Abril

Jilïr irpirinakampi yanaptʼayasiñatakejja, ¿kunsa lurañasa? Diosar confiyapjjatapsa, sum sarnaqapjjatapsa yateqasiñasawa, Bibliarjam ewjjtʼapkistu ukhas istʼañasarakiwa (Heb. 13:7, 17). Jilïr irpirinakajj wal munasipjjestu, Jehová Diosampi sum apasiñaswa munapjjaraki. Tantachäwinakat faltasitasa, Diosar jan taqe chuyma sirvjjatas amuyapjjani ukhajja, jankʼakiw yanaptʼapjjestani. Sum istʼapjjestani, wal chuymachtʼapjjestani, Bibliarjamaw sum ewjjtʼapjjarakistani. Jehová Diosajj jilïr irpirinak toqew munasiñap uñachtʼayistu, ¿jumajj ukhamti amuyarakta? Jilïr irpirinakatakejja, jiwasar ewjjtʼañajj chʼamakïspawa. Ukhamajj ¿kunjamsa jilïr irpirinakar lurañanakap phoqapjjañapatakejj yanaptʼsna? Humilde chuymanïñasawa, istʼasirïñasawa, yuspärasirïñasarakiwa. Diosaw munasiñat jupanak taypi yanaptʼitu sasaw amuyañasa. Ukhamatwa suma yanaptʼa katoqañäni, jilïr irpirinakas kusisitaw lurañanakap congregacionan phoqapjjarakini. w18.03 pág. 31 párrs. 15, 16

Wawanakajja sapa mayniw mayj mayjäpjje. Janirakiw taqenejj mä pachpa edadanirus amuytʼasir jaqer tukupkiti. Yaqhepajj jiskʼäsipki ukhaw amuytʼasir jaqëjjapjje, ukatwa bautisasiñ amtapjjaraki. Yaqhepasti tiempompiw bautisasiñatak wakichtʼatäsipki. Uk amuyir awk taykanakajja, janiw wawaparojj bautisasiñapatak jariyapkiti, jan ukasti chʼamachasitaparjamaw yanaptʼapjje. Awk taykanakajja, wawanakapajj kuntï jichhürutak ajllita texton siski ukarjam lurañatak chʼamachasipki ukhajja, wal kusisipjje. Ukampis wawapan Criston arkiripäñap munapki uk janipuniw armapjjañapäkiti. Uka amtampiw akham jisktʼasipjjañapa: “¿Wawajajj Jehová Diosar jakäwip katuyasiñatakisa bautisasiñatakis Biblian yatichäwinakap sumti amuyjje?” sasa. w18.03 pág. 9 párr. 6

Jiwasatï invittʼatajj ‘jutaw’ sistanjja phoqañasawa, janiw amanut jan sarañasäkiti. Ukham lursna ukhajja, invittʼirin chʼamachasitapajj inamayakïspawa (Mat. 5:37). Yaqhepanakajja, jukʼamp suma invitación katoqasajj ukarukiw sarjjapjje. Ukham lurasajja, janiw munasiñsa ni respetatapsa uñachtʼayapkiti. Ukhamajja, khitisay invittʼistpan, kunsay wajjtʼistpan, taqe chuymaw katoqtʼasiñasa (Luc. 10:7). Ukampis sarañ jan puedjjañäni ukhajja, jankʼakiw yatiyjjañasa, ukhamatwa munasirïtassa, respetompi uñjatassa uñachtʼayañäni. Kawkjantï jakasktan ukan costumbrenakapsa respetañasarakiwa. Sañäni, yaqhep cheqanakanjja, jan yatiyasa maynin utaparu visittʼañajj walikïskiwa, yaqhep cheqansti janiraki. Yaqhep markanakanjja, invittʼatäsajj “janiw puedkäti” sasin may kuti, jan ukajj pay kuti respetompi sañajj walikïskiwa, ukampis yaqhep markanakanjja ukham sañajj jan walit uñjatawa. Ukhamajja, utapar invittʼapkistani ukanakajj jiwasar invittʼasajj kusisitäpjjañapawa. w18.03 pág. 18 párrs. 20, 21

Espíritu santompi irpayasir jaqëñatakejja, janiw Bibliat yatiñakejj wakiskiti (1 Rey. 4:29, 30; 11:4-6). Bibliat sumsa yatkstanjja, Diosar serviñan jiltaskakiñasawa (Col. 2:6, 7). Ukatakejj “Diosan munasiñapan jakasipxañäni” sat librot yatjjatañajj wali wakiskiriwa. Uka librojja, kunjamsa Biblian ewjjtʼanakaparjam sarnaqsna ukatakiw yanaptʼistani. Uka librot yatjjatañ tukuyjjstanjja, kawkïr qellqatanakatï Diosar serviñan suma saytʼatäñatak yanaptʼkistaspa ukanakat yatjjatañasawa (Col. 1:23). Ukatjja, orasiñasapuniwa, kunjamsa yateqktan ukarjam phoqsna ukanakatsa lupʼiñasawa. Ukatsti, Jehová Diosan munañap lurañataki, istʼasirïñataki amtampiw Bibliat yatjjatañasa, lupʼiñasaraki (Sal. 40:8; 119:97). Kunanakatï Diosar serviñan jiltañatak jarkʼkistaspa ukanakatsa jitheqtañasawa (Tito 2:11, 12). w18.02 págs. 24, 25 párrs. 7-9

