Diciembre

Apóstol Pedron urunakapanjja, waljaniw Supayan yantʼanakaparojj saykatapjjäna, ukatwa jupajj cristianonakar uka arunak säna. Khitinakatï aguantawayapki ukanakan sarnaqäwinakapajja, akanakanwa yanaptʼistaspa: Jehová Diosat jan jitheqtañataki, jan waltʼäwinakan aguantañataki, Diosan bendicionanakapat jan pächasiñataki. Diosar servisajja, ¿tʼaqesiyata jan ukajj arknaqatat uñjasta? ¿Jilïr irpirita jan ukajj tamanak tumptʼiritti irnaqtʼaskta? Ukham irnaqtʼasin walja luräwinïsajja, ¿qaritat jikjjatasta? Ukhamächi ukhajja, Pablotwa yateqasisma. Jupajja, uñisirinakapamp arknaqataw uñjasïna. Maysa toqetsti jilat kullakanakapatsa llakisirakïnwa (2 Cor. 11:23-29). Ukhaman uñjasisajj janiw aynachtʼkänti, jan ukasti aguantänwa. Uk uñjasajja, jilat kullakanakajj jukʼamp chʼamañchataw jikjjatasipjjäna (2 Cor. 1:6). Jiwasatï jan waltʼäwinak aguantañäni ukhajja, mayninakar yanaptʼaraksnawa. w16.04 2:11, 14

Jichhürunakanjja, Diosan arunakap yatiyir sartan ukhajj waljaniw istʼapjjestu, yaqhepasti janiw kunsa yatiñ munapkarakiti. Ukampis Jehová Diosan Testigonakapajj utat uta yatiyirit uñtʼatätanwa. Diosan arunakap janis yaqhepajj istʼañ munapkchejja, yatiyktan uk sumwa uñjapjje. Kunjamtï yatktanjja, “Diosan reinopat aka suma yatiyäwisti aka oraqpachanwa yatiyatäni” sasaw Jesusajj arsuwayäna (Mat. 24:14). Walja religionanakaw ‘Diosan suma yatiyäwinakap nanakaw yatiyapjjta’ sasin sapjje. Ukampis jupanakajja, kunjamsa Jesusar uñtʼawayapjje uka toqetakwa parlañ yatipjje. Iglesianakapana, televisionana ukhamarak Internetanakwa Bibliat parlapjje. Yaqhepasti, ‘hospitalanakan doctorata, enfermerata, jan ukajj profesorat irnaqasaw jaqenakar yanaptʼapjjta’ sasaw sapjje. ‘Ukham lurasasti, Diosan arunakapsa yatiyapkirista ukhamawa’ sasaw sapjjaraki. Ukampis ukham lurasajja, ¿cheqpachapunit Jesusan arunakap phoqasajj jaqenakar yanaptʼasipkpacha? w16.05 2:1, 2

1914 marat aksarusti marka apnaqerinakajj Diosan Reinop contraw saytʼawayapjje. Uka Reinow akapach apnaqerinakarojj qʼal tukjani (Sal. 2:2, 7-9). Marka apnaqerinakajja, akapachan mä jukʼa sumankañ utjañapatakiw yanaptʼapjje, ukhamatwa Diosan arunakap yatiyasiñapatakis yanaptʼapjjaraki. Ukatwa Jehová Diosajj jupanakar utjayi (Rom. 13:3, 4). Marka apnaqerinakatakejj mayipjjañamawa sasaw Diosajj sistu. Yamas khitinakatï Diosan arunakap yatiyañ jarktʼañ munapki ukanakatakejja, jukʼampïñapawa sasaw sarakistu (1 Tim. 2:1, 2). Jiwasajja, apóstol Pabljamarakiw marka apnaqerinakarojj cheqapar uñjatäñatak maytanjja. Marka apnaqerinakajj Supayan apnaqatawa sasaw Bibliajj qhanañchi, ukampis jupanakat sapa mayniruw apnaqe sasin janiw siskiti (Luc. 4:5, 6). Ukhamasti ‘marka apnaqerinakan uttʼayatäpki ukanakajj Supayan apnaqatäpjjewa’ sasin janipuniw amuyañasäkiti. Janirakiw jupanakarojj jan wali arunakamp parlañasäkiti (Tito 3:1, 2). w16.04 4:5, 6

Inas maynejj akham jisktʼaschispa: “Bibliantï mä toqet qhanañchir leyejj jan utjkchi ukhajja, ¿kunjamatsa kuntï amtkä ukajj Jehová Diosatak walikïskiti janicha uk yatiristjja?” sasa. Bibliantï mä toqet jan sum qhanañchkchi ukhajja, ¿kunsa Jehová Diosajj uka toqet amuyi uk kunjamatsa yatsna? Uk yatiñatakejja, Jehová Diosaruw mayisiñasa, ukatsti qollan ajayupampiw yanaptʼayasiñasaraki. Jehová Diosan munañapajj kunasa ukjja Jesusajj sumwa yatïna. Amuytʼañataki, oración nayraqat lurasajja, Jesusajj pä kutiw milagro lurasin walja jaqenakar manqʼayäna sasaw Bibliajj qhanañchi (Mat. 14:17-20; 15:34-37). Yaqha horasansti, Jesusajj wasar pampan wali manqʼat awtjataskäna ukhajja, Supayan mayitaparjamajj janiw qalanak tʼantʼar tukuyañ munkänti (Mat. 4:2-4). Jesusajja, Awkipajj kunsa amuyi uk sum yatisaw qalanak tʼantʼar jan tukuyañ munkänti. Uka milagro lurasajj jupan askipaksa thaqkaspa ukhamäspänwa, ukajj Jehová Diosatakejj janiw walïkaspänti, Jesusajj uk sum yatïna. Supayar jan istʼasajja, ‘Diosaw kunatï wakiski uk churitani, Jupaw yanaptʼarakitani’ sasinwa confiyäna. w16.05 3:7, 8

