Josué chachampi gabaonitanakampi

Kunatï Jericó markar paskäna ukjja Canaán oraqenkir yaqha markanakajj istʼapjjarakïnwa. Ukatwa uka markanakan reyinakapajj israelitanakamp nuwasiñatak mayachtʼasipjjäna. Ukampis Gabaón markankirinakajj yaqha amtaruw puripjjäna. Thantha isinakamp isintasisaw Josué chachan ukar sarapjjäna. Akham sapjjarakïnwa: ‘Jaya markatwa jutapjjta. Jehová Diosat istʼapjjta, kunanaktï jumanak laykojj Egipto markansa Moab markansa lurkäna ukanaksa istʼapjjaraktwa. Jumanakatï markajar jan tukjañatak mä promesa lurapjjätajja, nanakajj jumanakaruw servipjjäma’ sasa.

Josué chachajj arunakap creyisaw markapar jan tukjañatak mä promesa luräna. Ukampis kimsa uru pasjjän uka qhepatwa Josué chachajj kʼarisipjjatap yatiskäna: gabaonitanakajj janiw jaya markatäpkänti, jan ukasti Canaán oraqetäpjjänwa. Ukatwa Josué chachajj ‘¿kunats kʼarisipjjta?’ sasin säna. Jupanakasti sapjjänwa: ‘Wal ajjsarayasipjjayäta. Kuna laykutejj Jehová Diosamaw jumanakar yanapapjjtamjja. Mirä amp suma janikiy jiwarayapjjestati’ sasa. Josué chachajj promesap phoqasaw jan jiwaraykänti.

Mä qhawqha urutjja, phesqa cananeo reyinakaw soldadonakapampejj gabaonitanakar jiwarayir sarapjjäna. Josué chachampi soldadonakapampejj arum paqaraw gabaonitanakar salvir sarapjjarakïna. Guerrajj wali alwatwa qalltäna. Cananeonakajj taqe cheqaruw escapapjjäna, ukampis Diosajj jupanakjjar jachʼa qala chhijchhinak purintayäna. Josué chachajj ‘inti saytʼayam’ sasaw Jehová Diosar mayisïna. Janis intejj saytʼirïkchïnjja, ¿kunatsa uk maypachäna? Jupajj taqe chuymaw Jehová Diosar confiyäna. Uka urojja, cananeo reyinakaru soldadonakapar israelitanakan atipapjjañapkamajj janiw intejj jalantkänti.