Diosan Reinopat cheqa yatichäwinaka: Cheqa yatichäwinakaw yatichasïna

KUNTÏ Bibliajj siski uk sum amuytʼasajja, Bibliat yateqasipki uka jaqenakajj wal kusisipjje. Ukat awisajj akham sapjjewa: “¡Wiñayatakiw mä suma paraison jakasiñäni sasarakis Bibliajj yatichataynajjä! ¿Cheqapunit aka Oraqen ukham jakasiñäni?” sasa. “Jïsa, Bibliaw ukham yatichi” sasaw jumamp chik sarir jilatajj saraki. Bibliat yateqeristi akham saskakiwa: “Janipuniw kunapachas uk yatichapkituti” sasa. Cheqansa, waljaniw ukham sañ yatipjje, Diosajj Jehová sutinïtap yateqasas wal muspharapjje.

¿Janit jumajj Bibliat yateqerimar ukham siri istʼirïkta? Uk uñjasaw Biblian cheqa yatichäwinakapajj mä suma regalötap amuytanjja. ¿Ukampis kunjamsa uk katoqawaytan? Uka jisktʼarojj aka jaljaw qhanañchaskani. Diosan markapankirinakajj nayratpachaw cheqa yatichäwinak jukʼat jukʼat katoqawayapjje, ukaw Diosan Reinopajj utjaskapunïtap uñachtʼayistu. Cheqansa, 1914 maratwa uka Reinon Reyipajja, mä arunjja, Jesucristojj Diosan markapar cheqa yatichäwinak yatichasiñapatak chʼamachasiski.