Qalltañataki

Cristianjam jakañatak yanaptʼir textonaka sat aka librojja, jan walinakar saykatañatakejj Bibliankir textonak jankʼak jikjjatañatakiw yanaptʼätam. Ukatjja mayninakar chʼamañchtʼañataki, Jehová Diosar jachʼañchkir suma amtanakar puriñatak textonak jikjjatañatakis yanaptʼarakïtamwa. Kuna toqetsa yatjjatañ munta uka tema ajllisajja, wali suma jisktʼanakampi Biblian sarnaqäwinakapat qhanañchtʼir mä qhawqha arunakampwa jikjjatäta. (“¿Kunjamsa aka librompejj yanaptʼayasisma?” sat recuadro liytʼäta). Aka qellqatanjja Bibliarjam apstʼat chʼamañchtʼir walja textonakampi, yanaptʼanakampi, ukat chuymachtʼir arunakampiw utji. Jumatakisa mayninakar yanaptʼañatakisa chʼamañchtʼkir Biblian wiñay yatichäwinakapaw utjaraki.

Aka libron utjki uka temanakanjja, mä temat parlir taqpach textonakajj janiw qellqatäkiti. Jan ukasti kunjamsa Bibliat jukʼamp yatjjatañ qalltsna ukatakjam lurtʼatawa (Pr 2:1-6). Jukʼamp sum yatjjatañatakejja, La Biblia. Traducción del Nuevo Mundo sat Biblian utjki uka referencias marginales ukat notas de estudio ukanakampiw yanaptʼayasisma. Bibliankir mä textojj kamsañsa muni jan ukajj kunjamsa mä textorjam kuns lursna uk jukʼamp yatjjatañatakejja, Jehová Diosan Testigonakapan Bibliat yatjjatapjjañapataki sat librompi ukat Índice de las publicaciones Watch Tower sat qellqatampiw yanaptʼayasirakisma. Kunanakatï jichhak qhanañchasiwayki ukanakarjamat Biblia yatjjataskta janicha uk yatiñatakejja, jichhak mistur qellqatanakwa liytʼarakisma.

Aka librojj Diosan Arupat yatjjatañatak jumar yanaptʼañapwa munapjjta, ukhamat jumajj yatiña, suma amuytʼirïña, entiendiña jikjjatañamataki. Aka qellqatat yatjjatkasajja, ‘Diosan arupajj jakkirïtapa, wali chʼamanïtapwa’ jukʼamp amuyäta (Heb 4:12).