Biblianjja, mä qhawqha cheqanakajj mä jaqetakiki jan ukajj mä qhawqha jaqenakatakikiw qellqasïna, ukatwa janïr Biblia liytʼkasajja, jukʼamp yateqañatakisa, kunanak yateqañastï Diosajj munki ukanak amuytʼañatakisa, yanaptʼap mayisiñasa (Esd. 7:10; Sant. 1:5). Biblia liykasajja, akham sasaw jisktʼasiñasa: “¿Kunsa akajj Jehová Diosat yatichitu? ¿Kunjamsa yanaptʼitaspa? ¿Kunjamsa akampejj yaqhanakar yanaptʼirista?” sasa. Ukham jisktʼasiñaw Bibliat jukʼamp yatjjatañatak yanaptʼistani. Amuytʼañataki, kuna mayitanaktï jilïr irpirinakajj phoqapjjañapäki uka toqet amuytʼañäni (1 Tim. 3:2-7). Jiwasat jila partejja, janiw jilïr irpirïktanti. Ukatwa uka mayitanakajj janis jiwasatakjamäkaspa ukham amuysna. Ukampis walja yatichäwinakwa jikjjatsna. w16.05 5:7, 8

Judionakajj katuntatäsin Babilonia markar apatäpkäna ukhajja, uka markajj kʼari diosanakampi, sajjranakar yupaychiri jaqenakamp phoqantatänwa. Ukhamäkchïna ukasa, judionakat waljanejj janiw Diosat jitheqtapkänti, janirakiw Babilonia markan costumbrenakaparjamas sarnaqapkänti. Jupanakat mä qhawqhanejj Danielampi kimsa amigonakapampïnwa (Dan. 1:6, 8, 12; 3:16-18). Uka kimsa waynanakajja, Jehová Diosarojj Sañu Luririparjamaw uñjapjjäna, ukatsti Juparukiw yupaychapjjarakïna. Daniel chachajj walja maranakas Babilonia markan jakchïnjja, “Diosajj jumarojj walwa munastam” sasaw mä angelajj jupar säna (Dan. 10:11, 19). Bibliajj qellqaskäna uka tiemponakanjja, mä sañu lurirejj molder ñeqʼe uchasaw wali suma vasijanak lurirïna. Jichhürunakanjja markanakajj sañu luraña ñeqʼjamäpjjewa. Taqe kunjjar apnaqeri Jehová Diosajja, jupanakarojj ñeqʼerjamarakiw ñatjaspa, jan ukajj yanaptʼaspa, cheqpach cristianonakajj uk sumwa yattanjja (Jer. 18:6). Jehová Diosajja, suma jaqer tukuñataki jiwasar yanaptʼañatakejj munañaniwa. Ukampis sapa mayniw yanaptʼayasiñäniti janicha uk amtjjañasa. w16.06 2:1, 2

Walja cosasanakanïsas kusisit jakasiñajj utjkaspa ukham amuyañaswa Supayajj muni. Ukatwa jupajj akapachampisa, ‘kuntejj nayrajj uñjki’ ukampis jukʼamp cosasanak munañatak chʼamañchistu (1 Juan 2:15-17; Gén. 3:6; Pro. 27:20). Akapachanjja, jichhak mistur cosasanak alañataki chʼamañchir yatiyäwinakajj waljaw utji, uksti niya sapa kutiw istʼtansa jan ukajj uñjtansa. Wali sumätap laykuki jan ukajj mä yatiyäwi istʼasakejj inas kuns alasirïstan. Ukham alasasti, qhepatakwa jan wakisitap amuyirïpachätanjja. Jan wakiski ukanak alaskaksna ukhajja, janiw kusisit jakasjjsnati. Jehová Diosarus janiw taqe chuyma sirvjjsnati. Amuytʼañataki: Biblia liyiñatakisa, tantachäwir sarañatakisa, ukan arstʼañatak wakichtʼasiñatakisa, yatiyir sarañatakisa janiw tiempojj utj-jjestaspati. Apóstol Juanajj akham sänwa: “Akapachajj tukusirikiwa jan wali luräwinakapamppacha” sasa. Uka arunak janipun armapjjañäniti. w16.07 1:3, 4

Nayrïr cristianonak taypinjja, judionakatsa, romanonakatsa, yaqha markanakatsa waljaniw utjäna. Jupanakajj kunayman sarnaqasiri, kunayman costumbrenakani, kunayman amuyunakani ukhamäpjjänwa. Ukhamasti yaqhepatakejj kuntï yateqapkäna ukarjam sarnaqañasa, nayra sarnaqäwinakap apanukuñas chʼamakïnwa. Ukatwa apóstol Pablojj “mä sapa Dios Awkikiw” cristianonakatakejj utji sasin säna, ukasti Jehová Diosawa. ¿Diosan servirinakapat kamsasirakispasa? “Qhepa urunakansti” taqe markat jutir jaqenakaw Jehová Diosarojj mayachtʼat yupaychapjjani sasaw Isaías profetajj säna. Uka jaqenakajj akham sapjjañapänwa: ‘Diosaw sarnaqäwinakap yatichistani, ukat uka thakipanjamwa sarañäni’ sasa (Isa. 2:2, 3). Kunjamsa uka profeciajj jichhürunakan phoqasiski uk uñjañajj walpun kusisiyistu. Jilat kullakanakasajj walja markanakata, kunayman arunak parliri, ukatsti kunayman costumbrenïpjjewa. Ukhamäkchi ukasa, taqeniw Diosarojj mayachtʼata yupaychtanjja. w16.06 3:15, 16

