Marzo

Jilïr irpirinakajja, wayna jilatanakar wakichtʼañatakiw tiempo apstʼasipjjañapa (Sal. 71:17, 18). Jilatanakar ukham wakichtʼiri jilïr irpirinakajj tamatak mä bendicionäpjjewa. Tamarojj jan waltʼäwinakar saykatañatakiw yanaptʼapjje. ¿Kunjamsa? Jilïr irpirinakajj jilatanakar wakichtʼañatak chʼamachasipjje ukhajja, wakichtʼat jilatanakajj jukʼampiw tamanakan utji. Jupanakaw jilat kullakanakan mayachtʼatäñapatakisa Diosat jan jitheqtapjjañapatakis yanaptʼapjje. Yamas jachʼa tʼaqhesiñ tiemponwa jupanakan yanaptʼapajj munasini (Eze. 38:10-12; Miq. 5:5, 6). Ukhamasti, munat jilïr irpirinaka, jichhat uksarojj jilatanakar wakichtʼapjjam, ukatakiw chʼamañchtʼapjjsma. Cheqas taman walja wakiskir lurañanak utjipanjja, jilïr irpirinakajj janis jukʼamp lurirjamäpkaspa ukhamwa amuyasipjjaspa. Ukampis jilatanakar wakichtʼañatakejja, inas uka luräwinakat tiempo apstʼasipjjañapajj wakischispa (Ecl. 3:1). Ukham lurapjjatapajj janiw inamayäkaniti. w15 4/15 1:8-10

Oraqpachankir jaqenakaruw Biblian yatichäwinakapajj yanaptʼaspa, ukampis Bibliajj sapa mayniruw Jehová Diosaru jakʼachasiñatak yanaptʼistaspa. Ukatakejja, Biblia liyisasa, yatjjatasasa, kunjamsa jikjjatastan uk sumwa amuyañasa. Kunjamsa ukarjam sarnaqsna uksa lupʼiñasarakiwa. Ukanaktï lurañänejja, Jehová Diosas jiwasamp parlkaspa ukhamäniwa. Ukatjja kunjamsa Jehová Diosajj yanaptʼistu uk amuyasajja, jukʼamp sumwa Jupampejj apasiñäni (Heb. 4:12; Sant. 1:23-25). Amuytʼañataki, Mateo 6:19, 20 qellqatanjja Jesusajj akham sänwa: “Akapachanjja jan imapjjamti walja yänakjja” sasa. Uka arunak liytʼasajj ¿kunjamas jikjjatastanjja? Jehová Diosaru jakäwisan nayraru uskuskstan ukhajja, Jupajj ukham luratas uñjasajj sumaw jikjjatasini. Ukampis Jesusan arunakap liytʼasatï Jehová Diosaru jakäwisan jan nayraru uskuskatasa amuyasstan ukhajja, Jehová Diosajj jupar jakʼachasiñasataki yanaptʼaskatapwa amuyañäni. w15 4/15 3:3-5

Jehová Diosajj ‘yanapirinakaparjamaw’ uñjistu (1 Cor. 3:9, MT; 1 Tes. 2:4). Jiwasatï jan inaktʼas yatiyaskakiñäni ukhajja, kunatï wakiski uk Jehová Diosajj churapunistaniwa (Mat. 6:33). Ukatjja, Jupajj mayisitanakasar jaysapuniniwa sasin suytʼañas janiw sinti chʼamäkaniti. Jehová Diosamp sapürutjam jukʼamp sum apasiñatak chʼamachasim. Kunapachatï sinti jan waltʼäwin uñjasïta ukhajja, uka jan waltʼäwejj Jehová Diosar jakʼachasiñatakis yanaptʼkiristam ukham uñjam. Biblia liyipunim ukat yatjjatarakim, liytʼkta ukanakat lupʼiñatakis tiempo apstʼasirakim. Jehová Diosar mayisiñ janipun jaytamti, Jupar jan qarjtas serviskakim. Taqe ukanaktï lurätajja, Jehová Diosajj jichhasa jutïrinsa jan waltʼäwinakar saykatañatakejj yanaptʼapunïtamwa. w15 4/15 4:17, 18

Jachʼa jachʼa tukuñ utjatapatwa tama taypin sumankañajj jan utj-jjaspati. Jiwasantï uñisisiñasa, jan ukajj mayninakat sipan jukʼamp askïksnas ukham amuyasiñas utjaspa ukhajja, mayninakaruw arumpisa, luratanakampis chuyma ustʼaysna (Pro. 12:18). Mayninakat sipansa jukʼampïksnas ukham amuyasstan ukhajja, ak amtañasawa: “[Jehová Diosajj] jachʼa jachʼa tukur jaqenakarojj uñisiwa” (Pro. 16:5). Jiwasatï markasatsa jañchisatsa jachʼa jachʼa tukuskstan ukhajja, Diosajj janis ‘mä sapa jaqetaki taqe kast jaqenak mirtaykaspa’ ukham amuyataswa uñachtʼaysna (Hech. 17:26). Jehová Dios nayraqatanjja, taqenis mä sapa kasta jañchinikïtanwa. ¿Kunatsa? Taqeniw Adanat jutirïtanjja. Ukhamasti yaqhepanakajj yaqha jañchinïpjjatap laykojj jukʼamp askïpkaspasa, yaqhepajj janirakisa, ukham amuyañajj janipuniw walïkaspati. Ukham amuysna ukhajja, Supayan amtaparjamaw lurasksna, jupajj cristianonakan munasipjjañapsa mayachtʼatäpjjañapsa janiw munkiti (Juan 13:35). Supay contra saytʼasiñatakisa atipjañatakisa, janiw jachʼa jachʼa tukuñampejj apayasiñasäkiti (Pro. 16:18). w15 5/15 2:8, 9

