Kunayman toqenakatwa Jehová Diosar sirvsna

DIOSAN Reinopat yatiyañarojja, Jesusajj mä cosecha apthapiñäkaspas ukhamwa uñjäna, ukatwa yatiyañatak horasajj purinjjäna ukhajj akham säna: “Cosecha apthapiñajj waljawa, ukampis trabajirinakajj jukʼanikiwa” sasa. Uka luräwin waljätap laykojj akham saskakïnwa: “Khititï cosecha apthapiyaski ukarojj trabajirinak cosechapar khitaniñapatak mayipjjam” sasa (Mat. 9:37, 38). Ukatjja akham sarakïnwa: “Qhanakwa sapjjsma, janïraw Israelan taqpach markanakapsa muytapkätati, ukhaw jaqen Yoqapajj purinini” sasa (Mat. 10:23). Uka arunakampejja predicañajj qhawqha wakiskirïnsa ukwa uñachtʼayaskäna. Ukhamasti janiw tiempo ina chʼusar aptʼasiñ horasäkänti.

² Jichhürunakan niya ukhamarakiw pasi, walja lurañaw utjistu. Suma yatiyäwinakajj janïr akapach tukuskipanwa yatiyasiñapa, ukampis ukatakejj jukʼa tiempokiw utj-jjestu (Mar. 13:10). Predicañajj waktʼkistu uka territoriojj aka oraqpachawa, ukampis yatiyirinakajj oraqpachankir walja millón jaqenakat sipansa jukʼanikïtanwa. Ukhamäkchisa Jehová Diosaw yanaptʼaskistu, ukatwa suma yatiyäwinakajj aka oraqpachan predicasini sasin confiytanjja. Ukjjaruw Jehová Diosajj amtki ukarjamajj akapachan tukusiñapajj purinini. ¿Jiwasanakat kamsasispasa? ¿Diosan Reinopat yatiyañajj jakäwisan nayrankiti? ¿Uka amtas phoqañatakejj kunanak lurañas yanaptʼistaspa?

³ Kunjamtï Jesusajj siskänjja, Jehová Diosajj servirinakapan taqe chuyma jupar servipjjañapwa muni, Jesusajj uka toqet akham sänwa: “Jehová Diosamarojj taqe chuymamampi, taqe almamampi, taqe amuyumampi, taqe chʼamamampi munasiñamawa” sasa (Mar. 12:30). Jehová Diosaruk serviñ munatassa, jupar jakañ vidas katuyasitassa, kunjamtï jupajj munki ukarjam servisaw uñachtʼaytanjja (2 Tim. 2:15). Cheqansa taqeniw kunayman luräwinak lurañ yattanjja, taqenis janirakiw mä igualak jakasktanti, ukhamäkchisa Jehová Diosar jukʼamp serviñatakiw chʼamachasiñasa. Jichhajj kunanaksa Diosar sirvkasajj lursna ukwa uñjaskañäni, ukanakaw nayrar sartaskakiñatak yanaptʼistani.

PUBLICADORÄÑA

⁴ Diosan Reinopat yatiyañajj wali wakiskiriwa, uka luräwimp phoqapjjañapatakiw Jesusajj discipulonakapar mayïna. Taqe khitinakatï Biblian cheqa yatichäwip katoqasipki ukanakaw uka luräwimp phoqapjjaspa (Mat. 24:14; 28:19, 20). Kunjamtï Andrés, Felipe, Cornelio ukat yaqhanakajj lurapkäna ukhamwa Jesusan discipulopar tukupki ukanakajj lurapjjarakispa. Cheqansa Jesusan discipulonakapajj yateqañ qalltapki ukhatpachwa predicapjjaspa (Juan 1:40, 41, 43-45; Hech. 10:1, 2, 24; 16:14, 15, 25-34). Mä arunjja, maynejj janïr bautisaskasaw kunatï cheqäki uk yaqhanakar parljjaspa. Maysa toqetjja, maynejj jan bautisat publicadoräñatak mayitanakamp (requisitonakamp) phoqjje ukhatpachaw utat uta predikirejj mistjjaspa. Ukatjja kunjamanjjay jakaschi ukat kunanakjjay sum lurtʼañ yatchi ukarjamaw kunayman toqet predicaspa.

⁵ Bautisasjje uka qhepatjja, mä publicadorajj yaqha jaqenakar Bibliat yatichañatakiw wal chʼamachasi. Cheqansa taqeniw Reinon suma yatiyäwinakapat predicasajj Diosan markapar yanaptʼtanjja. Jiwasatï Jehová Diosar kunayman toqet serviñatak wal chʼamachasiñäni ukhajja, wali kusisitaw jikjjatasiñäni.

