Mayo

Alajjpachankapki uka grupor uñjkäna uka qhepatjja, “walja jaqenakaruw” apóstol Juanajj uñjarakïna. 144.000 ajllitanakat sipansa, uka ‘walja jaqenakajj’ jan jaktʼkayänwa. ¿Jupanakajj khitinakäpjjesa? Juanarojj akham sasaw yatiyasïna: “Jupanakajj jachʼa tʼaqesiñatwa mistunipjje, kayukam purir isinakapsa tʼajjsusipjjarakiwa, Corderon wilapampiw uka isinakap janqʼoptayapjje” sasa (Apoc. 7:14). Jachʼa tʼaqesiñ tiempo jakkirpach pasasinjja, uka ‘walja jaqenakajj’ aka oraqenwa jakapjjani, wali suma bendicionanak katoqasajj kusisitäpjjarakiniwa (Sal. 37:9-11, 27-29; Prov. 2:21, 22; Apoc. 7:16, 17). Alajjpachar sarañatak ajllitäskstansa jan ukajj aka oraqensa jakchiñänejja, ¿Apocalipsis capítulo 7 ukan utjki uka arunak phoqasir uñjañäniwa sasin creytanti? Uka tiempojja, Diosar servipki uka paypach gruponakatakejj wali kusiskañäniwa. Jehová Diosan gobiernopar apoyañ amtatasatjja, walpun kusisiñäni. w22.05 pág. 16 párrs. 6, 7

¿Mä wakiskir amtar puriñamajj wakisïnti? Ukhamächin ukhajja, yatiñanïñ necesitatam laykojj Jehová Diosaruw mayispachätajja (Sant. 1:5). Salomón reyejj akham sasaw qellqäna: “Yatiñajj jukʼamp wakiskiriwa” sasa (Prov. 4:7). Jupajj janiw jaqet jutki uka yatiñat parlkänti, jan ukasti Jehová Diosat jutki uka yatiñatwa parlaskäna. Ukampis Diosat jutki uka yatiñajj jichha tiempon utjki uka problemanakar saykatañatakejj ¿yanaptʼistaspati? Jïsa, yanaptʼistaspawa. Ukatakejja, wali yatiñanïpkäna uka pä chachanakan yatichäwinakap yatjjatañasawa, ukarjamaw lurañasaraki. Salomón reyit parltʼañäni, Bibliajj jupat akham siwa: “Diosasti Salomonarojj wali yatiñanïñampi, wali amuytʼasirïñampi churäna” sasa (1 Rey. 4:29). Jesusat parltʼarakiñäni, jupjam wali yatiñanejj janiw khitis aka oraqen utjkänti (Mat. 12:42). Jupat parlkasin mä profeciajj akham sänwa: “Jehová Diosan espiritupaw jupjjankani, ukatwa jupajj yatiñanïni, wali suma amuytʼasirïni” sasa (Is. 11:2). w22.05 pág. 20 párrs. 1, 2

Jehová Diosar jukʼamp serviñ amtañatakisa, uk phoqañatakis janiw sinti jilïrëjjsnas ukham amuyasiñasäkiti. 75 marani Beverley kullakat parltʼañäni. Jupajj usutätap laykojj janiw sum sarnaqañ puedkänti, ukampis Jesusan jiwatap amtañataki campañanjja, wal yanaptʼañ munäna. Uk phoqañatakejj kunanaksa luraspa ukwa Beverley kullakajj amtäna. Amtanakap phoqasajj wal kusisïna. Ukham chʼamachasitapajja, mayninakarojj jukʼamp predicapjjañapatakiw chʼamañchtʼäna. Jilïr jilat kullakanakajj janis nayrjam lurañ puedjjapjjchejja, kun lurañatakitï chʼamachasipki uk Jehová Diosajj wali valoranitwa uñji (Sal. 71:17). Ukhamajj kunanak lurañtï puedktan ukanak lurañ amtapjjañäni. Jehová Diosar kusisiyañatak chʼamachasipjjañäni. Jehová Diosampiru markapampir yanaptʼañatakejj jukʼamp lurañanak yateqapjjañäni. Kunjamanakatsa jilat kullakanakar yanaptʼsna uk amtapjjañäni. Ukhamtï lurañänejja, Jehová Diosajj bendisistaniwa, kunjamtï Timoteon ‘nayrar sartatap taqeni uñjapkänjja’, ukhamarakiw jiwasan nayrar sartatas taqeni uñjapjjani (1 Tim. 4:15). w22.04 pág. 27 párrs. 18, 19

Walsa chʼamachasiwayapjjstajja, wawanakamat maynejj janiw Jehová Diosar serviñ munjjaspati, ukhaman uñjasisajj ¿kamachapjjätasa? Awk taykjamajj janiw sum uywawaykpachätanti sasajj janiw amuyapjjañamäkiti. Jehová Diosajja, jupar serviñäniti janicha uk jiwas pachpa amtirwa taqenirus lurawayistu. Mä urojj Jehová Diosan ukar kuttʼanjjaniwa sasin jan qarjtas suytʼasipkakim. Jesusajj herencia tukuntir waynat parlkäna uka uñachtʼäwit amtasipjjam (Luc. 15:11-19, 22-24). Uka waynajj suma thakit saranukchïnsa, qhepat kuttʼanjjänwa. Awk taykanaka, Jehová Diosajj mä suma privilegio jumanakar churapjjtamjja, Jehová Diosar jutïrin servipkani uka wawanakaruw jumanakajj uywasipktajja (Sal. 78:4-6). Cheqas uk lurañajj janiw faciläkiti, ukatwa wal trabajipjjatamatsa, wal chʼamachasipjjatamatsa taqe chuyma felicittʼapjjsma. Jehová Diosar munasipjjañapatak wawanakamar yanaptʼañatak chʼamachasisipkakim, kunjamtï Jehová Diosajj munki ukarjam cheqañchasa ewjjtʼasa uywañatakis chʼamachasisipkakim (Efes. 6:4). w22.05 págs. 30, 31 párrs. 16-18