Jehová Diosajja, ajllit cristianonakarojj alajjpachan jan jiwiri cuerponïpjjañapatakiw mä suytʼäwi churawayi, ‘yaqha uwijanakarusti’ aka Oraqen wiñay jakapjjañapatakiw mä suytʼäwi churawayaraki (Juan 10:16; 17:3; 1 Cor. 15:53). Alajjpachan jakirinakasa aka Oraqen jakirinakasa, janiw tʼaqhesiñanak uñj-jjapjjaniti. Jehová Diosajja, kunjamsa jichhürunakan tʼaqhestan uk uñjaskiwa. Nayra tiemponjja ukhamarakiw kunjamsa israelitanakajj Egipto markan tʼaqhesipjjäna uk uñjarakïna. ‘Diosajj ayqopjjatap uñtanïnwa, arnaqasitanakaparus istʼarakïnwa.’ (Sal. 106:44.) Kunapachatï judionakajj templo wasitat jan saytʼayañ munirinakar ajjsarapjjäna ukhajja, Diosajj akham sasaw judionakar säna: “Khititejj llamktʼi markajjarojja, ukajj nayan nayrajjaruw llamktʼaski” sasa (Zac. 2:8). Kunjamtï mä taykajj wawapar munaskejja, ukhamarakiw Jehová Diosajj markaparojj munasiñat yanaptʼi (Isa. 49:15). Cheqansa Jehová Diosajj kunjamsa mayninakajj jikjjatasipjje uk amuyiwa, jiwasarojj jupjam amuytʼirwa lurawayarakistu (Sal. 103:13, 14). w15 5/15 4:2

Uka arunakampejja, ¿aka Oraqen wiñayatakiw pobrenakajj utjani sañti Jesusajj munaskäna? Janiwa. Aka ñanqha pachan tukusiñapkamakiw pobrenakajj utjañapäna. Jichhürunakanjja, gobiernonakajj jupanakan askipakwa thaqhapjje, ukhamïpanwa walja jaqenakajj jan utani jan manqʼani jikjjatasipjje. Ukampis niyaw tʼaqhesiñanakajj chhaqtjjani (Sal. 72:16). Jesusajj aka Oraqer apnaqjjani ukhajja, sum jakasiñatakiw yanaptʼistani, ukwa milagro luratanakapajj uñachtʼayistu (Mat. 14:14-21). Jiwasajj janis Jesusjam milagronak lurirjamäkstanjja, Diosan arunakapatwa jaqenakar yatichsna. Akat mä jukʼa tiemporojj wali sumaw jakasjjañäni, ukwa Biblian profecianakapajj uñachtʼayistu. Jehová Diosan servirinakapajj uk sum yattanjja, ukhamajj ¿jaqenakan jutïrit yatipjjañap janit munkaraksna? (Rom. 1:14, 15.) Uka toqet sum amuytʼañajja, jaqenakar Diosan Reinopat yatiyañatakiw chʼamañchistani (Sal. 45:1; 49:3). w15 6/15 1:7, 10, 11

Jehová Diosamp sum apasiñatï jiwasatak wali askïchi ukhajja, luratasampisa sarnaqatasampisa janiw Jupan chuymap ustʼaykañäniti. Jiwasajj ‘qʼoma chuymanïñ’ munasaw kunatï askïki, cheqäki, sumäki ukanakat lupʼiñ muntanjja (Sal. 24:3, 4; 51:6; Fili. 4:8). Cheqansa, Jehová Diosajj juchararätassa, jan walinak lurañ munirïtassa yatiwa. Ukampis jan walinak lurañat jukʼamp lupʼiskaksna ukhajja, Jehová Diosaruw llakisiysna (Gén. 6:5, 6). Uka toqet sum amuytʼasiñäni ukhajja, jan wali amuyunak apanukuñatakiw chʼamachasiñäni. Ukatakejja, Jehová Diosaruw yanaptʼa mayiñasa, ukhamatwa Jupar confiyatas uñachtʼayañäni. Ukhamtï lurañäni ukhajja, Diosajj jakʼachasistaniwa, qollan ajayupsa churarakistaniwa. Ukaw jan wali amuyunak apanukuñatakisa qʼom sarnaqañatakis yanaptʼistani. w15 6/15 3:4, 5