KAWKJANTÏ YANAPAJJ MUNASKI UKAN YANAPTʼAÑA

⁶ Inas walja kuti jaqenakar predicaski uka cheqan jiwasajj jakasstan, ukhamätap laykojj inas kawkjantï predikirinakajj munaski ukar sarañ amtaskstan (Hech. 16:9). Jan ukajj inas kawkjantï ancianonakana ukhamarak siervo ministerialanakan yanaptʼapajj munaski uka congregacionar sarañ amtaskstan. Jiwasatï yaqha congregacionar sarañ munstan ukhajja, superintendente de circuito jilataw kawkïr congregacionar sarañas wakisispa uk sistaspa. Ukampis jiwasatï markasankir yaqha lugarar sarañ munstan ukhajja, sucursalaw uka toqet sum qhanañchtʼistaspa.

⁷ Maysa toqet jiwasatï yaqha (extranjero) markan Diosar serviñ munstan ukhajja, wali sumwa amuytʼasiñasa, kuna laykutejj jakäwisasa jan ukajj jiwasamp chik sarañ munapki ukanakan jakäwipas cambianiwa. Ukatwa sum amuytʼasiñasa, congregacionasankir ancianonakampis parltʼañasa (Luc. 14:28). Ukampis jiwasatï jan jaya tiempo yaqha markar sarañ munkstan ukhajja, pachpa markasankir yaqha lugarar sarañwa amtsna.

⁸ Yaqhep lugaranakanjja, jilatanakajj congregacionan walja lurañanakanïpjjewa, jukʼa tiempokirakiw Diosan markapankasipki. Ukatwa jupanakajj experienciani ancianonakan responsabilidadanak katoqapjjañap munapjje, ukhamatwa humildëpjjatap uñachtʼayapjje. Ukampis jumatï ancianösta, uka congregacionar sarañ munaraksta ukhajja, janiw jupanakar reemplazañatak sarktati, jan ukasti jupanakamp chik serviriw sarasktajja. Jupanakarojj jukʼamp privilegionak katoqapjjañapatakiw chʼamañchtʼasma, congregacionan luräwinak katoqapjjañapatakis chʼamañchtʼarakismawa (1 Tim. 3:1). Sarkta uka congregacionanjja, inas kunjamtï markaman lurasirïki ukham jan taqe kunas luraskchiniti. Ukhamäni ukhajj janiw desanimasiñamäkiti, jan ukasti experienciamamp jilatanakar yanaptʼañatakiw chʼamachasiñama. Ukhamatwa markamar kuttʼjjäta ukhajj congregacionar uñjañatakejj ancianonakajj suma wakichtʼatäpjjani.

⁹ Jumatï ancianösta, siervo ministerialästa, precursorästa, publicadorästa, jan ukajj yaqha ukham privilegionïsta ukhajja, kawkïr markantï Jehová Diosar serviñ munkta uka markankir sucursalarojja congregacionamankir Comité de Serviciow mä carta de recomendación apayañapa, uka cartamp chikajj solicitud de información ukwa apayañaparaki. Ukjjarusti uka sucursalaw kawkïr congregacionanakansa yanaptʼajj munasi uk yatiyapjjätam.

YAQHA ARUT PREDICAÑA

¹⁰ ¿Yaqha aru parlañti yateqañ munta? Jan ukajj ¿lenguaje de señas aru yateqañcha munta? Ukhamächi ukhajja, Jehová Diosar jukʼamp serviñatakiw ukajj yanaptʼätam. Yaqha aru yateqañ munatamatjja, ancianonakampi superintendente de circuito jilatampiw parltʼasma. Jupanakaw kunsa ukatakejj lurasma uk sapjjeristam, chʼamañchtʼapjjarakiristam. Sucursalan pʼeqtʼatajja, yaqhep circuitonakajj cursos de idiomas ukwa organiztʼapjje, uka cursonakarojj mä qhawqha publicadoranakaru ukhamarak precursoranakaruw invittʼasi.

PRECURSORAT SERVIÑA

¹¹ Precursor auxiliarata, regularata, precursor especialata jan ukajj yaqha ukham toqenakat Diosar sirviñatakejj kuna mayitanakampis phoqañasa uk taqeniw yatiñasa. Precursoranakajj wali yateqaskayaw sarnaqapjjañapa, qhawqhatï mayiski ukha horanakwa predicapjjañaparaki. Comité de Servicio ukankir jilatanakaw precursor auxiliarataki jan ukajj precursor regularatak solicitudanak aprobapjje. Precursor especialat serviñatakejj sucursalaw maynir uttʼayi.

