Diciembre

Bibliajj qellqaskäna uka tiemponakan jakiri jaqenakajja, sumankañataki, jan ukajj amigopäñatakiw utapar manqtʼasiñatak invittʼapjjerïna (Gén. 18:1-8; Juec. 13:15; Luc. 24:28-30). ¿Jiwasajj khitinakarus utasar invittʼañasa? Congregacionasankir jilat kullakanakaruw invittʼañasa. Aka jan wali pachan tukusiñapajj wali jakʼankjjepanjja, jilat kullakanakasampejj jukʼamp sumwa apasiñasa, ukhamatwa maynit maynikam yanaptʼasiñäni. Tamanak tumptʼir jilatanakasa, Diosan markapan utjki uka escuelanakar saririnakasa, Tantachasiñ Utanak lurapki ukanakas alojtʼatäñwa munapjjaspa. Maysa toqetjja, jan waltʼäwinak utjipan jan utani uñjasipki uka jilat kullakanakajj ukhamarakiw utap lurasiñapkamajj alojamiento munapjjaraki. Jachʼa utaninakaw alojtʼapjjaspa sasajj janiw amuyañasäkiti. Jupanakajj inas walja kuti utapar aloj-jjapjjchi. ¿Janit jiwasajj utasar alojtʼañatak chʼamachasksna? Ukatakejj janiw jachʼa utanïñasa ni suma utanïñapunis wakiskiti. w18.03 pág. 15 párrs. 6, 9

¿Kunas ukatak yanaptʼistu? Diosaw chʼamapampejj yanaptʼistu, janiw chʼamasampikejj puedksnati (Filip. 4:13). Espíritu santon achupat mayajja, munañasampi jan apayasiñawa, jiwas pachpa cheqañchasiñajj ukar uñtasitarakiwa. Jiwas pachpa cheqañchasiñ yateqañatakejja, orasiñasawa, Biblia liyiñasawa, liyktan ukanakat lupʼiñasarakiwa. Ukampis Biblia liyiña jiwasatak chʼamächi, jan ukajj liyiñ jan gustkchistu ukhajja, ¿kunsa lursna? Chʼamachasiskakiñasawa. Jehová Diosampi yanaptʼayasiñäni ukhajja, Jupaw arunakap yatjjatañ munañatakejj yanaptʼistani (1 Ped. 2:2). Nayraqatajja, ‘Bibliat yatjjatañ munañajatak yanaptʼita’ sasaw mayisiñasa. Ukjjarusti, mayisitasarjam lurañatakiw chʼamachasiñasa. Qalltanjja, inas jukʼak yatjjatsna. Ukat jukʼat jukʼatwa Bibliat yatjjatañajj jan chʼamäjjaniti, gustjjarakistaniwa. Jehová Diosajj kunsa amuyi ukanakat lupʼiñataki tiempo apsusisajja, kusisitäñäniwa (1 Tim. 4:15). w18.03 pág. 29 párrs. 5, 6

Bibliat yateqerinakajj janïr bautisaskasajja, Diosan amtapajj kunasa, kunsa jiwasanak layku lurawayi ukanakwa nayraqat yatjjatapjjañapa (1 Tim. 2:3-6). Ukanakaw Jehová Diosar jukʼampi confiyañatakisa, leyinakapar istʼañatakis yanaptʼani. Ukhamatwa kunanaktï Diosajj uñiski ukanak uñisipjjarakini (Hech. 3:19). Cheqas uk lurapjjañapajj wali wakiskiriwa, jupanakatï jan walinak lurasipkakispa ukhajja, Diosar jakäwip katuyasitapajj inamayakïspawa, Jehová Diosajj jan walitwa uñjaspa (1 Cor. 6:9, 10). Ukatjja, tantachäwinakarusa predikirisa sarapjjañapapuniwa, Bibliatsa jaqenakar yatichapjjañaparakiwa (Hech. 1:8). Taqe uka mayitanak phoqasajja, Jehová Diosar jakäwip katuyasiñatakejj sapapakiw orasiñapa, ukatsti taqen uñjkataw bautisasiñapa. w18.03 pág. 6 párr. 12

¿Kunatsa Jehová Diosajj Jesusan taykapäñapatak Mariar ajllïna? Espíritu santompi irpayasitap laykuw ajllïna. Kunapachatï Zacarías, Elisabet familiaranakapar visittʼir saräna ukhajja, suma cantonakampiw Jehová Diosar jachʼañchäna (Luc. 1:46-55). Kuntï siskäna ukajja, Diosan Arupar wal munasitap ukhamarak Hebreo Arut Qellqatanak sum uñtʼatapwa uñachtʼayi (Gén. 30:13; 1 Sam. 2:1-10; Mal. 3:12). Joseampi casaraskäna ukhajja, Jesusan nasiñapkamajj janiw chacha warmjam ikthapipkänti. Jupanakatakejja, munañapampi apayasiñat sipansa, Diosan amtap phoqañaw nayrankäna (Mat. 1:25). Jesusajj kunanaktï lurkäna, kuntï siskäna, Jehová Diosajj Mesías toqet kunanaktï siskäna taqe ukanakwa Mariajj sum amuyäna. Jiwasajja, kunjamatsa Mariat yateqassna uk lupʼiñasawa, ukatsti Diosan amtap phoqañatakiw chʼamachasiñasa. w18.02 pág. 21 párr. 11

