SARNAQÄWI
Jehová Diosar confiyañaw salvitu
“¿JEHOVÁ DIOSAR servisajj kunjamas jakasiwayta?” sasin jisktʼapkitu ukhajj akham sistwa: “Jehová Diosan amparapankir mä maletjamätwa” sasa. Uka arunakampejj ak sañ munta, kunjamtï maletaj kawkirutï munkta ukar apktjja, ukhamarakiw Jehová Diosampisa markapampis irpayasta, jupanakaw kawkirusa kunapachas sarañaja uk sapjjetu, nayasti ukarjamaw sararakta. Jan walinakan uñjaskayäta uka lugaranakaruw khitapjjetäna, awisajj jakäwij niyaw aptʼasiyäta, ukampis ukanakat salvasiñatakejj Jehová Diosar confiyañwa yateqayäta.
JEHOVÁ DIOSARUW UÑTʼTA JUPARUW CONFIYARAKTA
Nigeria markat inti jalanta aynach toqenkir mä jiskʼa markanwa 1948 maran nasta. Uka maranakanjja, tatajan Moustapha sat sullka jilapampi, Wahabi sat jilïr jilajampiw Jehová Diosan Testigopäpjjäna. Llätunka maranïkayäta ukhaw tatajajj jiwjjäna. Tatajan jiwatapat walpun llakisiyäta. Jiwatat jaktanjjani ukhaw papitusar wasitat uñj-jjañäni sasaw Wahabi jilajajj sitäna. Uka suma suytʼäwit amuytʼañaw Bibliat yateqañatak wal yanaptʼitäna. 1963 maranwa bautisasta, kimsa jilanakajas bautisasipjjarakïnwa.
1965 maranjja, Wilson sat jilïr jilajajj jakkäna uka Lagos markaruw sarjjta. Ukanjja, Igbobi sat congregacionankir yaqhep precursor jilat kullakanakampiw wali sum compartiyäta. Jupanakar wali kusisita, Diosar taqe chuyma servir uñjasajj enero de 1968 maranwa precursorat serviñ qalltayäta.
Betelan servir Albert Olugbebi jilatajja, wayn tawaqonakaruw tantachtʼapjjetäna, Nigeria markan precursor especialanak faltatapwa yatiyapjjarakitäna. Kamsasas Albert jilatajj wal chʼamañchtʼapjjetäna uk amtaskaktwa. Jilatajj akham sänwa: “Jumanakajj wayn tawaqöpjjtawa, tiempsa chʼamsa Jehová Diosaruw churapjjasma. Ukan walja lurañaw utji” sasa. Nayajj Isaías profetjamäñ munasajj kawkjarutï Jehová Diosajj khitañ munkitäna ukar sarañwa munayäta, ukatwa mä solicitud phoqantayäta (Is. 6:8).
1968 maran mayo phajjsinjja, Nigeria markat alay toqeruw Kano markar precursor especialat khitapjjetäna. Uka pachpa tiemponarakwa, 1967 marat 1970 marakamajj Biafra toqen guerrajj apasïna. Uka guerra utjatapat waljaniw tʼaqesipjjäna jiwapjjarakïna, ukatjja uka markat alay toqenwa uka guerrajj utj-jjarakïna. Nayar yanaptʼañ munasajj Kano markar jan sarañajatakiw mä jilatajj ewjjtʼitäna. Ukampis akham sayätwa: “Nayat llakisitamat yuspärsmawa. Ukampis Jehová Diosatï Kano markar sarañaj munchejja, jupaw yanaptʼitani, janiw ukat payachaskti” sasa.
GUERRAMP JAN WALTʼAYAT MARKANWA JEHOVÁ DIOSAR CONFIYTA
Kunanaktï Kano markar purisajj uñjkayäta ukajj wali llakkañänwa. Guerra civilajj uka markar sintpun jan waltʼayäna. Predikkasajja, guerran jiwarayat jaqenakan cuerponakapwa uñjapjjayäta. Kano markan walja congregacionanakas utjchïnjja, jilat kullakanakat jilapartew uka markat escapjjapjjatayna. Uka markan 15 publicadoranakakiw quedasipjjatayna, jupanakajj wali sustjatäpjjänwa, desanimatäpjjarakïnwa. ¡Sojjta precursor especialanak uka markar puripjjatajat walpun kusisipjjäna! Chʼamañchtʼapkayäta ukajj walpun jupanakar yanaptʼäna. Wasitat tantachasipjjañapataki, predicapjjañapataki, sucursalar informenakap apayapjjañapataki, Bibliat apstʼat qellqatanak mayipjjañapatakiw yanaptʼapjjayäta.