Qhawqtï puedktan ukarjam luras Jehová Diosar serviñäni ukhajja, congregacionan sumankañaw utjani, mayachtʼatarakïniwa. Nayrïr cristianonakajj ukhamwa lurapjjäna. Jupanakajj kunaymaninak lurañ yatipjjäna, kunayman asignacionanakanïpjjarakïnwa (1 Cor. 12:4, 7-11). Ukampis ukajj janiw atip atipa sarnaqayañ utjayañatakïkänti, ni tʼaqa tʼaqa sarnaqañ utjayañatakïkänsa, jan ukasti apóstol Pablojj Éfeso markankir cristianonakar qellqkäna uka cartapanjja, ‘Criston cuerpopar chʼamañchapjjañamataki’ wal chʼamachasipjjam sasaw jupanakar ewjjtʼäna. Ukatsti akham sarakïnwa: “Kunapachatï cuerpon sapa partenakapajj lurañanakap phoqapki ukhajja, cuerporuw jiltañatak yanaptʼapjje, ukhamatwa taqpach cuerpojj munasiñan suma saytʼatarakejja” sasa (Efes. 4:1-3, 11, 12). Ewjjtʼanakaparjam luririnakajja, congregacionan sumankañ utjañapataki, mayachtʼatäñapatakiw yanaptʼapjjäna, ukwa congregacionanakasan uñjaraktanjja. Ukhamajj mayninakamp jan igualayasiñatak chʼamachasipjjañäni, Jesusat yateqasipjjañäni, kunjam chuymanïnsa uk yateqasiñatakis chʼamachasipjjarakiñäni. Jehová ‘Diosajj cheqapar uñjir Diosawa, jupajj janiw luratanakasat armaskaniti’ (Heb. 6:10). Jupar serviñatak chʼamachasitas uñjasajja, Jehová Diosajj wal kusisi. w22.04 pág. 14 párrs. 15, 16

Jehová Diosajj mä juchachasirirojj perdonaniti janicha uk amtañajj janiw jiwasar waktʼkistuti, uk yatiñajj wali askiwa. Ukampis may lurañaw waktʼistu, ¿kunäpachasa? Inas maynejj jiwas contra jucha lurawaychi, inas jachʼa jucha lurawaychi, ukham luratapat disculptʼita, perdontʼita sasaw mayisirakistaspa, jan ukajj inas jan perdón mayiskarakchistaspati. Perdón mayischistanisa janisa, jupar perdonañwa amtañasa, mä arunjja janiw chuymar imjjasiñasäkiti, janirakiw jupatakis coleratäjjañasäkiti. Maynitï wal chuym ustʼayawaychistu ukhajja, uk lurañajj chʼamakïspawa, tiempow munasirakispa. La Atalaya 15 de septiembre, 1994 revistan akham siwa: “Juchachasirir perdonañajja, jucha luratapajj janis kunäkaspa ukham janiw sañ munkiti. Mä cristianotakejja, kunatï pasawayki uk Jehová Diosan amparapar confiyasin jaytjjaña sañwa muni. Alajjpachansa aka oraqensa, jupaw cheqapar uñjir Juezajja, jupaw horasapar cheqapar uñjaskani” sasa. w22.06 pág. 9 párrs. 6, 7

Jehová Diosajj taqe markanakaru, tribunakaru, kunayman kasta jaqenakaru, kunayman aru parlir jaqenakar jichha tiempon tantachthapiñwa arsuwayi, jupanakajj mayachtʼataw adorapjjetani sasaw säna. Jupanakarojj jichha tiempon ‘walja jaqenaka’ sasaw uñtʼasi (Apoc. 7:9, 10). Uka walja jaqenak taypinjja, kunayman markanakat chachanaka, warminaka, wawanakaw utji. Ukhamäkchisa, taqe jupanakajj mayachtʼataw aka oraqpachan Diosar servipjje, maynit maynikamas sumankapjjarakiwa (Sal. 133:1; Juan 10:16). Jupanakajja, aka oraqen suma jakasiñ utjkani uka toqet istʼañ munapki ukanakar parlañatakejj jankʼakïpjjewa (Mat. 28:19, 20; Apoc. 14:6, 7; 22:17). Jumatï uka walja jaqenak taypinksta ukhajja, jutïritak mä suytʼäwejj utjki uk wali valoranitwa uñjpachätajja. Diablojj kuntï suytʼasktan ukwa apaqañ munistu. Jehová Diosajj janiw promesanakap phoqkaniti sasin amuyañaswa munaraki, cheqas ukaw amtapajja. Jupatï uka suytʼäwis apaqestaspa ukhajja, ajjsarañampiw apayasjjsna, janirakiw Jehová Diosarojj sirvjjsnati. w22.06 págs. 20, 21 párrs. 2, 3