¿Kunjamsa Job chachjam Diosar taqe chuym confiysna, istʼaraksna? Walinsa jan walinsa uñjaskchiñänejja, Jehová Diosar serviñaw jakäwisan nayrankañapa. Taqe chuymaw Jupar confiyañasa, istʼañasaraki. Ukham lurañatakejj walja razonanakaw utjistu. Jiwasajj Job chachat sipansa, khitis Supayajja, kuna jan walinakampis yantʼistu uk sum yattanjja (2 Cor. 2:11). Kunatsa Diosajj jan walinak jan chhaqtayki ukjja, Bibliankir Job librow sum qhanañchistu. Danielan profeciapatjja, Diosan Reinopajj oraqpachankir mä gobiernötapa, Jesusan amparapankatapsa sum yatiraktanjja (Dan. 7:13, 14). Uka Reinorakiw taqe jan walinak wiñayatak chhaqtayani, uksa sum yatiraktanjja. Job chachan sarnaqäwipajja, tʼaqesipki uka jilat kullakanakasat sinttʼasirïñ yatichistu. Awisajja, Job chachjamaw jan sum amuytʼasis parlapjjarakispa (Ecl. 7:7). Cheqas juchañchañat sipansa, kunatsa ukham sapjje uk amuyañatakiw chʼamachasiñasa. Ukhamatwa khuyapayasir Jehová Dios Awkisat yateqasiñäni (Sal. 103:8). w18.02 pág. 6 párr. 16; pág. 7 párrs. 19, 20

Yaqhepanakajja, suma uñnaqtʼanisa, wali uñtʼatäsa, música tocañ sum yatisa, jan ukajj chʼamanïsa, mayninakan jachʼañchatätap laykuw jachʼa jachʼa tukjjapjje. David chachajj ukhamäkchïnsa, janiw jachʼa jachʼa tukurïkänti, wali humildënwa. Amuytʼañäni, Goliatar jiwaykäna ukhajja, Saúl reyejj phuchajampejj casarasismawa sasaw säna. Ukampis Davidajj akham sänwa: “Janiw nayajj khitïktsa, [...] nayajj reyin tollqapäñajjatakejja” sasa (1 Sam. 18:18). Jichhürunakanjja, Jehová Diosan servirinakapajj David chachjam humildëñatakiw chʼamachasiraktanjja. Jehová Diosajj Taqe Kunjjar Munañani Diosäkchisa, wali humildewa, ukajj wal musparayistu. Diosan aka ewjjtʼaparuw taqe chuyma istʼtanjja, Jupajj akham sistuwa: “Ukhamajj chuymatpach sinttʼasiñampi, suma chuymanïñampi, humilde chuymanïñampi, llampʼu chuymanïñampi, paciencia chuymanïñampi isthapisipjjam” sasa (Col. 3:12). Ukampis munasir jaqejj “janiw jachʼa jachʼa tukurïkiti, janiw wali wal tukurïkiti” uksa yatiraktanwa (1 Cor. 13:4). Jiwasatï humildëñäni ukhajja, jaqenakajj uk uñjasajj Diosar uñtʼañ munapjjarakispawa. w18.01 pág. 28 párrs. 6, 7

Kun lurañatakis yanaptʼajj munasispawa (Hech. 4:34, 35; 1 Cor. 16:2). Inas congregacionasan Tantachasiñ Uta luraña amtasipkchi. Inas mä jachʼa tantachäwitaki, jan ukajj jan waltʼäwinakan uñjasipki uka jilat kullakanakar yanaptʼañatak qollqew munasi sasin yatiyapjjchistu. Qollqempi yanaptʼatasajja, misioneronakaru, precursor especialanakaru, tamanak tumptʼirinakaru, sucursalan trabajipki uka jilat kullakanakaru, Warwick, Nueva York markan Betel utan trabajir jilat kullakanakar yanaptʼañatakejj wali wakiskiriwa. Jehová Diosan markapajj aka qhepa urunakan kuntï luraski ukarojj taqeniw yanaptʼsna. Qollqempi yanaptʼaski ukanakat jila partejja janiw khitirus yatiyaskiti. Tantachasiñ Utan utjki uka cajar uchasasa, Internetan jw.org toqnam apayasas janirakiw khitirus yatiyktanti. Jukʼa qollqempiki yanaptʼasajj inas janis kunäkaspa ukham amuystan. Cheqas Diosan markapan qollqe utjki ukanakat jila partejja, jukʼa qollqempi yanaptʼaski ukawa, janiw mä qhawqhanin walja qollqe churapki ukakïkiti. w18.01 pág. 19 párrs. 10, 11

Salvatäñatakejja, mä cristianojj bautisatäñapaw wakisi (Mat. 28:19, 20). Bautisasitamajj Jehová Diosar katuyasitamwa uñachtʼayi, mä arunjja, taqe kunat sipansa Diosar munasiña, munañap nayrar uchañwa arsuwaytajja. Jehová Diosan amparapar katuyasiñajj wali wakiskiriwa. Cheqas janiw ukat sipan yaqha suma luräwejj utjkiti. Jehová Diosar jan sirvkasmajja, Supayan amparapankasmawa. Jupajj janiw salvasiñam munkiti, jan ukasti Diosan Reinop contra saytʼasiñama, wiñay jakañ aptʼasiñamwa wal muni. Jehová Diosar jakañ vidam katuyasisa bautisasitamat kuna bendicionanaksa katoqawayta ukanak amuytʼañamawa. Jupar katuyatäjjasajj taqe chuymaw akham sasma: “[Jehová] Tatitojj nayampïskiwa: janiw ajjsarayaskäti; ¿kamacharakitan jaqesti?” sasa (Sal. 118:6). Cheqas Jehová Dios toqet saytʼasiña, jupampi suma uñjatäñaw taqe kunat sipansa wali wakiskirejja. w17.12 págs. 23, 24 párrs. 1-3