Sarapkayäta uka precursor especialanakat taqeniw hausa aru yateqañ qalltapjjayäta. Pachpa arupat jaqenakar predicapjjatajatjja, ukankir jaqenakajj waljaniw sum istʼapjjetäna. Ukampis uka markan wali uñtʼat religionankirinakat yaqhepajj janiw predicapjjañaj munapkänti. Ukatwa wali amuyump sarnaqapjjañajäna. Mä urojja, nayampir compañerojampirojj mä chachaw cuchillos aptʼat arknaqapjjetäna. Nanakajj jupat sipans jukʼamp ratuk tʼijusaw escapapjjayäta. Kunjamtï Salmo 4:8 qellqatajj siskejja, jan walinakans Jehová Diosaw ‘jan ajjsaras jakañatak’ yanaptʼapjjetäna, publicadoranakajj jukʼat jukʼatwa jiljjattarakïna. Jichhajj Kano markan 11 congregacionanakaw utj-jje, 500 jila publicadoranakaw utj-jjaraki.
NÍGER MARKAN ARKNAQAPJJETU
Niamey (Níger) markan precursor especialat sirvta.
1968 maran agosto phajjsinjja, Kano markar puripjjatajat mä qhawqha phajjsinakakiw pasaskäna, ukhaw nayampir pä precursor especialanakampir Niamey markar khitapjjetäna, uka markajj República de Níger markan capitalapawa, África Occidental toqenkarakiwa. Oraqpachan utjir wali juntʼu lugaranakatjja, puripkayäta ukspachaw Níger markajj ukanakat maynïrïtap amuyapjjayäta. Janiw caloraruk yatinoqtapjjañajäkänti, jilpach parlaskäna uka francés aru yateqapjjañajarakïnwa. Ukhamanakan uñjaskasas Jehová Diosaruw confiyapjjayäta, Niamey markan jukʼa publicadoranakampikiw predicañ qalltapjjarakiyäta. Uka markan liytʼañ yatipkäna ukanakatjja, niya taqenejj mä qhawqha tiemponakwa La verdad que lleva a vida eterna sat libronïpjjäna, ukampiw Bibliat yatichapjjayäta. Yamas yaqhepajj nanakan ukaruw uka libro mayisirejj jutapjjeri.
Autoridadanakajj janiw Jehová Diosan Testigonakapar sum uñjapkänti, ukar puripkayät ukspachaw uk amuyapjjayäta. Uka markanjja, julio phajjsin 1969 maran nayrïr asamblea de circuito apapjjayäta, ukan niya pä tunkaniw tantachasipjjayäta. Pä publicadoranakan bautisasipjjañap yatisajj wal kusisipjjayäta. Ukampis asamblean nayrïr urunjja, asambleajj apasiskäna ukhamaruw policianakajj purinipjjäna. Ukatsti circuitompir precursor especialanakampiruw estación de policía ukar apapjjäna. Ukanwa jisksupjjetäna, qharüruw kuttʼanipjjäta sasaw sapjjarakitäna. Autoridadanakan nanakar jarkʼañ munapjjatap amuyasjjapjjayätwa, ukatwa bautisasirinakatak discurso arstʼasiñapatakejj mä utan wakichapjjayäta, ukatsti bautisasirinakajj jan khitin amuykañakiw jawiran bautisasipjjäna.
Mä qhawqha semananak pasatatjja, Ministerio del Interior ukankirinakaw nayampiru mayni phesqa precursor especialanakampirojj uka markat alisnukupjjetäna. Níger markat sarjjañatakejj 48 horanak churapjjetäna, nanakaw kunjam sarjjañs amtapjjañajäna. Jupanakar istʼasajja, Nigeria markankir sucursalaruw sarjjapjjayäta. Sucursalatjja yaqha lugaranakaruw khitapjjarakitäna.
Nigeria markankir Orisunbare sat markaruw asignapjjetäna. Ukankir mä qhawqha jilat kullakanakamp predicasasa mä qhawqhanir Bibliat yatichasas wal kusisiyäta. Ukampis sojjta phajjsi qhepatjja, Níger markar kuttʼañajatakiw sucursalajj mayitäna, naya sapakiw ukar sarañajäna. Uka invitación janiw suykayätti, llakisiyarakitänwa. Ukampis Níger markankir jilat kullakanakar wasitat uñjañ wal munayäta.