Ajllit cristianonakajj Cristomp chik alajjpachan apnaqjjapjjani ukhajja, kunanaksa Diosajj jupanakatak wakichpachäni ukjja janiw amuyksnati (Luc. 22:28-30; Fili. 3:20, 21; 1 Juan 3:2). Jupanakajj ‘machaq Jerusalenat’ uñtʼatäpjjaniwa, mä arunjja, Criston noviaparuw tukupjjani (Apo. 3:12; 17:14; 21:2, 9, 10). Ajllit cristianonakajja, Jesusampi chika irnaqasaw ‘markanakan qollasiñapatak’ yanaptʼapjjani. Jupanakaw juchampit jiwañampit qhespiñatakejj jaqenakar yanaptʼapjjani, jan juchani jaqenakar tukupjjañapatakis yanaptʼapjjarakiniwa (Apo. 22:1, 2, 17). ¿Kunjamsa Diosajj jachʼa munasiñap uñachtʼayani? Mä toqetjja, jiwatanakar jaktayasaw uñachtʼayani (Job 14:13-15; Juan 5:28, 29). ¿Khitinakas jaktayatäpjjpachäni? Jesusajj jiwayatäkäna uka nayrajja, Diosat jan jitheqtas servir walja chachanaka warminakaw jiwapjjäna, taqe jupanakaw jaktayatäpjjani. ‘Yaqha uwijanakatsti’, mä arunjja, Diosat jan jitheqtas servirinakajj waljaniw aka qhepa urunakan jiwapjjaraki, jupanakas jaktayatäpjjarakiniwa. Jaktasinjja jupanakajj Diosar servisipkakiniwa (Juan 10:16). w16.07 4:13-15

¿Kunas ajay toqet jan ikjañatakisa, Diosan urup wakichtʼat suyañatakis yanaptʼistaspa? Kunatï cheqäki uk lurañ wal munañaw chuymasan utjañapa, ukampis janiw ukakïñapäkiti. Jiwayatäñapäkäna ukhat mä qhawqha urunak nayrajja, ‘jan ikjañatakejj orapjjañamaw wakisi’ sasaw Jesusajj arkirinakapar ewjjtʼäna (Luc. 21:36). Aka qhepa urunakan ajay toqen jan ikjañatakejja, ukhamarakiw jiwasajj Jehová Diosar jan inaktʼas mayisiñasa (1 Ped. 4:7). Akapachan tukusiñapajj “jan amtat horasaruw jutani” sasaw Jesusajj säna (Mat. 24:44). Janiw Supayan apnaqat akapachankir jaqenakjam sarnaqañ horasäkiti. Akapachanjja janiw cheqpach kusisiñ jikjjatksnati. Jehová Diosasa Jesusasa, ajay toqen jan ikjañatakejj kunsa lurañasa uk Biblia toqew yatichistu. Ukhamasti, Biblian qellqatäki uka profecianakar istʼapjjañäni, uka profecianakajj kunjamsa phoqasiski uksa amuyapjjarakiñäni. Diosarus jakʼachasisipkakiñäni, Reinopsa jakäwisan nayrar uchasipkakiñäni. Ukhamtï lurañänejja, akapachan tukusiñap urojj purinkani ukhajj wakichtʼatäñäniwa (Apo. 22:20). Wakichtʼatäñäni ukhakiw Diosajj qhespiyistani. w16.07 2:15-17

Chacha warminakatï ‘purapat llampʼu chuymampi sarnaqapjjani, maynit maynirus perdonasipjjarakini’ ukhajja, sumaw jakasipjjani. Pantjasir jaqenakjamajj pantjasipjjakipuniniwa, pantjasisajj uka pachpa juchar jan purtʼasiñatakiw chʼamachasipjjañapa. Purapat perdonasiñwa yateqapjjañapa. Bibliajj munasiñ toqet yatichki ukarjam sarnaqañatakis chʼamachasipjjañapawa. Uka “munasiñasti mayaruw tukuyi” (Col. 3:14). Chacha warminakajja, maynit maynikam pacienciampi uñjasisa, sum uñjasisa, ukatjja ‘coler jan imjjasisaw’ uka munasiñ uñachtʼayapjjaspa (1 Cor. 13:4, 5). Jan waltʼayasiñajj utjani ukhajja, jankʼak askichañatakiw chʼamachasipjjañapa, colerasiñanakapajj janiw jurnaläñapäkiti (Efe. 4:26, 27). Chacha warminakajj wali altʼat chuymani, qhana arunakamp parliri ukhamäpjjañapawa, ukhamäpjjani ukhajja, pantjasisajj ratukiw “pantjastwa, perdontʼita” sasin sapjjani. Ukhamatwa jan walinak jankʼak askichapjjani, chacha warmis mayachtʼataw jakasipjjarakini. w16.08 2:6