Taqe kunas sumakëjjaniwa sasin taqe chuyma suytʼañajja, kunayman jan waltʼäwinakar saykatañatakiw yanaptʼistu. Ak amtapjjañäni, jumanakarojj arknaqapjjätamwa sasaw Jesusajj säna (Juan 15:20). Ukhamajj kuna bendicionanaktï Diosajj churkistani ukanakat lupʼiñajja, jupar serviskakiñatakiw yanaptʼistani. Jesusajj jan sinttʼasis jiwayatäñap yatkchïnsa, kunjamsa suytʼäwinïñajj Diosat jan jitheqtañatak yanaptʼäna uk uñjañäni. 33 maran Pentecostés urunjja, apóstol Pedrojj Salmos libron mä profeciapwa aytäna, uka profecianjja kunjamsa Jesusajj wali paciencianïtapsa, Diosar confiyatapsa uñachtʼayañapäna ukwa wali sum qhanañchi, ukan akham siwa: “Nayajj Diosar suytʼasaw jakarakëjja, janiw nayarojj Sepulturar jaytkitätati, khititï jumat jan jitheqtki ukan cuerpopan ñusantañapsa janirakiw munkätati. […] Nayraqatamansa wali kusisiñampiw phoqtʼayarakitäta” sasa (Hech. 2:25-28; Sal. 16:8-11). Jesusajja, Diosaw jaktayitani, Awkijan ukaruw wali kusisit kuttʼjjäjja sasaw taqe chuym suytʼäna (Heb. 12:2, 3). w22.10 pág. 25 párrs. 4, 5

Mä kutejja, apóstol Santiagompi Juanampejj Jesusan ukaruw mamapar khitapjjäna, ukhamat mamapajj Reinon suma lugaranak mayiñapataki (Mat. 20:20, 21). Uka pä apostolonakajja, jachʼa jachʼa tukurïpjjatapa, kuns jupanakatakik munirïpjjatapwa uñachtʼayasipkäna (Prov. 16:18). Janiw Santiagompi Juanampikejj uka horasan jan wal lurapkänti. Uk pasipan kunjamas mayni apostolonakajj jikjjatasipjjäna uk amuytʼañäni, “ukanak istʼasasti mayninakajj tunkanpachaw uka pä jila sullkatakejj wal colerasipjjäna” (Mat. 20:24). Kunjamsa Santiagompi, Juanampi, mayni apostolonakampejj wal toqentasipjjäna uk amuysnawa. ¿Uk pasipan kunjamas Jesusajj jikjjatasïna? Jupajj janiw coleraskänti. Jumanak lantejj jukʼamp humilde chuymani, jukʼamp munasir jaqenakaruw uttʼayäjja, jupanakajj jukʼamp suma apostolonakäpjjaniwa sasajj janiw Jesusajj siskänti. Antisas suma chuymanïpjjatap yatisajja, pacienciampiw Jesusajj amuytʼayäna (Mat. 20:25-28). Jupajj munasiñampipuniw apostolonakapar uñjäna. w23.03 págs. 28, 29 párrs. 10-13

Wayn tawaqo, kunanaksa jichhakamajj lurawayta ukanakat amuytʼam. Bibliat wal yatjjatawaypachätajja, inas walja maranak yatjjatawaysta, ukham yatjjatañaw Bibliajj Diosan arupäskapuniwa sasin confiyañatak yanaptʼawaypachätamjja. Ukampis jichhajj sagrado libro qellqayirirojj uñtʼjjtawa, munasjjaraktawa, ukaw jukʼamp importantejja. Jehová Diosar wal munasitam laykuw jakäwim jupar katuyastajja, bautisasjjaraktajja. Ukham luratamajj ¡kusiskañawa! Janïr bautisaskasajj inas jan walinakan uñjaschiyäta, inas ukanakajj Diosat jitheqtayañ munchiyätam. Ukampis akat maranakarojja, yaqha jan walinakanwa uñjasirakïta. Diosar munasitamajj thayarjjaspa, jupat jitheqtjjasma ukwa Supayajj munani (Efes. 4:14). Janiw Supayarojj gustop churañamäkiti. Jehová Diosat jan jitheqtañatakisa, jupar jakäwim katuyasiwaykta ukamp phoqañatakis ¿kunas yanaptʼätam? Diosar serviñan jiltaskakiñamawa, mä arunjja cristianjamajj ‘jilïr jaqeruw tukuñama’ (Heb. 6:1). w22.08 pág. 2 párrs. 1, 2

Kunanakatï utan paski ukanakatjja, familiankirinakajj janiw taqpachjja yaqhanakar parlapjjañapäkiti. Mä chachatï esposapan laruyirjam costumbrenïtap amuychi ukhajja, janiw uka toqet yaqhanakar parlañapajj walïkaspati. Niyakejjay esposapar munaschejja, janipuniw kuntï chuym ustʼaykaspa uk lurañ munkiti (Efes. 5:33). Awk taykanakajj ak amtapjjañapawa, waynitunakas tawaqetanakas respetompi uñjatäñwa munapjje, ukhamajj janiw pantjasitanakap yaqhanakar yatiyasajj jiskʼachapjjañapajj walïkaspati (Col. 3:21). Wawanakajj amuytʼasirïñwa yateqapjjañaparaki, kunanakatï familiat maynir phenqʼachkaspa ukanak janiw yaqhanakar parlapjjañapäkiti. Kunanakatï familian paski ukanak yaqhanakar jan yatiyañatak taqen chʼamachasipjjani ukhajja, familiajj jukʼamp mayachtʼatäniwa. w22.09 pág. 10 párr. 9