Noé chachjam Diosar confiyañatakejja, Bibliat sum yatjjatañaw yanaptʼistaspa, ukhamarak kunanaktï yateqktan ukanak wali valoranit uñjaña, yateqatarjam sarnaqaña, ukarjam lurañaw yanaptʼarakistaspa (1 Ped. 1:13-15). Ukhamajja, Supayan trampanakapar jan purtʼasiñatakisa, akapachan espiritupampi jan apayasiñatakisa, Diosar confiyaña ukhamarak yatiñanïñaw yanaptʼistani (2 Cor. 2:11). Cheqas uka jan wali espirituw jaqenakarojj jan walinaka, qʼañu juchanak lurapjjañapatakisa, jan walinak lurañ munapjjañapatakis chʼamañchi (1 Juan 2:15, 16). Diosar jan taqe chuyma confiyirinakasa, janis qhep qhepa urunakanksna ukham amuyapjjaspa. Jesusajj jichha tiempompit Noé chachan tiempopampit parlkäna ukhajja, jan wali lurañanakata, qʼañu jucha lurañanakat qhanañchañat sipansa, Diosat jitheqtañaw utjaspa sasaw jukʼamp qhanañchäna (Mat. 24:36-39). Jiwasajj akham jisktʼasiñasawa: “¿Jehová Diosar uñtʼir jaqjamat sarnaqasktjja? ¿Diosar confiyatajajj arunakapar istʼañataki, jaqenakar yatiyañatakit chʼamañchitu?” sasa. Uka jisktʼanakarjamajj kamsätasa ukaw Diosampit sarnaqaskta janicha uk amuyasiñatak yanaptʼätam (Gén. 6:9). w18.02 págs. 9, 10 párrs. 8-10

Diosar jan servipki uka jaqenakat janiw jitheqtkapunsnati, trabajonsa, escuelansa, jupanakampïtanwa, inas jupanakampis jakasirakstan. Ukampis jan jupanakjam amuyañataki, lurañatakiw chʼamachasiñasa. ¿Kunas ukatak yanaptʼistaspa? Jehová Diosampi jukʼamp sum apasiñatakiw chʼamachasiñasa, ukatakejj Biblia liyiñasawa, Diosar serviri amigonakwa ajlliñasaraki. Jaqenakarus Diosar uñtʼapjjañapatakiw yanaptʼañasaraki. Ukatakejj taqe cheqan yatiyañatakiw chʼamachasiñasa, Jehová Diosaruw suma arunak horasapar arsuñataki mayisiñasa. Jaqenakarus Jehová Diosan Testigopätasjja yatiyañasarakiwa. Ukhamatwa suma sarnaqatasampejj jiwasar jachʼañchasiñat sipansa, Jehová Diosar jachʼañchañäni. Jiwasarojja, Jehová Diosaw “jan wali sarnaqañanak apanukuñsa akapachan utjki uka jan wali munañanak apanukuñsa yatichistu”, juparakiw “suma amuyumpi jakañatakisa, cheqapar sarnaqañatakisa, akapachankir jaqenak taypin Dios chuymäñatakisa yatichistu” (Tito 2:11-14). Jiwasatï Jehová Diosat yateqasiñäni, jupar istʼañäni ukhajja, yaqhepanakajj jiwasar uñjasajj akhamwa sapjjaspa: “¡Jumanakamp saraña munapjjta, nanakasti istʼapjjtwa Diosajj jumanakampïtapa!” sasa (Zac. 8:23). w18.01 pág. 31 párrs. 17, 18

¿Uka arunakajj jiwas pachpajj janiw munasiñasäkiti sañti muni? Janiwa. Taqeniw jiwas pachpajj munastanjja, ukajj wali wakiskirirakiwa. Jehová Diosaw ukham lurawayistu. Jesusajj akham sänwa: “Jaqe masimarojj juma kikparjam munasiñamawa” sasa (Mar. 12:31). Jiwasatï jan jiwas pachpar munasksna ukhajja, janirakiw jaqe masisarojj munasksnati. Bibliajj akham siwa: “Casarat chachanakajj ukhamarakiw warminakaparojj pachpa cuerpoparjam munasipjjañapa. Warmipar munasir chachajja, jupa pachpaw munasi. Janiw khitis pachpa cuerpoparojj kunäkipans uñiskiti, antisas manqʼayiwa, wali munasiñampiw uñjaraki” sasa (Efes. 5:28, 29). Ukhamajj jiwas pachparu munasiñajj walikïskiwa. Mayni pachpa munasiñata 2 Timoteo 3:2 texton parlki ukajja, janiw walïkiti. Uka munasiñajj jiwas pachparuki añcha munasiñawa. Ukham jaqenakajja, kunatï amuyañäki ukat jukʼampwa jupanak pachpat amuyapjje (Rom. 12:3). Janirakiw yaqhanakat llakisipkiti, jupanakatakwa wal llakisipjje. Kunas jan walëjje ukhajja, yaqhanakarukiw ukanakat juchañchañ yatipjje, janis jupanakajj ukat juchanïpkaspa ukhamwa amuyasipjje. Uka kasta jaqenakajja, janiw kusisit jakasipkiti. w18.01 pág. 23 párrs. 4, 5