Jesusajja, janiw “sapürutak manqʼañ churanita” sasin mayisiñ yatichkänti, jan ukasti “sapürutak manqʼañ churanipjjeta” sasaw yatichäna. Kunjamsa África toqenkir tamanak tumptʼir Víctor jilatajj ukarjam luri uk parltʼañäni. Jupajj siwa: “Jehová Diosar walpun yuspärtjja, nayasa esposajasa janiw manqʼañatsa ni uta alquiler pagañatsa llakisipkti. Munat jilat kullakanakaw ukanakampejj yanaptʼapjjetu. Ukampis walja jilat kullakanakaw akapachan qollqe toqet aynachtʼat jikjjatasipjje, ukatwa jupanakar yanaptʼañapatak Diosar oracionan mayta” sasa. Inas jiwasajj manqʼa toqet jan pistʼatäkstanti, ukampis walja jilat kullakanakasaw pisin jakasipjje, jan ukajj yaqha jan waltʼäwinakan jikjjatasipjje. Jupanakatakiw Diosat mayiñasa. Ukatsti jiwasajj yanaptʼañasarakiwa. Sañäni, kunanakatï utjkistu ukanakampiw jupanakar yanaptʼsna. Ukatjja, oraqpachan yatiyasiski ukarojj qollqesampis yanaptʼaraksnawa. Uka qollqempiw khitinakatï yanaptʼa munapki ukanakar yanaptʼasi (1 Juan 3:17). w15 6/15 5:4-6

Kunjamtï Isaías 60:17 qellqatan arsusiwaykejja, Jehová Diosan markapajj jukʼamp sumäñapatakejj kunayman mayjtʼäwinakaw utjawayi. Diosan markapar jichhak mantanipki uka jilat kullakanakasa wayn tawaqonakasa, uka mayjtʼäwinakatjja qellqatanakan liytʼasakiw yatipjje, jan ukajj uka toqenakat parlirikwa istʼawayapjje. Ukampis walja maranaka Diosar servir cristianonakajja, Diosan markapan kuna mayjtʼäwinakatï utjawayki ukanakjja uñjawayapjjewa. Ukanak uñjasajja, kunjamsa Jehová Diosajj markaparu Yoqap toqe pʼeqtʼaski ukwa amuyawayapjje. Ukhamajj Diosan markapan mayjtʼäwinak uñjawayapki uka jilat kullakanakaru uka toqenakat jisktʼapjjañäni, ukaw Diosar jukʼamp confiyañatak yanaptʼistani. Diosarojj jukʼa maranakas jan ukajj walja maranakas serviskstanjja, Diosan markapajj kunjamasa uka toqet taqeniw mayninakar parlañasa. Aka Oraqpachankir jilat kullakanakasampi sumana mayaki jakasiñajj mä milagrowa. w15 7/15 1:12, 13

Armagedón jachʼa chʼajjwäwinwa Diosan qollana sutipajj jachʼañchatäni. Khitinakatï ‘cabritonakat’ uñtʼatäpkani ukanakajj tʼunjatäpjjaniwa (Mat. 25:31-33, 46). Jan walinakas aka Oraqen janiw utj-jjaniti, khitinakatï ‘walja jaqenakjam’ uñtʼatäpki ukanakas qhespiyatäpjjaniwa. Kunanakatï akat mä jukʼa tiemporojj paskani ukanak yatisajj ¿kun lurañasasa? Apóstol Pedrojj akham sasaw ewjjtʼistu: “Taqe kunas ukham tukjaschini ukajja, jumanakajj ¡kunja Tatit chuymas jupar wali katuyasita jakapjjañamajja! Tatitun jutañap ursti suytʼapjjam, jankʼakïñapa munasa. [...] Ukatpï munat jilatanaka, akanak suytʼkasajja taqe kunsa askpun lurapjjam, ukhamata Diosajj jumanakar sumana jikjjatañapataki, jan juchani ni kuna qʼañunsa” sasa (2 Ped. 3:11, 12, 14). Ukhamasti, kʼari yatichäwinakampi jan qʼañuchasis Jehová Diosar servipjjañäni, sumankañ utjayir Jesucristo Reyirus yanaptʼapjjarakiñäni. w15 7/15 2:17, 18

Taqe aka Oraqpachanjja, walja jilat kullakanakaw Tantachasiñ Utanak lurañ yanaptʼapjje. Jupanakaw Tantachasiñ Utajj kunjamänisa uk sum amuytʼapjje, ukatsti ukarjamaw lurapjje, askichapjjaraki. Taqe ukanakjja jan kun mayisakiw lurapjje. Noviembre 1, 1999 marat 2014 marakamajja, 28.000 jila Tantachasiñ Utanakaw lurasiwayi, sapürojj phesqa Tantachasiñ Utanakas Oraqpachan luraskaspa ukhamawa. Khitinakatï walja utjirinïpki ukanakajja, jukʼa utjirinïpki ukanakar yanaptʼapjjañapawa sasaw Bibliajj sistu (2 Cor. 8:13-15). Jehová Diosan markapanjja, waljaniw jan qollqe mayisa Tantachasiñ Utanak lurañ yanaptʼapjje, ukatsti waljanirakiw jukʼampi Tantachasiñ Utanak lurasiñapatakejj qollqemp yanaptʼapjjaraki. Ukhamatwa kawkhanakantï Tantachasiñ Utanak lurañatakejj jan qollqenïpki uka cheqanakan lurasiwayi. w15 7/15 4:9-11

