Bibliat jukʼamp yatxatañataki
2. Suma amuyumpiw liytʼañasa
¿Janïr uñtʼkayäta uka jaqit jan walinak parlapxirïtamti? Ukat juma pachpa uñtʼxta ukhaxa, ¿kunjamsa jupar uñjta? Chiqasa ukham jan walinak maynit parlapxistäna ukhax kunjam chuymanisa ukat kunjam jaqisa ukanak amuyañax chʼamakïpachänwa. Niya ukhamarakiw walja jaqinakax Bibliat amuyayapxi.
BIBLIA liykasax kunsa chiqpachapuni yatichi uk yatxatañatakiw liytʼañasa, apóstol Pablox uk sum amuyäna. Nayrïri patak maranakan (siglo I) jakiri judionakax ukhamäpxänwa, ukatwa Pablox jupanakat akham säna: “Jupanakanx Diosatak munañ chuymax utjaskiwa, ukampis jupanakan Diosar munañax janiw chiqpach amuytʼañxankiti” sasa (Romanos 10:2).
Hebreo Arut Qullan Qillqatanakanxa jutaniw sat mesiasat qhanaw qillqatäskäna, ukampisa, kawkit Jesusax mesiasänixa sapxänwa. Ukat Nazaret markankir Jesusat profecianakax qillqatäkäna ukanakarjamasa Jesusax phuqharakïnwa, ukampis kuntï judionakax yatipkäna ukar atinisisax Diosan Arupat janiw sum amuytʼapkänti.
¿Kuns uka sarnaqäwit yatiqsna? Taqi chuym Biblia liyiñax wali wakiskiriwa, ukwa yatichistu. Ukatwa jiwasax taqi chuyma Bibliat yatxatañar uchasiñasa ukhamatwa chiqpach yatichäwinak sum yatxatarakiñäni.
Carolina del Norte (Estados Unidos) uksankir yupaychäwi tuqit mä yatichirix Bibliat akham sänwa: “Aka librox jaqinakan lurata ukat jaqinakatakiwa, may maya parli janiw mä amtak yatichkiti, iwxanakapax janiw atiniskañäkiti” sasa. Jiwasatï uka jaqjam “aka librox jaqinakan lurata ukat jaqinakatakiwa” sasin amuyaraksna ukhaxa, Biblian utjki uka iwxanakarus kamachinakarus janiw istʼañ munxarakiñäniti.
Ukatwa sum amuytʼasa yatxatañasatak Bibliax chʼamañchistu, apóstol Pablo jakkäna uka tiempon Berea markan jakir jaqinakatwa yatiqasiraksna. Jupanakaxa janiw “suma chuyman[ikïpkänti]” jan ukasti, “sapürurakiw Qillqatanaksa yatxatapxäna. Uka arunakax ¿chiqapunïpachati janicha?” sasa (Hechos 17:11). Biblia liytʼasa sum amuytʼañ munstan ukhax bereankir jaqinakjamaw taqi chuyma yatxatañasa, ukatakisti yatxtan ukarukix janiw atinisiñasäkiti ni jan walinak Bibliat parlapkistu ukanakarus yäqañasäkarakiti. Ukhamasti, Biblia liykasax kunsa chiqpachapuni yatichi uk yatxatañatak chʼamachtʼasim ukat Jehová Diosan kusiskañ yatiyäwinakapsa yatxarakïtawa.