Bibliat yatjjatasaw Jehová Diosar istʼtanjja. Ukampis Jupampi parlasiñ munstan ukhajja, orasiñasawa. Ukhamajj janiw Diosar mayisiñarojj mä costumbrekïkaspas ukham uñjañasäkiti, janirakiw kuns sum phoqasiñapatakiki mayisiñasäkiti. Oracionajj Taqe kun Luriri Diosampi parlasiñatakiwa. Jupajj istʼañwa muntamjja (Filip. 4:6). Kunas llakisiyätam ukhajja, “Diosar llakinakam katuyam” sasin Biblian siski uka ewjjtʼat amtasiñamawa (Sal. 55:22). ¿Uka ewjjtʼajj cheqapunit yanaptʼiristamjja? Walja jilat kullakanakaw ukham lurañajj yanaptʼasiwa sasin sapjjeristam. Jumarus ukhamarakiw yanaptʼiristam. Jehová Diosarojj sapüruw mayisiñasa, janiw yanaptʼa munktan ukhak orasiñasäkiti. Awisajj kunayman llakinakan uñjasisajja, kuna bendicionanaktï Diosat katoqktan ukanak armtʼasnawa. ¿Kunanakatsa sapürojj Jehová Diosar yuspärasma? Mä kimsataksa yuspärasma ukajj walipunïspawa. w17.12 págs. 25, 26 párrs. 10, 11

Bibliat yateqerinakajja sapa maraw waranq waranqanaka Jehová Diosar jakäwip katuyasisa bautisasipjje. Jupanakat jilapartejj wayn tawaqonakäpjjewa, cristiano familianwa jilsupjjaraki, ukham lurapjjatapajj wali wakiskiriwa (Sal. 1:1-3). Cheqas walja cristiano awk taykanakaw wawanakapan bautisasipjjañap wal munapjje (3 Juan 4 uñjjattʼarakïta). Cristiano awk taykanakajja, wawanakapajj “sagrado qellqatanak” uñtʼapjjañapwa munapjje. Uka qellqatanakajj Hebreo Aruta, Griego Arut Qellqatanakawa. Jiskʼa wawanakasa Biblian qellqatäki uka sarnaqäwinakat yateqapjjarakispawa. Diosan markapanjja, kunayman qellqatanakaw utjistu. Sañäni, libronaka, folletonaka, videonaka, ukanakajj kunayman arutwa utjaraki. Awk taykanakajj uka yanaptʼanakampiw wawanakapar yatichapjjaspa. Qollan Qellqatanakat yatjjatañajj Jehová Diosampi sum apasiñatakiw yanaptʼistu, uk janipuniw armañasäkiti. w17.12 pág. 18 párr. 1; pág. 19 párr. 4

Mä kullakan jan Testigo esposopajj jan walsa jupar uñjkaspa ukham amuytʼañäni. ¿Kullakatï ukham luratapat colerasis esposopar toqespa ukajj yanaptʼaspati? Inas esposopajj jupar istʼchispa, ukampis ¿Jehová Diosar serviñ munaspati? Inas jan munkchispati. Antisas kullakatï esposopar familia pʼeqtʼirirjam respetompi uñjanejja, familiapan sum apasiñatakiw yanaptʼani, Jehová Diosarus jachʼañcharakiniwa. Inas tiempompejj esposopajj Diosar serviñ munjjarakchispa. Ukhamäspajja, panpachaniw premio katoqapjjaspa (1 Ped. 3:1, 2). Mä jilatan jan Testigo esposapajj janis respetompi uñjkaspa ukham amuytʼarakiñäni. ¿‘Nayaw familian pʼeqëtjja’ sasin toqesisajj respetayasispati? Janiwa. Jan ukasti, Jesusat yateqasis esposapar munasiñampi uñjañapwa Jehová Diosajj muni. Jesusajj munasiñampi pacienciampiw congregacionar uñji (Luc. 9:46-48). Cristiano mä chachatï Jesusat yateqasis esposapar sum uñjanejja, inas esposapajj Diosar serviñ munjjchispa. w17.11 págs. 28, 29 párrs. 13, 14

Akapachankir jaqenakjam amuyapki ukanakajj janiw Jehová Diosan leyinakaparojj istʼapkiti. Ukajj jukʼat jukʼatwa Diosar confiyañat apaqestaspa. Cheqas taqeniw kunjamsa akapachankirinakajj amuyapjje ukjja, Internetansa, trabajonsa, escuelansa uñjtanjja. Walja markanakanjja, ‘janiw Diosar creykti’ sasajj waljaniw sapjje. Diosajj utjiti janicha uk inas jan sum yatjjatapkchiti, ukampis kunatï jupanakar gustki ukanakjja wal lurañ munapjje (Sal. 10:4). “‘Diosar jan creykasasa, suma jaqëristwa’ sirinakajj amuytʼasirïpjjewa” sasaw yaqhepajj amuyapjje. ¿‘Taqe kun Lurirejj janiw utjkiti’ sasin amuyañajj walikïskiti? Kuntï cientificonakajj uka toqet sapki ukanakat yatjjatañ munasajja, jukʼampiw jan amuyjjsnati. Ukampis uka jisktʼan qhanañchäwip yatjjatañajj janiw chʼamäkiti. Kunjamtï taqe utas maynin luratäkejja, ukhamarakiw taqe kunatï utjki ukanakajj maynin lurataraki. w17.11 pág. 21 párrs. 2-4