Aka qhepa urunakan kuna profecianakas phoqasiñapa ukjja, Jesucriston ewjjtʼanakaparjam sarnaqapki ukanakakiw kuna tiemponsa jaktan uk amuyapjje (Mat. 24:27, 42). Jesucriston profecianakapajj 1914 marat aksaruw sumpach phoqasiñ qalltawayi. Ukhamajja, qhepa urunakanwa jakasktanjja. Kunapachas aka ñanqha pach tʼunjani uk Jehová Diosajj amtjjewa (Mat. 24:3). Ukhamajj akapachan tukusiñap wakichtʼat suyaskakiñasawa. ¿Kunatsa jichhürunakan cristianonakajj wakichtʼat suyasipkakiñasa? Maya, Jesucriston arunakaparuw jiwasajj istʼañ muntanjja. Paya, aka qhepa urunakatakejj kuna profecianakatï qellqatäkäna ukanak phoqasiskatapsa sumwa amuytanjja. Ukhamarusa, uka profecianakajj Diosan Arupan qellqatawa, ukatwa jiwasajj akapachan tukusiñapajj niyaw purinini sasin wakichtʼat suytanjja. w15 8/15 2:8, 9

Paraisonjja, ¿kusistʼañasa samartʼañasa utjpachäniti? Jïsa, utjaniwa. Jehová Diosajja, jakäwisan kusisit jakasiñ munirwa lurawayistu. Jupasti akham sistuwa: ‘Askinak jilarkirwa churapjjäma’ sasa (Ecl. 2:24). Ukampis ak amtapuniñäni: Jehová Diosar servisakiw cheqpach kusisiñ jikjjatsna. Ukhamajja, samartʼañasa, kusistʼañasa Paraison utjkchinisa, Jehová Diosar serviñaw jakäwisan nayrankani. Ukhamasti jichhatpach Jehová Diosar serviñ nayraru uchapjjañäni, ukatsti kuna bendicionanaktï Diosar servisajj katoqktan ukanak janipun armañäniti (Mat. 6:33). Jutïr urunjja, Paraison jakasiñajj wali sumapunïniwa. Ukhamasti ukan jakasiñatakejj jichhatpach wakichtʼasipjjañäni. w15 8/15 3:17, 18

Jesusajj aka Oraqenkkäna ukhajja jan pantjasiri jaqënwa. Ukampis awkipasa, taykapasa, jilanakapasa, kullakanakapasa, mayni jaqenakasa pantjasirïpjjänwa. Awisajja, arkirinakapas jachʼa jachʼaw tukupjjäna, ukatjja jupanakan askipakwa thaqhapjjäna. Amuytʼañataki, Jesusajj jiwayatäñatak janïr katuntatäkäna uka arumajja, discipulonakajj khitis jupanakat jukʼamp jilïrejja ukjjatwa chʼajjwapjjäna (Luc. 22:24). Ukhamäkchïna ukasa, ‘Diosamp sum apasiñatakejj chʼamachasipjjaniwa ukatsti taman mayachtʼatäñapatakis yanaptʼapjjaniwa’ sasaw Jesusajj confiyäna. Ukatwa uka pachpa arumajj Jehová Diosar akham sasin mayisïna: “Mayiraksmawa Awkejja, jupanakajj mayakïpjjañapataki, ukhamarak jiwasampis mayakïpjjañapatakiraki, kunjämtï jumajj nayanktajja, nayajj jumankaraktjja ukhama. [...] Kunjämatejj jumampi nayampejj mayakïtan ukhamaraki” sasa (Juan 17:21, 22). w15 9/15 1:10, 11

¿Kunatsa uma patanjam sarkasajj Pedrojj ajjsarayasïna? Bibliajj siwa: “Thayajj wal thaytʼasinkatapwa amuythapisïna” sasa (Mat. 14:24-32). Iyawsäwipaw aynachtʼäna, ukatwa umar chhaqaranttäna. Pedror ajjsaraykäna uka thayasa, uma mathapinakasa, akapachankir jan waltʼäwinakampi sasispawa. Jan waltʼäwinakar saykatañajj wali chʼamäkchisa, Jehová Diosaw yanaptʼistaspa. Ukampis jan waltʼäwinakatak sinti llakisjjsna ukhajja, Diosajj uka jan waltʼäwinakar saykatañatak janis yanaptʼkistaspa ukhamwa amuyjjsna. Iyawsäwisajj aynachtʼaspawa, uk janipun armañäniti. Bibliajj akham siwa: ‘Jiwasar apnaqkistu uka juchaw aynachtʼayistaspa’ sasa (Heb. 12:1). Jiwasatï jan waltʼäwinakasat Pedrjam sinti llakissna ukhajja, iyawsäwisajj aynachtʼaspawa. w15 9/15 3:1, 6, 7

Mä regalo katoqasajja, ¿kunsa uka regalompejj lurtanjja? Wali askitwa uñjtanjja, ukhamarus janiw ukhamak jaytktanti, jan ukasti apnaqasipuntanwa. Jehová Diosajja, kunatï jakasiñatakisa, kusisitäñatakis munaski ukwa churistu. Ukaw Jupar munasiñatak chʼamañchistu. Israelitanakajj walja maranakaw Jehová Diosamp wali suma uñjatäpjjäna, bendicionapsa katoqapjjarakïna. Diosajj leyinaka, kunanakatï jakasiñatak munaskäna ukanakwa jupanakar churäna (Deu. 4:7, 8). Jupanakasti, Diosan leyinakaparjam sarnaqasaw Jupar yuspärapjjatap uñachtʼayapjjañapäna. Amuytʼañataki, ‘yapunakapat nayrïri suma achunakapwa’ Jehová Diosarojj sacrificiot churapjjañapäna (Éxo. 23:19). Israelitanakajj uk lurasaw Jehová Diosan munasiñapata, bendicionanakapata yuspärapjjatap uñachtʼayapjjañapäna (Deu. 8:7-11). w15 9/15 5:5, 6

