Cuerpo Gobernanten cartapa

Munat jilat kullakanaka:

Diosar munasitasata, jaqenakar munasitasatwa Jesusan mandatopar istʼañ muntanjja. Jupajj akham sänwa: “Sarapjjam, taqe markanakankir jaqenakar nayan discipulojar tukuyapjjam, bautisapjjam” sasa (Mat. 28:19, 20; Mar. 12:28-31). Maynir cheqapun munasiñajja, cambiañapatakiw jupar yanaptʼaspa, ‘khitinakatï wiñay jakañatak suma chuymanïpki’ ukanakan chuymaparuw purtʼarakispa (Hech. 13:48).

Nayrajja, kunjamsa jaqenakar predicañäni, uk pʼeqer yatsuñatakiw chʼamachasiyätanjja, qellqatanak jaytañatakis chʼamachasirakiyätanwa. Ukampis jichhajja, jaqenakamp jukʼamp sum parltʼañatak chʼamachasiñaw wakisjje. Kunanakattï yatiñ munapki ukanakat parlasaw jupanakar munasitas uñachtʼaysna. Jaqenakajj janiw mä igualäpkiti, ukatwa kunanakatsa yatiñ munapjjaspa, kunanakas llakisiyi uka toqenakat parlañajj wakisi. Aka folletojj uka amtamp lurtʼatawa.

Aka folletojj 12 yatichäwinakaniwa, jaqenakar munasiñampi uñjañatakisa, Jesusan discipulopar tukupjjañapatakis kunjam jaqëñas wakisi ukanakat 12 yanaptʼanak aka folleton uñjaskañäni. Sapa yatichäwinjja, Jesusasa jan ukajj nayra tiempon jakir cristianonakas kunjamsa yatichkasin jaqenakar munasipjjatapa, jupanakat llakisipjjatap uñachtʼayapjjäna, ukanakwa mayat may yatjjataskañäni. Jichhajja, kunjamsa jaqenakamp parltʼañäni uk janiw pʼeqer yatsuñajj wakisjjeti, jan ukasti, kunjamsa jaqenakar munasitas uñachtʼaysna ukatak chʼamachasiñaw wakisjje. Jaqenakar munasiñ uñachtʼayañatakisa, Jesusan discipulopar tukuyañatakis kunjam jaqëñasasa, uka toqet tunka payaniw aka folleton qhanañchasi, taqe ukanakajj wali wakiskiriwa. Ukampis ukanakat yaqhepajj jaqenakamp parlañ qalltañataki, revisitanak lurañataki, Bibliat yatichañatakiw yanaptʼistani.

Sapa yatichäwinakat yatjjatkasajja, jakasktan uka cheqankir jaqenakar predickasajj kunjamsa ukham jaqëtas uñachtʼaysna, uka toqetwa lupʼiñasa. Kunjamsa predicañasa, jan ukajj yatichañasa ukat sipansa, Jehová Diosar munasitasa, jaqenakar munasitas uñachtʼayañaw jukʼamp importantejja. Ukatwa jukʼamp munasirïñatak wal chʼamachasiñasa. Ukaw jaqenakar Jesusan discipulopar tukuyañatakejj yanaptʼistani.

Jumanakamp mayachtʼat serviñajja, mä suma privilegiowa (Sof. 3:9). Jaqenakar munasiñ uñachtʼayañataki, Jesusan discipulopar tukuyañatak chʼamachasipjjatamarojj Jehová Diosajj bendispan.