Awisajj kuntï mayninakajj sapki, lurapki ukajj jan waltʼayistaspawa, jan ukajj jiwasaw mayninakar jan waltʼaysna. Ukhamanakan uñjasiñajj chʼamakïspawa. Ukampis Jehová Diosajj jupat jan jitheqtas serviñaswa muni. ¿Kunjamsa uk lursna? Jilat kullakanakampi juntuki Diosar servisa. Pantjasirïpkchisa, Diosajj jupanakar munasiwa, jiwasajj ukhamarakiw munasiñasa. Jehová Diosajj servirinakaparojj janiw jan walinakat jarkʼaqkapuniti, ukwa José chachan sarnaqäwipat yateqsna. Waynäskän ukhajja Egiptoruw apapjjäna, jilanakapaw uñisiñata mä esclavjam aljapjjäna (Gén. 37:28). Diosajj jupar jan jitheqtas serviri José chachar tʼaqesir uñjasajja, wal sinttʼaspachäna. Ukampis janiw ukanakat jarkʼaqkänti. Uka qhepatjja Potifar chachan warmiparus violañ munkaspa ukhamwa kʼarintapjjarakïna, ukhasa Diosajj janiw jarkʼaqkarakïnti. Ukhamajj ¿Diosajj Josearojj jaytanukpachänti? Janiwa, Bibliajj akham siwa: “Tatitusti jupampïskarakïnwa, taqe kunas Joseatakejj walikïskarakïnwa” sasa (Gén. 39:21-23). w18.01 págs. 9, 10 párrs. 12-14

‘¿Jumajj kunanakarus creyta?’ sasin jisktʼapjjestaspa ukhajja, ‘Jehová Diosaw taqe kuns lurawayi, Juparakiw jakañ vidsa churistu. Jesucristow juchanakas layku jiwawayi’ sasaw qhanañchtʼsna. Jutïrinsa, wiñayatakiw mä Paraison jakasiñäni sasin inas saraksna. Ukampis jiwatanakajj jaktanipjjaniwa sasin ¿saraksnati? Jiwasatï wali tʼaqesiñ tiempo jakkir pasañ suyaskstan, Paraison wiñayataki jakañ suyaskstan ukhasa, jiwatat jaktañajj utjkani ukarojj taqe chuymaw creyta sasaw sissna. Jiwasatakejj ukar creyiñajj wali wakiskiriwa. Jesusatï jan jaktankaspänjja, janiw jichhajj mä reyïkaspänti, Reinopat yatiyañas inamayakïspänwa (1 Cor. 15:12-19). Ukampis Jesusan jiwatat jaktatapat janiw pächasktanti. Jiwatanakajj jaktanipjjaniwa sasaw taqe chuyma sapjjaraktanjja (Mar. 12:18; Hech. 4:2, 3; 17:32; 23:6-8). w17.12 pág. 8 párrs. 1, 2

Fariseonakajj jan khuyaptʼayasisaw jaqenakar juzgapjjerïna, juchachasirejj kunjam jaqesa uk uñjañat sipansa, kuna jan waltï lurkäna ukakwa uñjapjjerïna. Amuytʼañataki, Jesusarojj Mateon utapan manqʼaskir uñjasajja, fariseonakajj akhamwa discipulonakapar jisktʼapjjäna: “¿Kunatsa yatichirimajj impuesto cobririnakampi juchararanakampi manqʼe?” sasa. Uk istʼasasti Jesusajj akham sänwa: “Sano jaqenakatakejj janiw doctorajj munaskiti, jan ukasti khitinakatï usutäpki ukanakatakikiw munasi. Ukhamasti sarapjjam, kuntï Diosajj siskäna uka arunakajj kamsañsa muni uk yatjjatanipjjam, jupasti sänwa: ‘Nayajj jaqenakan khuyapayasirïñap munta, janiw sacrificionakap munkti’” sasa (Mat. 9:9-13). Uk sasajj ¿juchararanakatti Jesusajj arjjatasiskäna? Janiwa, arrepentisipjjañapwa munäna. Uka toqetwa yatiyarakirïna (Mat. 4:17). ‘Impuesto cobririnakata juchararanakat’ yaqhepajj arrepentisiñ munapjjatap Jesusajj amuyänwa. Jupanakajj janiw Mateon utapar manqʼeriki sarapkänti, jan ukasti jupanakat waljanejj Jesusan arkirinakapäpjjänwa (Mar. 2:15). Ukampis fariseonakajj janiw Jesusjam jaqenakar uñjapkänti. w17.11 pág. 13 párr. 2; pág. 16 párr. 15

