La Atalaya sat revistax kunjamäxanisa
1 Aka mara qalltanxa, kusiskañ wali suma yatiyäwiw taqi tamanakan yatiyasïna: 2008 maran enero phaxsitxa, La Atalaya sat revistaxa pä kastaw lurasxani sasa, mayax taqinitakïniwa, maynïristi jiwasanakatakikiw lurasini sasaw yatiyasïna. Ukat inas akham jisktʼasstan: “¿Kunanakas mayj mayjäpachäni? ¿Ukham paya lurañax kunatsa jukʼampi askixa? ¿Kuna machaq wakichäwinakas uka revistanakan utjani?” sasa.
2 Kunanakas mayj mayjänixa. Phaxsi qallta mistkani uka revistaxa taqinitaki sas uñtʼatäniwa, ukatxa taqinitakjamaw qillqasini. Chika phaxsin mistkani uka revistasti taman yatxatañataki sas uñtʼatarakïniwa, ukampis janiw uka revistxa yatiyir sarkasax jaqinakar churkañäniti. Uka revistanxa phaxspachatakiw taman yatxatañapataki wakichäwinakax utjani, ukatxa, bautisat cristianonakataki yaqha wakichäwinakampiw utjarakini. Taqinitaki sat revista liytʼañax jiwasatakix wali askïniwa, ukampis Bibliar respetomp uñjiri Diosan jan Qhanañchiripäpkisa uka jaqinakar yanaptʼañatakiw lurasini. Ukampis ¡Despertad! sat revistaxa taqinitakiw lurasiskakini, Diosar jan iyawsirinakaru ukhamaraki Cristor jan iyawsiri yaqha kʼari yupaychäwinakankirinakar yanaptʼañataki.
3 Kunatsa jukʼampi askïnixa. Amuytʼañataki, taman yatxatañataki sat revistanxa janiw “precursor” arux kamsañs muni uk taqin amuytʼapxañapataki qhanañchañax wakisxaniti. Ukhamarus Jehová Diosan Qhanañchirinakapataki ukhamaraki khitinakatï sum yatxatasipki ukanakatakjamaw wakichasini. ¿Maynïr revistax kunjamänisa? Diosan jan Qhanañchirinakapäpki uka jaqinakatakjamaw wakichasini, ukhamaraki jupanakansa amuytʼkañ qillqatarakïniwa, jupanakatakis jiwasanakatakis qalltat tukuykam liysuñax wali askipunïniwa. Ukhamasti sapa phaxsixay La Atalaya, ¡Despertad! sat paypach revistanakampi yatiychiñänixa, pusi semanpachaw uka revistanakampix kunjamas parltʼaña ukxa yatsuñäni.
4 Kuna machaq wakichäwinakampis utjani. Taqinitaki sata revistanxa walja machaq wakichäwinakaw utjani. Uka revistan qillqatanakatxa yaqhipax Biblian qallta yatichäwinakapatwa sum amuytʼkañ parlani. Ukatxa Bibliat apstʼat familiataki iwxtʼanakasa utjarakiniwa. Ukhamarusa, wayn tawaqunakan Bibliat yatxatapxañapatak wakichäwinakaw utjarakini. Ukatxa, kunjamsa Jehová Diosar jukʼampi uñtʼsna uka tuqit Bibliat apstʼata qillqataw sapa revistan utjarakini.
5 Jehová Diosaruw akham machaq wakiyäwinakar bendiciñapatakix mayipxta. La Atalaya ukat ¡Despertad! sat revistanakaxa taqi aski jaqinakaru suma yatiyäwinaka puriyaspa ukwa munapxta (Mat. 10:11).