¿Kunatsa Jesusan jiwatap amtir sarañajj wali wakiskiri? Tantachäwinakajja, Jehová Diosar adorañatakiwa, uk janiw armañasäkiti. Jesusan jiwatap amtir sarañatak khitinakas wal chʼamachasipjje ukjja, Jehová Diosampi Jesusampejj sum yatipjje. Ukhamasti, uka tantachäwir sarañatak wal chʼamachasitasa, janipun sarirjamäktan ukhak jan saratas uñjapjjañapwa muntanjja. Tantachäwinakar wali askit uñjatas luratasampi uñachtʼayañäni ukhajja, Jehová Diosajj sutisjja janiw ‘librot’ apskaniti. Uka librojj ‘jakañ libro’ sasin uñtʼatarakiwa. Jehová Diosajj wiñay jakaña churañ munki ukanakan sutinakapaw uka libron qellqata (Apoc. 20:15). Jesusan jiwatap amtañ uru jakʼanakajja, orasiñatakisa, Diosampejj sumti apasisktan janicha ukanakat amuykiptʼasiñatakis tiempo apsusiñasawa (2 Cor. 13:5). w18.01 pág. 13 párrs. 4, 5

Nayra tiemponjja, jan munkasina jaqe jiwayirirojj imantasiñ markanjja janiw khitis jiwaykaspänti. Jehová Diosaw uka markanakajj “imantasiñapatakïniwa” sasin säna (Jos. 20:2, 3). Janirakiw uka juchapat mayampi juchañchatäñap munkänti. Jiwatan parientepas janirakiw imantasiñ markar mantasajj jiwaykaspänti. Uka markanjja, Jehová Diosaw jarkʼaqäna, janiw kuna jan walis paskaspänti. Janiw mä carcelankkaspas ukhamäkänti, ukanjja trabajaspänwa, yaqhanakarus yanaptʼaspänwa, Jehová Diosarus serviskaspänwa. Imantasiñ markanjja kusisitaw jakasispäna. Yaqhepajj jachʼa juchapat arrepentisjjapkchisa, juchañchasisipkakiwa. Jehová Diosajj janipuniw uka juchajj armkaniti sasaw amuyapjje. Jumatï ukham amuyasstajja, ak amtañamawa, Jehová Diosajj khuyaptʼayasiñapatwa wiñayatak perdontamjja, janiw llakisjjañamäkiti. w17.11 pág. 9 párr. 6; pág. 11 párrs. 13, 14

Jesusan jiwatap amtañataki tʼantʼasa, vinos kamsañsa muni ukanakat lupʼisajj mayachtʼatäñasatakiw yanaptʼsna. Ukjja, janïr uka aruma purinkipanwa lupʼiñasa ukat uka arumasa lupʼiñasarakiwa (1 Cor. 11:23-25). Jan levadurani tʼantʼajja, Jesusan jan juchani cuerpopa sañwa muni, vinosti, Jesusajj wilap wartasiwayki ukampi sasirakiwa. Kunjamsa Jehová Diosajj munat Yoqapa jiwasanakar munasa khitanïna, Jesusas kunjamsa jiwasanakar munasa taqe chuyma jakañ vidap loqtasiwayi ukanakatwa lupʼiñasa. Jiwasatï ukanakat wali amuyumpi lupʼiñäni ukhajja, Jehová Diosampir Jesusampirojj jukʼampiw munasiñäni. Cheqas ukaw jilat kullakanakasampi mayachtʼatäñasatakejj yanaptʼistu. w18.01 pág. 15 párr. 11

Jehová Diosajj walpun jaqenakar munasi. Ukatwa wali munat Wawapar jiwas layku jiwañapatak khitanïna, ukhamat wiñay jakañ katoqañasataki (Juan 3:16). Diosajj arunakap jan phoqkaspajja, Diosajj kʼarïskapuniwa, jan wali apnaqerïskapuniwa, janiw jaqenakan sum jakasipjjañapsa munkiti sasaw Supayajj saspa. Diosan enemigonakapajj akham sapjjarakispawa: “Criston kuttʼaniñap tiempojj ¿kawkinkarakisti? Nayra awkinakasajj jiwañan iktʼjjapjjäna ukhat jichhakamajja, taqe kunas pachpakïskiwa, jaqenakajj luratäkäna ukhatpachaw ukhamäski” sasa (2 Ped. 3:3, 4). Ukatwa Diosajj taqe arunakap phoqani. Taqe kunjjar munañanïtap qhanstkani ukhasa, istʼasiri taqe jaqenakaruw Diosajj qhespiyarakini (Is. 55:10, 11). Jehová Diosajj munasiñampipuniw jaqenakar apnaqe. Ukatwa Diosajj wiñayatakiw munasiñampi uñjistani, taqe chuyma servirinakapat janipuniw armaskaniti sasin confiytanjja (Éx. 34:6). w17.06 pág. 23 párr. 7