Jehová Diosan markapankañajj mä suma bendicionawa. Tantachäwinakan Bibliat yatjjatañasa, maynit maynikam munasiñampi yanaptʼasiñasa, kuna premiotï jiwasatak utjki uk jan armañatakiw yanaptʼistu. Ukampis awisajja, jan walsa lurapkistaspa ukham amuyañaw utjaspa, ukhamatwa congregacionan jachjayasiñajj utjaspa. Uka jan waltʼayasiñanak jan askichksnajja, chuyma ustʼataw sarnaqsna (1 Ped. 3:8, 9). Chuyma ustʼata sarnaqañajj premio katoqañatwa jarkʼistaspa, ukar jan purtʼasiñatakejja, apóstol Pablojj akham sasaw ewjjtʼäna: “Jumanakajj Diosan ajllitanakapäpjjtawa, santöpjjtawa, jupan munatäpjjaraktawa, ukhamajj chuymatpach sinttʼasiñampi, suma chuymanïñampi, humilde chuymanïñampi, llampʼu chuymanïñampi, paciencia chuymanïñampi isthapisipjjam. Jumanak taypin kuna quejasiñas utjchi ukhasa, maynit maynikam aguantasisipkakim, jumanakkamajj taqe chuyma perdonasipjjarakim. Kunjamtï Jehová Diosajj taqe chuyma perdonapktamjja, ukhamarak jumanakajj perdonasipjjam” sasa (Col. 3:12, 13). w17.11 págs. 26, 27 párrs. 7, 8

Mä israelitatï jan munkasin maynir jiwayaspänjja, jankʼakiw imantasiñ markar escapjjañapäna, ukatsti marka mantañaru purisajj jilïrinakaruw kuntï lurki uk arsusiñapäna, jilïrinakasti sumwa katoqtʼapjjañaparakïna. Mä qhawqha tiempotjja kawkïr markantï jaqe jiwaykäna ukaruw apayapjjañapäna, ukhamat ukankir jilïrinak juzgapjjañapataki (Núm. 35:24, 25). Cheqapun jan munkasin jiwayatap yatisasti, imantaskäna uka markaruw kuttʼayjjapjjañapäna. ¿Kunatsa jaqe jiwayirejj jilïrinakampi parlañapäna? Jupanakaw Jehová Diosan khuyapayasiñap katoqañapatakisa, Israel markan qʼomäñapatakis yanaptʼapjjañapäna. Biblianakat yatjjatiri mä chachajj akham sänwa: ‘Jaqe jiwayiritï jilïrinakampi jan parlkaspänjja, jiwayataw uñjasispäna’ sasa. Imantasiñ markanakar jan escapkaspänjja, jiwirin mä familiarapaw jiwayaspäna. w17.11 pág. 9 párrs. 6, 7

Nayrajj kunjamatï servirinakapar jarkʼaqkänjja, ukhamarakiw Diosajj jichhürunakan angelanakapampi markapar jarkʼaqaski, chʼamañchaskaraki (Mal. 3:6; Heb. 1:7). Diosan Israelapajj 1919 maratwa Jachʼa Babiloniampi jan katuntatäjjeti. Ukhat aksarojj uñisirinakapan jan waltʼayañataki arknaqatpachasa, Diosan markapajj jiltaskakiwa (Apoc. 18:4). Angelanakaw jarkʼaqasipki, ukhamajja ‘Jachʼa Babiloniajj mayampiw Diosan markapar katuntani’ sasin janiw ajjsarañasäkiti (Sal. 34:7). Antisas taqe chuymaw Diosar kusisita serviskakiñasa. Diosan angelanakapaw yanaptʼistani. Wali tʼaqesiñ tiempojj qalltkani ukhajja, jupanakaw jarkʼaqapjjestani, Jehová Diosajj Taqe Kunjjar Munañanïki uka contra saytʼirinakarus tukjapjjarakiniwa (2 Tes. 1:7, 8). ¡Uka urojj wali kusiskañäniwa! w17.10 pág. 28 párrs. 10, 11

Familiasat maynejj congregacionat jaqsuyasi, jan ukajj jupa pachpa jitheqtañ amti ukhajj wali llakkañawa, mä cuchillompis chuymasar jununtkistaspa ukhamawa. ¿Kunsa ukhaman uñjasisajj lursna? Diosar serviñ nayrankañapatakejj chʼamachasiñasawa. Jehová Diosar taqe chuyma confiyaskakiñatakejj sapüruw Biblia liyiñasa, tantachäwinakatakis wakichtʼasiñasawa. Janirakiw tantachäwinakatsa faltasiñasäkiti, yatiyiris sarañasapuniwa, aguantaskakiñatakis Jehová Diosaruw yanaptʼa mayisiñasa (Jud. 21). Ukanak lurkasas llakisiskaksna ukhajj ¿kuns lursna? Jehová Diosar serviskakiñasawa, ukaw jan walinak jan lupʼiñatak yanaptʼistani, jan sinti llakisiñatakis yanaptʼistani. Salmo 73 qellqerirojj kunas pasäna uk amuytʼañäni. Jupajj jan walinakan uñjasisajj jan walinakwa amuyjjäna, walirak llakisjjäna. Ukampis Jehová Diosar jan jitheqtas serviskakiñaw ukham jan amuyjjañatak yanaptʼäna (Sal. 73:16, 17). Jiwasarojj ukham lurañaw yanaptʼarakistaspa. w17.10 pág. 16 párrs. 17, 18