Niyakejjay Diosajj Job chachar wal munaschïnjja, jan walinak aguantañapatakisa jupat jan jitheqtas serviskakiñapatakis kunanaktï necesitkäna ukanakwa churäna. Jupa pachpaw Job chachamp parläna, qhawqha yatiñanisa, jupan luratäpki ukanakarojj kunja munasiñampis uñji ukanakatwa parläna. Musparkañ walja animalanakatwa parlarakïna (Job 38:1, 2; 39:9, 13, 19, 27; 40:15; 41:1, 2). Maysa toqetjja, Diosajj Elihú waynaruw Job chachar chʼamañchtʼañapatakis chuymachtʼañapatakis khitäna. Diosat jan jitheqtir Elihú waynajja, aguantapki uka servirinakaparojj Jehová Diosajj bendisipuniwa sasaw Job chachar amtayäna. Elihú waynajj Job chachar ewjjtʼaspa ukwa Diosajj munarakïna. Elihú waynajja, jupa pachpat jan sint llakisiñapatakiw Job chachar munasiñamp amuytʼayäna. Taqe kun Luriri Jehová Diosat sipans jaqejj janiw kunäkisa sasaw amtayarakïna. Diosajj mä luräwi Job chachar churarakïna: jupar jan wal lurapkäna uka kimsa amigonakapatakiw orarapiñapäna (Job 42:8-10). ¿Jichha tiempon jan walinakan uñjastan ukhajj kunjamsa Diosajj yanaptʼarakistu? Jehová Diosajja, janiw Job chacharjam cheqak parlkistuti. Ukampis Biblia toqew jichhürunakan parlistu (Rom. 15:4). w22.08 pág. 11 párrs. 10, 11

Roma markankir congregacionanjja, judío cristianonakampi yaqha markanakat jutir cristianonakampiw utjäna. Niyakejjay Moisesan Leyipajj chhaqtayatäjjchïnjja, yaqhep manqʼañanak manqʼañajj janiw jarkʼatäjjänti (Mar. 7:19). Yaqhep judío cristianonakajj taqe kasta manqʼañanakwa manqʼasipkäna. Ukampis yaqhep judío cristianonakatakejj janiw ukajj walïkänti, ukaw congregacionarojj tʼaqjtayäna. Apóstol Pablojja sumankañajj kunja wakiskirisa uk amuyänwa. Ukatwa kunjamsa manqʼañ toqet chʼajjwañanakajj jupanakarusa, congregacionarus jan waltʼayaspäna uk amuyasipjjañapatak yanaptʼäna (Rom. 14:19, 20). Mayninakar jan lanktʼasiyañatakejja, jupa pachpas cambiañatakejj dispuestokïnwa (1 Cor. 9:19-22). Kuntï jiwasajj munktan, kuntï mayninakajj munapkaraki uka toqet jan chʼajjwkañäni ukhajja, Pabljamarakiw mayninakar chʼamañchtʼañäni, sumankañ utjañapatakis yanaptʼarakiñäni. w22.08 pág. 22 párr. 7

Jehová Diosar jukʼamp serviñ amttan ukhajja, uk jikjjatañkamajj wal chʼamachastanjja. Kunatï cheqapäki uk jikjjatañatakejj ukhamarakiw chʼamachastanjja. Diosasti pacienciampiw kunatï cheqapäki ukar jukʼamp munasiñatak yanaptʼistani, mä arunjja sapürutjam jukʼamp mejorañatakiw yanaptʼistani (Sal. 84:5, 7). Jehová Diosajja, kunatï cheqapäki uk lurañajj janiw chʼamäkiti sasaw munasiñamp amtayistu (1 Juan 5:3). Kunatï cheqapäki uk lurañajj jarkʼaqestuwa, sapüruw ukamp jarkʼaqatäñ necesittanjja. Apóstol Pablojj mä armadurat parlkäna ukat amuytʼañäni (Efes. 6:14-18). ¿Kunas mä cristianon chuymap jarkʼaqe? ‘Cheqapar sarnaqañ pecho jarkʼaqasiñ chalecow’ jarkʼaqe, ukajj Diosan cheqap leyinakapamp sasiwa. Kunjamtï pecho jarkʼaqasiñ chalecojj chuym jarkʼaqkejja, ukhamarakiw Diosan leyinakapajj chuymas jarkʼaqe, mä arunjja chuyma manqhasan kunjamätansa ukwa jarkʼaqe. Ukatwa cheqapar sarnaqañ pecho jarkʼaqasiñ chalecomp uchtʼasitäñajj wali importantejja (Prov. 4:23). w22.08 pág. 29 párrs. 13, 14

Diosan Arupajja, walja waranqa maranakaw Diosan servirinakaparojj yanaptʼawayi. ¿Kunjamatsa jichhürunakkam utjaskaki? Jehová Diosaw sagrado qellqatanakat copianak lurasiñapatakejj yanaptʼawayi. Bibliat copianak luririnakajj pantjasirïpkchïnsa, wali amuyumpiw copianak lurapjjerïna. Hebreo Arut Qellqatanakat parlkasinjja, Biblia toqet yatjjatat mä jaqejj akham siwa: “Nayra qellqatanakatjja, Hebreo Arut Qellqatanakakiw jan kun yaptʼasa, jan kun apaqas cheqapar copiasiwayi” sasa. Ukhamajj Bibliat liytʼktan ukhajja, Biblia qellqayiri Jehová Diosan amuyunakapwa liytʼasktanjja. “Taqe suma regalonakasa perfectöki taqe uka regalonakasa [Jehová Diosatwa] juti”, Diosajj churkistu taqe uka regalonakatjja, Bibliaw jukʼamp suma regalojja (Sant. 1:17). Mä regalojja, regalo churirejj jiwasar wali sum uñtʼatapa, kunanaktï necesitktan ukanak sum yatitapwa uñachtʼayistu. Bibliampejj ukhamarakiwa. Bibliat yatjjatktan ukhajja, Jehová Diosat waljanakwa yateqtanjja. Jupajj jiwasar wali sum uñtʼatapa, kunanaktï necesitktan ukanak yatitapwa amuytanjja. w23.02 págs. 2, 3 párrs. 3, 4

