsa maynejj jisktʼasispa uk qhanañchañäni. ¿Kunas iyawsäwejja, ukat kunatsa wali wakiskirejja? ¿Kunjamsa Diosar taqe chuym servipkäna uka chacha warminakat yateqassna?

¿Kunas iyawsäwejja, ukat kunatsa wali wakiskirejja?

4. ¿Kunsa jaqenakajj iyawsäwinïñat amuyapjje, ukat kunatsa pantjasitäpjje?

⁴ Iyawsäwinïñajj wali askipuniwa. Aka libron yatjjatkañäni uka chacha warminakatakejj iyawsäwinïñajj wali wakisiripunïnwa. Ukampis waljaniw jichhürunakan kunas cheqpach iyawsäwinïñajj uk jan yatipkiti. Jupanakatakejj jan sum yatjjatasa kunar iyawsañakïkaspas ukhamakiwa. Ukampis ¿ukhamapuniti? Janiwa, iyawsäwinïñajj janiw “Diosar munastwa” sañakïkiti, janirakiw jan sum yatjjatasaki Diosar iyaw saña sañ munkiti. Munasiñajj awisajj chhaqtjjakispawa ukat Diosar iyaw sañajj walikïskchisa, janiw ukakïkiti. Kunjamtï Bibliajj siskejja, sajjranakajj “iyawsasipkarakiwa, ajjsarañatsa khathatipjjarakiwa” (Sant. 2:19).

5, 6. 1) ¿Kuna jan uñjkañanakarus iyawsäwisajj suma uttʼayatajja? 2) ¿Iyawsäwinïñajj kunar uñtasitasa?

⁵ Cheqpach iyawsäwinïñajj jukʼampiwa. Ukhamajj kamsañs muni uk Biblian uñjañäni (Hebreos 11:1 liytʼasiñapawa). Jan uñjkaña payaw utji sasaw Pablojj säna. Maya, ‘kuntejj jan uñjtan ukajj cheqätapwa’ yattanjja. Cheqansa, Jehová Diosaru, Yoqaparu ukat alajjpachan apnaqjje uka Reino janiw nayrasamp uñjtanti, ukampis ukanakajj utjiwa, uk sum yattanjja. Paya, iyawsäwejj “‘katoqäwa’ sas taqe chuymampi suytʼktans ukawa”, ukanakajj janïraw paskiti. Sañäni, Diosan Reinopajj apankani uka machaq oraqjja, janïraw uñjtanti. Ukampis taqe ukanakajj janiw uñjaskiti sasati ¿jan iyawsäwinïñäni?

⁶ Janiw ukham amuyañasäkiti. Cheqpach iyawsäwejj suma uttʼayatawa sasaw apóstol Pablojj amuytʼayistu. Iyawsäwejj “‘katoqäwa’ sas taqe chuymampi suytʼktans ukawa” sasin Pablojj siskäna uka arunakajja, “título de propiedad” sasaw jaqokipasirakispa. Amuytʼañataki, maynitï mä uta churañ muniristam ukhajja, uka utan papelanakapwa churarakiristam, ukanakaw “título de propiedad” satajja. Ukat uka papelanak churasa, “akaw machaq utamäjje” sasin siristam ukhajja, ¿kuns amuyasma? Ukajj janiw “aka papelanakan jakäta” sañ munkiti. Ukampis uka papelanakajj wali valoraniwa, ukanakaw juman utamätap uñachtʼayi, ukhamajj uka papelanakajj pachpa utäkaspas ukhamawa. Iyawsäwisampejj ukhamarakiwa, taqe kuntï Diosajj arsuwayki ukanakajj phoqhasipuniniwa sasaw iyawsäwinïtas laykojj atinissna.

7. ¿Kunas cheqpach iyawsäwinïñajja?

⁷ Ukhamajj iyawsäwinïñajj Jehová Diosaru jan pächasisa, taqe chuyma atinisiña sañ muni. Iyawsäwinïtas laykuw Jehová Diosaru wali munasir Awkisarjam uñjtan, ukat kuntï Jupajj arsuwayki uk phoqhapuniniw sasaw taqe chuym atinistanjja. Janiw ukakïkiti, kunjamtï maynejj jakañatak manqʼañapajja, ukhamarakiw iyawsäwinïskakiñatakejj luräwinakasamp uñachtʼayañasa, jan ukajj iyawsäwisajj jiwatäkaspas ukhamäniwa (Sant. 2:26).