Niamey markaruw kuttʼayäta. Purkayäta uka qhepärmanthejja, Nigeria markan negocionak lurir mä jaqew nayan Testigötaj amuyäna, Bibliat waljanakwa jisktʼarakitäna. Bibliat yateqasajja, uka chachajj cigarro fumañ jaytjjänwa, janirakiw alcohols umjjänti, ukatwa bautisasjjäna. Ukatjja, markan kunayman lugaranakanwa predicayäta, kunjamsa jaqenakajj jukʼat jukʼat Biblian cheqa yatichäwinakaparjam sarnaqapjjäna uks uñjarakiyätwa, ukajj nayatak mä jachʼa bendicionänwa. Níger markar purkayäta ukhajja, 31 Testigonakaw ukan utjäna, sarjjayäta ukhajj 69 Testigonakaw utj-jjarakïna.
“KUNJAMAS GUINEA MARKAN PREDICASISKI UK JANIW YATIPKTI”
1977 maran diciembre phajjsinjja, kimsa semananak capacitación katoqañatakiw Nigeria markar kuttʼayäta. Tukuyjjäna ukhajja, Comité de Sucursalankir Malcolm Vigo sat coordinador jilatajj Sierra Leona markankir sucursalat apayanit mä carta churitäna. Uka jilatanakajj mä soltero precursor jilat thaqasipkäna, uka jilatajj kʼumaräñapänwa, inglés, francés arunak parlirïñaparakïnwa, ukhamat Guinea-Conakri markan circuitot serviñapataki. Malcolm jilatajj circuitot serviñamatakiw uka capacitacionar invitapjjsma sasaw sitäna. Uka lurañamp phoqañajj jan facilätapwa jilatajj qhanañchitäna, “Janïr iyawskasajj sum amuytʼasim” sasaw ewjjtʼarakitäna. Ukampis nayajj jankʼakiw akham sayäta: “Jehová Diosaw ukar khitaskitu, ukhamajj saräwa” sasa.
Sierra Leona markar avionat viajisajj sucursalankir jilatanakampiw tantachtʼasiyäta. Comité de Sucursalankir mä jilatajj akham sitänwa: “Kunjamas Guinea markan predicasiski uk janiw yatipkti” sasa. Cheqas sucursalaw kunjamas Guinea markan predicasiski uk uñjäna, ukampis política toqet jan waltʼaña utjatapat janiw publicadoranakamp kunjamats parlañ puedipkänti. Walja kutiw uka markarojj Diosan markapankir mä representantepar khitañ munapjjäna, ukampis janiw puedipkänti. Ukatwa Conakri markar khitapjjetäna, uka markajj Guinea markan capitalapänwa, ukan jakañatakiw permiso apsuñajarakïna.
“Jehová Diosaw ukar khitaskitu, ukhamajj saräwa”
Conakri markar purisajja, Nigeria markan embajadapar sarasajj embajadorampiw parlayäta. Guinea markan predicañ munatajwa sayäta, ukampis jupajj “Jan predicamti, carcelaruw llawintapjjätam jan ukajj jukʼamp jan walinak lurapjjätam” sasaw ewjjtʼitäna. “Nigeria markar kuttʼjjam, ukan predicam” sasaw sarakitäna. Nayasti, “Akan quedasiñatakiw amtjjta” sasaw sarakiyäta. Embajadorajj Guinea markankir Ministro del Interior ukaruw nayar yanaptʼañapatak mä carta qellqäna, ministrojj yanaptʼarakitänwa.
Mä qhawqha tiempotjja, Sierra Leona markankir sucursalaruw kuttʼayäta, kuntï ministrojj amtkäna ukwa jilatanakar awisarakiyäta. Jehová Diosan bendicionapampejj Guinea markankir gobiernojj uka markan quedasiñajatakiw permiso churitäna, uk yatisajj walpun jilatanakajj kusisipjjäna.
Sierra Leona markan circuitot sirvta.
1978 marat 1989 marakamajja, Guinea ukat Sierra Leona markanakan superintendente de circuitot serviyäta, Liberia markan circuiton sustitutopjamaw yanaptʼarakiyäta. Qalltan sapa kutiw usuntayäta. Awisajj markat jaya cheqanakar viajkayäta ukhaw usuntirïta, ukampis jilat kullakanakajj hospitalar nayar apañatakejj wal chʼamachasipjjeri.