Cristojj Waranqa Maranak apnaqkani uka tiempon jiwatanakajj jaktañ qalltapkani uka urojj wali kusiskañäniwa. Jiwjjapjje uka munat amigonakasaru, familiaranakasar wasitat uñjañ walpun muntanjja. Jehová Diosas ukwa munaraki (Job 14:15). Jiwatat jaktirinakampejj waljaniw oraqpachan wali kusisit jikisipjjani. Jakañ libron sutinakapajj qellqantatäpki uka ‘cheqapar sarnaqer jaqenakajja’, “jakañatakiw jaktanipjjani” (Hech. 24:15; Juan 5:29). Munat amigonakasata familiaranakasat jiwapki ukanakat waljanejja, inas aka oraqen jakañatak nayraqat jaktanipjjchini. Diosar jan uñtʼapkäna jan ukajj janïr jiwkasajj jupar jan servipkäna uka ‘jan cheqapar sarnaqer jaqenakajja’, “juzgatäñatakiw jaktanipjjani”. Jiwatat jaktirinakajj taqeniw waljanak yateqapjjani (Is. 26:9; 61:11). Ukatwa oraqpachankir taqe jaqenakar yatichañajj wakisini (Is. 11:10). w22.09 pág. 20 párrs. 1, 2

Jehová Diosajj nayratpachaw taqe mayachtʼat gobernantenakat jilankatap uñachtʼayawayi. Jupajj israelitanak laykuw nuwasïna, Suma Oraqen jilaparte oraqenakap katuntañatakiw yanaptʼarakïna (Jos. 11:4-6, 20; 12:1, 7, 24). Jehová Diosajj kutin kutiniw Jachʼa Diosätap uñachtʼayäna. Jehová Dios sapakiw jachʼañchatäñapa sasin humilde chuymamp reconosiñat sipansa, Babiloniankir Nabucodonosor reyejj chʼamanïtapata, autoridadanïtapata, reyïtapatwa jachʼañchasïna, ukatwa Diosajj loqher tukuyjjäna. Waliptjjäna ukhajja, jachʼa Diosaruw jachʼañchäna, Jehová Diosaw wiñayatak apnaqerejja sasaw reconosjjarakïna. Kuntï jupajj lurañ munki uk “janiw juparojj khitis jarkʼkaspati” sasaw sarakïna (Dan. 4:30, 33-35). Ukatwa Salmonak qellqerejj akham säna: “Kawkïr markatejj Jehová Diosarojj Diosaparjam adorki ukajj kusisitawa, jupankañapatak ajlliski uka markajj kusisitawa” sasa (Sal. 33:12). Ukatwa Jehová Diosarojj taqpach chuymamp serviñasa. w22.10 págs. 15, 16 párrs. 13-15

Biblian utjki uka walja profecianakan phoqasitapajja, kunanaktï Diosajj jutïritak arsuwayki ukanakajj phoqasipuniniwa sasin confiyañatakiw yanaptʼistu. Mä Salmo qellqerjamaw jikjjatasiraktanjja, jupajj Jehová Diosar akham sänwa: “Juman salvatäñwa nayajj wal munta, kuna laykutejj juman arumajj mä suytʼäwi churitu” sasa (Sal. 119:81). Jehová Diosajj munasiñatwa Biblia toqejj “mä suma suytʼäwi jutïritak” churañ munistu (Jer. 29:11). Jehová Diosajj kunanaktï jutïritak arski ukarjamaw mä suytʼäwisajj utjistu, ukampis ukajj janiw jaqenakan chʼamachasitaparjamäkiti. Ukhamasti Diosan Arupar jukʼamp confiyañatakejj Bibliankir profecianakat jukʼamp yatjjatasipkakiñäni. ¿Kunatsa Bibliar confiyaraksna? Kuna laykutejj ewjjtʼanakaparjam sarnaqerinakarojj yanaptʼiwa (Sal. 119:66, 138). Niya divorciasiñampïsipkäna uka chacha warminakajja, Biblian ewjjtʼanakapar istʼasaw jichhajj kusisita mayachtʼata jakasipjje. Ukham cristiano familiankir wawanakajja, munasiri familia taypinwa jilsupjje, suma uñjatäpjjewa, munatäpjjarakiwa (Efes. 5:22-29). w23.01 pág. 5 párrs. 12, 13

¿Diosan Arupan utjki uka yaqhep promesanakan phoqasitapajj kunjamsa jumar yanaptʼtam uk amuykiptʼirïtati? Kunanakatï jakañatak wakiski ukanakjja, Awkijaw churapjjätam sasaw Jesusajj säna (Mat. 6:32, 33). Jumanakatï espíritu santo mayipjjätajja, Jehová Diosajj churapjjätamwa sasaw sarakïna (Luc. 11:13). Jehová Diosajj uka promesanakap phoqewa. Kunjamsa Jehová Diosajj jiwasar yanaptʼañatakejj yaqha promesanakap phoqawayi uk amtarakpachätawa, jupajj jiwasar perdonaña, chuymachtʼaña, kunanakatï jakʼapankañatak wakiski ukanak churañwa arsuwayäna (Mat. 6:14; 24:45; 2 Cor. 1:3). Kunanaktï jiwas layku lurawayki ukanakat lupʼiñajja, kuntï jutïrin lurkani uk taqe chuyma suytʼañatakiw yanaptʼistani. Diosajj promesanakap phoqapuniniw sasaw confiytanjja. Salmo qellqerejj akham sänwa: “Jehová Diosapar suytʼir jaqejj kusisitawa. […] Jupajj jan apanukusir Diosapuniwa” sasa (Sal. 146:5, 6). w22.10 pág. 28 párrs. 15, 17

