Wawanakar yatichañataki

‘Jupasti Jehová Diosampiw sarnaqäna’

NAYAT janiw jitheqtitätati sasin awk taykamajj sirïtamti?a... Inas walja jaqenak utjipan ukham sirïstam. Jan kuna jan waltʼäwir puriñamatakiw ukham sapjjtamjja. Jichhajj Ezequiasat parltʼañäni, ‘jupajj Jehová Diosat janiw saraqkänti’ sasaw Bibliajj qhanañchi. Mä arunjja, Jehová Diosampipuniw sarnaqäna. Kunsa jupat yateqassna uk uñjañäni.

Wawakasinjja Ezequiasajj wal tʼaqesïna. Awkipajj Acaz satänwa, Judá marka apnaqarakïnwa, ukampis Jehová Diosat jitheqtasajja, kʼari diosanakaruw yupaychjjäna. Ukat mä diosapan askit uñjatäñatakejja jan walpunwa luräna. Ezequiasan jilaparuw mä sacrificiot loqtäna.

Awkipajj jan walinaks luraskakchïnjja, jupajj janiw Jehová Diosat jitheqtkänti, jan ukasti istʼänwa. ¿Jupatakejj chamapachänti?... Jïsa, ukampis Jehová Diosat janipuniw jitheqtkänti. ¿Kunas jan jitheqtañatakejj yanaptʼpachäna? Ukat jiwasajj kunjams ukham luraraksna.

Ezequiasajj Jehová Diosat jan jitheqtapkäna ukanakat yateqäsina. Maynïrejj Davitänwa, jupajj janïr Ezequías naskipanwa jakatayna, ukat uka urunakkamajj niya patak jila maranakaw pasjjatayna. Jupajj Diosan arunakap liytʼasaw Davitat yateqasïna. Amuytʼañataki, Davitajj akham sasaw mä kutejj qellqatayna: “Awkejjas, taykajjas apanukchitanejja”, Jehová Diosaw “nayarojj uywaskitani” sasa.

Amuytati ¿kunas Jehová Diosar istʼañatakejj Davitar yanaptʼäna?... Diosaruw confiyasïna. Ukat “nayatï Jehová Diosar taqe chuym istʼä ukhajja, Jupajj yanaptʼitaniwa” sasaw Davitajj wal confiyasïna. Uk yatjjatañaw Jehová Diosar istʼañataki ukat jan jitheqtañatakejj Ezequiasar yanaptʼpachäna. Jumatï ukham luräta ukhajja Jehová Diosajj yanaptʼarakïtamwa.

Awk taykamatï Jehová Diosar jan istʼkchi ukhajja, ¿kamachasmasa?... Awk taykarojj istʼañapuniwa, ukwa Jehová Diosajj muni. Ukhamajja jumajj awk taykamarojj istʼañamapuniwa. Ukampis Awk taykamatï Diosatak jan walïki ukanak lurañ mayïtam ukhajja, kunatsa jan istʼkäta ukjja uka ratpachaw qhanañchañama. Janipuniw kʼarisiñäkiti, lunthatasiñakisa ukat kunatï Diosatak jan walïki uksa janiw lurañamäkiti, uk jan armasimti. ¡Jehová Diosarupuniw istʼañasa!

Biblian walja wakiskir sarnaqäwinak ­utjki ukanakatwa yateqasiraksna. Ezequiasajj janiw Davidatak yateqaskänti, jan ukasti Jotam sat achachilapatwa yateqasirakïna. Jiwasajj ukhamarakiw Biblia liyisajj yateqasiraksna. ¿Yaqha sarnaqäwit amtastati?...

Biblia liytʼasajja, Ezequías, David, Jotam ukat yaqhanakas kunjams pantjasipjjatayna uk uñjarakïta. Jupanakajj Jehová Diosar munasipjjatapatjja juchanakap uñtʼasipjjänwa ukat kunatï askïki uk lurañatakiw chʼamachasipjjäna. Jesusakiw jan panjasir jaqenjja. Ukatwa jupat jukʼamp yatjjatañasa ukat yateqasiñatak chʼamachasiñasa.

Bibliat liytʼañataki

2 Reyes 18:6; 2 Crónicas 28:1-3

Salmo 27:10; Efesios 6:1; Colosenses 3:20

2 Crónicas 27:1, 2; 1 Pedro 2:21

[Qhanañchäwi]