Taman yatxatañataki revistax mayjtʼayatäniwa
Kunjamtï amuyaskixa, Yatiyañataki sat aka revistax mä jukʼa mayjtʼayatäxiwa, ukhamat jukʼamp sumäñapataki. Ukat Diosan arunakapat jukʼamp sum yatxatañatakiw yanaptʼistani (Sal. 1:2; 119:97).
Yatiyañataki revistax niya pusi maranakaw payar jaljtayatäxi. Mayax jaqinakar yatiyir sarañatakiwa, maynisti jiwasataki ukat Bibliat yatxatañ munirinakataki wakichtʼatarakiwa.
Jehová Diosar walja maranak serviri mä jilatax akham sasaw qillqanitayna: “¡Chiqa yatichäwinakax wali sumpum qhanañchasi! sasaw Yatiyañataki revistat taman yatxatañataki ajllitäki uk liytʼasax sirïta. Biblian yatichäwinakap amuytʼañax chʼamäki uk sum qhanañchasitapax chuymarupuniw purtʼitu. Yatiyañataki revistax mä suma regalopuniwa, walpun yuspärapxsma” sasa. Ukat yaqha jilatax akham sasaw qillqarakitayna: “Bibliajampi yanaptʼayasisin uka revistat yatxatañ walpun munta” sasa. ¿Janit jumax ukham amuykarakta?
Yatiyañataki revistax 1879 maratwa lurasiñ qalltawayi. Jehová Diosan bendicionapampi ukat qullan ajayun yanaptʼapampikix jichhakamas lurasiskakiwa (Zac. 4:6). Qalltaskän ukhat jichhakamax 133 maranakäxiwa, ukat walja kutiw tapapax cambiasiwayi. Ukat 2012 maranxa, kunjamsa jaqinakar yatiytan ukaw tapan uñachtʼayasini, colorani suma fotonakaw utjani. Ukat Jehová Diosan Reinopat taqi chuyma yatiyañax wali wakiskiritapwa amtayarakistani (Hech. 28:23). Payïr jananxa, uka fotox kawkit apsutasa ukaw mä jukʼa qhanañchtʼasini. Ukasti, Jehová Diosan Qhanañchirinakapax Diosan Reinopat ‘aka uraqpachan’ kunjamsa yatiyasipki ukwa sapa phaxsix aka maran amtayistani (Mat. 24:14).
Ukampis janiw ukak mayjtʼkaniti. Yaqha jananakas mayjtʼarakiniwa, sañäni: Taman yatxatañataki yatichäwin amtañataki jisktʼanakani recuadrox qalltankxaniwa. Ukhamatwa kuna tuqinakatsa uka yatichäwin qhanañchasiski ukxa qalltatpach amuyäta ukat Yatiyañataki revistat taman yatxatañataki wakichtʼaskäta ukhasa, qhanañchäwinakap jikxatañatakis yanaptʼarakïtamwa. Ukatxa jananakana ukat parrafonakan numeronakapax jachʼpachäniwa.
Ukatxa, aka pä yatichäwinakaw ukjarakini: 1) “¿Kunanakas imatäski?”. Kunjamtï aka pachpa qillqatan qhanañchaskixa, Jehová Diosan Qhanañchirinakapan sarnaqäwipatxa kuna sumanakas utji ukanak amtañatakiwa. 2) “Taqi chuymaw lurapxäna” siski uka yatichäwinxa, kawkintï Diosan Reinop yatiyirinakax wal munaski uka chiqanakar sarasax kunja kusisitas walja jilat kullakanakax jikxatasipxi ukanakaw qhanañchtʼasirakini.
Diosan Arup yatxatkäta ukhax aka revistax jumatak mä suma yanaptʼañapwa munapxta.
Qillqirinaka
[3 janan fotopa]
1879
[3 janan fotopa]
1895
[3 janan fotopa]
1931
[3 janan fotopa]
1950
[3 janan fotopa]
1974
[3 janan fotopa]
2008