Supayajj Edén jardinan Eva warmimpi parlkäna ukhajja, jupat llakiskaspas ukhamänwa. Ukampis kʼari chuymampiw uñisiñat parljjayaskäna (Gén. 3:4, 5). Ahitofel chachajj ukhamarakiw David reyir munaskaspas ukham tuktʼäna, ukampis Davidajj jan walin uñjasjjäna ukhajj jupa contraw saytʼjjäna (2 Sam. 15:31). Jichhürunakanjja, ukhamarakiw Diosan markap contra saytʼirinakasa, congregacionar tʼaqanoqtayañ munirinakas “mojjsa arunakampi” parlapjjaspa (Rom. 16:17, 18). Ukampis jupanakan munañap thaqasakiw ukham lurapjjaspa. Jaqe masisar engañjañataki munasirjam tuktʼañajj janipuniw walïkiti. Jaqenakarojj engañsnawa, ukampis Jehová Diosarojj janiw engañksnati. Jan suma jaqëkasin suma jaqer tuktʼirinakat parlkasajja, Jesusajj akham sänwa: “[Diosajj] wal jupar castigani” sasa (Mat. 24:51). Jehová Diosan servirinakapajj akham sasaw jisktʼasiñasa: “¿Jilat kullakanakarojj cheqapunit taqe chuyma munastjja?” sasa. w17.10 pág. 8 párrs. 6-8

Yatiykasajj Bibliat liytʼktan ukhajja, Jehová Diosarus parlayksna ukhamawa. Suma ajllit textojja, arunakasat sipansa jukʼampiw jaqenakan chuymapar purtʼaspa (1 Tes. 2:13). Ukatwa akham jisktʼasiñasa: “¿Diosan arunakap yatiykasajj Bibliat liytʼapuntti?” sasa. Jaqenakatakejj janiw aleqak liytʼarapiñasäkiti. Nayra tiemponakansa, jichha tiemponsa janiw taqenejj kuntï Bibliajj yatichki ukanak amuyapkiti. Jaqenakatak Biblia liytʼarapktan ukhajja, entiendpachaw sasakejj janiw amuyañasäkiti. Jan ukasti, kunanaktï qhanstañap munktan ukanak amuyañapatakejj mayamp mayampwa sañasa, kamsañsa muni uksa qhanañchañasarakiwa. Ukhamatwa kuntï yatichktan ukajj pʼeqeparusa chuymaparus purtʼani (Luc. 24:32). w17.09 pág. 25 párrs. 7, 8

Cristianonakajj jaqe masisatsa jilat kullakanakatsa sinttʼassna ukwa Jehová Diosajj muni (Juan 13:34, 35). Sinttʼasirïñajja, “maynimp chika tʼaqesiña” sañwa muni. Sinttʼasir jaqejj tʼaqesipki ukanakar yanaptʼañatakiw chʼamachasi. Ukhamasti, kunjamsa yaqhanakar yanaptʼsna uk amuytʼañasawa. Terremotonaka, jan ukajj yaqha ukham jan walinak utjki ukhajja, jilat kullakanakajj jankʼakiw sinttʼasiñat yanaptʼapjje. Jehová Diosan servirinakapajj ukham yanaptʼasirit uñtʼatäpjjewa (1 Ped. 2:17). Japón markankir mä kullakat parltʼañäni, jakaskäna uka cheqajja terremotompi umampi qʼala tukjataw 2011 maran uñjasïna. Japón markatsa yaqha markanakatsa waljaniw utanaka, Tantachasiñ Utanak askichañatakejj yanaptʼir sarapjjäna, ukaw kullakarojj wal chʼamañchtʼäna chuymachtʼarakïna. Jupajj akham siwa: “Uk uñjañajja, Jehová Diosajj wali munasirïtapa, Testigonakajj maynit maynikam yanaptʼasirïpjjatapa, jilat kullakanakas oraqpachan orasipkatapa amuyañatakiw yanaptʼitu” sasa. w17.09 pág. 11 párrs. 12, 13

¿Kunatsa munañasampi jan apnaqayasiñatakejj chʼamachasiñasa? Uk pä toqet uñjañäni. Maya, munañapampi jan apnaqayasirinakajja janiw sinti jan walinakan uñjasipkiti, jaqe masipampis sumakiw apasipjje, janirakiw jankʼakis colerasipkiti, ni sinti llakisiñarus puripkarakiti. Paya, Diosan amigopäñ munstan ukhajja, yantʼanakar saykatañasawa, janirakiw jan wali munañanakasampis apnaqayasiñasäkiti. Adanampi Evampejj munañapampi apnaqayasisaw juchar purtʼasipjjäna (Gén. 3:6). Jichhürunakansa jaqenakajj munañapampi apnaqayasisaw kunayman jan walinakan uñjasipjje. Jaqenakatakejja, munañanakampi jan apnaqayasiñajj chʼamakïspawa. Jehová Diosajj uk sum yati, ukatwa jan wali munañanakasar atipañatakejj yanaptʼañ munistu (1 Rey. 8:46-50). w17.09 pág. 4 párrs. 3, 4