Mä kutejj walpun usuntayäta, malaria usuniyätwa, sellqʼonakaw jiphillajan utjarakïna. Ukampis waliptjjayäta ukhajja, jilat kullakanakajj kawkirus jilatar imtʼjjañäni sasin parlapjjatapwa yatiyäta. Awisajj jan walinakan uñjasisajj niyas vidaj aptʼaskchiyätjja, janiw kunapachas circuitot serviñ jaytañ pienskayätti. Nayajj janiw akat payachaskti: Jehová Diosakipuniw cheqans jakayistaspa, juparakiw jaktayistaspa.
ESPOSAJAMPEJJ JEHOVÁ DIOSARUW CONFIYAPJJTA
Casarasipkta uka uru, 1988 marana.
1988 maran Dorcas kullakaruw uñtʼayäta, jupajj Diosar taqe chuym serviri wali humilde kullakänwa. Casarasisajj circuitot servisipkakiyätwa. Jupajj nayar yanaptʼapunirïnwa, munasirakitänwa, Jehová Dios laykojj kunayman sacrificionak lurarakïna. Mä congregacionat yaqha congregacionar sarañatakejja, awisajj 25 kilometronakaw qʼepinakamp kayuk sarapjjerïta. Jaya lugarankir congregacionanakar puriñatakejj taqe kunatwa sarapjjerïta. Ñeqʼerara pʼiya pʼiya thakinak sarapjjerïta.
Dorcas esposajajj janiw kuns ajjsarkiti. Awisajj cocodrilonakan phoqantat jawiranak pasapjjañajänwa. Mä kutejj phesqa urunakaw viajisipkayäta, maderat lurat puentenakan jan walïtapat canoatwa mä jawir paskatapjjañajäna. Esposajajj canoat mistuñatak saytʼasïna ukhajja, umar jalaranttasaw chhaqaranttäna. Janiw nayas esposajas nadañ yatipkayätti, uka jawiran cocodrilonakaw utjarakïna. Ukhamaruw mä waynanakajj umar thoqontasin esposajar umat apsupjjäna. Mä qhawqha tiempojja, panpachaniw kunatï ukürojj pasapkitäna ukamp samkasipjjayäta, ukhamäkchïnsa lurañanakajamp phoqasipkakiyätwa.
Jahgift ukat Eric wawanakajajj Diosan regalopawa.
1992 mara qalltanjja, esposajan usurïtapwa yatipjjayäta. Ukhamajj ¿circuitot serviñ jaytjjapjjañajat wakisïna? Nanakajj akham sapjjayätwa: “Aka wawajj Jehová Diosan regalopawa” sasa. Ukatwa imill wawajarojj Jahgift sutimp uchapjjayäta (uka sutejj “Jah Diosan regalopa” sañ muni). Pusi mara qhepatjja, Eric wawajaw nasirakïna. Jupanakajj Jehová Diosan suma regalonakapäpjjewa. Jahgift wawajajj Oficina Remota de Traducción de Conakri ukanwa mä tiempojj yanaptʼäna, Eric wawajajj siervo ministerialarakiwa.
Tiempompejj Dorcas esposajajj precursora especialat serviñ jaytjjchïnsa, precursora regularat serviskakïnwa, wawanakajj jiskʼäsipkäna ukhas ukham serviskakïnwa. Jehová Diosan yanaptʼapampejj precursor especialat serviskakiyätwa. Wawanakajajj jilarjjapjjäna ukhajja, Dorcas esposajajj wasitatwa precursora especialat sirvjjäna, jichhajj paninpachaw Conakri markan misionerot servisipkta.
JEHOVÁ DIOSAW JARKʼAQAPJJETU
Nayajj kawkirutï Jehová Diosajj khitkitäna ukaruw sarayäta. Walja kutiw kunjamsa Jehová Diosajj jarkʼaqapjjetu bendisipjjetu uk esposajamp uñjapjjta. Utjirinakar confiyañat sipans Jehová Diosar confiyasajja, janiw kuna jan walinakansa ni llakinakans uñjasipkti. Jehová Diosaw ‘salvir Diosajja’, jupakipuniw kunats salvistaspa, ukwa esposajampejj uñjawayapjjta (1 Crón. 16:35). Jehová Diosar confiyapki ukanakan jakañ vidapajj ‘jakañ imañ bolsan’ wali suma imatawa, janipuniw ukat payachaskti (1 Sam. 25:29).