Génesis 3:15 qellqatarjamajj Jehová Diosajj jaqenakar salvañ amtkäna ukhajja, Jupatakejj niyas Yoqapajj jiwjjaspa ukhamänwa. Pusi waranqa maranak qhepatjja, Jehová Diosajj mä sapa Yoqapwa jaqenak laykojj churäna (Juan 3:16). ¡Ukham luratapat walpun yuspärtanjja! Jiwasajj niyakejjay Diosar uñtasit luratästanjja, jupjamarakiw jan kun katoqañ suyasajj munasirïsna. Abel chachajj ukhamwa luräna, kunatï wali valoranïkäna ukwa Diosar sacrificiot loqtäna (Gén. 4:3, 4). Noé chachajj ukhamarakiw munasir jaqëna, walja maranakaw jan istʼasir jaqenakarojj Diosan arunakap yatiyäna (2 Ped. 2:5). Abrahán chachasti taqe kunat sipansa Diosaruw wal munasïna, ukatwa Isaac yoqapar sacrificiot loqtañatakis jankʼakïna (Sant. 2:21). Jiwasajj jupanakjamarakiw chʼamäkipansa munasirïñ muntanjja. w17.10 págs. 7, 8 párrs. 3, 4

Jichhürunakanjja, Jehová Diosampi perdonayasiñatakisa khuyapayasiñap katoqañatakis Jilïr Sacerdote Jesusaw horasapar yanaptʼistu (Heb. 4:16). Ukhamajj Jehová Diosar imantasiñatakejja, Jesusan jakäwip loqtasitaparuw confiyañasa. Jesusajj sapa maynitakiw jiwaraki, ukarojj taqe chuymaw confiyañasa (Gál. 2:20, 21). Jehová Diosajj Jesusan loqtasitapjjaruw juchanakas sapa maynir perdonistu, uka laykurakiw wiñay jakañ katoqsna, ukanakarojj taqe chuymaw confiyañasa. Jesusan jaqenak layku jiwatapajj Jehová Diosan mä suma regalopawa. Jehová Diosajj perdonkistu ukhajja, mayampiw Diosajj uka juchajat juchañchitani sasin janiw ajjsarañasäkiti (Sal. 103:8-12). Jehová Diosajj perdonistuwa sasaw confiyañasa. w17.11 págs. 11, 12 párrs. 14-17

Tatitun Cenapajj nayrïr kuti apaskäna uka arumajja, Jesusajj kunjamtï jupajj alajjpachankir Awkipampi mayachtʼatäkänjja, ukhamarak discipulonakapan mayachtʼatäpjjañapatakiw Awkipar mayïna. Jehová Diosajj munat wawapan mayisitapjja istʼänwa. Cheqas Jesusan jiwatap amtañajja, Jehová Diosan Testigonakaparojj aka oraqpachanwa mayachtʼistu. Uka urojj walja jaqenakaw kunayman markata, kunayman jañchini mä wawaki tantachtʼasipjjani. Yaqhep cheqanakanjja, Diosar serviñataki ukham tantachasiñajj jan walit uñjatawa. Ukampis Jehová Diosampi Jesusampejj wali askitwa uñjapjje. Jehová Diosan Testigonakapajj mayachtʼata tantachtʼasiñjja, wali askitwa uñjtanjja. Jehová Diosajj Ezequiel profetap toqew uka toqet parläna (Ezeq. 37:15-17; Zac. 8:23). w18.01 pág. 14 párrs. 7-9

‘Utachirinaka’ sasin Biblian siski ukajj judionakäpjjänwa, jupanakaw Jesusar jan uñtʼir tukupjjäna. Janirakiw Cristötapsa amuyañ munapkänti, antisas jiwayatäñapwa mayipjjäna (Luc. 23:18-23). Ukhamajj jupanakaw Jesusan jiwatapat juchanïpjjäna. Jesusarojj jan uñtʼiriw tukupjjäna ukat jiwayapjjarakïnwa, ukhamajj ¿kunjamatsa ‘esquina jachʼa qalar’ tukuspäna? Jiwatat jaktaspäna ukhakiw ukham tukuspäna. Pedrojj “Nazareno Jesucristo[twa]” parläna, juparuw ‘mä lawar chʼakkatas jiwayapjjäna, ukampis Diosaw jiwatanak taypit jaktayäna’ (Hech. 3:15; 4:5-11; 1 Ped. 2:5-7). Jesusajj jiwatat jaktasaw jiwasan qhespiyirisar tukuwayi. Cheqas, “jupat sipanjja yaqha salvirejj janiw utjkiti, janirakiw Diosan ajllit yaqha sutejj aka oraqen utjkiti, ukhamat jiwasan salvasiñasataki” (Hech. 4:12; Efes. 1:20). w17.12 págs. 9, 10 párrs. 6-9