Sudáfrica markanjja, kunayman kast jañchini jaqenak tantachasipjjañapajj autoridadanakan jarkʼatänwa. Ukampis domingo 18 de diciembre, 2011 maranjja, 78.000 Testigonakaw kunayman kast jañchini tantachasipjjäna, jupanakajj Sudáfrica markata ukhamarak uka jakʼankir yaqha markanakat jutapjjäna. Johannesburgo markan utjkäna uka estadionwa Diosan arunakap istʼañatakejj tantachasipjjäna, ukajj wali phoqapunïnwa. Estadio uñjiri mä chachajj akham sänwa: “Janipuniw ukham suma jaqenak waljan tantachtʼat uñjirïkti. Taqeniw suma isthaptʼatäpjje, tantachasipki uka lugarsa wali qʼoma jaytawayapjje. Janiw yaqha kasta jaqëtaw sasin uñchʼukisiñanakajj utjkiti, ukaw jukʼamp musparayitu” sasa. Jehová Diosan jan Testigopäpki ukanakaw jiwasat ukham sum parlapjje, ukaw Diosan markapajj mayni organizacionanakat sipansa mayjätap uñachtʼayi (1 Ped. 5:9). ¿Kunatsa Diosan markapajj mayninakat sipan mayjätanjja? Espíritu santompi Bibliampi yanaptʼatäsajja, ‘nayrajj kunjam jaqëkayätantï’ ukanak apanukusin ‘machaq jaqëñampi isthapisiñatakiw’ chʼamachastanjja (Col. 3:9). w17.08 págs. 17, 18 párrs. 2, 3

Bibliarjamajja, espíritu santow paciencianïñatakejj yanaptʼistu. Diosan jan uka yanaptʼapampejja, paciencianïñajj wali chʼamäspawa. Cheqas paciencianïñajj Diosan regalopawa, ukham jaqësaw Jupar munasitassa jaqe masisar munasitassa uñachtʼaytanjja. Ukampis jan paciencianïksna ukhajj janiw maynit maynikam munasiñajj utj-jjaspati (1 Cor. 13:4; Gál. 5:22). Cristianjam sum sarnaqañatakejja, paciencianïñajj wali wakiskiriwa. Sañäni, ukaw jan walinakan aguantañatakisa, jan walinakaru kusisit chuymampi saykatañatakis yanaptʼistani (Col. 1:11; Sant. 1:3, 4). Ukatjja, jan walinak luratajj jan ukhamat ukham kuttʼayañatakiw yanaptʼarakistani, kunayman jan waltʼäwinakan uñjaskasas janipuniw Jehová Diosat jitheqtkañäniti. Maysa toqetjja, suytʼañajj kunja wakiskirisa uk yateqañasatakiw Bibliajj ewjjtʼistu, ukwa Santiago 5:7, 8 textot yateqtanjja. w17.08 pág. 4 párr. 4

Wayn tawaqo, kunapachatï maynejj kawkirus viajiñ muni ukhajja, nayraqatajj kawkirus sarani ukwa amtañapa ¿janicha? Jakañajj mä viajimpi sasirakiwa. Kawkirus maynejj sarani ukjja, waynäkasaw amtjjañapa. Cheqas kuns lurañäni uk amtañajj chʼamakïspawa. Jehová Diosajja, jutïrin kuns luräta uk sum amuytʼasis amtañamatakiw chʼamañchtamjja. Kuntï jichhürutak ajllita textojj siski Jehová Diosan uka arunakapat amtasim (Ecl. 12:1; Mat. 6:20). Kusisit jakasisma ukwa Jupajj munaraki. Ukjja, kuntï jupajj lurawayki ukanak uñjasa, istʼasa, manqtʼasaw yatisma. Jehová Diosajj kunjamsa uñjistu, yaticharakistu ukanakatsa amuytʼarakismawa. Khitinakatï ewjjanakapar jan istʼapki ukanakarojj akham siwa: “Kuntejj nayarojj jan munaskitu ukwa ajllipjjaraktajja” sasa. Ukatjja akham sarakiwa: “Servirinakajjajj [...] kusisitäpjjaniwa, ukampis jumanakajj mä pʼenqa jiskʼachjataw uñjasipjjäta; jupanakajj kusisiñatsa qʼochusipjjaniwa, chuymanakapan kusisiñajj utjatap layku” sasa (Is. 65:12-14). Kuntï jutïrin lurkañäni uk sum amuytʼasis amttan ukhajja, Jehová Diosaruw jachʼañchtanjja (Prov. 27:11). w17.07 pág. 22 párrs. 1, 2

Niyakejjay Jehová Diosajj sapa warawarajj kawkjankisa uk sum yatchejja, jiwasat sapa maynejj kawkinkasktansa, kunjamäsktansa, kunsa sapa maynejj muntan ukanak sum yatiraki. Sapa maynejj kuna llakinakans uñjastan uk Jehová Diosajj sum yati, yanaptʼañatakis chʼamanirakiwa (Sal. 147:5). Awisajj mä jan waltʼäwin uñjasisajj sinti jan walipunïkaspas ukham inas amuysna, janis aguantañjamäjjaspa ukham amuyaraksna. Ukampis qhawqhakamas aguantsna uk Diosajj sum yati, ‘ñeqʼet luratätassa yatirakiwa’ (Sal. 103:14). Pantjasirïtas laykojj sapa kutiw pachpa juchar purtʼastanjja. Awisajja, taqeniw kun arsutasatsa, envidiasitasatsa, jan walinak lurañ munatasatsa qhepatak amtastanjja. Jehová Diosajj janis jiwasjam pantjasirïkchejja, chuymasan kunjamäsktansa uk sum yati (Is. 40:28). Jehová Diosajj kunjamsa jan waltʼäwinakar atipjañatak yanaptʼistu uk uñjpachätanwa (Is. 41:10, 13). w17.07 pág. 18 párrs. 6-8