Jesusajja, Jehová Diosan Reinopat yatiyañatakiw chʼamachasïna. Arkirinakapar yanaptʼañatakis tiempo apstʼasirakïnwa. Sañäni, kunjamsa mayninakar yatichapjjañapa, kunjamsa Jehová Diosan markap uñjapjjañapa ukwa yatichäna (Mat. 10:5-7). Maysa toqetjja, Felipe chachajj Diosan arunakap yatiyañatakiw chʼamachasïna, ukham lurapjjañapatakis phuchanakapar yanaptʼarakïnwa (Hech. 21:8, 9). Jichhürunakanjja, ukhamarakiw yaqhanakar yanaptʼañasa. ¿Kunatsa? Oraqpachanjja, Bibliat yateqerinakajj waljaniw tantachäwinakar sarjjapjje, ukampis janïraw bautisatäpkiti. Ukatwa qhawqha wakiskiris Jehová Diosan Arup liyiñasa, jukʼamp yatjjatañasa uk amuyapjjañapatak yanaptʼañasa. Ukatsti, suma yatiyäwinak yatiyapjjañapatakis yanaptʼañasarakiwa. Jichhak bautisasipki uka jilatanakarus yanaptʼañasarakiwa, ukhamat congregacionan yanapiripjama, jan ukajj jilïr irpirjam irnaqtʼapjjañapataki. Bibliat yateqasipki ukanakarus taqeniw yanaptʼaraksna. w16.08 4:1, 2

Jilat kullakanakasamp chika kuns lurtan ukhajja, jukʼampiw mayachtʼastanjja. Maynit maynikamas jukʼamp sumaw apasiraktanjja. Ukhamarusa, ukaw kuna bendicionanaktï Jehová Diosan Reinopajj jutïrin apankani ukanak jan armañatakis yanaptʼistu. Kunapachatï mayninakar chʼamañchtʼtan ukhajja, jan walinakar saykatapjjañapataki, ukhamarak jutïr urunak jan pächasis suyapjjañapatakiw yanaptʼtanjja (Isa. 35:4). Janiw ukakïkiti, jutïr urunak suyaskakiñatakis jiwas pachpaw chʼamañchasiraktanjja. Kunjamsa Jehová Diosajj khä nayra tiempon servirinakapar yanaptʼäna uk yatisajja, jukʼampiw Jehová Diosar confiytanjja, iyawsäwisas jukʼampiw jiljjattaraki. Ukhamajj jan waltʼäwinakana jan ukajj llakita jikjjatasiñäni ukhajja, jan aynachtʼapjjañäniti (Sof. 3:16). Jiwasatï Jehová Diosaru yanaptʼa mayiñänejja, Jupajj chʼamañchistaniwa, jutïrin walja bendicionanak katoqañatakis yanaptʼarakistaniwa (Sal. 73:23, 24). w16.09 1:16-18

Diosan servirinakapajj kuna issa uchasipjjani uk amuytʼapki ukhajja, kuntï jichhürutak ajllita textojj siski uka arunakwa amtapjje. Kunjamtï yatktanjja, thaya horasa, juntʼu horasa, juyphi pacha, jallu pacha ukhamaw utji, sapa markansa janiw mä kikpajj jakasktanti, ukatwa taqenejj mä kikpa isi jan uchasktanti. Ukampis Jehová Diosajj isisiñ toqet ewjjtʼkistu ukajj janipuniw mayjtʼkiti (Mal. 3:6). Juntʼu cheqanjja, yäparu isthaptʼasiñajj chʼamakïspawa. Ukampis sinti tʼeqe jan ukajj ancho isinak jan uchasiñatak chʼamachastan ukhajja, jilat kullakanakasajj wali askitwa uñjapjjestu (Job 31:1). Kunapachatï mä playaru jan ukajj mä piscinaru sarañäni ukhajja, umar mantañatak isisajj mayninakar jan lanktʼasiyirjamäñapawa (Pro. 11:2, 20). Akapachankir jaqenakajj sinti jiskʼa isinaksa umar mantañatakejj uchasipkchejja, jiwasajj janiw ukham uchasiñasäkiti, jan ukasti kuntï uchasktan ukajj Jehová Diosaruw jachʼañchañapa. w16.09 3:11, 12

Jesucristojja, arkirinakaparojj sapa kutiw jisktʼirïna, ukhamatwa kunsa amuyapjje uk yatïna. Awk taykanaka, Jesusatwa yateqasipjjañama. Wawanakamampi parlasasa, kun lurkasasa, kunsa jupanakajj amuyapjje uk jisktʼam, kunjamsa jikjjatasipjje uk yatiñatakis chʼamachasirakim. Wawamatï Biblian mä yatichäwip jan jankʼak iyawskanejja, paciencianïñamawa. Jisktʼanakapar qhanañchañatakiw chʼamachasiñamaraki. Wawanakamajj sum amuytʼañ munasaw ukham jisktʼapjjeristam, ukajj janiw jan walïkiti. Jesusajj waynitükäna ukhajj jisktʼasirakirïnwa (Luc. 2:46). Wawanakamar sum uñtʼañamawa. Inas yatiyirisa, tantachäwinakarusa sarasipkchi, ukham uñjasajj Diosar taqe chuymas confiyapkaspa ukham janiw amuyañamäkiti. ¿Wawanakamajj Diosar munasipjjeti? ¿Kunsa Bibliat amuyapjje? Kunanakas Diosat jitheqtayañ muni uk yatjjatañatakiw chʼamachasiñama. Kun lurkasas sapüruw Diosat wawanakamar parlañama, mayirapiñamarakiwa, ukjja sapakisa jan ukajj jupanakampïsaw lurasma. w16.09 5:3-5