¿Kunjamsa Diosajj yanaptʼasktam uk amuytati? Yaqhep jilat kullakanakajja, ‘Diosaw Jupar uñtʼañatakejj yanaptʼawayitu’ sasaw sapjje. Yaqhepasti ‘mä jilatan discursop toqew Diosajj yanaptʼawayitu’ sasin inas sapjjarakchi. Yaqhepasti inas akham sapjjarakchi: ‘Diosajj mayisitajar istʼasaw yanaptʼawayitu’, ‘Diosajj kuntï Jupar jukʼamp serviñatakejj amtkayäta uk phoqañatakiw yanaptʼawayitu’ jan ukajj ‘tantachäwinakaru ukhamarak yatiyir sarañataki tiempo apaqer trabajo jaytasajja, Jehová Diosaw kunatï jakañatak wakiski uk churasajj yanaptʼawayitu’ sasa (Heb. 13:5). Jiwasatï Diosan amigopästan ukat ‘qʼoma chuymanïstan’ ukhajja, kunjam toqenakatsa Jupajj yanaptʼaskistu uk sumwa amuyañäni. ‘Qʼoma chuymanïñatakejja’, kunatï askïki ukwa lurañasa, jan walïki ukanaksa apanukuñasarakiwa (2 Cor. 4:2). Ukhamajj Jehová Diosan yanaptʼap amuyañatakejja, Diosan amigopäñasawa. w15 10/15 1:17, 19

Jerusalenan tantachtʼatäpkän uka jaqenak taypinjja, judionakan religionapar mantir griego jaqenakaw utjarakïna. Kuntï Jesusajj templon lurkäna uk uñjasajja, jupanakajj wal muspharapjjäna. Ukatwa Feliper akham sapjjäna: “Tata, Jesusaruw uñjañ munapjjta” sasa. Ukampis Jesusajj janiw uka arunakar istʼkänti, janiw jupar arjjatirinak thaqhañ munkänti. Jan ukasti Diosan munañap lurañaw jupatakejj jukʼamp wakiskirïna, mä arunjja, jiwasanak laykuw jiwañapäna. Jiwañap jakʼäjjatap yatiyasinjja, Andresampir Felipempirojj akham sänwa: “Khititejj jakañaparu munchi ukajja aptʼasiniwa, ukampis khititejj aka oraqen jakaña uñiskchi ukajja, wiñay jakañanïniwa” sasa. Uka griego jaqenakan munañap lurañat sipansa, jupat yateqasisin taqe chuyma arkapjjañapatakiw Jesusajj arkirinakapar ewjjtʼäna. Ukatsti kuntï jichhürutak ajllita jiskʼa tʼaqajj siski uka arunakwa sarakïna. Felipejj taqe uka arunakwa uka griego jaqenakarojj yatiypachäna (Juan 12:20-25). Jesusatakejj Diosan arunakap yatiyañas nayrankchïnjja, awisajj yaqhanak lurañatakejj tiempo apstʼasirakïnwa. w15 10/15 3:13, 14

Jesusajj arkirinakaparuw khitis jukʼamp jilïrejja sasin chʼajjwiri uñjäna. Ukatwa walja kutejj pacienciampi cheqañchäna. Ukampis kunapachasa, kawkhansa munasiñampi cheqañchaspa uk sumwa amuytʼäna (Mar. 9:33-37). Awk taykanaka, wawanakamarojj wal munasipjjpachäta, ukatwa munasiñat cheqañchañ munapjjaraktajja. Kuns jan wal lurapjjani ukhajja, awisajj kunatsa ukham lurapjjatapajj jan walïki uk qhanañchtʼañakiw wakisispa. Ukampis cheqañchatajj janipun istʼasipkani ukhajja, ¿kun lurañäspasa? (Pro. 22:15.) Jesusatwa yateqasipjjasma. Jupjamaw wawanakamarojj pacienciampi yanaptʼapjjañama, ewjjtʼapjjañama. Kunapachasa, kawkhansa munasiñampi cheqañchapjjasma ukwa amuytʼapjjañamaraki. Sudafricankir Elaine kullakajja akham amti: “Kunjamsa sarnaqañaja ukjja awk taykajajj qhanañchtʼapjjerïtänwa. Kunatsa castigapjjetani uk nayraqatwa sum qhanañchtʼapjjerïtu, janipuniw coleratajj cheqañchapjjerïkituti. Ukhamatwa nayar wal munasipjjatap amuyirïta” sasa. w15 11/15 1:5, 6