Sri Lanka markat sarjjasin yaqha markan jakasir jilatat parltʼañäni. Jupajj markapanjja, utani oraqeni ukhamawa. Jilat kullakanakajj utapanwa tantachasipjje, jachʼa tantachäwinaksa apapjjaraki, Diosar precursorat servir jilat kullakanakas ukanwa alojtʼasipjjaraki. Jilatajj qollqepsa gastkchejja, jukʼa qollqenïpki uka jilat kullakanakarojj ukhamatwa yanaptʼi. Diosan arunakap yatiyañajj jarkʼatäki uka markanakanjja, jilat kullakanakajj utanakapanwa tantachasipjje. Ukhamatwa jukʼa qollqen precursoranakasa jilat kullakanakas alquiler jan pagasaki tantachasipjje. Mä kullakajja, Diosan Reinopat yatiyasiñapatakejj walja maranakaw qollqemp yanaptʼi, ukham lurasajj walja bendicionanakwa katoqawayi. Jupajj akham siwa: “Jaqe masijar jukʼamp yanaptʼañatak chʼamachasta ukhajja, jukʼampiw perdonañ yateqta. Paciencianïñatakisa, chuym jan ustʼayasiñatakisa, ewjjanak katoqasiñatakis yanaptʼarakituwa” sasa. w17.07 pág. 9 párrs. 9, 10

Kunjamsa tʼaqesïna ukwa Job chachajj amtpachäna. Khitis ukham tʼaqesiyäna uk sumsa jupajj amuyjjchïnjja, inas kunatsa ukham tʼaqesiñajajj wakispachäna sasin jisktʼaschïna. Ukampis Jehová Diosan arunakap amtañaw yanaptʼpachäna. Ukarakiw chuymachtʼpachäna, kunas jukʼamp wakiskiri uk amtañatakis yanaptʼarakpachäna (Sal. 94:19). Job chachan experienciapat amuytʼañajj yanaptʼistuwa, jan wali amuyunakasa cheqañchañatakis yanaptʼarakistuwa. Job librojj Bibliankir mayni libronakjamarakiwa, “jiwasar yatichañatakiw qellqasiwayi, ukhamat kuntï Diosajj jutïrin churkistani uk suytʼañasataki. Uka Qellqatanakaw aguantañasatak yanaptʼistu, chuymachtʼarakistu” (Rom. 15:4). ¿Kunsa Job librojj yatichistu? Llakinakasat sinti lupʼiñajja, Jehová Diosajj taqe kunjjar munañanïtap arjjatañajj kunja wakiskirisa ukwa armayistaspa. Wali llakinakan uñjaskasasa, Job chachat yateqasisin Diosar taqe chuyma serviskakisajja, Jehová Diosajj taqe kunjjar munañanïtapwa arjjatasktanjja. w17.06 pág. 24 párr. 9; pág. 25 párrs. 13, 14

Jesusajj discipulonakapan samartʼapjjañap wakisitapjja yatïnwa. Mä kutejja, Diosan arunakap yatiyasajj wal qaripjjäna, ukatwa Jesusajj kuntï jichhürutak ajllita textojj siski uka arunakwa discipulonakapar säna. Kusistʼañanakasa, anattʼañanakasa, awisajj samartʼañatakiw yanaptʼistaspa. Ukampis janiw kusistʼañanakasa ni anatañanakasa jukʼamp wakiskirïñapäkiti. Nayra tiemponjja waljaniw akham sapjjäna: “Manqʼasiñäni, umtʼasiñäni, qharürojj jiwjjchiñänejjaya” sasa (1 Cor. 15:32). Jichhürunakanjja waljanirakiw ukham sapjje. Kunarus tiemp aptʼasktan uk amuytʼasiñatakejj ¿kunas yanaptʼistaspa? Mä semana ajllisajja, qhawqha horanaksa tantachäwitakisa, yatiyir sarañatakisa, Bibliat yatjjatañatakis apsustan ukwa uka semanan qellqtʼassna. Ukatsti qhawqha horanaksa anatañatakisa, televisión uñchʼukiñatakisa, anatañ videonakatakis apsustan ukwa qellqtʼasiraksna. Uka horanak igualtʼayasajj ¿kunas qhan amuyasi? ¿Kunatak chʼamachasiñasas wakisispa? (Efes. 5:15, 16). w17.05 págs. 24, 25 párrs. 11-13

Suma perlanak thaqeri mä comerciante chachatwa Jesusajj parläna. Mä urojja, wali valorani mä perla jikjjatäna. Uka perla alañatakejj kunatï jupan utjkäna ukanakwa aljäna. ¿Jupatakejj uka perlajj qhawqha wakiskirïnsa uk amuyasmati? Diosan Reinopat cheqa yatichäwejja, wali valorani perlar uñtasitawa. Suma perla uñjkäna uka chachjamaraki Diosan Reinop wali valoranit uñjañäni ukhajja, uka Reinompi apnaqatäñatakejj munañasarjam jan sarnaqañatakiw chʼamachasiñäni (Mar. 10:28-30). Amuytʼañataki, Zaqueo chachajj jaqenakat kʼarimp kʼarimpi qollqe lunthatasaw qamiriptäna (Luc. 19:1-9). Mä urojja, Zaqueojj Jesusaruw Diosan Reinopat parliri istʼäna. Ukasti chuymaparuw purtʼarakïna, ukatwa jupajj akham säna: “Tata, nayajj chikatpachwa utjirinakajat pobrenakar churaskta. Khitirutejj nayajj kʼarimp kʼarimpi lunthatkta ukarojja, pusi ukhampwa kuttʼayaskta” sasa. Kunanaktï jaqenakat lunthatkäna ukwa Zaqueojj kuttʼayjjäna, janirakiw jupatakik taqe kuns thaqjjänti. w17.06 pág. 10 párrs. 3-5