Jichhürunakanjja, Jehová Diosan Testigonakapajj Diosan arunakap “taqe markanakaru, taqe casta jaqenakaru, kunayman parlani” jaqenakaruw yatiyasipki, ukhamatwa mä profecía phoqasipki (Apo. 14:6). Waljaniw yaqha arunak parlañ yateqasipki, ¿jumajj yaqha aru parlañ yateqaskaraktati? Yaqhep jilat kullakanakajj misionerotwa servisipki, jan ukajj yaqha markar sarasaw kawkjantï jukʼamp yatiyirinakajj munaski uka cheqanakan yatiyasipki. Yaqhep jilat kullakanakasti pachpa markapanwa yaqha aru parlir taman yanaptʼasipkaraki. Diosar serviñan jan aynachtʼañatakisa, familiapar ajay toqet yanaptʼañatakis taqe jilat kullakanakaw chʼamachasipjjañapa. Ukampis awisajja, Bibliat sapaki sum yatjjatañatakejj janiw tiempojj utjkaspati. Yamas yaqha aru parlir taman yanaptʼapki uka jilat kullakanakatakejja, jukʼamp chʼamäspawa. Yaqha aru parlir taman yanaptʼapki uka jilat kullakanakajja, uka taman parlapki uka arwa yateqapjjañapa. Ukham yateqkasajja, cheqa yatichäwinak jukʼampiw yatjjatapjjañaparaki (1 Cor. 2:10). w16.10 2:1-3

Jichhürunakanjja kunayman jan walinakan uñjaskasasa, walja jilat kullakanakaw Diosar wali kusisit servisipki. Waljanirakiw ‘espadampi nuwasir jan sarañ munapjjatapat’ Eritrea, Singapur, Corea del Sur markanakan carcelan llawintat uñjasipjje. Walja jilat kullakanakajja, janiw uka jilatanakjamajj carcelan llawintatäsin tʼaqesiyata uñjasiwayapkiti. Ukampis waljaniw pisin jakasisa, guerranakan uñjasisa, oraq khatatinakan uñjasisa, jan ukajj yaqha ukham jan waltʼäwinakan uñjasisajj tʼaqesiwayapjje. Yaqhepanakasti, Abraham, Isaac, Jacob, Moisés chachanakatwa yateqasipjje. Jupanakajj qamirïñat sipansa, akapachan wali uñtʼatäñat sipansa Jehová Diosar taqe chuyma serviñwa amtapjjäna. Diosar kusisit chuymampi serviskakiñatakejja, ¿kunas jilat kullakanakar yanaptʼi? Jehová Diosar taqe chuyma munasiña ukhamarak arsutanakapar iyawsañaw yanaptʼi. Jehová Diosajj jupat jan jitheqtiri servirinakaparojj Paraison wiñay jakasipjjañapatakiw jaktayani, tʼaqesiñsa wiñayatakiw chhaqtayani (Sal. 37:5, 7, 9, 29). w16.10 3:15, 16

Jeremías profetajj wali ajjsarayasita ukhamarak aynachtʼata jikjjataskäna ukhajja, Jehová Diosajj nayaw yanapaskäma sasaw säna (Jer. 1:6-10). Chuymankipstata Daniel profetar chʼamañchtʼañatakejja, Jehová Diosajj mä angelaruw khitäna. Ukatjja, “Diosan munatapa” sasaw uka angelajj Danielar säna (Dan. 10:8, 11, 18, 19). ¿Ukhamarakit jumajj jilat kullakanakarusa, precursoranakarusa, chuymankipstat jilat kullakanakarus chʼamañchtʼaskta? Jesusampi Jehová Diosampejj walja maranakas alajjpachan chikäpchïnjja, Jesusajj aka Oraqenkjjäna ukhajja, Awkipajj chʼamañchtʼaskakïnwa. Akham sasaw Jesusar pä kutejj säna: “Akawa munat Wawajjajja, kawkïrirutejj nayajj ajllista ukajja” sasa (Mat. 3:17; 17:5). Awkipajj jupar wal munatapa ukhamarak lurkän ukats kusisitapa yatisajja, Jesusajj wali kusisitaw jikjjataspachäna. Jiwañapajj jakʼäjjäna ukhajja, ukhamarakiw Diosajj Jesusar chʼamañchtʼañatakisa, chuymachtʼañatakis mä ángel khitäna (Luc. 22:43). w16.11 1:7, 8

Markasata, costumbresata, jañchisata, uñnaqasat jan walinak sapjjestu ukhajja, llakita jan ukajj colerataw jikjjatastanjja. Yamas jilat kullakanakasat maynejj jan wal uñjistaspa ukhajja, chuym wal usuyassna. Ukampis Jehová Diosajja, jan colerasiñampi atipayasiñatakiw Biblia toqejj ewjjtʼistu. Uka ewjjtʼar istʼañajja, jan waltʼäwinakar jan puriñatakiw yanaptʼistu (Pro. 16:32). Maysa toqetjja, Bibliajj maynit maynikam perdonasipjjam sasaw sistu. Jesusajj akham sarakïnwa: “Masinakamar jan perdonapkäta ukasti, jumanakan Awkimasti janirakiw kuna juchanakamatsa perdonapkarakïtamti” sasa (Mat. 6:14, 15). Ukhamajj paciencianïñatakisa, mayninakar perdonañatakis chʼamachasipjjañäni. Jiwasatï maynitak colerat sarnaqsna ukhajja, jupar uñisiñaw chuymasan utjaspa. Uk imtʼañsa munkchiñänejja, jilat kullakanakajj amuyapjjaspawa. Ukatsti janiw jiwasamp chikachasiñ munjjapjjaspati (Lev. 19:17, 18). w16.11 3:4-6

