Pablon sobrinopajj jan ajjsarirïnwa

Mä waynituw apóstol Pablorojj jiwañat qhespiyäna, jupan sutipajj janiw yatiskiti. Jupajj Pablon sobrinopänwa. Uka waynitojj jan ajjsarirïnwa. ¿Kuns lurpachäna uk yatiñ munasmati?...

Mä kutejja, carcelaruw Pablorojj Jerusalenan llawintapjjäna, Jesusjjat parlatapata. Pablorojj wal uñisipjjäna. Ukatwa mä qawqha jan wali jaqenakajj akham sas amtapjjäna: “Pabloru tribunalar apañapatak soldadonakan pʼeqtʼiripar parljjayañäni. Thakitwa jiwasajj suytʼañäni, ukat pasasipkani ukhaw Pablorojj jiwayañäni” sasa.

Pablon sobrinopajj ukwa istʼatayna. Ukat jankʼakiw tiopar awisirejj saräna. Pablojj uk istʼasajj akham sänwa: “Soldadonakan pʼeqtʼiriparu uk jankʼak awisir saram” sasa. ¿Uk lurañajj chʼamäpachänti?... ¡Jïsa! Soldadonakan pʼeqtʼiripajj wali munañanïnwa. Ukampis Pablon sobrinopajj jan ajjsarasaw jupamp parlir saräna.

Soldadonakan pʼeqtʼiripajj sumwa waynitur istʼäna. Ukat 500 soldadonakaruw Pablor jarkʼaqapjjañapatak akham sas khitäna: “Jichha arumpacha Pablorojj Cesarea markar apapjjam” sasa. ¿Jan wali jaqenakajj Pablor jiwayapjjpachänti?... ¡Janiw jiwayapkänti!

¿Kunsa aka sarnaqäwit yateqasma?... Jumajj Pablon sobrinopat yateqasiñamawa, janiw ajjsarirïñamäkiti. Cheqansa, Jehová Diosat jaqenakaru parlañatakejj janiw ajjsarañasäkiti. ¿Jaqenakar jan ajjsarasa Jehová Diosat parlaskakïtati?... Jupat parlañajj wali wakiskiripuniwa, ukhamatwa walja jaqenakajj qhespiyasipjjani.