8. ¿Kunatsa iyawsäwinïñajj wali wakiskirejja?

⁸ ¿Kunatsa iyawsäwinïñajj wali wakiskirejja? Apóstol Pablow uk sum amuytʼayistu (Hebreos 11:6 liytʼasiñapawa). Jan iyawsäwinïsajj janiw Jehová Diosar jakʼachasksnati ni kusisiykaraksnasa. Ukhamajj alajjpachankir Awkisaru, mä arunjja, Jehová Diosar jakʼachasiñataki ukat jachʼañchañatakejja, iyawsäwinïñajj wali wakiskiripuniwa, cheqas amuytʼasir taqe jaqew uk lurañapa, janiw yaqha suma luräwejj utjkaspati.

9. Iyawsäwinïñajj wali wakiskirïtap yatitapjja, ¿kunjamsa Diosajj uñachtʼayi?

⁹ Iyawsäwinïñajj kunja wakiskirisa uk sumwa Jehová Diosajj yati, ukatwa yaqha jaqenakan sarnaqäwinakapat yatiyistu, ukhamat iyawsäwinïñasataki ukat uk uñachtʼayañasataki. Nayraqatjja, tamanak sarayapki uka jilatanakatwa yateqassna. Ukatwa Bibliajj “iyawsäwip arkapjjam” sasin ewjjtʼistu (Heb. 13:7). Maysa toqetsti, Pablojj ‘walja iyawsañani jaqenakatwa’ parläna. Jupanakajj Diosar taqe chuyma serviri ukat wali iyawsäwini nayra chacha warminakänwa (Heb. 12:1). Pablojj mä qawqhaninakatwa Hebreos 11 jaljan parläna, ukampis jukʼampinakaw utji. Bibliajj walja chacha warminakatwa parli, jupanakajj kunayman jakäwini ukat kunayman maranïpjjänwa. Jichhürunakanjja, niya taqeniw jan iyawsäwinïpkiti, ukhamajj khä tiempon jakapkäna uka chacha warminakat yatjjatañajj wali askipunïniwa.

¿Kunjamsa jupanakjam iyawsäwinïssna?

10. ¿Kunjamsa Bibliat sapak yatjjatañajj iyawsäwini chacha warminakat yateqasiñatak yanaptʼistaspa?

¹⁰ Maynit yateqasiñatakejja, nayraqat sum uñtʼañasawa. Ukatwa aka libro wakichasajj sum yatjjatasiwayi, ukhamat iyawsäwini chacha warminakar uñjkasmas ukham amuyañamataki. ¿Janit jukʼamp yatjjatasajj jupanakar jukʼamp sum uñtʼañ munkasma? Bibliat sapak yatjjatasajj yaqha qellqatanakwa thaqharakisma. Ukat liytʼasas lupʼiñamarakiwa, kunjamäpachänsa, kunanakas uka cheqan paspachäna taqe ukanakata. Ukankkasmas ukham amuyasim, jawiranaka, qollunak uñjam ukat kunanakas ukan pasaski uk istʼarakim. Kunjamsa uka chacha warminakajj jikjjatasipjjäna, kunsa amuyapjjpachäna uks amuytʼarakim, ukaw jukʼamp wakiskirejja. Ukhamtï luräta ukhajja, wali sumsa uka chacha warminakar uñtʼkasma ukhamäniwa. Ukat wali munat amigonakamarjamaw uñj-jjäta.

11, 12. 1) ¿Kunjamsa Abrahamaru ukat Sarar jakʼachassna? 2) ¿Kunjamsa Ana warmin, Eliasan ukat Samuelun sarnaqäwipajj yanaptʼistaspa?

¹¹ Diosat jan jitheqtiri servirinakar sum uñtʼjjäta, ukhaw jupanakat yateqasiñ wal munäta. Kunjamsa sarnaqäwipajj yanaptʼistaspa uk mä qawqha uñjañäni. Kawkhantï yatiyirinakajj jukʼamp munaski ukar khitapjjeristam, jan ukajj “akham yatiyañaw wakisjje” sasin sapjjeristam, ukampis jumatak uk lurañajj jan phoqhañjamäkaspa, jan ukajj ajjsarchisma ukhajja, ¿kunsa lurasma? Uka toqet lupʼisa Diosat mayisïta ukhajja, Abraham chachan sarnaqäwipatwa yatjjatasma. Jupampi Sarampejj Ur markan sum jakasiñwa jaytapjjäna, ukham lurapjjatapatwa walja bendicionanak katoqapjjäna. Jupanakat yateqasisajj jukʼampiw jupanakar jakʼachasïta.