¹² Precursor auxiliaratjja mä phajjsi, jukʼamp phajjsinaka, jan ukajj kawkjakamatï puedki ukhakamaw maynejj servispa. Waljaniw vacacionanakan precursor auxiliarat servipjje (sañäni, escuelankapki uka wayn tawaqonakas vacacionanwa ukham servipjjaraki), jan ukajj Tatitun Cenap amtaski ukhaw (marzo ukat abril) phajjsinakan precursor auxiliarat servipjje, jan ukajj superintendente de circuito jilatajj visitki uka phajjsiw precursor auxiliarat servipjjaraki. Uka phajjsinakanjja precursor auxiliarat servisajj jukʼa horanakakwa maynejj informaspa. Jumatï taqe kunan qʼom sarnaqañatak chʼamachassta, precursor auxiliarjamas horanak mä phajjsisa jan ukajj jukʼamp phajjsinakas phoqañ puedsta ukhajja, ancianonakaruw precursor auxiliarat serviñatakejj mä solicitud mayisma, jupanakajj taqe chuymaw uk churapjjätam.

¹³ ¿Precursor regularat serviñatakejj kuna mayitanakampis maynejj phoqañapa? Yateqaskayaw sarnaqañapa, mä sojjta phajjsi bautisatäñapawa, maranjja qhawqtï predicapjjañapäki ukarjamaw horanak phoqañaparaki. Precursor regularanakajj congregacionan wal yanaptʼapjje, taqe chuym predicasas kusisit predicañatakiw mayninakar yanaptʼapjje, precursorat servipjjañapatakis chʼamañchtʼapjjarakiwa.

¹⁴ Yaqhep precursor regularanakajja, suma prediktʼirïpjjatapat precursor especialat uttʼayatäpjjarakiwa. Awisajj mä qhawqha tiempotakikiw uka asignación katoqapjje. Precursor especialanakajja, kawkjarutï sucursalajj khitkani ukar sarañatakejj dispuestokïpjjañapawa. Jilpachajj jaya lugaranakaruw jupanakar khitasi, ukhamat mä machaq congregacionajj uttʼayasiñapataki. Yaqheparusti kawkïr congregacionanakantï yanaptʼajj munaski ukaruw khitasiraki, ukhamat congregacionankir taqpach territorio predicañataki. Ancianöpki ukanakat yaqheparojja, jiskʼa congregacionanakaruw khitasiraki (uka congregacionanakanjja inas predicañ toqen jan añcha yanaptʼa munapkchiti). Precursor especialanakarojja, mä jukʼa qollqew churasi.

MISIONEROT SERVIÑA

¹⁵ Comité de Servicio del Cuerpo Gobernante taypinkirinakaw misionerot serviñatak jilat kullakanakar uttʼayapjje. Jupanakat jilapartejj Escuela para Evangelizadores del Reino sat escuelaruw sarapjje. Sucursalajja kawkjanakantï walja jaqenakajj utjki uka cheqanakaruw jupanakar asigni. Uka jilat kullakanakajj congregacionarojj walpun yanaptʼapjje, congregacionan nayrar sartañapatakisa jukʼamp sum predicasiñapatakis yanaptʼapjjarakiwa. Jupanakarojj jakañatak mä utampi mä jukʼa qollqempiw churasi.

SUPERINTENDENTE DE CIRCUITOT SERVIÑA

¹⁶ Cuerpo Gobernantejj mä superintendente de circuitor janïr uttʼayki ukhajja, uka jilatajj wakichtʼatäñapawa, superintendente de circuito sustitutjamas experiencianïñaparakiwa. ¿Kunsa ukatakejj maynejj lurañapa? Taqe chuyma predikiri, Bibliat yatjjatiri, suma yatichiri, discursonak sum arstʼir jilatäñapawa. Jakäwipanjja espíritu santon achuparjam sarnaqatapaw amuyasiñapa. Suma amuytʼasiri, jan kunans jiljiri ukhamäñaparakiwa. Predicañajj wal gustañapa, jilat kullakanakarus wal munasiñaparaki. Esposapajj yateqaskayaw sarnaqañapa, mayninakarojj sum uñjañapa, suma prediktʼirïñaparakiwa. Jehová Diosarojj wali respetompiw uñjañapa, esposoparus ukhamaraki. Janiw esposopan sutipjjarojj kuns parlañapäkiti, ni jupakis parlañan nayrankañapäkiti. Superintendente de circuitosa esposapasa jan tiemponiw Diosar servipjje, ukatwa kʼumaräpjjañapajj wakisi. Khititï superintendentet serviñ munki ukajja, janiw mä solicitud phoqantañapäkiti, jan ukasti ukham serviñ munatapjja superintendente de circuito jilataruw yatiyañapa, jupaw kunsa lurañapa uk saskani.