¿Jehová Dios saparukiw wasitat adorasjjani siski uka profeciajj jichhürunakan phoqasiskiti? ¡Jïsa, phoqasiskiwa! 1919 marat aksarojja, millón millón jaqenakaw Jachʼa Babiloniat mistunjjapjje, mä arunjja oraqpachankir falso religionanakat mistunjjapjje. Taqe jupanakajj Suma Oraqet sipans jukʼamp suma lugarar apatäjjapjjewa, jupanakajj mä paraisonjamwa jakasipjje (Is. 51:3; 66:8). 1919 marat aksarojja, ajllitanakajj wali kusisitaw mä paraisonjam jakasjjapjje. Tiempompejja, aka oraqen jakañatak suyasipki uka cristianonakajja, mä arun ‘yaqha ovejanakajja’ ajllitanakamp chikaw mä paraisonjam jakasjjapjje, Jehová Diosatsa walja bendicionanakwa katoqapjje (Juan 10:16; Is. 25:6; 65:13). Niyakejjay Diosan servirinakapajj oraqpachan jakstanjja, oraqpachanwa mä paraisonjam jakastanjja. Ukhamajj kawkjansay jakaskstanjja, mä paraisonjamwa jakassna, ukampis ukatakejj taqe chuymaw Diosar cheqaparjam adoraski ukar yanaptʼañasa. w22.11 págs. 11, 12 párrs. 12-15

¿Jehová Diosajj “wiñayans wiñayapatak” jakirïtap amuyañajj jumatak chʼamakiti? (Is. 40:28). Janiw jumatakik uk amuyañajj chʼamäkiti. Elihú chachajj Diosat akham sänwa: “Jupan maranakapajj janiw jaktʼañjamäkiti” sasa (Job 36:26). Ukampis jiwasatï mä kuns jan sum amuykstan ukhajja, janiw ukajj janis cheqäkaspa ukham sañ munkiti. Amuytʼañataki, kunjamatsa luza qhanajj utji uk janis sum amuykstanjja, ukajj janis luza qhanajj utjkaspa ukham janiw sañ munkiti. Niya ukhamarakiwa, Jehová Diosajj jan qalltanïtapsa jan tukuyanïtapsa inas jaqejj janipun taqpach amuykchiñäniti, ukampis ukajj janis Diosajj wiñay jakir Diosäkaspa ukham janiw sañ munkiti. Kunatï Luririsat cheqäki uk yatiñajja, janiw qhawqsa mä kunats amuytan ukarjamäkiti (Rom. 11:33-36). Alajjpachasa, intisa, warawaranakas janïr utjkäna uka nayraw Diosajj utj-jjäna. Ukatwa Bibliajj akham sasin qhanañchi: “Jupaw alajjpachanaksa [...] janatataraki” sasa (Jer. 51:15). w22.12 págs. 2, 3 párrs. 3, 4

Awisajj mayninak nayraqatan orañasatakiw mayipjjestaspa. Amuytʼañataki, Bibliat yatichir mä kullakajja, inas jupar compañki uka kullakarojj yateqeripatak orañap maychispa. Compañki uka kullakajj inas yateqerir jan sum uñtʼkchiti, ukatwa Bibliat yatjjatañ tukuyar orañ munaspa. Ukhamatwa yateqerir yanaptʼañatakejj oracionan kamsanisa uk sum yatjjani. Mä jilatarojj predikir mistuñatak tantachäwina, jan ukajj congregacionan mä tantachäwin orañapatak mayipjjani ukhajja, ¿kunsa jupajj amtañapa? Orapkani uka jilatanakajj kuna amtampis uka tantachäwejj apasi ukwa amtapjjañapa. Oracionanakajj janiw congregacionar ewjjsuñatakïkiti, ni yatiyäwinak yatiyañatakïkisa. Jilaparte tantachäwinakanjja, cancionampi oracionampejj phesqa minutonwa tuktʼayasiñapa. Ukhamasti oración lurkani uka jilatajj janiw “walja arunak” oracionan arsuñapäkiti, yamas tantachäwi qalltanakan janiw wali jay orañapäkiti (Mat. 6:7). w22.07 pág. 24 párrs. 17, 18

Jesusan arunakaparjamajja, qhepa urunakan epidemianakajj ‘ukjan akjanwa utjañapäna’ (Luc. 21:11). Uk yatiñajj sumankañwa churistu. ¿Kunatsa ukham sistanjja? Jiwasajj uka epidemianak utjañap yatjjayätanwa, janiw mä akatjamat katjkistuti. Kunjamtï Jesusajj siskäna ukarjam phoqasirwa uñjasktanjja. Ukatwa Jesusan ewjjtʼaparjam sarnaqasktanjja, qhepa urunakan jakapjjañapäkäna ukanakatakejj mä ewjjtʼa jaytäna: “Jan sustjasipjjamti” sasa. Mä epidemiajj sartki ukhajja, kunanaktï lurirïktan ukanak janiw lurañ puedjjsnati. Ukampis janiw Bibliat sapak yatjjatañsa jan ukajj tantachäwinaksa jaytañasäkiti. Kunjamsa jiwasjam jan waltʼäwinakan uñjasir jilat kullakanakajj Diosar jan jitheqtas servisipki ukwa Bibliat apstʼat qellqatanakasa videonakas amtayistu. w22.12 pág. 17 párrs. 4, 6