Awk taykanakar yanaptʼapki uka jilat kullakanakajja, wawanakarojj awk taykapar respetañwa yatichapjjañapa. Ukatakejj awk taykapatwa sum parlapjjañapa, janirakiw jupanakas wawanakar uywapjjañapäkaspa ukham tukupjjañapäkiti. Ukatsti, kunanakatï jaqenakatakisa jilat kullakanakatakis jan walïki, jan wal amuyaykaspa ukanak janipuniw lurapjjañapäkiti (1 Ped. 2:12). Yaqhep awk taykanakajj wawanakapar yatichañatak yaqhanakarus yanaptʼa mayipkchejja, jupanakaw Bibliat yatichasipkakiñapa. Jilat kulla kanakajj kunjamsa wawanakapar yanaptʼasipki uksa uñjapjjañapawa. Awk taykanaka, Jehová Diosar yanaptʼa mayisipjjam, wawanakar yatichañatak chʼamachasisipkakim (2 Crón. 15:7). Wawanakaman Jehová Diosampi sum apasipjjañapaw jukʼamp wakiskirejja. Biblian yatichäwinakapampi wawanakaman chuymapar purtʼañatak chʼamachasisipkakim. Wawanakamajj Jehová Diosaruw servipjjaspa, uk janipun armapjjamti. w17.05 pág. 12 párrs. 19, 20

Jan wali pä jaqenakaw mä chacharojj jan walinaksa lurkaspa ukham juchañchapjjäna. Ukham parlapjjatapajj kʼarïnwa. Uka chacharojj jachʼa juchanïkaspas ukham uñjapjjäna, ukatwa jiwayañ amtapjjäna. Cheqaparjam luriri jaqenakajja, ¡jan juchani uka chachampiru, yoqanakapampiru qalampi kʼupjat jiwapjjatap uñjasajj wal chuym usuyasipjjpachäna! Uka jan walejj cheqapuniw pasawayi. Jehová Diosar taqe chuyma serviri Nabot chacharuw ukham jiwayapjjäna, jupajj Acab reyejj Israel marka apnaqkäna uka tiemponwa jakäna (1 Rey. 21:11-13; 2 Rey. 9:26). Acab reyejj Nabot chachan uva yapup munäna, uka lantisti jukʼamp suma uva yapu churäma sänwa, ukampis Nabot chachajj janiw munkänti. ¿Kunatsa? Nayra awkinakapat herencia katoqki uk aljañajj Diosan leyip contränwa, ukatwa uva yapup churañ jan munkänti (Lev. 25:23; Núm. 36:7). Nabot chachajj Jehová Diosaruw taqe kunan istʼäna. w17.04 pág. 23 párr. 1; pág. 24 párr. 4

Jan wali jaqenakajj chhaqtjjani ukhajja, ¿kunjam jaqenakas aka Oraqen jakasjjapjjani? Jehová Diosajj akham siwa: “Llampʼu chuymaninakasti oraq katoqapjjani, jilarkir sumankañampiw kusisipjjarakini” sasa. Ukatsti akham sarakiwa: “Aski jaqenakajj oraq katoqapjjani, wiñayatakiw ukan jakapjjarakini” sasa (Sal. 37:11, 29). ¿‘Llampʼu chuymaninakasa’ ‘aski jaqenakas’ khitinakäpjjesa? Llampʼu chuymaninakajja, Jehová Diosat yateqapki Juparus istʼapki ukanakawa. Aski jaqenakasti, Jehová Diosatakejj kunatï walïki uk lurañ munirinakawa. Jichhürunakanjja, jila partejj jan walinak luriri jaqenakaw utji. ¡Ukampis paraisonjja, llampʼu chuymaninaka, aski jaqenakakiw utjani! w17.04 págs. 10, 11 párrs. 5, 6

‘Diosar munasiñaw’ jilat kullakanakar munasiñampi uñjañatak yanaptʼistu, yamas jan walinakan uñjasipki ukhajj jukʼampïñapawa (1 Juan 3:17, 18). Amtañäni, Judea markankir cristianonakajj manqʼat pistʼapkäna ukhajja, tamajj jankʼakiw yanaptʼañatak wakichtʼasipjjäna (Hech. 11:28, 29). Pablompi Pedrompejj maynit mayni khuyaptʼayasipjjañapatakiw cristianonakar chʼamañchtʼapjjäna (Rom. 12:13; 1 Ped. 4:9). Ucrania markankir jilat kullakanakajj aka maranakakiw guerra utjipana, Diosar servipjjatapat uñisita uñjasipjjatapat yaqha markanakar escapapjjäna. Uka markanakansti wali munasiñampiw jilat kullakanakajj katoqapjjäna. Uka markanakansa Testigonakajj janirakiw guerrarusa ni politicarus mitisipkiti, kunattejj ‘janiw akapachankirïpkiti’ (Juan 15:19; Hech. 8:4). w17.05 pág. 4 párrs. 6, 7