Kunsa liytʼirinakajj yatiñ munapjje

¿Jiskʼa wawanakarojj bautisañäspati?

▪ “John sat jiskʼa sullkajajj limbonkaskatap yatisajj walpun llakisiyäta” sasaw Victoriajj säna. ¿Kunatsa wal llakispachäña? “Johnajj janïr bautisaskipanwa jiwawayjje ukat wiñayatakiw limbonkani sasaw mä tatakurajj situ” sasaw Victoriajj saraki. Ukatwa wal llakisïna. Ukampis ¿jan bautisat jiwapki uka wawanakajj wiñayatakiw limbonkapjje sasati Bibliajj yatichi?

Cristianonakajj bautisasipjjañapaw sasaw Bibliajj yatichi. Jesusajj arkirinakapar akham sänwa: ‘Taqe akapachankir jaqenakar yatiyir sarapjjam, nayar arkir tukuyapjjam; bautisapjjam Dios Awkina, Yoqana, qollan ajayun sutiparu. Yatichapjjarakim taqe kuntejj nayajj jumanakar yatichapksma ukanak phoqhaña’ sasa (Mateo 28:19, 20). Uka qellqatarjamajja, maynin bautisatäñapatakejj Jesusan arkiripäñapawa, mä arunjja, Jesusaruw uñtʼañapa ukat ukarjamaw sarnaqañapa. Mä jiskʼa wawajj janiw uk lurkaspati.

Ukhamäkchisa, Jesusan arunakaparjamajja wawanakas bautisatäpjjañapawa sasaw yaqhepajj sapjje. “Taqeniw bautisatäpjjañapa wawanakampacha, [...] Janitï bautisatäpkanejja, janiw juchanakapat perdón jikjjatapkaniti ukat wiñayatakiw limbor katuyatäpjjani” sasaw Richard P. Bucher luterano iglesiankir pastorajj säna. Ukham amuyunakajja, Jesusan yatichäwinakap contrawa. Uk kimsa toqet amuytʼañäni.

Nayrïri, jiskʼa wawanakarojj bautisasiñapawa sasin janipuniw Jesusajj yatichkänti. ¿Kunatsa uk yatiñajj wali wakisirejja? Kunanakas Diosar serviñatakejj wakisi ukwa Jesusajj yatichäna. Ukat kutin kutiniw uka yatichäwinak sum amuyapjjañapatak yatichäna (Mateo 24:42; 25:13; Marcos 9:34-37; 10:35-45). Ukampisa, ¿kunatsa jiskʼa wawanakajj bautisatäpjjañapaw sasajj ni mä kutis siskpachäna? ¿Armaspachänti? Janiwa. Jiskʼa wawanakar bautisañatï wali wakiskirïsapänjja, jupajj yatichasapänwa.

Payïri, jiwatanakajj tʼaqhesipjjew sasin janipuniw Jesusajj yatichkänti. Jan ukasti, Eclesiastés 9:5 qellqataruw taqe chuyma atinisïna, ukan akham siwa: “Khitinakatejj jakasipki ukanakajja yatisipjjewa jiwjjañanakapa, ukampis jiwatanakajj janiw kunsa yatipkiti” sasa. Jiwatanakajj purgatoriona, limbona, infiernona jan ukajj yaqha ukham cheqanakan jan tʼaqhesipjjatap Jesusajj sum yatïna. Ukatwa jiwatanakajj janiw kunsa yatipkiti ikisipkaspas ukhamawa sasin yatichäna (Juan 11:1-14).

Kimsïri, “taqe jiwatanakasti [...] jaktapjjaniwa” sasaw Jesusajj yatichäna (Juan 5:28, 29). Khitinakatï jan bautisatäkasin jiwapki jupanakas uka taypinkarakiniwa. Jaktanipkani ukhajja, Diosan kamachinakapat yateqapjjañapatakis tiempow churatäni ukat wiñayatakiw paraisor tukuyat Oraqen jakasipjjani (Salmo 37:29).a

Ukhamasti, jiskʼa wawanakajj bautisatäpjjañapawa sasin janiw Bibliajj kawkhans yatichkiti.

[Qhanañchäwi]