Jehová Diosatï jiwasar jan munaskistaspa ukhajja, ¿jutïrin jakasiñajj kunjamäspasa uk amuysnati? Uk amuytʼañajj janiw chʼamäkiti. Jaqenakana ukhamarak Supayana apnaqat aka ñanqha pachanjja, kunayman jan walinaka, tʼaqhesiñanakakiw utjaski (2 Cor. 4:4; 1 Juan 5:19; Apo. 12:9, 12). Cheqansa, Jehová Diosatï jan munaskistaspa ukhajja, jutïrin jakasiñajj sinti jan walipunïspawa. Supayajj Dios contraw saytʼawayi. Diosajj janis pachpa luratanakapjjar apnaqerjamäkaspa, Diosat sipansa jupan apnaqatas jaqenakajj sum jakasipkaspa ukhamwa Supayajj säna (Gén. 3:1-5). Ukatwa ukajj cheqapuniti janicha uk yatiñatakejj Jehová Diosajj mä jukʼa tiempo Supayar churawayi. Ukhamatwa Jehová Diosan gobiernopat sipansa yaqha suma gobiernojj jan utjatap yattanjja. w15 11/15 3:3, 4

Altʼat chuymanïstan ukhajja, Jesusan aka arunakapar istʼañäniwa, jupasti sänwa: “Istʼapjjaraktawa kunatï satäkänsa ukjja: ‘Jaqe masimarojj munam, uñisirimarusti uñisirakim’ sasa. Ukampis nayajj sapjjsmawa: Uñisirinakamarojj munapjjam, maldecirinakamarojj bendecipjjam, uñisirinakamarusti aski lurapjjam, Diosat mayirapipjjarakim khitinakatejj jumanakar toqepktam, ukhamarak jan walinaks lurapktam ukanakatakisa. Ukhamatwa jumanakajj alajjpachankir Awkiman wawanakapäpjjätajja. Jupasti taqenitakiw intsa jalsuyani, ukhamarak aski jaqenakatakisa, jan aski jaqenakatakisa jallsa puriyaniraki” sasa (Mat. 5:43-45). Diosan servirinakapjamajja, uñisirinakasan jan wali uñjatpachasa jupanakar munasiskakiñasawa. Jehová Diosar munasitassa jaqe masisaru munasitassa taqe horasanwa uñachtʼayañasa. Jaqenakan uñisitpachasa, jan istʼañ munatpachasa, yanaptʼa munapkani ukhajj yanaptʼañasawa. w15 11/15 4:17, 19, 20

Diosarojj parlir luratätasatwa arunakasampi jachʼañchtanjja, yaqhanakarus Jupat parlaraktanjja. Aka qhepa maranakanjja, walja arunakaruw Diosan Arupajj jaqokipasiwayi, ukhamatwa jaqenakarojj Diosar uñtʼapjjañapatak yanaptʼasi. Jichhürunakan walja Biblianakaw utji, ukampis janiw nayra qellqatanakarjam jaqokipatäkiti. 1940 maranakanjja, Traducción del Nuevo Mundo Biblia lurir jilatanakajja jaqokipkasajj akanak lurañwa amtapjjäna: 1) Diosan sutipajj nayra qellqatanakan uñstki uka cheqanakaruw Jehová suti uchañ amtapjjäna, ukhamat Diosan sutipajj jachʼañchasiñapataki (Mat. 6:9). 2) Sapa arutaki mä aru thaqhañwa amtapjjäna, ukampis ukham lurasajj kuntï nayra qellqatanakajj siskäna uk janiw mayjtʼayañ munapkänti. 3) Taqenin amuytʼkaya arunakampi lurañwa amtapjjarakïna (Neh. 8:8). 130 jila arunakar Bibliajj jaqokipaski ukanakajja, uka kimsa amtarjamaw lurasi. w15 12/15 2:1, 2

Mä nuwasïwintï trompetajj kunatakis phustʼasi uk soldadonakajj jan amuyapkaspäna ukhajja, soldadonakajj janiw kun lurañs yatipkaspänti. Jiwasampejj niya ukhamarakiwa, arunakasatï jan qhanäkaspa ukhajja, istʼirinakasajj janiw sum amuyapkaspati (1 Cor. 14:9). Cheqas qhana arunakamp parlasajj janiw chuyma usuchjir arunakampi parlañasäkiti. Jesusan Wali Uñtʼat Arstʼäwipat amuytʼañäni. Jesusajj janiw jan amuykaya, chuyma ustʼayir arunakamp parlkänti, jan ukasti chuymar purtʼkiri, qhana amuykaya arunakampiw parläna. Amuytʼañataki, jaqenakajj manqʼa jikjjatañ toqet jan sinti llakisipjjañapatakejja, akham sänwa: “Uñtapjjam jamachʼinakajj jalaski uka, janiw jupanakajj satapkis ni apthapipkarakisa, janirakiw juyranaksa pirwanakarus imapkiti, ukampis alajjpachankir Awkimaw ukanakarojj manqʼayi. Uka jamachʼinakat sipansa jumanakajj jukʼamp munatäpjjtawa” sasa (Mat. 6:26). Jesusajj amuykaña qhana arunakampikiw jaqenakan chuymanakapar purtʼäna. w15 12/15 3:13, 14