Jesusajj wali tʼaqesiñ tiempon jakʼankjjatap toqetjja, akham sänwa: “Jaqen Yoqaparuw alajjpachankir qenayanak patjjan wali kʼajkiri wali chʼamani jutaskir uñjapjjani. Angelanakaparuw jupajj khitanini, trompetas wali jachʼatwa istʼasirakini, uka angelanakaw jupan ajllitanakapar [...] jawsthapipjjani” sasa (Mat. 24:29-31). Jesusajja, aka oraqen jiltʼasipkani uka “ajllitanakapar” alajjpacharu apasjjani ukhaw jupanakar tantachthapini. Ukajj wali tʼaqesiñ tiempo qalltkani ukhaw pasani, ukampis janïr Armagedón guerra qalltkipana. Uka guerranjja, Jesusampi 144.000 ajllitanakampiw aka oraqenkir taqe reyinakar atipjapjjani (Apoc. 17:12-14). Ukhamajja, Jesusajj ajllitanakaru alajjpachan tantachthapiñataki janïr apaskani ukhaw Jesusan jiwatap qhep qhepa kuti amtañäni. w18.01 pág. 16 párr. 15

Jesusajj alajjpachanwa ‘wiñayans wiñayapataki jakaski’ (Apoc. 1:5, 18; Rom. 6:9; Col. 1:18; 1 Ped. 3:18). Jupat jan jitheqtiri apostolonakaparojj ‘nayamp chikaw apnaqanipjjäta’ sasaw säna (Luc. 22:28-30). Apóstol Pablojj niya ukar uñtasitwa akham sarakïna: “Cristojj jiwatanak taypit jaktayatäjjewa, jupajj khitinakatï jiwañan iktʼjjapjje ukanakat nayrïr achuwa” sasa. Ukatjja Jesusjamarakiw yaqhepajj alajjpachan jakañataki jaktayatäpjjani sasaw Pablojj sarakïna. Ukatsti akham sarakïnwa: “Sapa mayniw horasapar jaktani: Cristow nayrïr achojja, ukjjarusti khitinakatï Cristonkapki ukanakaw jaktanipjjani, jupajj kuttʼankani uka tiempona” sasa (1 Cor. 15:20, 23). Jehová Diosan Testigonakapajja, walja maranak nayraw ‘Jesusan kuttʼaniñap tiempojj’ 1914 maran qalltatap Bibliampi qhanañchtanjja. Jichhas uka tiemponwa jakasktanjja, akapachan tukusiñapas wali jakʼankjjarakiwa. w17.12 pág. 10 párr. 11; pág. 11 párrs. 14-16

“Wali munasiñampi khuyaptʼayasiri” Diosan munat servirinakapajj ukhamarakiw jiwapjje, jupanakat yaqhepajj Abrahán, Isaac, Jacob, Moisés, David jupanakawa (Núm. 12:6-8; Mat. 22:31, 32; Hech. 13:22). Jehová Diosajj jupanakar jaktayañ uru puriniñap wal suyaski sasaw Bibliajj qhanañchi (Job 14:14, 15). Uka uru purinini ukhajja, jaktanirinakajj wali kusisitaw jakasipjjani, janirakiw mayamps usuntjjapjjaniti. Amtañäni, Jehová Diosajj Yoqapar kunjamsa jiwayapjjäna uksa uñjarakïnwa, juparojj walpun munasïna (Prov. 8:22, 30, NM). Kunja llakitäpachänsa uk janiw amuyksnati (Juan 5:20; 10:17). Jehová Diosaw yanaptʼitani sasaw taqe chuyma confiyañasa. Ukhamajj llakinakas Juparuw yatiyañasa. Kunja llakitätansa uk Jupajj sum yati ukat chuymachtʼarakistuwa, uk yatiñajj walpun chʼamañchistu (2 Cor. 1:3, 4). w17.07 pág. 13 párrs. 3-5

Jichhürunakanjja waranq waranqa jaqenakajj taqe chuymaw wali valorani utjirinakapampejj Diosar adorasiñapatak yanap).tʼasipki, mä arunjja tiempopampi, qollqempi, chʼamapampi, yaqha ukhamanakampiw yanaptʼapjje (Prov. 3:9). Jehová Diosajj kuntï jupar serviñatak lurktan ukanaksa Jupar munasktan uksa janiw armaskaniti. Aka qhepa urunakanjja, Diosar cheqaparjam adorañatakejj walpun servirinakapajj chʼamachasiwayapjje. Ukham lurapjjatapatjja, Diosajj jupanakar bendisitapa, Cristojj jupanakar pʼeqtʼatapwa uñachtʼayi. Diosan markapajj suma uttʼayatawa, jan walinakatsa jarkʼaqatawa, wiñayatakirakiwa, jiwasajj uka markanktanwa. Ukhamajja, Diosan markapan kuna lurañanïktantï uk taqe chuyma phoqapjjañäni, Jehová Diosan ‘arupsa istʼarakiñäni’ (Zac. 6:15). Ukhamtï lurañänejja, Reyïki, Jilïr Sacerdotëkaraki jupajj jarkʼaqestaniwa. Jehová Diosar cheqaparjama adorañatak taqe chuyma chʼamachasipjjañäni. Ukhamatwa, ejercitonakan Jehová Diosapajj aka qhepa urunakansa wiñayan wiñayapatakis jan walinakat jarkʼaqestani. w17.10 pág. 30 párrs. 18, 19