Charles Taze Russell jilatasa, mayni jilatanakasa, Bibliat wal yatjjatañ munasaw 1870 maran Bibliat jukʼampi yatjjatañ qalltapjjäna. Qalltanjja, Russell jilatajj kawkïr religionas cheqapajja ukwa yatiñ munäna. Ukatakejja, walja cristiano religionanakana, ukhamarak jan cristianöpkäna ukanakan yatichäwinakapwa yatjjatäna, ukatsti Bibliarjamajj cheqti yatichasipki janicha ukwa uñjäna. Yatjjatkäna ukarjamajja, janiw ni mä religionas Bibliarjamajj yatichkänti. Ukatwa Russell jilatajj iglesia pʼeqtʼirinakampi parlir saräna. Jupajja, kuntï Bibliajj cheqpachapuni yatichki uk yatichapjjañapwa munäna. Ukampis uka sarayirinakajj janiw munapkänti. Uk uñjasajja, Bibliat Yatjjatirinakajj kʼari yatichirinakat jitheqtasinwa Jehová Diosar serviñ amtapjjäna. w16.11 4:14

Wachoq jucha lurañanakatsa, machañanakatsa, yaqha ukham jan wali luräwinakatsa jitheqtjjtanwa (1 Cor. 6:9-11). Ukampis janiw ukanakatak jitheqtañasäkiti, jan ukasti kunanakatï Jehová Diosatak jan walïki ukanakat jitheqtañasarakiwa. Sañäni, janiw wachoq jucha lurañ mayatak jitheqtktanti, jan ukasti kunanakantï qʼañu lurañanakajj utjki taqe ukanakatwa jitheqttanjja. Cheqas janiw machjasktanti, ni machjasiñkamas umkaraktanti. Taqe ukanakar saykatañajj chʼamakïspawa, ukampis apanuksnawa. Apóstol Pablon arunakapar istʼañatak chʼamachasipjjañäni, jupajj sänwa: “Janirakiw juchampis apnaqayasipjjañamäkiti uka jiwir janchi cuerponjja. Kuntejj uka janchi cuerpomajj munki ukajj atipjañaw wakisi” sasa (Rom. 6:12; 7:18-20). w16.12 1:16, 19-21

Jumanakatï Jehová Diosar qollan ajayup mayipjjätajja, Jupajj qollan ajayup churapjjätamwa sasaw Jesusajj säna (Luc. 11:10-13). Diosan qollan ajayupajja, mä arunjja, chʼamapajja, Taqe Chʼamani Diosjam suma chuymanïñatakiw yanaptʼistu (Col. 3:10). Ukham suma chuymanïñatak chʼamachasiñajja, taqenimp sum apasiñatakiw yanaptʼarakistu, ukhamatwa kunanakatï llakisiykistaspa ukanak jan lurktanti. “Diosan munañani amparapa[ru]” confiyañatakisa, ‘Juparu taqe llakinaka jaytañatakisa’ altʼat chuymanïñaw wakisi (1 Ped. 5:6, 7, MT). Altʼat chuymanïñäni ukhajja, Jehová Diosajj sum uñjistani ukatsti yanaptʼarakistaniwa. Kuntï lurirjamäktan ukhamarak jan lurirjamäktan uk amuytʼasiñäni ukhajja, jiwas pachpar confiyasiñat sipansa Jehová Diosaruw confiyañäni, ukaw llakimp jan aynachtʼañatakejj yanaptʼistani (Miq. 6:8). w16.12 3:7, 12

Noé chachajja, Diosajj Uma Juicio apanini sasaw jaqenakar taqe chuym yatiyäna. Ukham yatiyañajja, Diosat jan jitheqtañatakiw yanaptʼäna. Maysa toqetjja, Jehová Diosan arupar istʼasaw mä arca lurarakïna (Heb. 11:7). Jichhürunakanjja, Noé chachjamaw “Tatitun luräwipanjja” yanaptʼasktanjja (1 Cor. 15:58). Yaqhepajj Tantachasiñ Utanaka, Jachʼa Tantachasiñ Utanak lurañana, ukhamarak ukanak askichañanwa yanaptʼapjje. Jachʼa tantachäwinakansa, sucursalansa, yaqha arur jaqokipaski uka utanakansa yanaptʼapjjarakiwa. Ukampis ukanakat sipansa, Jehová Diosan Reinopat yatiyañaruw uchastanjja, ukaw Jehová Diosar jukʼamp confiyañatak yanaptʼistu. Ukampis jiwasajj mä suma suytʼäwinïtanwa, uka suytʼäwisat yatiyañaw wiñay jakañar apir thakit jan jitheqtañatak yanaptʼistu (1 Cor. 9:24). w17.01 1:8, 9

