‘Jukʼa yatiñan jaqenakaruw mä arunjja, wawanakaruw yatiytajja’

¿Kunatï Diosat cheqäki uk yatiñ munasmati: khitisa, kunas munañapajja, kuns muni ukat kuns jan munkaraki taqe ukanakjja? Jehová Diosajj Biblia toqew taqe ukanak yatiyistu. Ukampis janiw taqenipunejj Biblia liyipkaspati ni amuyapkarakispasa. ¿Kunatsa? kunattejj uk amuyañajja, mä suma churäwiwa; janiw taqe jaqes uk katoqkaspati. Jesusajj uka toqet kamsänsa uk jichhajj uñjañäni (Mateo 11:25 liytʼäta).

Uka tʼaqajj akham sasaw qallti: “Ukapachajj Jesusajj sarakïnwa” sasa. Amuyatajja, kunanakatï pasawaykäna uk uñjasaw parlañ qalltpachäna: Galileankir kimsa markanakan markachirinakaparuw toqenoqäna, jupanakajj milagronakap uñjasas janiw arkapkänti (Mateo 11:20-24). Amuysnatï, ¿kunjamarak milagronak lurir uñjkasas maynejj jan arkkaspasti? Cheqas jan istʼasiri qhoru jaqenakäpjjpachänwa (Mateo 13:10-15).

Biblian cheqa yatichäwinakap sum amuyañatakejja, payaw munasi: Diosan yanaptʼapa ukat suma amtamp chuym wakichaña, ukjja Jesusajj sum yatïna. Jupajj akham sänwa: “Yupaychsmawa, Awkejja, munañanirakïtawa alajjpachansa akapachansa. Jumawa yatiñkankañ imanttajja wali yatiñan jaqenakatjja; ukatsti jukʼa yatiñan jaqenakaruw [mä arunjja wawanakaruw] uñachtʼaytajja” sasa. Amuytati, Jehová Diosan cheqa yatichäwinakap sum amuytʼañajj ¿kunats mä suma churäwejja? Kunattejj Jehová Dios ‘Tatituw alajjpachansa akapachansa munañanejja’, Jupaw munañaparjam cheqa yatichäwinak khitirutï yatiyañ munki ukar yatiyaspa jan ukajj imtʼaspa; ukampejja, jan sintʼasisas munañaparjamak taqe kuns lurkaspa ukham janiw amuyañasäkiti. Ukhamajj ¿kamsañs munpacha?

Jehová Diosajj llampʼu chuymaninakaruw yanaptʼi janiw jachʼa jachʼa tukurinakarojj yanaptʼkiti (Santiago 4:6). Cheqa yatichäwinakapjja, ‘wali yatiñani, amuytʼani jaqenakatjja’ imtʼiwa. Akapachankir yatjjatat jaqenakajja, yatiñanakapar atinisisajj janis khitin yanaptʼap munapkaspa ukham amuyasipjje (1 Corintios 1:19-21). Ukampis Diosajj ‘jukʼa yatiñan jaqenakaruw mä arunjja wawanakaruw’ yatiyi, jupanakajja, yanaptʼap taqe chuyma thaqhapki ukat wawanakjam altʼat chuymanïpki ukanakawa (Mateo 18:1-4; 1 Corintios 1:26-28). Diosan yoqap Jesusajja, uka pä kasta jaqenakaruw uñtʼäna. Uka tiempon wali yatjjatata ukat jachʼa jachʼa tukur religionanak pʼeqtʼirinakajja, janiw Jesusan yatichäwinakap amuyapkänti, ukampis altʼat chuyman chawlla katurinakaw amuyapjjäna (Mateo 4:18-22; 23:1-5; Hechos 4:13). Ukampisa, wali qamiri ukat yatjjatat jaqenakatjja, yaqhepanakajj taqe chuymaw altʼat chuymanïtap uñachtʼayapjjäna ukat arkapjjarakïna (Lucas 19:1, 2, 8; Hechos 22:1-3).

Qalltan mä jisktʼajj utjkän uk amtañäni: ¿Kunatï Diosat cheqäki uk yatiñ munasmati? Ukhamächejja, ak yatiñajj wal kusisiyätamjja: Diosajj janiw jachʼa jachʼa tukuri jan ukajj yatiñan tukurinakarojj yanaptʼkiti, antisas khitinakarutï uka jaqenakajj jiskʼachapki ukaruw yanaptʼi. Jumatï Diosan arunakap suma amtampi ukat taqe chuyma yatjjatätajja, Diosajj mä jachʼa regalo churki, mä arunjja, cheqa yatichäwip amuytʼayki uka walja jaqenak taypinkarakïtawa. Ukat kunats jakasktan uksa sum amuyjjäta ukat kusisitaw jakasirakïta. Ukat jutïrinjja wiñayaw mä paraison jakasïta kunjamtï Diosajj arsuwayki ukhama (1 Timoteo 6:12, 19; 2 Pedro 3:13).a