ESCUELAS BÍBLICAS

¹⁷ Escuela para Evangelizadores del Reino. Uka escuelarojja solteranaka, solteronaka ukat casado chacha warminakaw sarapjjaspa, jupanakarojj congregacionanakar Diosar serviñan chʼamañchtʼañataki ukhamarak kawkjantï yatiyirinakajj munaski uka cheqanakar sarapjjañapatakiw wakichtʼasi. Jilapartejja uka escuelat graduasipki ukanakarojj precursor regularat servipjjañapatakiw pachpa markapar khitasi, ukampis yaqhep jilat kullakanakarojja yaqha asignacionan servipjjañapatakiw pachpa markaparu jan ukajj yaqha markar khitasi. Yaqhepanakarojja mä qhawqha tiempo precursor especialat servipjjañapatakiw uttʼayasi, yaqhepanakarusti walja tiempo precursor especialat servipjjañapatakiw uttʼayasiraki. Uka escuelar sarañ munirinakajja, asamblea regionalanakan mä tantachäwejj apaski ukaruw sarapjjaspa, ukhamat kuna mayitanakampis phoqapjjañapa uk yatiñataki.

¹⁸ Escuela Bíblica de Galaad. Uka escuelar sarañatakejja, Comité de Sucursalaw sapürunjam Diosar servipki uka solteronakaru, solteranakaru ukhamarak matrimonionakar mä solicitud churi. Jupanakajj inglés arwa yatipjjañapa, ukhamarus jilat kullakanakapar serviñ munapjjatapwa uñachtʼayapjjañapa. Ukatjja Biblian mayitanakapsa Diosan markapan mayitanakapsa, taqe chuymaw jilat kullakanakar yatichañ munapjjañapa, ukarjam sarnaqapjjañapatakis wal yanaptʼañ munapjjañaparaki. Uka escuelar saririnakajj congregacionanakansa sucursalanakansa wal yanaptʼapjjaspa. Graduatäpki ukanakarojj pachpa markapana jan ukajj yaqha markan servipjjañapatakiw invittʼasispa.

BETEL

¹⁹ Betel sutejja, “Diosan Utapa” sañwa muni. Uka suti apañapajj wali khusapuniwa, kuna laykutejj ukanwa predicacionar yanaptʼañatakejj jilat kullakanakajj wal trabajipjje, Bibliat apstʼat qellqatanakasa ukanwa traducisi, imprimisi ukat congregacionanakar apayasiraki. Cuerpo Gobernantejj uka jilat kullakanakan luratanakap wali valoranitwa uñji. Walja traductoranakajja, kuna arurutï traducipki, uka aru parlir jaqenakas utjkaraki uka cheqanwa jakasipjje. Ukhamatwa kunjamsa jaqenakajj parlapjje uk sapa kuti istʼapjje, traducit qellqatanakajj entiendisiskiti janicha uksa amuyapjjarakiwa.

²⁰ Betelarojja jilapartejj bautisatäpki, kʼumaräpkaraki uka wayna jilatanakaruw invittʼasi, kuna laykutejj ukan trabajiñatakejj chʼamaw munasi. Betelan serviñ munstan ukhajja, congregacionasankir ancianonakampiw parltʼsna, ukhamat kun lurañas wakisispa uk yatiñataki.

CONSTRUCCIÓN

²¹ Diosar adorañatak utanak lurañajja, Jehová Diosar serviñampi sasiwa, nayra tiempon Salomonajj mä templo lurkäna ukajj ukhamarakiw Diosar serviñamp sasïna (1 Rey. 8:13-18). Walja jilat kullakanakaw construccionan yanaptʼañatakejj tiempo apstʼasipjje, kunanakapatï utjki ukanakampis taqe chuymaw yanaptʼapjjaraki.

