Wawanakar yatichañataki
¿Kunatsa Dorcas warmix wali munatäpachänxa?
TAQINIW munasiñampi uñjatañ muntanxa. ¿Janich ukhamäki?a... Biblianxa, Dorcas sat sutini mä warmitwa parli, taqiniw juparux wal munasipxäna.
Warminakatxa, Dorcasaw Jesusan nayrïr arkiripänxa, jupax Jope markanwa jakasïna, uka markax Mediterráneo lamar quta lakankänwa. Ukat Jerusalén markax 56 kilometronak sarañankänwa.
¿Kunatsa Dorcas warmix wali munatäpachäna?... Jupax walja askinakwa luräna ukat suma regalonak churirïna sasaw Bibliax qhanañchi. Jupax wali suma isinakwa viudanakatak lurirïna, jupanakan chachanakapax jiwatäxapxänwa. Ukat Jesusat yatiqasisax taqiniruw Jehová chiqpach Diosat parlarakïna.
¿Kunas Dorcas warmir paspachäna?... Wal usuntasaw jiwawayxäna. Ukat amigonakapax wal llakisipxatap laykuxa, “jankʼak jutam Jope markaru” sasinwa apóstol Pedror jawsayapxäna, jupasti 16 kilometronak jayankänwa. Purisinsti jankʼakiw Pedrox kawkhankkantix Dorcas warmix uka cuartor makatäna ukat warminakax jachtʼasisaw kuna isinaktï Dorcasax jupanakatak luräna uk uñachtʼayapxäna.
Ukat Pedrox taqiniruw anqar mistupxam sasin säna. Jupasa ukat mayni apostolanakasa walja milagronakwa lurapxäna, ukampis janiw jiwatanakar jaktayapkänti. ¿Kunsa Pedrox lurpachäna?...
Dorcas warmin ladopan qunqurtʼasisaw jan ukax killtʼasisaw Pedrox Diosat mayisïna. Ukat “sartam” sasaw Dorcasar säna, jupasti ukspachaw uñatatäna. Ukat amparat waytasinwa saytʼañ yanaptʼäna. Ukatxa, Dorcasar uñjapxañapatakiw viudanakaru ukat mayninakar jawsayäna. ¿Kunja kusisitas taqinis jikxatasipxpachäna uk amuyasmati?...
¿Kunsa Dorcas warmin jaktanitapat yatiqsna? Jumatï mayninakar yanaptʼäta ukhaxa, waljaniw wali munasiñampi uñjapxätam. Ukat janiw ukakïkaniti, Jehová Diosaw wali munasiñampi uñjätam ukat janiw jumatsa ni suma luratanakamatsa armaskaniti, ukatsti Paraisonx wiñayatakiw kusisit jakayätam, ukaw taqi kunat sipansa wali askixa.
Bibliat liytʼañataki
[Qhanañchäwi]
a Mä wawatakitï aka yatichäw liytʼaskstaxa, kimsa puntonak uñjasaxa, wawan arstʼañapatakiw suytʼañama.