Mayninakajj kuntï lurañ amtapki ukarojj respetañasawa. ¿Kunatsa? Sapa maynejj mayj mayj amtirïtanwa, ukhamajj janiw mä pachpa amtaruk purksnati. Kunjamsa maynejj sarnaqani, kunjamsa Jehová Diosar servini ukjja sapa mayniw amtjje. Sapa mayniwa luräwinakapat llakisiñapa, ukhamajj kunanaktï jilat kullakanakajj amtapki uk respetañasawa (1 Cor. 10:32, 33). Jehová Diosajja, jiwas pachpa kuns amtirwa lurtʼawayistu, ukhamajja kunsa lurañäni uk sapa mayniw amtjjsna (2 Cor. 3:17). Ukham luratätasatwa Jehová Diosar jachʼañchkir amtanakar pursna, ukhamatwa qhawqsa Jupar munastan uk uñachtʼaysna. Ukhamajj Jehová Diosar jachʼañchkir amtanakar puripjjañäni, kuntï mayninakajj amtapkani uksa respetapjjarakiñäni. w17.01 2:15, 17, 18

Jiwasas jukʼamp askïksna ukham tukuñat sipansa, ‘suma munkaña, llampʼu chuymanïñatakiw’ chʼamachastanjja (1 Ped. 3:3, 4; Jer. 9:23, 24). Kunjam chuymanïtansa ukajja, arsutasana luratasanwa qhan amuyasi. Amuytʼañataki, sum yatitasata, kuns sum lurtʼirïtasat inas jachʼañchayasiñ munsna, jan ukajj wali uñtʼat jaqenakampi uñtʼasitasat sum uñjayasiñ munsna. Maysa toqetjja, inas mayninakajj kuna lurañansa yanaptʼapjjchistaspa, ukham yanaptʼayasisajj jiwasakiw mayninakampi jachʼañchayasiñ thaqsna. Jesusat amuytʼañäni, jupajj pachpa amuyunakapampejj jaqenakar wal muspharayaspäna, ukampis janiw uk lurkänti, jan ukasti sapa kutiw ‘Diosan Arupajj akham siwa’ sasin säna. Jaqenakampi jachʼañchayasiñat sipansa, Jehová Diosaruw jachʼañchäna. w17.01 4:12

Uka arunak amuyañasa, ukar istʼañasa Adanatakisa, Evatakisa janiw chʼamäkänti, ¿kunatsa ukham sistanjja? Jupanakatakejj wali suma frutanak achuri qoqanakajj waljaw utjäna. Supayajj mä asiru toqew Eva warmir engañjäna, ukhamat Jehová Dios contra saytʼasiñapataki (Gén. 3:1-5; Apo. 12:9). Supayajj akham sasaw Evar säna: “¿Ukhamajj Diosajj sapjjtamti: ‘Janiw kawkïri qoqan achunakapsa manqʼapjjätati’ sasa?”. Mä arunjja, ‘¿janit munañanakamarjam kuns lurapkasma?’ sasinsa Supayajj siskaspäna ukhamänwa. Ukjjarusti, Jehová Diosar jan istʼapjjañapatakejj akham sarakïnwa: “Janiw jiwapkätati, [...] kunapachatejj jumanakajj uka qoqan achunakapata manqʼapjjasma ukkhajj yatipjjasmawa kunatejj askïki, ukhamarak ñanqhäki ukanakjja” sasa. Ukham sasinjja, Jehová Diosajj janis Adanasa Evasa Jupjam yatiñanïpjjañap munkaspa ukhamwa amuyayañ munäna. Tukuyañatakejj Supayajj akham saskakïnwa: ‘Jumanakatï uka qoqan achunakapat manqʼantapjjasma ukhajja, Diosjamäpjjasmawa’ sasa. w17.02 1:8, 9

Isaías profetajj sänwa: “Markanakatakejja mä jilïri” jaqeruw tukuni sasa (Isa. 55:4). Daniel profetasti “jachʼa jilïri” Mesiasaw purinini sasaw säna (Dan. 9:25). Jesús pachpaw Diosan markapan ‘jilirïtwa’ sarakïnjja (Mat. 23:10). Discipulonakapajj taqe chuymaw jupar arkapjjäna, Jehová Diosaw Jesusar ajlliwayi sasaw confiyapjjarakïna (Juan 6:68, 69). Ukham confiyapjjañapatakejj ¿kunas jupanakar yanaptʼäna? Jesusajj bautisaskäna ukhajja, Juanajj “alajjpachanak jistʼartirwa uñjäna, qollan ajayusti mä palomar uñtata jupjjar saraqasinkiri uñjarakïna” (Mar. 1:10-12). Jesusajj aka oraqen yatiykäna ukhajja, Jehová Diosan qollan ajayupaw yatichañatakisa, milagronak lurañapatakis yanaptʼäna (Hech. 10:38). Ukatsti Jesusarojj munasirïñatakisa, kusisitäñatakisa, Jehová Diosar confiyañapatakisa qollan ajayuw yanaptʼarakïna (Juan 15:9; Heb. 12:2). Marka apnaqerinakatjja janiw maynis Diosan qollan ajayupampejj yanaptʼatäkiti. Ukhamajja, Jehová Diosaw markapan pʼeqtʼañapatakejj Jesusar ajlliwayi. w17.02 3:15, 16