Pablojj ‘jilapurjam munasipjjam’ sasin siskäna uka arunakajja, griego arunjja mä ‘jilaru’ jan ukajj mä ‘kullakar munasiña’ sañwa muni (Juan 11:36). Jiwasajja, cristiano masinakasarojj janiw arumpiki ‘jilata’ jan ukajj ‘kullaka’ sasin sisktanti, jan ukasti cheqpach jilasarjama, jan ukajj kullakasarjamaw uñjtanjja (Mat. 23:8). Pablojj sänwa: “Maynit maynikamaw munasipjjañama jila purjam taqe chuymampi, suma aytat sarnaqañansti purapat suma ajjsartañampi uñjasisa” sasa (Rom. 12:10). Uka arunakajja, kunja munasiñampis jilat kullakanakasar uñjtan ukwa uñachtʼayistu. Jilapurjam munasiñasa, cristianjam munasiñasa Diosan markapan sum apasiñataki ukhamarak mayachtʼat sarnaqañatakiw yanaptʼistu. Jichhürunakanjja, Jehová Diosar servipki uka cristianonakarojj taqeniruw jilasarjama, jan ukajj kullakasarjam uñjtanjja (Rom. 10:12). Jehová Diosaw maynit maynikam ukham munasiñ yatichistu (1 Tes. 4:9). w16.01 1:5, 6

Jesusar munasiñaw Diosan arunakap yatiyañatakisa, Bibliat jaqe masisar yatichañatakis yanaptʼistani (Mat. 28:19, 20; Luc. 4:43). Jesusan jiwatap amtkañäni uka urunakanjja, ¿janit precursor auxiliarjam irnaqtʼasin 30 jan ukajj 50 horanak yatiyañ amtksna? 84 marani mä viudo jilatat parltʼañäni. Jupajj chuymanëjjänwa, janirakiw kʼumaras jikjjataskänti ukatwa precursorat janis irnaqerjamäjjaspa ukham amuyasïna. Ukampis utap jakʼan jakapkäna uka precursor jilat kullakanakajja, precursorjam serviñapatakiw yanaptʼañ amtapjjäna. Ukham yanaptʼatajja, uka jilatajj 30 horanakwa uka phajjsin yatiyäna. Jiwasajj ukhamarakiw jilat kullakanakarojj marzo, abril phajjsinakan precursorjam servipjjañapatak yanaptʼsna. Cheqas janiw taqenipunejj precursorjam servirjamäktanti, ukampis Jehová Diosar jukʼamp serviñatakejj tiempsa chʼamsa apstʼassnawa. w16.01 2:7, 11

Ajllita cristianonakan sutinakap jan yatisajja, ¿kunatsa ‘jumanakampiw sarañ munapjjta’ sasin yaqha uwijanakajj sapjje? Diosan Arupajj siwa: “Tunka jan uñtʼatanakaw yaqha markankirinakata mä judío jaqerojj isipat katuntasipjjani, sapjjarakiniwa: ‘¡Jumanakamp saraña munapjjta, nanakasti istʼapjjtwa Diosajj jumanakampïtapa!’” sasa. Uka qellqatanjja, mä “judío” jaqetwa parli, ukatsti aka aruw uñstaraki “jumanakampi” sasa. Ukhamajja, judío jaqejja janiw mayni sapakïkiti, mä arunjja, janiw mä ajllit mayakïkiti, jan ukasti taqe ajllit cristianonakawa. Ukjja yaqha uwijanakajj yatipjjewa, ukatwa jupanakampi chikajj Jehová Diosar servipjje. Sapa ajllitar arkañatakejja, janiw sutinakap yatipjjañapajj wakiskiti. ¿Kunatsa? Bibliajj siwa: “Cristo sapakiwa jilïrejja” sasa (Mat. 23:10). w16.01 4:4

Nasïwisat jiwañkamajja taqeniw munatäñ muntanjja. Janiw kunjamtï mä chachampi mä warmimpi munasipki ukham munatäñak suyktanti, jan ukasti taqenimp munatäñwa suytanjja. Ukampis taqe ukanakat sipansa, Jehová Diosamp munatäñwa muntanjja. Walja jaqenakajj akham amuyapjje: “Diosampejj janiw jaqenakajj sum apasksnati” sasa. ¿Jiwasajj jupanakjamarakit amuyañasäspa? ¡Janiwa! Nayra tiemponjja, jiwasjam pantjasir jaqenakajj wali sumwa Diosampejj apasipjjäna uka toqetwa Biblian parli. Uka jaqenakan sarnaqäwinakap yatiñajj wali wakiskiriwa, ukaw Jehová Diosamp sum apasiñataki, mä arunjja amigopäñatak yanaptʼistani. Uka jaqenakat maynejj Abraham chachänwa, jupajj Jehová Diosan amigopa satänwa (Sant. 2:23). ¿Kunas Abraham chacharojj Jehová Diosamp sum apasiñatak yanaptʼäna? Diosar iyawsatapaw yanaptʼäna. Ukatwa Bibliajj jupat akham sasin qhanañchi: “Abrahamajj taqe khitinakatejj iyawsäwi layku Diosampi katoqatäpki ukanakan awkipa[wa]” sasa (Rom. 4:11). w16.02 1:1, 2