Jacob chachajj José yoqapar wal munasïna, ukajj qhanaw amuyasïna (Gén. 37:3, 4). Ukatwa Josean jilïr jilanakapajj jupat wal envidiasiñ qalltapjjäna. Qhepatsti, alakipa luriri madianitanakaruw aljantapjjäna. Uka chachanakajj Josearojj Egipto markaruw apapjjäna, Egipto markajj utapat walja patak kilometronak jayankänwa. Ukansti Potifar chacharuw aljantapjjarakïna, Potifarajj faraonan guardianakapan pʼeqtʼiripänwa. Cheqas Josean jakäwipajj mä akatjamatwa mayjtʼäna; jupajj awkipan wali munatäkchïnsa, jichhajj Egipto markan mä esclavöjjänwa (Gén. 39:1). Awisajj ukhamarakiw jiwasajj kuna jan walinakantï taqe jaqenakajj uñjasipki ukhaman uñjasiraksna (1 Cor. 10:13). Jan ukajj inas Jesusan discipulopätas laykojj jiwasat burlasipjjchispa, jarkʼapjjchistaspa jan ukajj arknaqapjjchistaspa (2 Tim. 3:12). Kuna jan walinakansay uñjaskchiñänejja, Jehová Diosajj taqe kunas sum sarañapatakiw yanaptʼistaspa. w23.01 pág. 15 párrs. 3, 4

Inas awisajj chuym ustʼaykistu uka jilatampi jan ukajj kullakampi parlañ amtstan. Ukampis janïr parlkasajja, akham sasin jisktʼasiñasawa: “¿Kunatï paski uk sumpacht amuytjja? (Prov. 18:13). ¿Chuym ustʼayañpunt munpachïtu? (Ecl. 7:20). ¿Nayajj mä kutis uka kikpajj lurarakirïtti? (Ecl. 7:21, 22). Jupamp parlasajj ¿cheqapunit kunatï paski uk askichäjja?” sasa. Jiwasatï uka jisktʼanakat sum amuytʼañatak tiempo apstʼasiñäni ukhajja, inas maynir munasiñamp uñjañ amtchiñäni, kunatï paski uk armjjañ amtarakchiñäni. Ukhamajj ¿kunsa sapa maynejj lurañasa? Jilat kullakanakasajj pantjasirïpkchisa, taqeniw jupanakar taqe chuym munasiñasa. Ukham luratasatjja, yaqhanakas kawkïris cheqpach religionajj uk amuyapjjaspawa, jiwasamp chikaw Jehová Diosar adorapjjarakispa. Ukhamajj cheqpach cristianötas uñachtʼayki uka munasiñamp mayninakar uñjaskakiñ amtañäni. w23.03 pág. 31 párrs. 18, 19

Jehová Diosajj wali munasirïtap amuytʼañasatakiw Bibliajj yanaptʼistu. Niyakejjay Jehová Diosajj wal munaschistojja, janiw kunanaktï jan yatiñasajj wakiski ukampejj phoqantkistuti (Juan 21:25). ¿Kunjamsa Jehová Diosajj munasiñap uñachtʼayarakistu? Biblia toqe jiwasamp parlki ukhajj khuyapayasiñampiw uñjistu. Janiw jiwasar taqe kunan controlañatakejj jan tukuskir leyinak Bibliar qellqaykiti. Jan ukasti suma amtanakar puriñasatakejj nayra tiempon jakir jaqenakan sarnaqäwinakapampi, musparkañ profecianakampi, yanaptʼkir ewjjtʼanakampiw yanaptʼistu. Ukhamatwa Bibliajj Diosar munasiñasatakisa jupar taqe chuyma istʼañasatakis chʼamañchistu. Jehová Diosajj jiwasat wal llakisitapwa Bibliajj uñachtʼayarakistu. ¿Kunjamatsa uk yattanjja? Jaqenakajj kunjamas jikjjatasipjjäna uka toqet walja kutiw Bibliajj parli. Biblian parlki uka chachanakas warminakas kunjamas jikjjatasipjjäna uk amuysnawa, jupanakajj ‘jiwasjam jaqekïpjjarakïnwa’ (Sant. 5:17). Ukampis akaw jukʼamp importantejja, Jehová Diosajj kunjamsa jiwasjam jaqenakar uñjäna uk yatjjatasajja, ‘Jehová Diosajj wali munasir chuymanïtapsa, wali khuyaptʼayasirïtapsa’ jukʼamp sumwa amuysna (Sant. 5:11). w23.02 pág. 6 párrs. 13-15

Biblian qhep qhepa libropajj aka arunakampiw qallti: “Aka arunakajja Jesucriston qhanañchat arunakawa, Diosaw juparojj qhanañchäna, ukhamat kunatï mä jukʼa tiempot paskani ukanakat Diosan esclavonakapar qhanañchañapataki” sasa (Apoc. 1:1). Kunanakatï mundpachan pasaski ukanak yatiñ munañasa, kunjamsa ukanakajj Biblian profecianakaparjamajj phoqasiski ukanak yatiñ munañas walikïskiwa. Inas uka toqenakat jilat kullakanakasamp parlañajj gustchistu. Ukampis kunjamsa Biblian profecianakapajj phoqasiski uka toqet parlktan ukhajja, amuyasiñasawa. Kuna laykutejj janiw amuyusatak parlasajj congregacionar tʼaqjjtayañ munktanti. Inas oraqpachankir pʼeqtʼirinakarojj kunjamsa jan waltʼäwinak askichapjjani, kunjamsa sumankañsa jan ajjsaras jakasiñs utjayapjjani uka toqet parlir istʼstan. Kuntï uka pʼeqtʼirinakajj sapki ukajj 1 Tesalonicenses 5:3 texton parlki uka profeciaw phoqasiskpacha sasin amuyañat sipansa, Diosan markapajj jichhak apski uka yatichäwinakatwa yatjjatañasa. Jiwasatï uka yatichäwinakarjam taqe kuns parlañäni ukhajja, congregacionarojj amuyun mayachtʼatäpjjañapatakiw yanaptʼañäni (1 Cor. 1:10; 4:6). w23.02 pág. 16 párrs. 4, 5