¹² Maynejj chuym wal ustʼayiristam ukat llakit jikjjatasisajj tantachäwinakar jan sarañ munjjasma ukhajja, Ana warmin sarnaqäwipatwa yatjjatasma. Juparojj Penina warmis chuym ustʼaykchïnjja, janiw Diosar yupaychañ jaytkänti. Jupat yatjjatasaw mä suma amtar purisma ukat sarnaqäwiparojj wali askirjamaw uñjarakïta. Ukat jan wali amuyunakamp aynachtʼata, luratanakamajj janis askïkaspa ukham amuyasïta ukhajja, Elías profetatwa amtasisma. Jupajj jan walinakan uñjasisaw tʼaqhesïna, ukampis Diosaw wal chuymachtʼäna. Wayn tawaqonakajj qʼañu luräwinak lurapjjañapatakiw escuelan yantʼat uñjasipjje, ukhamajj Samuelun sarnaqäwipaw jupanakar yanaptʼaspa, jupajj kuna jan walinaktï Elí sacerdoten yoqanakapajj tabernaculon lurapjjäna ukanakwa aguantañapäna.

13. Mayninakat yateqasitas laykojja, ¿iyawsäwisajj janit Diosatak askëjjpacha?

¹³ Mayninakat yateqasitas laykojja, ¿iyawsäwisajj janit Diosatak askëjjpacha? Janiw ukhamäkiti. Pachpa Bibliaw jupanakat yateqasiñasatak chʼamañchtʼistu (1 Cor. 4:16; 11:1; 2 Tes. 3:7, 9). Ukat aka libron yatjjatkañäni uka chacha warminakatjja, yaqhepajj nayra tiempon jakapkäna ukanakatwa yateqasipjjarakïna. Sañäni, kunjamtï 17 yatichäwin uñjkañänejja, Mariajj kuna arunaktï Ana warmejj Diosat mayisisajj säna uka pachpa arunakampiw mayisïna. Cheqansa, jupatwa yateqasïna. Ukhamasti, ¿“Mariajj janiw añcha iyawsäwinïkänti” sañäspati? Janiwa. Anat yateqasisaw Mariajj Jehová Diosar jukʼamp atinisiñ yateqäna ukat Jupa nayraqatan suma jaqet uñjatäñatakisa yanaptʼarakïnwa.

14, 15. ¿Aka librojj kunjam wakichatasa, ukat kunjamsa jukʼamp yatjjatsna?

¹⁴ Jukʼamp iyawsäwinïñasatakiw aka librojj wakichasiwayi. 2008 marat 2013 marakamajj “Jupjam iyawsäwinïpjjañäni” sat yatichäwinakaw Yatiyañataki revistan mistuwayi, ukanakaw mayaruk apthapisiwayi. Ukampis jukʼampinakaw utji. Sañäni, sapa yatichäwit sum yatjjatañataki ukat kunjamsa ukajj yanaptʼistaspa uk amuyañatakiw jisktʼanak wakichasiwayi. Ukat walja coloranakani fotonakaw aka librotak wakichasiwayaraki, revistanakan mistkäna uka fotonakas askichasiwayiwa. Janiw ukakïkiti, pä mapanakaw utji ukat kuna maranakansa uka chacha warminakajj jakapjjäna ukas qhanañchasirakiwa. Sapaki ukat tamamp chikaw Jupanakjam iyawsäwinïpjjañäni sat librot yatjjatasispa. Familianakas yatjjatapjjarakispawa. ¡Sapa sarnaqäwi liytʼañajj wali askipuniwa!

¹⁵ Diosar taqe chuym servipkäna uka nayra chacha warminakat yateqasiñatakiw aka librojj yanaptʼistani. Sapa jananakap liytʼasaw jukʼamp iyawsäwinïpjjañäni ukat alajjpachankiri Jehová Dios awkisarus jukʼampiw jakʼachasirakiñäni.