Bibliat yatjjatasaw nayra jakäwinakapjja jaytawayapjje
KAWKÏR religionantï awk taykapajj uywawayapkäna ukar kuttʼañatakejja, ¿kunas mä tawaqor yanaptʼäna? Kuntï jupa pachpajj siski uk liytʼañäni.
“Jichhapï wali kusisitäjjtjja” (LISA ANDRÉ)
NASÏWIP MARA: 1986
MARKA: LUXEMBURGO
NAYRA JAKÄWIPA: KUTKATASIR TAWAQO
NAYRA JAKÄWIJA: Luxemburgo marka jakʼan Bertrange sat cheqan jilsuwayta, uka cheqajj wali qʼoma, seguro ukat janiw qollqet pistʼañas utjkänti. Awk taykajajj Jehová Diosan Qhanañchiripäpjjewa, ukat phisqa wawanakapat nayaw sullkïritjja, jiskʼasipkayäta ukhatpachaw cristianjam sarnaqañatak yatichapjjetu.
Ukampisa, qʼajjo tawaqökayäta ukhaw Jehová Diosan Qhanañchirinakapan yatichäwinakapat pächasiñ qalltawayta. Ukham pächasitajat janiw yanap thaqkayätti, ukatwa iyawsäwijan jukʼat jukʼat aynachtʼawayta. Awk taykajajj kunaymanitwa cheqa thakir irpañatak yanaptʼañ munapjjetäna, ukampis nayajj janiw munkayätti. Jamasatwa jan respetasir wayn tawaqonakampi mistuñ qalltawayta. Jan khitin kamsataw jakañ munayäta ukat jupanakajj ukhams jakasipkaspa ukhamwa amuyayäta. Fiestat fiestwa sarapjjerïta, khitimpis ikintasipjjakirïtwa ukat alcoholampisa droganakampis qolljasipjjarakirïtwa. Qalltanjja, jupanakampïñajj wali sumjamänwa, ukat wali kusisitas jakapkaspa ukhamwa amuyayäta.
Ukampisa, ukham jakasajj janipuniw kusisitäkayätti, ni sumans jikjjataskayätti, kunatï pasaskäna ukanakat janiw amigonakajajj llakisipkänti. Ukampisa, kuna jan waltʼäwinakatï akapachan utjki ukanakat wal llakisiyäta. Ukat sapürutjamaw llakimp aynachtʼat jikjjatasiyäta.
KUNJAMSA BIBLIAJJ YANAPTʼAWAYITU: Mä urojja, mamajaw wali llakitätaj amuyäna, ukatwa Bibliat yatjjatañajätak chʼamañchtʼitu. Kuntï Bibliajj yatichki uk sum yatjjatam ukat ukarjamati jakäta janicha uk amtjjäta sasin situ, ukhajj 17 maranïyätwa. Ukham taqe chuyma parltʼatapatwa wasitat sum amuykiptʼasta. Ukat Caroline kullakajampi ukat Akif chachapampi Bibliat yateqañatakiw iyawsta. Jupajj jiskʼatpach janiw Jehová Diosan Qhanañchiripjam jilsuwaykataynati, jan ukasti jilïrëjjäna ukhaw Diosar uñtʼatayna. Jupampiw qhan parltʼirista sasin amuyayäta, ukajj wali askipunïnwa nätakejja.
Janiw Jehová Diosan Qhanañchiripjam sarnaqkayätti uk amuyasiskayätwa, ukampis kuntï lurkayäta ukajj närukiw llakisiypachïtu sasaw amuyayäta. Ukham sarnaqatajampejj Diosan chuymapwa ustʼayatäta uk Bibliat yatjjatkasajj amuyawayta (Salmo 78:40, 41; Proverbios 27:11). Ukat yaqhanakarus ukhamarakiw chuym ustʼayatätjja.
Bibliat yatjjatasajja, Diosan Arupätap jukʼamp sumwa amuyjjayäta. Ukajj ukhamapunïtapjja, Biblian jikjjataski uka walja profecianakapaw kunja muspharkañsa phoqasiwayi uk qhan uñachtʼayi. Ukanak yatjjatañaw kunanakattï nayrajj pächaskayäta ukanak sum amuyañ yanaptʼawayitu.
Bibliat yatjjatañ qalltawaykta ukhat mä marajjänwa, ukhaw awk taykajamp jilajar visitir sarapjjta, jupajj Jehová Diosan Qhanañchirinakapan Alemania markan utjki uka sucursalan yanaptʼäna. Jupajj wali kusisitaw jikjjatasïna, uk uñjasaw wal kusisirakiyäta. ¡Ukham kusisit jakasiñ munayäta! Ukat yaqha yanaptʼirinakar uñtʼasajj ukhamarakiw muspharta. Janiw kawkïr jan wali wayn tawaqonakampitï nayrajj mistkayäta ukhamäpkänti. Mä qhawqha tiempotjja, Jehová Diosaruw mayista ukat jiwañajkamaw servïma sasaw sawayta. Diosar katuyasisin 19 maraniw bautisasiwayta.
WALJA BENDICIONANAKWA KATOQAWAYTA: Jichhajj kusisitaw jakasta. Ukat kusisitarakiw yaqhanakarojj Bibliat parlta, Diosan sutipsa ukat kuna amtanakanis jutïritakejj uk uñtʼañsa yanaptʼaraktwa. Ukat familiajarus janiw llakisiyjjti.
Jan walinakwa nayrajj lurawayta, ukanakat jan añch lupʼiñatakiw chʼamachasta. Jehová Diosajj perdonasiriwa, qhawqsa munasitu ukanakatwa lupʼta. Kuntï Proverbios 10:22 qellqatan siski ukhamarakwa taqe chuym sista: “[Jehová] Tatitun bendicionapawa qamiriptayi; janiw kuna llakisiñsa ukampi chikajj apayankiti”.
[29 janan qhanañchäwipa]
“Fiestat fiestwa sarapjjerïta, khitimpis ikintasipjjakirïtwa ukat alcoholampisa droganakampis qolljasipjjarakirïtwa”
[30 janan qhanañchäwipa]
“Jan walinakwa nayrajj lurawayta, ukampis ukanakat jan añch lupʼiñatakiw chʼamachasiskta”