¿Kunatsa jumajj Jesucristor munasta? Jesusajj humilde chuymanïñaru, kunatï cheqäki, kunatï cheqapäki ukwa arjjati, uk utjañapatakiw chʼamañcharaki. Ukhamajj jumatï kunatï cheqäki kunatï cheqapäki ukar munasstajja, Jesusarojj munasiraktawa. Jesusajj kunatï cheqäki kunatï cheqapäki uk jan ajjsartʼasaw arjjatäna (Juan 18:37). Ukampis ¿kunjamsa taqenin humilde chuymanïpjjañapatak chʼamañchi? Jesusajj arsutapampi luratanakapampiw humilde chuymanïñ utjañapatak chʼamañchi. Ak amuytʼañäni, Jesusajj Awkiparupuniw jachʼañchirïna, janipuniw mayninakamp jachʼañchatäñ thaqerïkänti (Mar. 10:17, 18; Juan 5:19). ¿Jesusan humilde chuymanïtapat kunsa amuyta? ¿Janit ukajj Diosan Yoqapar munasiñatakisa, kayup arkañatakis chʼamañchktamjja? Cheqas uk lurañatakiw chʼamañchpachätamjja. ¿Kunatsa jupajj humilde chuymani? Kuna laykutejj Jehová Diosaw humilde chuymanejja, Awkipajj kunjam chuymanisa uk wali valoranitwa Jesusajj uñji, jupatwa yateqasiraki (Sal. 18:35; Heb. 1:3). Ukaw Jesusar jakʼachasiñatak yanaptʼistu. w23.03 págs. 3, 4 párrs. 6, 7

Bibliarjamajja, pä gruponakaw aka oraqen wiñay jakañatak jaktanipjjani: nayrïr grupojj ‘cheqapar sarnaqer jaqenakawa’, payïr gruposti ‘jan cheqapar sarnaqer jaqenakarakiwa’. ‘Cheqapar sarnaqer jaqenakajja’, jakkasin Jehová Diosar jan jitheqtas servirinakawa. ‘Jan cheqapar sarnaqer jaqenakasti’, janïr jiwkasin Jehová Diosar jan servipkäna ukanakawa. Niyakejjay uka pä gruponakajj jaktanipjjchinejja, ¿sutinakapajj jakañ libron qellqantatäjjewa sañti munpacha? ‘Cheqapar sarnaqer jaqenakan’ sutinakapajj janïr jiwapkäna ukhaw jakañ libron qellqantatäjjäna, ¿jiwjjapjjäna ukhajj sutinakapajj jakañ librot borrsutäjjänti? Janiwa. Jehová Diosajj janiw jupanakat armaskiti. “Jupajj janiw jiwatanakan Diosapäkiti, jan ukasti jakirinakan Diosapawa. Jupatakejj taqe uka jaqenakajj jakasipkiwa” (Luc. 20:38). Ukhamasti cheqapar sarnaqer jaqenakajj aka oraqen jakañatak jaktanipkani ukhajja, sutinakapajj jakañ libron qellqantatakïskaniwa. Ukampis qalltanjja, “lapizamp” qellqtʼatäkaspas ukhamakïniwa (Luc. 14:14). w22.09 pág. 16 párrs. 9, 10

Jehová Diosajj nayraqat lurkäna uka chachajj Diosan luratanakapat wal disfrutaspa ukwa munäna. Ukatwa Adanarojj mä suma paraisor uchäna, ukhamat ukan jakañapataki, yapuchañapataki ukhamarak uka oraq jithitatayañapataki (Gén. 2:8, 9). Jathanakat jilsuri, plantanak panqarir uñjasajj ¿kunjamas Adanajj jikjjataspachäna uk amuyasmati? Edén jardín cuidañajj jupatak mä jachʼa privilegiönwa. Jehová Diosajj animalanakar suti uchañapwa Adanar mayïna (Gén. 2:19, 20). Jehová Dios pachpaw uk luraspäna, ukampis Adanaruw uk lurañapatak mayïna. Cheqas Adanajj wali amuyumpiw animalanak uñchʼukpachäna, kunjam lurtʼatäpjjesa kunanaksa lurapjje ukanakwa janïr suti uchkasajj uñjpachäna. Uk lurañajj jupatak wali sumäpachänwa, Diosan wali yatiñanïtapsa, luratanakapajj kunja suma lurtʼatasa musparkañasa ukanaksa amuyarakpachänwa. w23.03 pág. 15 párr. 3

Jachʼa estatuan kayunakapampi saski uka Reino Unido ukat Estados Unidos mayachtʼat potencia mundialajja, Biblian parlki uka qhep qhepa potencia mundialawa (Dan. 2:31-33). Ukhamasti uka potencia mundial qhepat janiw yaqhajj utj-jjaniti. Uka potencia mundialarusa, jaqenakan gobiernonakaparus Diosan Reinopaw Armagedonan jankʼaki qʼal tukjani (Apoc. 16:13, 14, 16; 19:19, 20). ¿Kunjamsa uka profeciajj yanaptʼistu? Danielan profeciapajja, qhep qhepa urunakan jakaskataswa jukʼamp qhanañchistu. 2.500 jila maranak nayrajja, Babilonia markajj tʼunjatäjjani uka qhepat yaqha pusi potencia mundialanakaw Diosan markapar jan waltʼayapjjani sasaw Danielajj mä profecian arsüna. Ukatjja, Reino Unido ukat Estados Unidos mayachtʼat markanakaw qhepïri potencia mundialäni sasaw qhanañchäna. Uk yatiñajj wal chuymachtʼistu, mä suytʼäwi churarakistu, kuna laykutejj Diosan Reinopajj niyaw jaqenakan gobiernonakapar jan mayampitak tʼunjani, ukat Diosan Reinopakiw aka oraq apnaqjjani. w22.07 pág. 4 párr. 9; pág. 5 párrs. 11, 12