Walja qollqe ganañ amtampi negocio lurañanakasa, politicasa, religionanakas Supayan apnaqatäpjjewa, ukanakajj jutïrin qʼalaw aynachtʼapjjani. Qorisa qollqes jichhürunakan wali valoraniwa, ukampis jutïrinjja janiw ukhamäjjaniti sasaw Ezequiel, Sofonías profetanakajj qellqapjjäna (Ezeq. 7:19; Sof. 1:18). Amuytʼañataki, jiwasatï Diosat armtʼasisa, “akapachan kunatï valoranïki” ukanak wal imkatsna, ukampis jiwañas yatissna ukhajja, ¿kunjamakis jikjjatassna? Kunjamtï mä jaqejj mara mara trabajit qollqep falsokamakïtap amuyasi ukhamäspawa (Prov. 18:11). Akapachan kunatï valoranïki ukanakajj tukusirikiwa. Ukhamajj kunanakatï utjkistu ukanakjja, Jehová Diosampina Jesusampin amigopäñatakiw apnaqañasa. Kunanaktï Diosan Reinopar yanaptʼañatak lurkañäni ukanakajja, Jehová Diosan amigopäñatakiw yanaptʼistani. w17.07 pág. 11 párr. 16

Yaqhep cristianonakajja, jan phenqʼachayasiñ layku, jan ukajj yaqhanakar jan chuym ustʼayañ laykuw jachʼa juchanakap imtʼapjje (Prov. 28:13). Ukham lurasajj jan munasirïpjjatapwa uñachtʼayapjje, jupatakisa yaqhanakatakisa juch imtʼañajj jan walipuniwa. Congregacionajj janiw espíritu santon yanaptʼap katoqjjaspati, sumankañas janirakiw utj-jjaspati (Efes. 4:30). Jachʼa juch luriritï cheqpach munasirïchi ukhajja, jilïr irpirinakampiw uka juchapat parltʼañapa, ukhamatwa juparojj yanaptʼapjjani (Sant. 5:14, 15). Taqe kunat sipansa munasiñaw jilanki (1 Cor. 13:13). Maynit maynikam munasiñäni ukhakiw jaqenakajj Jesusan cheqpach arkiripätas yatipjjani, wali munasiri Jehová Diosat yateqasis sarnaqerïtassa yatipjjarakiniwa. Apóstol Pablojja, ‘munasiñatï nayan jan utjkaspa ukhajj janiw kunäkiristsa’ sasaw qellqäna (1 Cor. 13:2). Ukhamasti, munasiñasajj jan ‘arukïpati’, jan ukasti cheqpach munasitasjja ‘luratanakasampi’ uñachtʼayapjjañäni (1 Juan 3:18). w17.10 pág. 11 párrs. 17, 18

José waynat amtañäni, Potifaran warmipajj jupampi ikintasiñ munäna ukhajja, jan ajjsartʼasaw janiw säna. Ukham sasajj kuna jan walinakansa uñjasispäna uk sum yatïna, ukhamäkchïnsa, ukaratpachaw jan pächasisa janiw säna (Gén. 39:10, 12). Jericó markan jakaskäna uka Rahab warmitwa jan ajjsarirïñ yateqasiraksna. Pä israelitanakajj Jericó marka uñaqer sarapkäna ukhajja, uka chachanakar imantänwa, escapapjjañapatakis yanaptʼarakïnwa (Jos. 2:4, 5, 9, 12-16). Jesusajj kunjamsa jan ajjsarasa kuns luräna ukanak uñjasaw Jesusan apostolonakapajj yateqasipjjäna. Mä kutejja religión pʼeqtʼiri saduceonakajj janiw Jesusat yatichapjjätati sasaw apostolonakar sapjjäna, uk satajj yatiyasipkakïnwa (Hech. 5:17, 18, 27-29). José, Rahab, Jesús ukat apostolonakasa, kunatï cheqapäki uk lurañwa amtapjjäna. ¿Kunas jupanakar jan ajjsarirïñatak yanaptʼäna? Jupanak pachparuk confiyañat sipansa, Jehová Diosaruw confiyapjjäna ukaw yanaptʼäna. Ukhamajj jan ajjsarirïña wakiskani ukhajja, Jehová Diosaru confiyapjjañäni, janipun jiwas pachpar confiyasipjjañäniti (2 Tim. 1:7). w17.09 pág. 29 párrs. 6-9

