‘Kusisiñaniw khititix yantʼanak aguantki ukaxa’
1 Taqi cristianonakaw jan waltʼäwinak aguantañasa, kunattix awisax qullqits pistʼtan, usutasa, yantʼanakans uñjastan, ukat jaqis uñisipxarakistuwa (2 Tim. 3:12). Taqi uka jan waltʼäwinakampiw Supayax chʼam laqʼjtayañ munistu, ukat yaqhanakar Diosat yatiyañassa janiw munkiti, ukat Diosatsa apaqañ munistu (Job 1:9-11). Ukhamasti, ¿kunatsa yantʼanak aguantirix kusisiñaniw sasax sistanxa? (2 Ped. 2:9.)
2 Jan waltʼäwinakatak wakichasipxañäni. Jehová Diosaw kunatï chiqäki uk Arupan yatichistu, Jesusan yatichäwinakapampi sarnaqäwinakapampiw ukan qillqata. Jiwasatï ukanakar istʼañäni ukat ukarjam sarnaqañäni ukhaxa, jan waltʼäwinak aguantañasatakiw chʼamañchistani (Luc. 6:47-49). Ukampis yaqha yanaptʼanakaw utjarakistu: jilat kullakanakasa, tantachäwinaka, ukat amuyasiri chiqapa uywatan Bibliat apstʼat qillqatanakapa. Ukatxa Diosax yaqha yanaptʼampwa churistu, juparux kunapachas maytʼasiskaksnawa (Mat. 6:13).
3 Jehová Diosax mä suytʼäwi churarakistu. Jutïritak arsutanakapar taqi chuyma iyawstan ukhaxa, ukanak suytʼañax “sum katxäsistu ukhamarak almasa uñjaraki, kunjämatix anclax mä barcorux katxäsixa ukhama” (Heb. 6:19). Bibliax qillqaskäna ukhaxa, barconakax janipuniw jan anclanix sarapxirïkänti, jan kun pasïrjamäkipansa apasipxapunirïnwa. May thaytʼanïna ukhaxa, anclanakapwa umar jaquntapxirïna jan qarqar jaqkatayasiñataki. Niya ukhamjamarakiwa akapachan jan waltʼäwinakan uñjaskañäni ukhaxa, Diosan arsutanakapar suytʼatasaw yanaptʼistani. Akatjamatakwa jan waltʼäwinakan uñjassna. Listranxa Pablompi Bernabeyampix ukhaman uñjasipxäna. Uka markan yatiyañ qalltapkän ukhaxa jaqix sum istʼäna, ukampis jan istʼañ munir judionakax yaqha markat purinipxäna ukhaxa janiw istʼañ munxapxänti (Hech. 14:8-19).
4 Aguantasax kusisitätanwa. Jan istʼkatas yatiyaskaktan ukhaxa chuymasax wali kusisitawa, kunattix Cristo layku tʼaqhisirirjam uñjatäñaxa kusiskañawa (Hech. 5:40, 41). Jan walinakar saykatañaxa, altʼat chuymanïña, jaysasirïña, ukat aguantañ yanaptʼistu (Deu. 8:16; Heb. 5:8; Sant. 1:2, 3). Ukatxa, Jehová Diosaru arsutanakaparu atinisiñasatakiw yanaptʼistu, ukat jupar imantasiñasatakiw yanaptʼarakistu (Pro. 18:10).
5 Jan waltʼäwinakax janiw wiñayäkaniti ukxa yattanwa (2 Cor. 4:17, 18). Ukhamanakan uñjasisawa Jehová Diosarux qhawqsa munastan uk uñachtʼaytanxa. Aguantañäni ukhaxa, Supayan kʼarïtapwa uñachtʼayañäni. Ukhamasti, jan qaripxañäniti. ‘Kusisiñaniwa khititix yantʼanakxa llampʼu chuymampi katuqki ukaxa. Uka yantʼar atipjas misturisti churäwi katuqani, mä coronar uñtata jakañ’ katuqani (Sant. 1:12).