Apostolonakajj Pentecostés, 33 maranwa Jehová Diosan markap pʼeqtʼañ qalltapjjäna. Mä kutejja, “Pedrojj tunka mayan apostolonakampi saytʼasisinjja”, walja jaqenak nayraqatanwa Jehová Diosan Arupat yatichäna (Hech. 2:14, 15). Qhepatjja, waljaniw uka jaqenakat cristianöjjapjjäna. Ukatsti, “taqeniw sum arkapjjäna kunjämtejj apostolonakajj yatichkäna ukhamarjama” (Hech. 2:42). Apostolonakaw taman qollqep apnaqapjjarakïna (Hech. 4:34, 35). Jupanakaw Diosan markaparojj yatichapjjäna, oracionsa lurapjjarakïna, ukatwa akham sapjjäna: “Nanakasti Diosat mayiñaruw jukʼamp uskusipjjä, ukhamarak jupan arunakap yatichañaru” sasa (Hech. 6:4). Yaqha cheqanakan Diosan arunakap yatiyasiñapatakis wakichtʼat cristianonakaruw khitapjjarakïna (Hech. 8:14, 15). Qhepatjja, qollan ajayun ajllita jilïr irpirinakaw apostolonakarojj tamar irpañatakejj yanaptʼapjjarakïna. Jupanakaw oraqpachan jilïri irpirinakjamajj tamanakar yanaptʼapjjäna (Hech. 15:2). w17.02 4:4

Taqe jaqenakaw respetomp uñjatäñapa, ukampis Supayan apnaqat akapachanjja, jaqenakar respetompi uñjañat sipansa, jila partejj jaqe masiparukiw jachʼañchjjapjje. Sañäni, waljaniw yaqhep chachanakaru ukhamarak warminakaru idoloparjam uñjapjje. Jehová Diosajj munkäna ukarjam respetompi uñjañat sipansa, diosarjamaw jachʼañchapjje. Kunjamtï politiconakasa, religión pʼeqtʼirinakasa, atletanakasa, peliculanakan uñstir jaqenakasa, ukat wali uñtʼat yaqha jaqenakas isisipki ukwa yateqasipjje, ukatsti jupanakjam sarnaqañwa munapjjaraki. Jehová Diosan servirinakapajj janiw jaqenakarojj ukham jachʼañchktanti, ukham lurañajj jan walïtapwa amuytanjja. Jaqenakat yateqasis sarnaqañat sipansa, Jesucristot yateqasisaw sarnaqañasa (1 Ped. 2:21). Amtapuniñäni, jaqenakajj “taqeni jucha lurapjjatap laykusti Diosampejj janiw katoqatäpkiti” (Rom. 3:23). Ukhamasti, janiw mä jaqes jachʼañchatäñatakejj kunsa lurkiti. Kunapachatï jaqenakarojj wal jachʼañchtan ukhajja, Jehová Diosajj wal chuym usuyasi. w17.03 1:6-8

¿Jehová Diosarojj taqe chuymat servisktan janicha uk kunjamatsa yatsna? Sapa mayniw akham jisktʼasiñasa: ‘¿Jan walinakan uñjaskasas Jehová Diosar istʼaskakïti? ¿Diosan markapan qʼomäñapatakejj yanaptʼapunïti?’ sasa. Amuytʼañataki, mä familiaramajj tamat jaqsuta uñjasispa ukhajja, ¿kunsa lurasma? ¿Jupampejj parlaskakismati, chuymamarjamajj kun lurañsa munasma? Awisajj Asá reyjamaw taqenis jiwas conträpkaspa ukham amuyassna. Compañeronakamasa profesoranakamasa Jehová Diosan Testigopätamatwa jumat larusipjjaspa. Trabajonjja jachʼa tantachäwinakar sarañataki permiso mayitamata, jan ukajj arumanakamppacha jan trabajiñ munatamatwa jiskʼachapjjeristam. Ukham pasani ukhajja Asá reyit yateqasisaw Jehová Diosar jukʼamp confiyañasa. Wal orasiñasa, kunatï askïki uk luraskakiñatakis chʼamachasiskakiñasawa (2 Cró. 14:11). Amtapuniñäni, Asá reyirojj Jehová Diosaw yanaptʼäna, jiwasarojj ukhamarakiw yanaptʼistani. w17.03 3:6-8

Wakiskir mä amtar janïr purkasajja, sum amuytʼasiñaw wakisi sasaw Bibliajj qhanañchi. Ukhamajja, janiw jankʼakejj kunsa lurañäni uk amtañasäkiti, jan ukasti sum amuytʼasiñasawa (1 Tes. 5:21). Mä amtar janïr purkasajja, familia pʼeqtʼirinakajj Bibliata ukhamarak qellqatanakat yatjjatañatakiw tiempo apstʼasipjjañapa. Familiapankirinakajj kamsapjjesa uk sumwa istʼapjjañaparaki. Amtañäni, Jehová Diosajj warmimar istʼam sasaw Abrahamar säna (Gén. 21:9-12). Jilïr irpirinakasa, qellqatanakat sum yatjjatañatakejj tiempo apstʼasipjjañaparakiwa. Nayra amtanakapajj machaq qellqatanakarjam cambiañ wakisini ukhajja, jilat kullakanakajj kamsapjjanisa sasajj janiw llakisipjjañapäkiti. Amuytʼasiri ukhamarak altʼat chuymani jilïr irpirinakajja, wakisitarjam amtanakap mayjtʼayañatakejj jankʼakïpjjañapawa. Jupanakat yateqasiñajj wali askiwa, ukham lurañaw taman sum apasiñatakisa, mayachtʼatäñatakis yanaptʼi (Hech. 6:1-4). w17.03 2:16