²² Jumatï bautisatästa construccionan yanaptʼañ puediraksta ukhajja, congregacionamankir ancianonakampiw parltʼasma. Construccionan encargatäpki uka jilatanakajja, yanaptʼañ munatamat wal kusisipjjani, jupanakaw mä kun sum lurtʼañatakis yanaptʼapjjarakïtam. Mayitanakamp phoqapki uka jilatanakat yaqhepajja, construccionan yanaptʼañatakejj yaqha markanakar kunaw sarapjjaspa.

²³ Kunayman toqenakatwa construccionan yanaptʼasispa. Yateqaskay sarnaqeri ukhamarak construcción toqet suma yatjjattʼata jilatanakajja, jakasipki uka cheqan voluntarios locales de diseño y construcción ukhamwa servipjjaspa. Yaqhepasti jaya lugaranakanwa mä qhawqha tiempo servipjjarakispa. Jupanakajj voluntarios de construcción ukham uñtʼatäpjjewa, sucursalaw jupanakarojj pä semanataki jan ukajj kimsa phajjsinakatak invittʼaspa. Jaya tiempotak invitatäpki ukanakajj siervos de construcción sasin uñtʼatäpjjewa, jupanakajj yaqha markar khitatäjjapjje ukhajja, siervos de construcción expatriados sasin uñtʼatäjjapjjewa. Voluntarionakampi siervos de construcción ukanakampiw Grupos de Construcción ukan trabajipjje. Jupanakarojja voluntarios locales de diseño y construcción ukankir jilat kullakanakampi ukhamarak salonapajj luraski uka congregacionanakankir jilat kullakanakampiw yanaptʼapjje. Mä grupo de construccionajj trabajo tukuyjje ukhajja, sucursalajj mayki ukarjamaw yaqha proyector sarapjje.

¿DIOSAR JUKʼAMP SERVIÑATAKEJJ KUNSA LURASMA?

²⁴ Taqpach cristianonakaw Jehová Diosar wiñayatak serviñ muntanjja. Uka amtas phoqañatakejja, Diosan markapar jukʼamp yanaptʼañatakiw chʼamachasiñasa. ¿Kunatsa ukham sistanjja? Kuna laykutejj ukhamatwa tiemposampisa, chʼamasampis Diosan markapar sum yanaptʼsna. Ukham lurasajj kunatï wali wakiskirïki ukampiw phoqañäni, Diosar serviñansa jiltarakiñäniwa (1 Cor. 9:26; Filip. 1:10; 1 Tim. 4:15, 16).

²⁵ Apóstol Pablot yateqasipjjañäni, jupajj qhawqtï puedkäna ukarjamaw Diosar servïna (1 Cor. 11:1). Jupajj akham sasaw Corinto markankirinakar säna: “Jukʼamp trabajiñatak mä jachʼa punkuw nayatakejj llawirasi” sasa. Jiwasatakejj mä jachʼa punksa Jehová Diosajj jistʼarkaspa ukhamarakiwa, ukhamat jilat kullakanakasamp chik predicañasataki. Ukham luratasatjja Pabljamarakiw jan walinakan uñjastanjja, cheqas ‘waljaniw jiwas contra saytʼapjje’ (1 Cor. 16:9). Ukatwa Pablojj jupa pachp wal chʼamachasïna, akham sarakïnwa: “Cuerpojarojj nuwjtwa, mä esclavorjamaw apnaqarakta” sasa (1 Cor. 9:24-27). ¿Jiwasajj ukhamarakti lursna?

²⁶ Jehová Diosar jukʼamp servipjjañapatakiw jiwasajj mayninakar chʼamañchtʼtanjja. Diosar sapürunjam servipki uka jilat kullakanakat jilapartejja, wawäpkäna ukhatpachaw Diosar jukʼamp serviñ amtapjjäna, jupanakarojj papit mamitapa jan ukajj yaqha jilat kullakaw ukham lurapjjañapatak chʼamañchtʼapjjpachäna. Diosar jukʼamp serviñ amtapjjatapatjja, kusisitaw Diosar servisajj jakasipjje, janipuniw ukham amtapjjatapat arrepentisipkiti (Prov. 10:22). Ukampis akanak lurañwa amtaraksna: sapa semanaw predikir mistsna, estudionak qalltaña ukat sarayañwa amtsna, jan ukajj tantachäwinakatak sumwa wakichtʼassna. Kun lurañsay amtchiñänejja, jiwasatakejj Diosat jan jitheqtaña ukhamarak predicañaw jukʼamp wakiskirejja. Ukhamtï lurañänejja Jehová Diosaruw jachʼañchañäni, jutïrinsa wiñayatakiw Diosar serviñäni (Luc. 13:24; 1 Tim. 4:7b, 8).