Ezequías chachan awkipajj jan wali reyïnwa, ukampis Ezequiasajj janiw ukhamäkänti, wali suma reyïnwa (2 Rey. 18:6). Jupajj awkipan jan wali luratanakap cheqañchañwa amtäna. Nayraqatjja, Jehová Diosan templopwa qʼomachayäna, ukatsti Jehová Diosajj Judá markan jakasiri jaqenakan juchanakap perdonañapatakejj ofrendanakwa loqtayarakïna, kʼari diosanaksa taqpachwa tʼunjayarakïna (2 Cró. 29:1-11, 18-24; 31:1). Kunapachatï Asiria marka apnaqer Senaquerib reyejj Jerusalén marka tukjiri jutäna ukhajja, Ezequiasajj Jehová Diosar confiyatapa ukat jan ajjsarirïtapwa uñachtʼayäna. Uka markan jakasirinakarus Diosar taqe chuyma confiyapjjañapatakiw chʼamañchtʼäna (2 Cró. 32:7, 8). Qhepatjja, Ezequías reyejj jachʼa jachʼaw tukjjäna, ukampis ukham tukutapat Jehová Diosampi cheqañchayasïna ukhajja, wali altʼat chuymampiw arrepentisïna (2 Cró. 32:24-26). Kunjamtï uñjktanjja, Ezequiasajj jan wali familia taypinsa jilsuwaykchïnjja, janiw awkipjam sarnaqkänti, jan ukasti Jehová Diosampejj wali sum apasïna. Ezequiasan sarnaqäwipajj jiwasatak wali yateqaskayawa. w16.02 2:11

Kunjamansay jikjjataskchiñänejja, munasir chuymanïñaw Diosat jan jitheqtañatakejj yanaptʼistani. Amuytʼañataki, mä jilatana jan ukajj mä kullakan jachʼa juchar purtʼasitap yatsna ukhajja, ¿kamachsnasa? Jupatï wali munat amigosächi jan ukajj familiarasächi ukhajja, juchap imtʼañwa munsna. Ukampis jaqe masis toqet saytʼasiñat sipansa, Jehová Dios toqetwa nayraqat saytʼasiñasa. Ukatwa Diosar istʼasajj juch luririr yanaptʼañatak chʼamachasiñasa. ¿Kunjamsa uk lursna? Jan pächasisaw jupamp parltʼañasa. Jilïr irpirinakamp parlañapatakis suma arunakampiw chʼamañchtʼañasa. Jupatï mä qawqha tiempot juchap jan yatiykani ukhajja, jiwasaw jilïr irpirinakamp parltʼañasa. Ukhamatwa Jehová Dios toqet saytʼasitas uñachtʼayañäni. Amigosaru jan ukajj familiarasaru munasitassa uñachtʼayarakiñäniwa, ¿kunatsa ukham sistanjja? Jilïr irpirinakajj munasiñampi ukhamarak pacienciampiw yanaptʼapjjani (Lev. 5:1). w16.02 4:14

¿Kunanak lurasas ‘Dios chuymätas’ uñachtʼaysna? Mä qawqhajj akanakäspawa: Tantachäwinakaru saraña, arunakapat yatiyir saraña, sapäkasinsa Diosar oracionan mayisiña, Arupat yatjjataña. Diosar jakäwip katuyasir jaqejja, janiw ukanak lurañajj wali chʼamäkaspas ukham amuykiti. Jan ukasti kunjamtï David reyejj amuykäna ukhamarak amuyi, jupasti akham sänwa: “Dios Tatitojjay, munañam lurañaw kusisiyitu; yatichäwinakamajj chuymajjankiwa” sasa (Sal. 40:8). Amtapunim, sapa mayniw Diosarojj cuenta churañäni. Jehová Diosamp sum apasiñajj janiw kuntï amigonakamasa, awk taykamas lurapki ukarjamäñapäkiti, jan ukasti jumaw Diosampi sum apasiñatakejj chʼamachasiñama. Kuntï yateqkta ukajj jumatak cheqächi ukajja, ‘Diosar katuyasita’ ukhamarak ‘Jupa chuymaw’ sarnaqäta. Ukaw Diosan mayitanakapar respetañ munatamsa, bautisasiñ munatamsa uñachtʼayani. w16.03 2:10, 12, 15

Diosan markaparojja, Moisesan Leyipajj mä perqjamaw qʼañu luräwinakatsa kʼari diosanakar yupaychañatsa jarkʼaqäna. Amtañäni, israelitanakajj Diosar istʼapjjäna ukhajja, bendicionanakwa katoqapjjäna. Ukampis jan istʼapkäna ukhajja, jan walinakanwa uñjasipjjäna (Deu. 28:1, 2, 15). Israelitanakarojja, ¿kunatsa jukʼamp ewjjtʼanak churañajj wakisïna? Mesiasana, jan ukajj Jesucriston puriniñapatakiw Moisesan Leyipajj israelitanakar wakichtʼäna. Mesiasan puriniñapampiw Diosan amtapajj phoqasiñapäna. Leyejja, israelitanakan pantjasirïpjjatapsa, mä qhespiyiri, jan ukajj jan juchani mä jaqen taqenitaki jiwañap wakisitapsa amuytʼayarakïnwa (Gál. 3:19; Heb. 10:1-10). Ukatsti, kawkïr familiattï Mesiasajj jutañapäkäna uka familiarus jarkʼaqarakïnwa. Kunapachas Mesiasajj uñstañapäna uksa amuytʼayarakïnwa. Ukhamatwa Leyejj ‘mä wawa uywirjamäna’, mä arunjja Cristor puriñatakiw israelitanakar yanaptʼäna. w16.03 4:6, 7