Nayrajj kunjam jaqëkayätantï ukjja, janiw chʼamasampikejj apanuksnati. Yaqhepanakajja, nayrajj kunjam jaqëpkäntï uk apanukuñatakejj wal chʼamachasipjjäna. ¿Kunas jupanakar yanaptʼawayi? Diosan Arupampi espíritu santompiw yanaptʼawayi (Luc. 11:13; Heb. 4:12). Jiwasatï Biblia sapüru liyiñäni, ukanakat lupʼiñäni, ukarjam sarnaqañatakis chʼama, yatiñanïña Jehová Diosar sapa kuti mayisiñäni ukhajja, ukhamarakiw espíritu santojj yanaptʼistani (Jos. 1:8; Sal. 119:97; 1 Tes. 5:17). Tantachäwinakatak wakichtʼasiñäni, ukarus jan faltasis sararakiñäni ukhajja, Diosan Arupasa espíritu santosa yanaptʼarakistaniwa (Heb. 10:24, 25). Diosan markapanjja revistanaka, JW Broadcasting, JW Library programa, internetankir jw.org cheqaw utjaraki, ukanakaw yanaptʼarakistaspa (Luc. 12:42). Jehová Diosampi suma jaqet uñjatäñatakejj janiw jan wali lurañanakak apanukuñasäkiti, jan ukasti, Diosajj churkistu uka machaq jaqëñampiw wiñayatak isthapisiñasa (Col. 3:10). w17.08 pág. 21 párrs. 16, 17

David reyejj jan walinakanwa uñjasïna. Wawäkäna ukhas Israel markan reyïñapatak Diosajj ajllkchïnjja, 15 maranakaw tribupjjaru reyjam apnaqañatakejj suyañapäna (2 Sam. 2:3, 4). Suyaskäna uka maranakanjja, Saúl reyiw jiwayañ munäna, ukatwa markapat yaqha cheqanakar sarjjäna. Awisajja, wasaranwa qollu pʼiyanakan jakirïna. Tiempompejj mä guerransa Saúl reyejj jiwjjchïnjja, Israel markpacha apnaqañatakejj paqallqo maranakampwa Davidajj suyañapäna (2 Sam. 5:4, 5). ¿Kunatsa Davidajj pacienciampi suytʼäna? Jehová Diosajj wal munasitu, janirakiw jaytkitaniti sasaw Davidajj taqe chuyma confiyäna. Diosaw jan waltʼäwinakaj askichjjani sasaw suytʼäna. Nayrajj kunjamsa Jehová Diosajj yanaptʼatayna ukanaksa amtarakpachänwa, ukatwa Diosar pacienciampi suytʼäna (Sal. 13:6). w17.08 pág. 6 párrs. 14, 15

Tiempompejja, arunakajj mayjtʼjjewa. Yaqhep arunakajja, nayrajj kuntï sañ munkäna ukajj janiw jichha tiempon amuyasjjaspati. Bibliajj hebreo, griego arunakat qellqaskäna uka arunakampejj ukhamarakiwa. Sañäni, jichha tiempon hebreo, griego parliri jaqenakajja, janiw nayra tiemponjam parljjapjjeti. Ukatwa Diosan Arupa amuyañ munirinakajj hebreo, griego arunak parlapkchi ukasa, jichha tiempon parlasi ukarjam traducit Biblia munapjje. Yaqhepajja, nayrajj kunjamtï hebreo, griego arunakajj parlaskän uk yateqasaw Biblia liyisajj sum amuyirista sasaw sapjje, ukampis janiw ukhamapunïkaspati. Jichha, tiemponjja, Bibliajj taqpachasa jan ukajj chikatakisa, niya 3.000 arunakar traducitaw utj-jje, ukatwa wal yuspärtanjja. Cheqas Jehová Diosajja, ‘taqe markankirinaka, tribunaka, kunayman parlani jaqenaka’ Bibliat yatjjatapjjañapwa muni (Apoc. 14:6). Taqe ukanakaw wali munasiri jan yaqhachasir Jehová Diosar jukʼamp jakʼachasiñatak yanaptʼistu. w17.09 pág. 19 párr. 4

Inas familiasat maynejj congregacionat jaqsutächi. Ukhamächi ukhajja, janiw munañasampi apnaqayasiñasäkiti, jupampejj wakiski ukhakiw parlañasa. Uk lurañajj chʼamakïspawa, ukampis ak amtañasawa: Jehová Diosat yateqasisaw uk lurasktanjja, Jupajj uk lurañaswa muni. David reyitwa yateqasiraksna. Saúl chachasa, Simeí chachasa jan wal lurapkäna ukhajja, janiw Davidajj coleraskänti, ni reyïtap laykus jupanakar jan wal lurkänti (1 Sam. 26:9-11; 2 Sam. 16:5-10). Ukampis mä kutejja, Davidajj munañapamp apnaqayasisaw Betsabé (Bat-seba) warmimpi qʼañu jucha luräna, Nabal chachatakis wal colerasïna (1 Sam. 25:10-13; 2 Sam. 11:2-4). ¿Kunsa David chachat yateqsna? Maya, Diosan markapan pʼeqtʼapki uka jilïr irpirinakajja, janiw munañaparjamak kuns lurapjjañapäkiti, jan ukasti munasiñampiw jilat kullakanakar uñjapjjañapa. Paya, janiw kuna jucharus purtʼaskäti sasajj janiw khitis amuyañapäkiti (1 Cor. 10:12). w17.09 págs. 5, 6 párrs. 12, 13